22/01/2026
🪷 ရှင်အနုရုဒ္ဓါ ဂါထာတော် 🪷
ဒိဗ္ဗစက္ခုအရာမှာ ဧတဒဂ်ရသလို မရှိစကားမကြားဖူးသည်အထိ ဘုန်းကံကြီးမားသော ရှင်အနုရုဒ္ဓါ လောင်းလျာမှ ရဟန္တာအဖြစ်ရောက်ရှိသွားတဲ့အခါမှာ ဝမ်းမြောက်စွာ ကျူးရင့်ခဲ့တဲ့ ဂါထာတော်ဖြစ်ပါတယ်။
(က) မမ သင်္ကပ္ပမညာယ၊
သတ္ထာ လောကေ အနုတ္တရော။
မနောမယေန ကာယေန၊
ဣဒ္ဓိယာ ဥပသင်္ကမိ။
(ခ) ယထာ မေ အဟု သင်္ကပ္ပေါ၊
တတော ဥတ္တရိ ဒေသယိ။
နိပ္ပပဉ္စရတော ဗုဒ္ဓေါ၊
နိပ္ပပဉ္စ မဒေသယိ။
(ဂ) တဿာဟံ ဓမ္မမညာယ၊
ဝိဟာသိံ သာသနေ ရတော။
တိဿော ဝိဇ္ဇာ အနုပ္ပတ္တာ၊
ကတံ ဗုဒ္ဓဿ သာသနံ။
🪷 အနုရုဒ္ဓါထေရ်အကြောင်း 🪷
အနုရုဒ္ဓါထေရ်သည် ဂေါတမမြတ်စွာဘုရား လက်ထက်တော်တွင် ထင်ရှားသော ထေရ် တစ်ပါးဖြစ်သည်။ မြတ်စွာဘုရားခမည်းတော် သုဒ္ဓေါဒနမင်းကြီး၏ ညီတော်ဖြစ်သော သုက္ကောဒနမင်း၏ သားတော် အငယ်ဖြစ်သည်။ ငယ်စဉ်က အဆင်းလှ၍ ဘုန်းကံကြီးလျက် သိမ်မွေ့နူးညံ့သည်။ မရှိ ဟူသော စကားကို တစ်ရံခါမျှ မကြားစဖူးချေ။ တစ်ရံရောအခါ အနုရုဒ္ဓါမင်းသားသည် ဂုဏ်ဝါတူမျှသော အခြားသာကီဝင်မင်းသားတို့နှင့် အံကစားရင်း မုန့်များကို အလောင်းအစားပြုရာ ရှုံးသဖြင့် မုန့်ပေးရရာ မုန့်ကုန်ပြန်သော် မိခင်ထံသို့ စေလွှတ်၍ တောင်းသည်။ မိခင်သည် သုံးလေးကြိမ်ရှိသော် မရှိတော့ဟူ၍ ပြောလိုက်ရာ ထိုစကားကို မုန့်အမည်ပင် ထင်မှတ်၍ မရှိမုန့်ကို တောင်းသည်။ မိခင်က မရှိကြောင်းကို သိစေလို၍ ရွှေဖလားချည်း ပေးလိုက်ရာ နုစဉ်က ပစ္စေကဗုဒ္ဓတစ်ပါးအား ထမင်းလှူခဲ့သော မင်းသား၏ ဘုန်းကုသိုလ်ကံကြောင့် နတ်များက မုန့်ထည့်ပေးကြသည်။ ထိုအကြောင်းကို မိခင်သိလျှင် ငါ့သားသည် ဘုန်းရှိသော ယောက်ျားဖြစ်သည်။ ရှေးဆုတောင်း အကြောင်းကြီးစွာ ရှိလိမ့်မည်ဟု အောက်မေ့၍ မုန့်စားလို၍ တောင်းလျှင် အချည်းနှီးသော ရွှေခွက်ကို ဖုံးလျက်သာ ပေးလိုက်၏။ ထိုမှစ၍ အိမ်ရာထောင်သော လူ့ဘောင်၌ နေသမျှကာလပတ်လုံး နတ်ပေးသော မုန့်များကို အစဉ် စားရသည်။ အရွယ်ရောက်သော် နောင်တော်မဟာနန်မင်းသားက တိုင်ပင်လာသည့်အတိုင်း အခြား သာကီဝင်မင်းတို့ကဲ့သို့ ရဟန်းပြုရန် မယ်တော်အား တောင်းပန်ကာ မြတ်စွာဘုရားကျောင်းတော်သို့ သွားရောက် ရဟန်းပြုသည်။ အနုရုဒ္ဓါနှင့်အတူ အာနန္ဒာ၊ ဘဒ္ဒိယ၊ ကိမိလ၊ ဘဂု၊ ဒေဝဒတ်ဟူသော မင်းသားငါးပါးနှင့် ဆတ္တာသည် ဥပါလိ လိုက်ပါကြသည်။ မြတ်စွာဘုရား အထံတော်သို့ ရောက်လျှင် ဇာတိမာန်ခက်ထန်သော သာကီဝင် မင်းမျိုးအဖို့ ရဟန်းဖြစ်သောအခါ ရိုသေရာဖြစ်စေရန် ဥပါလိကို ဦးစွာ ရဟန်းပြုပေးပြီးမှ မင်းသားတို့ကို ရဟန်းပြုပေးသည်။ ရဟန်းဖြစ်ပြီးသော် မြတ်စွာဘုရား၏ တရားတော်ကို ကြားနာရလျှင် ဒိဗ္ဗစက္ခုဉာဏ်ကို ရတော်မူသည်။ ပဒုမုတ္တရ ဘုရားရှင်လက်ထက်မှပင် ဆုပန် ပါရမီကြီးစွာ ဖြည့်ဆည်းခဲ့တော်မူသော ကြောင့် ဒိဗ္ဗစက္ခုဥာဏ်အရာကို သာလျင်စွာ ရရှိတော်မူသည်။ အရှင်အနုရုဒ္ဓါမထေရ်သည် ရှင်သာရိပုတ္တရာထံမှ ကမ္မဋ္ဌာန်းကို သင်ယူပြီးနောက် စေတိတိုင်း အရှေ့ဝါးတောအရပ်၌ ရဟန်းတရားပွါးများအားထုတ်ရင်း မနေမနားအားထုတ်ရာမှ မထေရ်မြတ်သည် ကမ္မဋ္ဌာန်းအလုပ် အားထုတ်မှုဒဏ်ချက် ပြင်းထန်စွာ နှိပ်စက်အပ်ရကား ပင်ပန်းနွမ်းနယ်သော ကိုယ်ရှိသည်ဖြစ်၍ ဝါးရုံတခု၏အောက်၌ ခေတ္တ အပန်းဖြေ ထိုင်နေတော်မူလေ၏။ ထိုအခါ အရှင်အနုရုဒ္ဓါ မထေရ်၏ စိတ်သန္တာန်ဝယ် ဤဆိုလတ္တံ့သော ယေက်ျားမြတ်တို့၏ မဟာပုရိသဝိတက်ကြီးများ ထင်ရှားဖြစ်ပေါ်၍ လာလေ၏။
ဤလောကုတ္တရာတရား ကိုးပါးသည်
၁) အလိုနည်းသော
၂) ရောင့်ရဲလွယ်သော
၃) ဆိတ်ငြိမ်မှုရှိသော (အပေါင်းအသင်းမမက်သော)
၄) လုံ့လရှိသော
၅) သတိရှိသော
၆) သမာဓိရှိသော
၇) ပညာရှိသော
ပုဂ္ဂိုလ်၏ သန္တာန်မှာသာ ပြည့်စုံနိုင်၏၊ ဤသို့ ထင်ရှား ဖြစ်ပေါ်လာလေ၏။
ဤတရားများကို စဉ်းစား ဆင်ခြင်ပြီးသောအခါ ထို့ထက် အထက်သို့တက်၍ တရားတမျိုးကို
စဉ်းစားဆင်ခြင်ရန် ဝန်လေးမြဲ ပင်ပန်းမြဲဓမ္မတာ ဖြစ်လေသည်။ သာဝကတို့အဖို့ရာ ပညာထိသာ ဆင်ခြင်နိုင်နေမြဲဓမ္မတာဖြစ်သည်။ ထို့ကြောင့်ပင် အရှင်အနုရုဒ္ဓါသည် ခုနစ်ခုမြောက် ပညာနှင့်စပ်သော မဟာပုရိသဝိတက်ကြီးကို ကြံစည်စဉ်းစား ဆင်ခြင်ပြီးနောက် ရှစ်ခုမြောက်ဖြစ်သော မဟာပုရိသဝိတက်ကြီးကို ဆက်၍ ကြံစည်ဆင်ခြင်ရန် ပင်ပန်းလျက် ရှိလေသည်။
ထိုအခါ မြတ်စွာဘုရားရှင်သည် ဘေသကဠာတောအုပ်၌ နေတော်မူရင်းကပင် “အနုရုဒ္ဓါသည် ရှစ်ခုမြောက် မဟာပုရိသဝိတက်ကြီး၌ ပင်ပန်းလျက်နေ၏”ဟု သိတော်မူ၍ “ထိုအနုရုဒ္ဓါ၏ အလိုအကြံကို ငါဘုရားသည် ပြည့်စေမည် = ဖြည့်စွက်ပေးမည်”ဟု ကြံစည် ဆင်ခြင်တော်မူကာ တန်ခိုးတော်ဖြင့် ခဏအတွင်း မှာပင် အရှင်အနုရုဒ္ဓါ၏ မျက်မှောက်သို့ ကြွရောက်တော်မူလျက် ခင်းထားပြီး ရှိနှင့်သောနေရာ၌ ထိုင်နေတော်မူပြီးလျှင်-
“အနုရုဒ္ဓါ.. ကောင်းစွာ့ ကောင်းစွာ့၊ အနုရုဒ္ဓါ.. သင်သည် ‘(၁) ဤလောကုတ္တရာတရား ကိုးပါးသည် အလိုနည်းသောပုဂ္ဂိုလ်၏ သန္တာန်မှာသာ ပြည့်စုံနိုင်၏။ အလိုကြီးသောပုဂ္ဂိုလ်၏ သန္တာန်မှာ မပြည့်စုံနိုင် ။(ပ)။ (၇) ဤလောကုတ္တရာတရား ကိုးပါးသည် ပညာရှိသော ပုဂ္ဂိုလ်၏ သန္တာန်မှာသာ ပြည့်စုံနိုင်၏၊ ပညာမဲ့သော ပုဂ္ဂိုလ်၏ သန္တာန်မှာ မပြည့်စုံနိုင်’ဟု ယောက်ျားမြတ်တို့၏ အကြံကို ကောင်းစွာသာလျှင် ကြံပေ၏။
အနုရုဒ္ဓါ.. ထိုသို့ဖြစ်လျှင် သင်သည် ‘(၈) ဤလောကုတ္တရာတရား ကိုးပါးသည် သံသရာကို ချဲ့ထွင်တတ်သည့် (တဏှာ, မာန, ဒိဋ္ဌိ တည်းဟူသော) ပပဉ္စတရားမှ ကင်းလွတ်ရာ နိဗ္ဗာန်၌ မွေ့လျော်နှစ်ခြိုက် ပျော်ပိုက်သော ပုဂ္ဂိုလ်၏ သန္တာန်မှာသာ ပြည့်စုံနိုင်၏။ ပပဉ္စတရား၌သာ မွေ့လျော်နှစ်ခြိုက် ပျော်ပိုက်သော ပုဂ္ဂိုလ်၏ သန္တာန်မှာ မပြည့်စုံနိုင်’ဟု ဤရှစ်ခုမြောက် ယောက်ျားမြတ်တို့၏ အကြံကိုလည်း ကြံဦးလော့”-
ဟု ဤလိုနေသည့် ရှစ်ခုမြောက် မဟာပုရိသဝိတက်ကြီးကို ဖြည့်စွက်ပေးတော်မူလေသည်။ ယင်းသို့ ဖြည့်စွက်ပေးတော်မူပြီးလျှင် ဆက်၍ပင် မြတ်စွာဘုရားရှင်သည် အရှင်အနုရုဒ္ဓါ မထေရ်မြတ်အား ဤမဟာပုရိသဝိတက်ကြီး ရှစ်မျိုးကို ကြံစည်၍နေလျှင် လောကီပဌမဈာန် ဒုတိယဈာန် တတိယဈာန် စတုတ္ထဈာန်တို့ကို အလွယ်တကူ ရယူဝင်စား နေနိုင်ကြောင်းကို၎င်း, ဤမဟာပုရိသဝိတက်ကြီး ရှစ်မျိုးကို ကြံစည်ကာ လောကီဈာန် လေးပါးတို့ကို အလွယ်တကူ ရယူဝင်စားနေလျှင် (၁) စီဝရသန္တောသ = သင်္ကန်း၌ ရောင့်ရဲလွယ်ခြင်း (၂) ပိဏ္ဍပါတသန္တောသ = ဆွမ်း၌ ရောင့်ရဲလွယ်ခြင်း (ဤပိဏ္ဍပါတသန္တောသ၌ပင် ဆေးပစ္စည်း ၌ ရောင့်ရဲလွယ်ခြင်းကိုလည်း ထည့်သွင်းထားသည်ဟု အထူးမှတ်ပါ။) (၃) သေနာသနသန္တောသ = ကျောင်းအိပ်ရာနေရာတို့၌ ရောင့်ရဲလွယ်ခြင်း (၄) ဘာ၀နာရာမတာ = ဘာဝနာအလုပ်၌ မွေ့လျော် ပျော်ပိုက်ခြင်း တည်းဟူသော အရိယဝံသပဋိပဒါ လေးပါးကို အလွယ်နှင့် ရမည်ကို၎င်း အကျယ် ဟောကြားတော်မူလေ၏။ (ဟောကြားတော်မူပုံ အကျယ်ကို ပိဋကတ်မြန်မာပြန် အင်္ဂုတ္တိုရ် တတိယအုပ် စာမျက်နှာ ၆၄-မှစ၍ ကြည့်ရှုရာ၏)။
ထိုသို့ ဟောကြားတော်မူပြီးနောက် မြတ်စွာဘုရားရှင်သည် “အနုရုဒ္ဓါ၏အဖို့ရာ အဘယ်ကျောင်းအိပ်ရာ နေရာ၌ နေထိုင်လျှင် ကမ္မဋ္ဌာန်းသည် သပ္ပါယ ဖြစ်လိမ့်မည်နည်း”ဟု ဆင်ခြင်တော်မူလတ်သော် ထိုဝါးတော၌ နေမှသာလျှင် သပ္ပါယဖြစ်လိမ့်မည်ဟု ကောင်းစွာ သိတော်မူ၍-
“အနုရုဒ္ဓါ.. သင်ချစ်သားသည် နောင်အခါ၌လည်း စေတိတိုင်း ဤဝါးတောအရပ်၌သာလျှင် ဝါကပ်၍ နေလေလော့”-
ဟု မိန့်တော်မူပြီးလျှင် ကောင်းကင်သို့ ပျံတက်တော်မူကာ ဘေသကဠာတောအုပ်သို့ပင် ကြွရောက်တော်မူ၍ ထိုတောအုပ်၌ ရဟန်းတို့အား ဤမဟာပုရိသဝိတက်ကြီးရှစ်ပါး တရားဒေသနာကို အကျယ် ဟောတော်မူပြန်လေ၏။ (အကျယ်ကို ပိဋကတ်မြန်မာပြန် အင်္ဂုတ္တိုရ် တတိယအုပ် စာမျက်နှာ ၆၆-မှစ၍ ကြည့်ရှု မှတ်ယူကုန်ရာ၏)။
အရှင်အနုရုဒ္ဓါ မထေရ်မြတ်သည် မြတ်စွာဘုရားရှင် ကြွသွားတော်မူလျှင်ပင် ရဟန်းတရား ပွါးများကြိုးကုတ် အားထုတ်တော်မူလေရာ မကြာမြင့်မီပင် (နောက်နှစ် ဝါတွင်း၌) ပု,ဒိ,အာ = ဝိဇ္ဇာသုံးပါးနှင့် ပြည့်စုံသော အာသဝေါကုန်ခန်း ရဟန္တာမထေရ်မြတ် ဖြစ်၍ “ဩ.. မြတ်စွာဘုရားသည် ငါ၏စိတ်ကို သိမြင်ကာ ကြွလာတော်မူ၍ ရှစ်ခုမြောက်ဖြစ်သော မဟာပုရိသဝိတက်ကြီးကို ဖြည့်စွက်ပေးတော်မူပါပေ၏၊ ငါ၏ ထိုစိတ်နှလုံး အလိုသည်လည်း ယခုအခါ အထွတ်အထိပ်မြောက် ပေါက်ရောက်လေပြီတကား”ဟု အားရဝမ်းသာ အောက်မေ့တော်မူကာ မြတ်စွာဘုရားရှင်၏ တရားဒေသနာတော်နှင့် မိမိ ရရှိအပ်သော လောကုတ္တရာတရားကို အာရုံပြု၍ အထက်ပါ ဥဒါန်းဂါထာတို့ကို ရွတ်ဆို ကျူးရင့်တော်မူခြင်းဖြစ်ပါတယ်။
(က) မမ သင်္ကပ္ပမညာယ၊
သတ္ထာ လောကေ အနုတ္တရော။
မနောမယေန ကာယေန၊
ဣဒ္ဓိယာ ဥပသင်္ကမိ။
(ခ) ယထာ မေ အဟု သင်္ကပ္ပေါ၊
တတော ဥတ္တရိ ဒေသယိ။
နိပ္ပပဉ္စရတော ဗုဒ္ဓေါ၊
နိပ္ပပဉ္စ မဒေသယိ။
(ဂ) တဿာဟံ ဓမ္မမညာယ၊
ဝိဟာသိံ သာသနေ ရတော။
တိဿော ဝိဇ္ဇာ အနုပ္ပတ္တာ၊
ကတံ ဗုဒ္ဓဿ သာသနံ။
“မြတ်စွာဘုရားသည် ငါ၏စိတ်ကို သိမြင်ကာ ကြွလာတော်မူ၍ ရှစ်ခုမြောက်ဖြစ်သော မဟာပုရိသဝိတက်ကြီးကို ဖြည့်စွက်ပေးတော်မူပါပေ၏၊ မဟာပုရိသဝိတက်ကြီး၏ ၈ ခုမြောက်ဖြစ်သော (တဏှာ, မာန, ဒိဋ္ဌိ တည်းဟူသော) ပပဉ္စသုံးပါး သံသရာနယ်ချဲ့တရားတို့မှ ပယ်ရှားလွတ်မြောက်ရာမှန် အသင်္ခတနိဗ္ဗာန်ကို ကရုဏာရှေ့ထား ဟောကြားတော်မူလေပြီ။ငါ၏ ထိုစိတ်နှလုံး အလိုသည်လည်း ယခုအခါ အထွတ်အထိပ်မြောက် ပေါက်ရောက်လေပြီတကား။
အရဟတ္တဖိုလ်ပေါက် အသိဉာဏ်ရောက်၍ သုံးပါးသိက္ခာ သာသနာ၌ ဖလသမာပတ်ဖြင့် မပြတ်မွေ့လျော် ပျော်ပိုက်သည်ဖြစ်၍ မျက်မှောက်ဘဝ ချမ်းသာရ၍ မျှတနေနိုင်ခဲ့လေပြီ။ အနုရုဒ္ဓါ မထေရ်ငါသည် သုံးပါးဝိဇ္ဇာ ပု,ဒိ,အာ- တို့သို့ အရဟတ္တဖိုလ်ခိုက် ရောက်ဆိုက်အပ်ကုန်ပြီ။ လောကထွတ်ထား မြတ်စွာဘုရား၏ သုံးပါးသိက္ခာ သာသနာကို အရဟတ္တဖိုလ်ရောက် ကျင့်ဆောက်ကြိုးကုတ် အပြီးတိုင် ပြုလုပ်အပ်လေပြီ။”
ဟူသော အဓိပ္ပါယ်များပါဝင်တဲ့ ဂါထာလေးဖြစ်ပါတယ်။
(ပုဂံဒေသမှ မြင်အပ် မမြင်ပုဂ္ဂိုလ်များ ညောင်ဦးအရပ်၌ တောင်းဆိုသော ရှင်အနုရုဒ္ဓါ တရားတော်ဖြစ်ပြီး၊ ဆိတ်ငြိမ်ရာ အရပ်၌ တည်ရှိသော ပုဂံပြည် နောက်ဆုံးမင်းဆက် နရသီဟပတေ့မင်းဘုရားတွင်လည်း ပတ်ပတ်လည်အစောင့်အရှောက်များသို့ ဟောကြားပေးခဲ့ရသော တရားတော်ဖြစ်ပါတယ်။)
🪷🪷🪷🪷
ဒီလိုဝေမျှမှုများကို အထောက်အပံ့တစုံတရာပြုလုပ်ပေးလိုသူများကလည်း 09968854411 သို့ ဒေဝါဘူမိအလှူတော်နှုန်းထား ၁၁၁၁ ကျပ်မှစတင်၍ မိမိနှစ်သက်သလို “ရှင်အနုရုဒ္ဓါပူဇာ အလှူတော်” ဟုရေးသား၍ ဒိဗ္ဗစက္ခုအရာ၊ မရှိစကားမကြားရသော အရာ၊ ရဟန္တာဂုဏ်သတ္တိတို့ကို ပူဇော်ရင်း အတိတ်နိမိတ်လေးနဲ့အတူ ထည့်ဝင်နိုင်ပါတယ်ရှင်။
အားလုံးပဲရွှင်လန်းချမ်းမြေ့ကြပါစေ။ 🦋💕✨🪷
သဗ္ဗေသတ္တာ သုခိနော ဟောတု။ 🪷🪷🪷🪷
ဘဝတု သဗ္ဗမင်္ဂလံ၊ ရက္ခန္တု သဗ္ဗဒေဝတာ။ သဗ္ဗဗုဒ္ဓါနုဘာဝေန၊ သဒါ သုခီ ဘဝန္တုတေ။ 🪷🪷🪷🪷
.lotus
#သီရိပစ္စယာမှတ်တမ်း
