Nisim Thalakna, Tedim Baptist Church/Yangon, Yangon (2026)

07/10/2026

LAITHAINI OCTOBER 8
JOHN 16:5-15
Amah hong tun ciangin leitung mite’ tungah mawhna thu, dikna thu leh thukhenna thu laktel ding hi. [JOHN 16:8]

KHA SIANGTHO’ NASEP
သန့်ရှင်းသောဝိညာဉ်တော်၏အမှုတော်
THE HOLY SPIRITS WORK

My Utmost for His Highest (Ka sungtawng a, sangpen Pa) cih laibu gelh Olsward Chambers in Lai Siangtho sangneu khat a makaih lai-in tua taka nasem nupa khat in vanlena a guklam uh theikha hi. Khialhna khatpeuh pholak ding pen thu hoih ahih hangin hih vai-ah Olsward in genkhiat pahloh dingin khensat a, Pasian in amau’ lungsimah na a sep ding thungen hi. Tawlkhat khit ciangin tuate nupa in thuman genin a kis*kkikna uh pulak hi. Olsward in “Hih vai, ka theih sawt” ci a, “Ahi zong, Pasian’ Kha in no hong hopih ding ka ngaknop man uh hi” ci hi. Nupate in lamdang sa-in a lungsim uh sukha ahih manin Jesu umin sang uh hi.

Na a sem Pasian’ Kha cih pen Jesu in a sih ma, a nungzuite’ kiang kamciam a piakna ah: “Thumaan thutak Kha Siangtho hong tun ciangin amah in thumaan thutak khempeuh note hong hilh ding hi” ci hi (JOHN 16:13). Nungzuite pen Jesu paikhia ding cih thu hangin dah uh a, ahi zong Jesu in tua pen amau’ hoih nading ahihna limtak gen hi. Tua banah “Huhpa” ahi, Pasian’ Kha Siangtho amau’ kiangah hong pai ding ci hi (tg.7). Kha Siangtho’ tungtawnin Pasian in mite a mawhna uh kiphawksak hi: “Leitung mite’ tungah mawhna thu, dikna thu leh thukhenna thu laktel ding hi” (tg.8). T**a in mite pen “thumaan thutak khempeuh” hilh lai ding hi (tg.13).

Eite zong pukkhalo-in tawntung nuntakna i ngah nading tuni-in Kha Siangtho in a nasep zom lai a (tg.1), Pasian in i khialhkhak ciangin mawhna hong phawng ding, i dah ciangin hong hehnem ding, leh Pasian biakna ah hong makaih dingin Huhpa hong pia hi. AMY BOUCHEE PYE

Kha Siangtho thapiakna koici danin tuakkha ngei na hiam? Na nuntakna sungah Kha Siangtho’ nasepna bangci muhkhak na hiam?

Ciamkip Pasian, Kha Siangtho’ hehpihna, thapiaknate ka dawntuah theih na’ngin a nem lungtang hong guan ta in.

Amen

KUMTAWN LAI SIANGTHO|ISAIAH 30-31; PHILIPPI 4

05/10/2026

PITHAINI OCTOBER 6
1 SAMUEL 21:10-15
T**A in ama’ nasemte honkhia a, amah a beel mi khat beek gim kipia lo ding hi. [LATE 34:22]
DAVID A KIHOTKHIATNA
ဒေးဗစ်၏လွတ်မြောက်ခြင်း
DAVIDS DELIVERANCE

Dave pen a sang uha kipumlaai kidemna ah kihel a, semi final a tun ciangin a taklam nakguh kitan hi. Tua semi final a zawh hangin final ciang nakguh kitanpi tawh bangci kidem theih ding ci-in lunghimawh hi. Final kimawl ni ciangin a veilam khe muangin haksapi-in kimawl hi. Tua hangin a kidempihpa in kidemna sung bup, Dave ii veilam khe mah suksawm hi. Tua bangin a veilam khe a zatna tungtawnin Dave in a liambaang a taklam pang kidal thei-a kidemna ah zo hi.

A tunga “Dave” tawh min kinaipih Lai Siangtho sunga David in haksatna pan a suahtaak na’ngin khemna na zang hi. Amah a that nuam kumpi Saul kiang pan a taikhiat laitak Israel-te’ galte lakah busim thei hinapi, amah Hebrew galhang khat ahihlam a sawtlo-in kithei hi. (1 SAMUEL 21:11). David zong kithah ding a lau manin “Amaute’ mai-ah a gamtat kheelin, amaute’ muhna ah a hai-in kibawl a, kulh kongkhakte’ tung kuigawpin, a khamul tungah a cilphuan kaisuksak hi” (tg.13). Tua kineihkhemna kimang thei bilbel hi (tg.14-15).

Hih banga khemna zat vai ah mi hoihte’ ading kikup khop khat om dinga muhzia zong a tuamtuam om ding hi. Himahleh Late 34 in David’ tuahkhak thu hong teltheisak hi. Tua sungah David in ama’ suahtakna pen ama’ kineihkhemna hang hilo-in Pasian’ hang bek ahihna pulak hi: “Keimah in T**a ka zong a, … ka launa khempeuh panin kei hong honkhia hi” ci hi (tg.4). Tua banah “Hih mi hehpihhuaipa kiko-in T**a in … ama’ haksatna khempeuh panin amah honkhia hi” ci lai hi (tg.6). David in Philistia mite’ kiangah galbitna ngah a, ahi zong Pasian’ kiang a kihei ciangin ama’ adinga a muanhuai bukna ngah thei pan hi (tg.8, 22). TIM GUSTAFSON

Bangci nam thu omziate in na kis*kkik ding thute na seploh hong phamawhsak hiam? Pasian’ kiang na kihei ciangin na dawntuahzia bang hong khel masapen hiam?

Kong it Pa aw, kei’ pilna ka suan ciangin buaina vive ka tuak hi. Hih ka buainate nang’ kiang kong zuat nading hamphatna hong hisakzaw ta in.

Amen

KUMTAWN LAI SIANGTHO|ISAIAH 26-27; PHILIPPI 2

04/10/2026

PIZINGNI OCTOBER 5
MATTHEW 13:44-46
Vantung kumpigam pen lo sunga kiseel, … vanmanpha tawh kibang hi. [MATTHEW 13:44]
A MANPHA TAKTAK
စစ်မှန်သောဘဏ္ဍာ
TRUE TREASURE
New York gamke sung, bual khat sunga kiseel sum kepna s*k singkuang khat a zong dingin James kithawi hi. Sik-hup khauh mahmah khat a kithuah khauhual sau khat tui sungah khiasuk hi. Ngabeng a bang tua s*k-hup in a lomloma kigak $100 lai tawh kidim s*k singkuang khat matlinglengsa-in hong dawkto hi. Palikte in tua sumte pen khutkhialh bankhialhna vai hilo ahih manin James in tang thei ding ci uh hi. Tua sumte pawlkhat sialuata-in a mel mualkhin hitaleh James in inn khat lei nading khop ngahkhia zo dingin kilamen hi.

Vanmanpha kiseel zonkhiat pen lawphuai mahmah a, Jesu in zong tua dana a zong mi khat’ thu gentehna-in nei hi. “Vantung kumpigam pen lo sunga kiseel, mi khat in tuakkha-in a selkik, vanmanpha tawh kibang hi. Nuamna tawh amah paikhia-in a neihsa khempeuh zuakin tua lo lei hi” ci hi (MATTHEW 13:44). Tua pa in a muhkhak vangmanpha ii manphatzah tel mahmah ahih manin tua lo lei nadingin a neihsa teng nangawn zuak ngam hi.

Hih thugenteh i lungngaih ciangin bang zahtakin i hau zongin i mawhna hanga i neih leiba lohzo lo hi. Jesu bek in ama’ sihna leh a thawhkikna bek tawh hong tankhia thei a, ama’ Pa tawh hong kilemkiksak hi.

Leitung’ vanmanphate pen hoih mah a, ahi zong, tuate kimansuah thei, hong kiguksak thei, ahkl. hong kisuksiatsak thei hi. Vantungah Jesu tawh nuntakkhopna pen eite’ ading hamphatna lianpi ahihlam thei ihih manin ei’ adinga ama’ hong kipiakkhiatna leh a khawnkhonga hong piak tawntung nuntakna lungdam takin i sang ding hi. NANCY GAVILANES

Jesu pen nang’ ading bang hangin manpha hiam? T**a tawh mankhop nadingin nuntakna lui nusiat ding bang hang ut na hiam?

Kong it Jesu, kong upna tawh vantung, vanmanpha khat nong piak manin ka nuam hi.

Amen

KUMTAWN LAI SIANGTHO|ISAIAH 23-25; PHILIPPI 1

03/10/2026

NIPINI OCTOBER 4
LATE 63:1-8
Zan thapai-in kong lungngaihngaih ciangin … Bang hanghiam cih leh kei hong huhpa na hi hi. [LATE 63:6-7]
DAIHNA SUNGAH
ငြိမ်ဝပ်ခြင်းထဲမှာ
IN THE STILLNESS

Ka neulai-in zankim ka khanlawh ciangin lengla khan a, tutphah tungah ka nu’ tut pen ka mu mun mahmah hi. Sabuai tunga meivak taang panin ka nu’ phei tunga om, laibu ka muh zel pen Lai Siangtho bu hi. Ka nu pen ihmut theihloh natna leh natsau natna hangin a ihmusip theihloh hangin a hun mawk beisak lo hi. Tua bang zante ah holim theih om lo hi. Ka ihmut suaklua ahih manin lupna lam ka zuatsan zel hi. Himahaleh ka nu in zingtuung a gamdaih mahmah laitak Pasian tawh kizopna hunin zanga Pasian in amah hopih hi cih zong ka thei hi.

A kicingzaw semin Pasian i teltheih nading hunlenite bangci zon ding ihiam? Ihmut theihloh hun ngak kul nawnlo hi. Jesu in a kithuahpihte kiangah a Pa tawh khatguak kihon hun a lak nadingn vaikhak hi (MARK 1:35).

Lai Siangtho in “Om hithiat unla, Pasian ka hihna thei un” ci hi (Late 46:10). David ii lapaute sungah Pasian tawh thuk taka sunglam kizopna nei-in ama’ hihna bangin amah phat ding a sawmna thu pulak zelzel hi.(63:1-8).

Leitung pen gamlum lua ahih manin i mitsuanna nangawn hong heikhiatsak thei hi. Tuate in i lungsim hong la nuamin i kiheltheih theih nadingin hong thatang zawt hi. Tua hang mahin innkuan sung noploh hunte, nasep vai-a manlah hunte a, kingah mengmeng lo gamdaih hunte limtak i zon ding a kisam ahi hi.Daihna sungah Pasian i mu ding hi.

Pasian pen lusu lo, teisinsenin a bil hong ngat gige hi. Amah a zongte tawh hun zangkhawm dingin a baihsa-in om den hi.
CINDY HESS KASPER

Bang buainate in Pasian tawh na kiho nading hun hong nawngkaisak hiam? T**a’ mai ah na “om hithiat” theih na’ng, kiginkholh nadingin bang lampi hoihpen hiam?

Kong it Jesu aw, nong ompihna sungah kingakh theihna leh nang kong zon theih nading hong hilh in. Mitsuanna dangte hemkhia-in T**a na hihna kong phattheih na’ng hong huh in.

Amen

KUMTAWN LAI SIANGTHO|ISAIAH 20-22; EPHESUS 6

02/10/2026

NINONI OCTOBER 3
HEBREW 4:14-16
Eite’ neih siampi lianpenpa pen … eimah tawh kibangin siatzolna namkim a thuak, ahih hangin mawhna a bawllo, siampi lianpenpa ahi hi. [HEBREW 4:14]

LAINAT TELSIAMNA
စာနာနားလည်မှု
COMPASSIONATE UNDERSTANDING

Ka sungpa pen Galpi Nihna lai, Europe gam tenga bomb khiat gal vanleng hawl khat hi. A vanleng uh kikapkhia a, kiman ahih manin kha tampi sung galmatin om hi. Jim in tua a tuahkhak thute a gen ngei kholloh hangin galpi pian ma-a amah a theite’ genna ah a maitai, a thunuam khangno khat ci uh hi. Ahi zongin tua gal sunga a tuakkhakteng hangin lungsim kikhel vatvat thei khat suakin mi tawh kitamthuah nawnlo hi.

A ma’ tuahkhak thu theihtel nopna tawh Europe gamte’ tunga vanleng tawh galdona vai, Donalh Miller’ gelh Masters of the Air (Huih lak a ukte) cih laibu ka simkha hi. Tua laibu ka simna tungtawnin gal sunga gal vanleng hawlte’ pumpi lam, lungsim lam, suplawhna thute ka telthei hi. Tua hangin ka sungpa’ tungah lainatna ka nei semsem hi.

Hebrew laigelhpa in eite’ neih “Siampi lianpenpa” thu hong gen hi (4:4). Tua pen eite’ thuaknate hong theihpih bek hilo-in a tamzaw a thuak Jesu hi. Na khempeuh ah i thuakna hong theihpih na’ngin eite’ lakah hong teng hi. Hebrew sungah “Eite’ neih siampi lianpenpa pen i thanemnate hong lainatpih theilo nam hilo-in eimah tawh kibangin siatzolna namkim a thuak, ahih hangin mawhna bawllo hi” ci hi (tg.15). Hih thu ngaihsun dih! Jesu in eite’ thuakna hong theihpih hi. Eite mah bangin ama’n zong siatzolna tuak hi.

Jesu banga lainatna neih ding hanciamna pen ama’ itna mite’ tungah lahkhiat nading lampi hoih khat ahi hi. Pasian in a Kha Siangtho’ tungtawnin mite’ tungah itna, lainatna tawh telsiamna lungsim hong guan tahen. BILL CROWDER

Kuate’ tungah lainatna nei dingin hanciam na hiam? A thukzaw a, telsiamna lungsim bangci phungvuh ding na hiam?

Kong it Pa aw, mi’ tunga ka gamh tatkhakna hong maisak in. Kei’ tungtawnin nong’ itna a muh nadngun lainat telsiamna thu hong hilh ta in.

Amen

KUMTAWN LAI SIANGTHO|ISAIAH 17-19; EPHESUS 5:17-33

01/10/2026

LAITHAINI OCTOBER 2
PHILIPPI 3:10-16
Tua pen Khris leh ama’ thawhkik vangliatna ka theih ka tel nading, ama’ gimthuakna thuakpihin ama’ sihna thu ah amah tawh ka kibat nading ahi hi.
[PHILIPPI 3:10]

PASIAN’ A KIMITSUAN NGIMNATE
ဘုရားသခင်အတူညှိနှိုင်းခဲ့သော ပန်းတိုင်များ
GOALS ALIGNED WITH GOD

Wil pen zaksakna om lopi-a nasep a kitawpsak ciangin lel lua ahih manin lungsim lam kibawlna zato ah kilak hi. Ni tampi khit khantohna a omloh laitak ni khat a siapa tawh a nisim a kimuh ngei bangin a kimuhna ah a siapa in maitai kawmin “Tawlngakhna inndei, a tung masa kidem dia” ci hi. Wil ii genkikna ah “Tua hong cihziau pen ka sungah bang hiamkhat a satsuah tawh kibang” ci hi. Thakhatin a sungah ngimna khat a ompah zahin kingaihsun hi. Amah zong manlang takin a tai leh a siapa sangin tung masazaw hi. Lamdang a sak khatah tupna kung khat neihna in amah lametna guan a, tua mah zong ama’ damkikna hipah hi.

Paul in tupna kung kician sinsen neih a thupina tel mahmah hi. A pawlpite kiangah “Khris ka theitel nuam” ci-in gen hi (PHILIPPI 3:10). A thokik Jesu’ vangliatna ka thei nuam ci hi. Tua vangliatna in Khris tawh kibangsak semsem ding ahihman hi. Tua lungtup a tangtun nadingin Paul in “Nunglama omte mangngilhbawlin mailama omte a hahbawl ka hizaw hi. Khris Jesu’ sunga om, tunglam pana Pasian’ sapkhiatna tawh kipawl gualzawhman ngah nadingin kung zuanin ka delh hi” cih kuanzia khat zang hi (tg.13-14). Nang’ e tangtutzo lo na kisa hiam? Khris sungah “I ngah khitsa thute tawh kituakin i gamtat” ciang Pasian in i tupnate i mitsuankik zawh nading hong huh hi (tg.16).

Tua hi a, Paul ii tupna kung cih pen leitung thute hilo hi. “I gammi hihna pen vantung” ahihlam ama’n tel hi (tg.20). Hih tawntung thu mitsuanna tawh eite in Khris’ sungah a nungta a khanglian dingin lametna thak i mu hi.
PATRICIA RAYBON

Bang tupna kung nei na hiam? Na tupnate Khris’ ngimna tawh a kituak dingin koici khel ding kisam hiam?

Kong it Pa aw, ka tup ka sawmnate hong puahphatsak in. Tua hileh tuate in Jesu ka theihsem na’ngin hong satsuah ding hi.

Amen

KUMTAWN LAI SIANGTHO|ISAIAH 14-16; EPHESUS 5:1-16

01/10/2026

LAIZINGNI OCTOBER 1
PAUNAK 15:1-6
Kamnemin dawnna in hehna damsak hi. [PAUNAK 16:1]

GENTLE ANSWERS WITH GODS HELP
KAMNEEM TAWH DAWNNA
ဘုရားသခင်၏မစမှုဖြင့် ညင်သာသောအဖြေ

Khuai khawi dan ka sin lai, ni khat kei hong hilh pa in “Mu khin ing, khakkik ta oo” hong ci hi. Ka gamtat pen manlangin khauh ahih manin khuai khawizia sin kimlai khuaite patausak zawsop-in, ka lu’ kiim teng hong bawh ngeingai uh hi. A donsawm hinapi’n a hehsak ka suak zawsop hi. Tua panin hong hilhpa in neemtaka gamtatna in khuaite buaisak lozaw hi ci-in “Neemtaka” tatzia a thupina hong hilh hi. (K*m tampi khit) tuni-in ahihleh khuai khawina bukah ka pai ciang kidawm lua kisa ka zi bang in a laam tawh kibang phialteh hong ci hi.

Khatveivei, kihona nuamlo i tuah ciangin khuaite tawh a laamkhawm kibang hi. Kihona ah a lungso a lungham a om laitak awtol tawh khauh taka dawnkikna in thulela siasuaksak zaw hi. K*mpi Solomon cih mah bangin “Kam nemin dawnna in hehna damsak a, kam khauh in hehna piangsak hi” (Paunak 15:1). A lungham ahkl. a pumheh khat thunem thudam tawh dawnkik ding cih pen kisinsin a kul ding khat hi. Ahi zongin lungnemna cih pen eite’ sunga a gamtang Kha Siangtho’ gah nam khat ahih manin (Galatia 5:22-23 sim in) Pasian’ huhna tawh tua pen i pungsak thei hi.

Tuteng, khuai khawina buk ka pai sim, ahkl. kihona nuamlo ka tuah simin Pasian’ kiangah pilna leh lungnemna ka ngen thei ta hi. Kihona a noploh hunte ah Pasian tawh tonkhawm peuh lehang, “I haksat hunin huhna” pen gamlapi-ah om ngeilo hi (Late 46:1). JAMES BANKS

A lungham khat lungnem takin na dawn theih na’ng Pasian in hong koici huh ding hiam? Tuni-in nang’ tung pan thunem tawh dawnna kisam mi khat’ tungah bang gen ding na hiam?

Kong it Jesu, tuni-in midangte ka dawnna ah nangma’ itna nemtakin ka hopsawn theih na’ng hong huh in.

Amen

KUMTAWN LAI SIANGTHO|ISAIAH 11-13; EPHESUS 4

29/09/2026

NILAINI SEPTEMBER 30
COLOSSAE 2:6-15
'Khrih thu tawh a kituak lopi-in, tangthu tuanthu ahi a, huihlak a ukte’ thu s*ksanin ahi zongin, bangmahin a kimang lo leitung pilna tawh mite’ khemsa-in sila na suahkhak loh nadingun kingaihsun un. COLOSSAE 2:8

BIAKNA HILO KHRIS
ရိုးရာအစဉ်လာ၌မဟုတ်၊ ခရစ်တော်၌သာ
NOT RITUAL BUT CHRIST

New Mexicon gam Santa Fe ah kumsimin mi a then a sim kikaikhawmin Zozobra kici pi 50 bang a sang niksia puansia leh lungkhamna khempeuh tawh gawmin a kibawl lohunna milimpi khat halin pawi bawl zel uh hi. Mipi aw ing, “Hal vo hal o,” ci-in tua meikuangin a lungkham a hatsatna teng uh a kangtum bangin nuntakna thak a ngah bangin ki ngaihsun uh hi. Hih biakna in mihingte a launa, a maizumna leh a khialhna panin a kisiansuah nopna kilang sak hi. Ahiding tawh kibang napi, hilo deuh zel hi.

Mei in laidal leh puansiate kangtum sak thei mah-a kisungsiatna leh maizumnate kangtum sak theilo hi. Nungzuipi Paul in, “'Khrih thu tawh a kituak lopi-in, tangthu tuanthu ahi a, huihlak a ukte’ thu s*ksanin ahi zongin, bangmahin a kimang lo leitung pilna tawh mite’ khemsa-in sila na suahkhak loh nadingun kingaihsun un (KOLOSE 2:8),” ci’n na gelh hi. A laisim mite a phawksak thu-ah bangmahlo thute tawh Jesu a khek khakloh nading genin, “Jesu pen a kimutheilo Pasian’ mel,” a hihna (1:15), piansakna khempepuh tungah a lianpen ahihna (1:16), mihing lim a pua Pasian taktak ahihna (2:9), thunei vangnei khempeuh tungah a gualzo pen ahihna (n10) na telgen hi . Ama’ sihna leh a thawhkikna in eite “Ama’ sungah zungkha in hong khangsak a (n7), i mawhna hong maisak in a dimnuntakna hong pia hi (n13).

Mihingte biakna leh ngeina pawite in mipi hong lawpsak mah dinga, Jesu bekin mawhna khut leh leiba panin a tanwtungin hong suakta sak thei hi. Ngeina pawi leh biakna tawh vangik kisuanlo-in Khris kiangah tunpih zaw ni. I thakawkna panin a mah bekin hong honkhia-in lametna tawh hong kidimsak thei hi. MARVIN WILLIAMS

Khris munah Mihing biakna i khek khak ding bangzah in lauhuai hiam? Bangci lampi tawh tuate panin i suaktak nading Amah in hong vaihawm sak hiam?

Jesu aw, nang bekin hong suakta sak thei hi.

Amen

KUMTAWN LAI SIANGTHO: ISAIAH 9-10; EPHESUS 3

29/09/2026

PITHAINI SEPTEMBER 29
THUHILHNA 5:1-5
Vantungah Pasian om a, leitungah nang om na hih manin na pau ding a kilawm zahval pau kei in. THUHILHNA 5:2

PASIAN’ AW NGAIHNA
ဘုရားသခင်၏စကားကို နာယူခြင်း
LISTENING TO GOD

TED talk kici thugenna khatah Celeste Headlee in “Mi tawh a muibun zaw-a kihozia ding nam 10,” cih thu na gen hi. Tuate sungah thu khat pen i ngaihsutna tawh kileh bulh leh kilawm hi. Kihona nuam a ut leh thu a ngaih kul hi ci photphot hi. Mi khatpeuhin thu a gen ciangin hoih takin i ngai kei-a ama’ man ciangin bang gen ding ka hiam cih tawh lungsim manlah mahmah hi. Headlee in Steven Covey thu gen kawmin, “Mi a tamzaw in mikhat thugen ngai-in tel ding cih sawmin kinei lo-in i dawnkik zia ding lunggelin i om zaw ,” ci hi.

Lai Siangtho in a diakin Pasian tawh kisai thute-ah thu ngaih siam ding hong gen pha mahmah hi. Thuhilhna bangah kician zaw kan lai hi: “A pil phah inla ka kam cip in (THUHILHNA 5:1),” ci lian hi. Ei sangin Pasianin nakpi takin theilua zaw mahmah hi cih i phawkna ding, “Vantungah Pasian om a, leitungah nang om na hih manin na pau ding a kilawm zahval pau kei in (n2),” na ci hi. Headlee leh Covey gen bangin Paunak in zong, “'Mihaite in thu a teltheih zawhna ding uh kin lo uh a, pil si, a kicih theih nading deihna bek tawh thu gen uh hi (18:2)” na ci mawk hi.

En bangci ngaihsun ding ih hiam? Thungen dingin Pasian’ kiang i zuat ciangin, i lunghimawh thute gen samsam masa lo-in hunla in Ama’ aw i ngaih ding ahi hi. Tuni-in midangte tawh i kiho ciangin zong i gennop bek ci lo-in hoihtak ngai siam leng lamdang takin i kizopna hong nuamzaw hong cidam zaw ding hi.
KENNETH PETERSEN

Thu ngaih vai na lunggel ciangin Pasian tawh a thunget hunte koici kilamdan sak ding na hiam? Koicih lecin ama’ aw na ngai thei zaw ding hiam

Pasian aw, mite thugen a ngai siam dingin hong huh inla, ka thunget ciangin zong nang’ aw a ngai dingin hong siamta in.

Amen

KUMTAWN LAI SIANGTHO: ISAIAH 7-8; EPHESUS 2

28/09/2026

PIZINGNI SEPTEMBER 28
THUKHENTE 10:17–11:8, 29
Jefthah’ tungah T**a’ kha hong tung hi. THUKHENTE 11:29

PASIAN IN SANG
ဘုရားသခင်၏လက်ခံမှု
ACCEPTED BY GOD

Sum piazo takei leh a cinate cikmah hunin a nungat ngeilo, mipi’n a deihloh hang zong a lungkia tuanlo siavuan khat oma a min Harold ahi hi. Asangkahna-ah pil mahmah napi, a cilem hangin a siavuan sinna London khua-a zato khatzongin amah sang lo hi. Tua manin 1913 kumin a innah zato hon-a, mizong daipaante a khongin vel hi. Dr. Harold Moody in tua bangin mi kideidante a huh manin “Londonte’ Martin Luther King,” kici lianghi. Dr. Moody in mi hong nialna tungah i nuntakna a kilam hilo ci hi. Ih Lai Siangtho-ah zong hih thuman pen Jefthah tangthu sungah kimu thei hi. A thahat galhang mahmah khat ahihhangin a beh sangam pa’n nawlkhinin khuasung pan hawlkhia hi. “Ka pa uh inn sungah gamh na luah kei ding hi; bang hang hiam cih leh nang pen numei dang tawh zawlta na hi lel hi,” ci uh hi (THUKHENTE 11:2).

Jefthat zong a behte kiang panin kihem khia-in mundang ah teng hi (n3). A innkuan pihte’n a nawlkhin hangin Pasian in na sang hi. Israel te’n gal a neih ciangin huhna a vangetna uh pen Jafthah kiangmah ahi hi (n4-6). “Kote makai hong sem inla, Ammonite mite hong do sakin (n6),” ci uh hi. Pasian in Jefthat ompih a, a galte zo-in (n29, 32-33) a khuanung ciangin Israelte makai suak hi (12:7). Midang te’n hong nawlkhin hong pampaih ciangin Pasian muangin a thu mang tawntung ni. Hih bangzia in Pasian in hong mu-a, tua banga i nuntak ding hong deih hi.
KAREN HUANG

Nawlkhinna in hong bangci huzap hiam? Pasian’ hong sanna in hong bangci thapiak hiam?

Pa aw, nong itna leh nong sanna hangin lungdam ing.

Amen

KUMTAWN LAI SIANGTHO: ISAIAH 5-6; EPHESUS 1

Nisim Thalakna

07/10/2026

05/10/2026

04/10/2026

03/10/2026

02/10/2026

01/10/2026

01/10/2026

29/09/2026

29/09/2026

28/09/2026

Address

Website

Alerts

Shortcuts

Share

Category

Listing takedown request