17/07/2026
KODI MPINGO WA KRISTU NDIWO MPINGO WOKHA UMENE UDZAPULUMUTSIDWA?
Mateyu 16:18; Aefeso 1:22–23; Machitidwe 2:47
Funso limeneli lakhala likukambidwa kwa zaka zambiri. Ena amaliona ngati lokhumudwitsa, pamene ena amapewa kuliyankha. Koma monga alaliki a Uthenga Wabwino, udindo wathu si kulalikira zomwe anthu amakonda kumva, koma zimene Malemba amaphunzitsa (2 Timoteo 4:2).
Tisanayankhe funsoli, tiyenera kuchotsa kusamvetsetsana komwe kulipo. Nkhani si yakuti anthu a chipembedzo chomwe chimatchedwa Mpingo wa Kristu (Church of Christ) okha ndi amene adzapite kumwamba. Koma nkhani yake ndi yakuti, kodi mpingo umene Yesu anamanga ndiwo wokha umene uli gulu la anthu opulumutsidwa?
Yesu anati: "Pa thanthwe ili ndidzamanga mpingo wanga, ndipo zipata za Hade sizidzaugonjetsa." (Mateyu 16:18)
Onani kuti Yesu sanati, "Ndidzamanga mipingo yanga." Anati, "mpingo wanga," chifukwa pali Mpulumutsi mmodzi, chikhulupiriro chimodzi, ndi Uthenga Wabwino umodzi.
Mtumwi Paulo akutsimikizira zimenezi:
"Pali thupi limodzi..." (Aefeso 4:4)
Kodi thupi limodzi limenelo ndi chiyani?
Paulo akuyankha kuti:
"Iye ndiye mutu wa thupi, lomwe ndi mpingo." (Akolose 1:18)
Ndiponso: "Anamuika kukhala mutu wa zinthu zonse kwa mpingo, umene uli thupi lake." (Aefeso 1:22–23)
Baibulo silisiya malo a chisokonezo. Mpingo ndi thupi ndi chimodzimodzi. Ngati pali thupi limodzi, ndiye kuti pali mpingo umodzi wa Khristu.
Komanso, Aefeso 5:23 amati:. "Khristu ndiye mutu wa mpingo, ndipo ndiye Mpulumutsi wa thupi." Khristu sanatchulidwe kuti ndi Mpulumutsi wa zipembedzo zosiyanasiyana kapena mabungwe opangidwa ndi anthu. Iye ndi Mpulumutsi wa thupi lake, lomwe ndi mpingo.
Kodi munthu amalowa bwanji mu mpingo umenewu?
Machitidwe chaputala 2 limapereka yankho. Petro atalalikira ulaliki woyamba wa Uthenga Wabwino, amene anamva, anakhulupirira, analapa, ndipo anabatizidwa, analandira chikhululukiro cha machimo awo. Kenako Baibulo limati:
"Ndipo Ambuye anawonjezera ku mpingo tsiku ndi tsiku amene anali kupulumutsidwa." (Machitidwe 2:47)»
Onani kuti anthu sanangodzilembetse okha mu mpingo kapena kudzaza mafomu a umembala. Ambuye mwiniwake ndi amene anawonjezera opulumutsidwa ku mpingo wake.
Izi zikutanthauza kuti munthu aliyense wopulumutsidwa m***a mtima amakhala mumpingo wa Khristu chifukwa Ambuye ndiye amamuika mmenemo.
Kodi Khristu anayambitsa zipembedzo zosiyanasiyana (ma denomination)?
Yankho lake ndi Ayi.
Mu Yohane 17:20–21, Yesu anapemphera kuti otsatira ake onse akhale amodzi monga Iye ndi Atate ali amodzi.
Paulo analimbikitsanso kuti:
"Pasakhale magawano pakati panu." (1 Akorinto 1:10)
Zipembedzo zosiyanasiyana zimabweretsa magawano, koma Khristu anapempherera umodzi. Chipangano Chatsopano chimasonyeza mpingo umodzi, Mutu umodzi, chikhulupiriro chimodzi, ubatizo umodzi, ndi Uthenga Wabwino umodzi.
Ena amanena kuti, "Bola mukhulupirira Yesu, dzina la mpingo silofunika."
Ndithudi, Baibulo limaphunzitsa kuti chipulumutso sichili m'dzina lokha kapena pa chikwangwani cha mpingo. Koma limaphunzitsanso kuti tiyenera kukhala mumpingo umene Khristu anaugula ndi mwazi wake (Machitidwe 20:28). Funso lofunika si lakuti, "Dzina la mpingowu ndi liti?" Koma lakuti, "Kodi uwu ndi mpingo umene ukuwululidwa m'Chipangano Chatsopano?"
Mawu akuti "mipingo ya Khristu" (Aroma 16:16) ndi mawu a m'Baibulo osonyeza kuti mpingowo ndi wa Khristu. Mpingowo ndi wake chifukwa anaugula ndi mwazi wake.
Tiyeneranso kunena kuti Mulungu yekha ndiye amadziwa mitima ya anthu onse (1 Samueli 16:7). Sitife oweruza amene adzapite kumwamba kapena ku gehena. Udindo wathu ndi kulalikira Uthenga Wabwino monga momwe walembedwera m'Malemba.
Choncho, tikamanena kuti Mpingo wa Khristu ndiwo mpingo wokha umene udzapulumutsidwe, sitikunena kuti chipembedzo chamakono chokha chili ndi ufulu wokalowa kumwamba. Tikungotsimikizira choonadi cha m'Baibulo chakuti okhawo amene ali m'thupi limodzi la Khristu—mpingo umene Iye anamanga, anaugula ndi mwazi wake, ndipo Ambuye amawonjezeramo opulumutsidwa—ndi amene ali ndi lonjezo la chipulumutso.
Kuyitanidwa kwa Uthenga Wabwino kukadali komweko lero monga kunalili pa Pentekoste:
- Imvani Uthenga Wabwino (Aroma 10:17).
- Khulupirirani Yesu Khristu (Yohane 8:24).
- Lapani machimo anu (Luka 13:3).
- Vomerezani Khristu pamaso pa anthu (Aroma 10:9–10).
- Batizidwani kuti machimo anu akhululukidwe (Machitidwe 2:38; Maliko 16:16).
- Khalani okhulupirika mpaka imfa (Chivumbulutso 2:10).
Funso siloti, "Ndi chipembedzo chiti cholondola?" Koma ndi lakuti, "Kodi ndamvera Uthenga Wabwino ndipo ndakhala mbali ya mpingo umodzi umene Khristu anayambitsa?"
Mulole tonse tifufuze Malemba ndi mitima yoona mtima, ndipo titsatire Khristu osati miyambo ya anthu.
"Mudzadziwa choonadi, ndipo choonadi chidzakumasulani." — Yohane 8:32
Ine m'bale wanu mwa Khristu
Ezekiel David
0992200447
