Nisim Thalakna

Nisim Thalakna FOR PERSONAL and FAMILY DEVOTIONS. SINCE 1956

02/09/2026

LAIZINGNI SEPTEMBER 3
THU HILHKIKNA 10:12-15

T**a na Pasian uh zahtak Un. THU HILHKIKNA 10:12

PASIAN ZAHTAKNA
ဘုရားသခင်ကို ကြောက်ရွံ့ရိုသေလော့
REVERENT FEAR OF GOD

Tanitan in, “Nidangin mi that ngei ing. Ahizongin Khris Jesu up ding katel a kipan tua bang nuntakziate T**a’n hong phal nawnlo hi,” ci hi. Tanitan pen Philippines gam Sierra Madre mualtung-a teng, mihing bengin awngtan-a a lutang lak pen ngeina-a a nei Ilongot kici mualtung minam khat pan ahi hi. A nuntakna lui leh Khris sunga nuntakna a tehkakna-ah Tanitan in, “Nidangin sih ding ka lau mahmaha mi thah ding ka kihta kei hi. Tu’n ahih leh mi thah ding ka lau-a sih ding ka kihta kei hi,” ci hi.

Florentino Santos’ gelh “the Headhunters of Sierra Madre” cih laibu sungah hih Tanitan’ thu ka sim ciangin Pasian kihtakna, zahtakna in Ama’ thumanna koici khansak hiam ci’n ka lungngai hi. Pasian’ kamciam gam a lut ma-a Moses in Israelte tungah a gen, “T**a na Pasian uh zahtak un, (THU HILHKIKNA 10:12)” cih kammal ka phawk hi.

Pasian’ zahtatkna cih pen thumanna tawh a kilang khia ding ahi hi. Pasian tate cih pen “Amah zahtak ding, Ama lampite tot ding, Amah it ding, lungsim khempeuh le nuntakna khempeuh tawh Ama’ na sep ding (n12-13),” ahi hi. Jesu a um eite pen a siangtho Pasian i zahtakna in gitlohna hong kih sakin Ama’ thumanna ah hong lungkim sak ding ahi hi (PAUNAK 8:13). T**a a zahtak nuntakna i neih na ding Ama’ tungah huhna ngen ciat ni. KAREN HUANG

Tuni simding Lai Siangtho panin “T**a zahtakna” na koici lah ding hiam? Bang thute ah Pasian’ thu man ding haksa na sa-a, T**a zahtakna in hong koici huh hiam?

A Siangtho Pasian aw, Na maipha sungah zahtak kihtakna hong hilh in.

KUMTAWN LAI SIANGTHO: LATE 140-142; CORINTH KHATNA 14:1-20

02/09/2026

NILAINI SEPTEMBER 2
TUNI SIMDING: CORINTH NIHNA 4:7-18
'Tua thu hangin ka lungkia tuan kei uh hi. CORINTH NIHNA 4:16

Mitkha-a luai Galva-etnuam
ထာဝရတိုင်အောင်တည်ရှိနေသောမြင်ကွင်းများ
THE ULTIMATE SNAPSHOT

Switzerland gam ka zin ding ciangin vuk a dim Alps mualpi, keelhonte, mualtunga lokhote tuuki mut-a om a mu dingin ka mitkha ah ka bawl hi. Zurich khua panin ka pai suksuk uh ciangin ka muh pen ahileh khuapi dangte mah bangin a cimtak huai lampi dungte mah hilel hi. Ka giahna ding mun ka naih kuan ciangun lampi pen nakpi takin na sia zaw lai hi. Mawtaw tung panin tuakin a gik mahmah ka vante uh ka tunna ding zinbuk d**g ka pua kaihkaih lai uh hi. Tawl kawm, lungkim phalo kawmsa-in zinbuk innka-ah a dak leh Kalai! A hoih mahmah galva-etnuam hong kilang hi. A dum dildial Lucerne bualpi, a gei-a kitung henhan Alp mualpi a om viavua leh a nuai-a khuapi mei tangzihzia hong kilang mawk hi. Pai tak mah ei! Et tak mah ei.

“Tua thu hangin ka lungkia tuan kei uh hi (CORINTH NIHNA 4:16)” cih thu ka phawk hi. Nungzuipi Paul in ama’ mimal haksatna na gen a, “Gimna ka tuah zelzel uh hangin…ka lungkia kei uh hi(n8)”, na ci hi. A hoihlam a muhna na gen a, “Tuhun laitakin tomno sung lungkhamna ka thuakte uh in ka thuakna uh sangin nakpitakin a lianzaw tawntung minthanna sung hong tunpih ding hi (n17)” na ci hi. Tua manin, “A kimu thei lo nate a tawntungin a kip ahi hi (n18)” ci-in tawntung galva-etnuam i mit suan ding hong hanthawn hi.

Khatveivei i khuazinna pen cimtak huai-in haksa thei hi. Ahizongin Khris sungah a hoihpen galva-etnuam i ngah ding khamuanna hong pia hi. I muh ding tawntung minthanna pen i mitkha-a i luai sak theih a hoih pente tawh teh theih ding hilo hi.
KENNETH PETERSEN

Tusung teng na khualzinna ah bang haksatna na tuak hiam? Tawntung minthanna na bangci ngaihsut hiam?

Itna Pasian aw, hih a haksa ka khualzinna ah thapiakna kisam ing. Nang’ tawntung minthanna ka muh hamtang ding thu hong ngen ing.

AMEN

KUMTAWN LAI SIANGTHO: LATE 137-139; CORINTH KHATNA 13

31/08/2026

PITHAINI | SEPTEMBER 1
TUNI SIMDING: SAWLTAKTE 2:1-6, 36-37

'Amaute in sawltakte tung panin thu sinin amaute tawh kikhawl uh a, amaute tawh an nekhawmin, thu zong a ngenkhawm uh hi. SAWLTAKTE 2:42

KHRIS SUNGAH KHANGTO KHAWM
ခရစ်တော်၌ ကြီးထွားရန် အတူတကွစုရုံးခြင်း
Gathering to Grow in Christ

California a Monterey tuipiau ah dolphin tulnih val bang a lom om pen captain khatin na mu kha hi. A ne thei ngasate’ gal pan kidalna, kikepna leh kikhuatuahna-in dolphinte tua bangin a lom om uh ci hi. Ahita zongin hih bang-a a tam mahmah dolphin lompi muh ding pen a baih hetlo thu khat ahi hi.

I upna tangthu Lai Siangtho-ah tua bang-a mi tampi kituah khopna khat na kigen hi. Nungzuite in Jerusalem ah Pentecost pawi a kham laitak un, “huihpi nung bangin huging khat hong tungvat a, amaute’ kikhopna innsung khempeuh hong dim hi” (n2). 'Amaute Kha Siangtho tawh kidim uh a, minam dangte’ pau tawh a pau thei hi” (n4). Pasian’ bawlsa minam tuamtuamte zong tua Pentecost pawi-ah hong kituah uh hi (n5). Tua huging a va naih uh ciangin Nungzuite’ thugen pen, “amau’ pau ciatin za uh hi” (n6). Tua ciangin Peter in “Jesu pen T**a leh Messiah” a hihna tangko hi (n36). Mi tulthum bangin a kigen thu umin ki tuiphum uh hi (n41). Tua bangin Pasian’ mite a ten khop uh ciangin “Pasian in nisimin hotkhiatna a ngah mi kibehlapsak tawntung hi” (n47).

Kha Siangtho’ vangliatna tawh leitung bup a Pasian’ thu-umte kipawl khawmin Jesu pen T**a hi ci-in tangko lai uh hi. Ei tungtawnin zong Ama’ ukna gam hong khangsak lai ding hi.
XOCHITL DIXON

Pasian’ minam tuamtuamte tawh koici bangin na khangto khawm ding hiam? Minam na kibatpih loh mite zangin Pasian in na upna leh na pawlpi hong koici khan sak hiam?

Pasian aw, minam dangte tawh upna sungah a khangto khawm dingin Pawlpi hong huh in.

AMEN

KUMTAWN LAI SIANGTHO: LATE 135-136; CORINTH KHATNA 12

30/08/2026

PIZINGNI AUGUST 31
GALATIA 2:19-21
Kei a nungta hi nawnlo-in kei’ sungah Khris a nungta hizaw hi. [GALATIA 2:20]
KEI’ SUNGA KHRIS
ကျွန်ုပ်၌ရှိ‌သောခရစ်တော်
CHRIST IN ME
Thaksuahna Hun lai-in siamnel pu Albrecht Durer pen ama’ pianpih siamna hangin k*m 20 gualin minthang ta hi. Tua hun lai-a siamnel lamsang etkak genkop siamte in amah pen “Mahlemah kituak taka kilaakkhia thei a siampen pa” ci uh hi. A minthan semsem ciangin mihau miliante in sumlepaai tampi tawh amah cial uh hi. Amau’ khopin a minthang veve siamnel p**e ahi, Giovanni Bellini leh Raphael-te nangawn in ama’ khutma thupilak mahmah uh hi.

Ama’ khutma a hoih khat hi ci-a mipilte’ ciapteh lim sungah Durer in ama’ melletha teng, Jesu’ limlemel hidinga a upmawh teng tawh gawmkhawm hi. A limgelhna sungah amahlemah a sam sausak, kilsak, biangmul neisaka a mittangte zong Pasian’ ngimna a kilangsak dan namin bawl hi. Hih pen mi tampi in siamnel pu ii kiphatsakna lungsim tawh mahlemah a kimuhzia hiding ci uh a, amah a theite in ahihleh Durer in ama’ sunga om Jesu midangte a musak nuntakna nam neinuam ahihman hi ci uh hi.

Khris nei takpi hileng, tua bang lunggulhna i nei ding hi. Jesu umin ama’ sihna leh thawhkikna pen Pasian tawh i kizopna ii thu bulpi hi ci a, sang cih pen tu-in eile-ei’ ading hilo-in Jesu’ ading nungta ding cihna hi (Galatia 2:19). Eite ama’ ading nungta-a amah zong ei’ sungah nungta-in nasem hi. Paul in kha sunga, ama’ kikhelna a genna ah “Kei a nungta hi nawnlo-in kei’ sungah Khris a nungta hizaw hi” ci hi (tg.20). Tuni, mite in i sungah Jesu a muhtheih nading i nuntakna tungtawnin Khris’ minpha tangkhiasak ni. JENNIFER BENSON SCHULDT

Jesu in amah a kitheih nadingin nang’ tungtawnin nasem cih na phawk hunte ah na lungphawnna bangci om hiam? Tua bang a pianloh nadingin bang haksatnate in hong khaktan zel hiam?

Van a Pa aw, kei’ utna teng dim dinga ka nuntakna pan ka khawl theih na’ng hong huh in. Mite in kei’ sungah Khris a muhtheih na’ng Kha Siangtho’ makaihna hong zuizosak ta in.

AMEN

KUMTAWN LAI SIANGTHO|LATE 132-134; 1 CORINTH 11:17-34

30/08/2026

NIPINI AUGUST 30
PHILIPPI 4:15-19
Ka Pasian in … na kitangsapte uh a vekpi-in hong dip ding hi. [PHILIPPI 4:19]
PASIAN’ SIKNA A TAMPI
ဘုရားသခင်၏ ကြွယ်ဝသောထောက်ပံ့မှု
GOD’S RICH PROVISION

North Carolina gamke sung khuapineu khatah a teng pastor khat in 2024 k*m, Helene ci a, min kivawh Hurricane (huihpi kipei) tuihualpite in a khua a suksiat ciangin paizia a lungluthuai khat phawkkha hi. “Bang kisam na hiam?” cih dotna dawng theilo-in a om laitak a kisap hun simin citpiak vanlenate tung pahpah hi. Phone tha thun nading kisam maw? Lamethetloh khatin mi khat in mawtaw tawh biakinn ah mei setpi khat hong pua-in tha thunna phual khat bawlziau hi. Tuidawn kasam maw? Thakhat thu-in tuithawlte hong tung pah hi.

A kituakkha pak maw? Lai Siangtho in tua bang hilo ci-in Pasian mah k**k hi. “Ka Pasian in Khris Jesu’ sunga minphatna tawh kipawl ama’ hauhna tawh kizui-in na kitangsapnate uh a vekpi-in hong dip ding hi” (Philippi 4:19). Hih kamciam pen Pi 30 banga khang tuihualpite suksiat gawp khuapi’ adingin khiatna neilo tawh kibang hi. Ahi zongin hih thapiakna a gen laitak thong sunga om Paul pen haksatna a tuak ngeilo hizenzen lo hi.

Paul in Philippi pawlpi’ tungah sumlepaii a kisap mahmah huna a huhna hangun lungdamkohna lai khak hi. Amah a phawk pen amau’ bek mah hi. Ahi zongin ama’ kisapnate a dim dingin Pasian in amaute zang hi (tg.15). Tua hang mahin ama’ kammalte pen kha thupha namkim i ngahna ahi, i honpa Khris Jesu’ sunga om “Minpha tawh kipawl ama’ hauhna” hong pia Pasian’ tungah khuavak bangin taan hi (Ephesus 1:3). Lungdamna, nopna lemna, thuman thutak leh hotkhiatna cihte ama’ hong piak nate lakah kihel hi. I kisap pen tuis*k ahihleh zong a migitna tawh tuis*k hong s*k ding hi. I Pasian pen itna nei-in ciing hi. PATRICIA RAYBON

Tuni-in kha lamah bang teng kisam kisa na hiam? Bangci taksep ding kisam na hiam?

Pa Pasian, nang’ deihna tawh kizui-in kha thu ah hitaleh nuntakna sungah hitaleh a kisam khempeuh Khris Jesu’ sungah nong dip manin ka lungdam.

Amen

KUMTAWN LAI SIANGTHO|LATE 129-131; 1 CORINTH 11:1-16

28/08/2026

KIGINNI AUGUST 29
PIANCILNA 2:1-7
T**A Pasian in … a nak sungah nuntakna hu sangsuk hi. Tua mi pen leitung nuntakna a nei mihing hong suak pah hi. [PIANCILNA 2:7]
PASIAN’ NUNTAKNA HU
ဘုရားသခင်မှုတ်သွင်းသောအသက်
GOD’S BREATH OF LIFE

Thubulkante’ muhkhiatna ah tui sunga om thankik namkhat pen tui sungah huih dik lo-in minit 20 sung om thei ci uh hi. Hih thankikneu namte ii vun pen balteh bangin tui talsuak hi. Tuipi thukna ah a lut uh ciangin huih puakno khat sangkhia uh a, tua pen a muk tungah belh hi. A pil dan uh pen a muk tunga belh huihpuakno mah dikkikkik uh a, mipilte in tua pen huih a omsa khat a thaka zatkikkikna hiding hi ci uh hi. Hih tui thankikte in hih banga a tumdang hihtheihna nei uh himahleh piansak dangte mah bangin nuntak nading huih a dikkik kul veve hi.

Piancil a lian 2 ah Pasian in “[Adam’] nak sungah nuntakna hu sangsuk hi. Tua mi pen .. nuntakna a nei mihing hong suak pah hi” cih kimu thei hi (tg.7). Pasian in “leitung leh vantunga om na khempeuh a bawl” mah bangin (tg.4), “leivui tawh” mihing zong bawl hi (tg.7). Himahtaleh a piansakte a dimtak a nuntaktheih na’ngin Pasian’ hu kisam sese hi. Ama’n mi masapen pa a nungta mihing suaksak hi. Tua khitteh Adam’ nakguh panin Eve bawl hi (tg.22). Mihingte pen kha ihih manin Khris upna tungtawnin Pasian tawh kilawmta thei hi. Jesu in a nungzuite lamah “a hu sang” a, “Kha Siangtho na sang un” ci hi (John 20:22). Hilhcian sya khat in “Mihingte Pasian tawh a kilawmtat theih na’ngin Kha Siangtho’ humopna pen a omloh phamawh” ci hi.

I naksuk i naktoh khempeuh Pasian hong piak cilesa nuntakna khuttawi ahi hi. Thu-umte ihih manin tua naksuk naktoh pen zong tawntung nuntakna a neite ihihlam leh i sungah nuntakna a pia Kha Siangtho a tenden ihihna a kilangsakte ihi hi (Rome 8:11).
TOM FELTEN

Pasian’ hu sang cih pen nang’ ading bang khiatna nei hiam? Kha Siangtho in kha thu lamah hong bangci nuntaksak hiam?

Itna Pasian, nuntak tawntungna leh na hu nong mop manin ka lungdam lua.
..AMEN...

KUMTAWN LAI SIANGTHO|LATE 126-128; 1 CORINTH 10:19-33

27/08/2026

LAITHAINI AUGUST 28
2 SAMUEL 23:11-12
Shammah in tua munah panmun la hi. [2 SAMUEL 23:12]
PASIAN’ PIAK NGAMNA HANNA
ဘုရားသခင်ပေးသော ရဲစွမ်းသတ္တိ
THE COURAGE GOD GIVES
CEO (company makaipi) in kamkhauh zang ahih manin nasemte lungsim nasak hi. Gene a kipan mi khempeuh in kihta uha dawngkik ngamlo uh hi. Ni khat CEO in nasem thak khat taiigawp ahih manin tua nu kap hi. Inn sungah omte kuamah pau ngamlo-in a daih laitak Gene hong paukhia hi.

Gene in a genkikna ah “Mite na bawl dan pen maanlo hi ci-in ka gen leh tua pen amah a kidawnkik masakna ahih manin lamdang sa peuhmah. Amah bel kikheel tuanlo ahih hang pulak thei ka hih manin ka lungkim” ci hi.

Lai Siangtho sungah mi tampi kihtak tona khat’ mai ah a ding ngam mi khat’ thu om hi. David k*mpi a suah ma-in a galkaphang khat ahi Shammah pen haksatna tampi kawmkalah David’ kiang pai hi (1Samuel 22:1-2 sim in). Pasian in amah zangin Filistia-te zosak hi. “Besan a dimna mun Lehi ah Filistia-te kikaikhawm uh a, Filistia-te kiang panin Israel mite tai uh hi” (2 Samuel 23:11). Shammah bek in Israel-te’ an omna phual hu ngam dal ngam hi. Mi khat bek in Filistia-te do cih pen sih ding kicianzaw a, “Shamah in lolai-ah panmun lai-in a hu hi” (tg.12).

Pasian in Shammah huh a, Filistia-te zosak hi (tg.12). Lolai-a Israel a om pen amah bek hikha thei dinga ahih hang amah guak hilo hi. Pasian in amah ompih a, tua ni-in gualzawhna lianpi pia hi. Midang khempeuh’ pelh tona phinna khat maingat dinga hong kizawt hun omkha ding hi. Shammah mah bangin Pasian’ ompihna muangin i dingkhia ding hi. KAREN HUANG.

Pasian in bangci nam tona maingat dingin hong sam hiam? Hong huh dingin Pasian bangci muan ding na hiam?

Kong it Pa aw, nang’ ading ka dinkipzawh na’ng hanna ngamna hong guan ta in.
..AMEN...

KUMTAN LAI SIANGTHO|LATE 123-125; 1 CORINTH 10:1-18

26/08/2026

LAIZINGNI AUGUST 27
JAMES 4:1-10
Tua ahih manin nomaumah Pasian’ kiangah niamlut un. Dawimangpa langdo un. Tua hileh note’ kiang pan taimang ding hi. [JAMES 4:7]
PASIAN’ UKNA MUN
ဘုရားသခင်စိုးစံရာ
WHERE GOD REIGNS

2018 k*min pasal khat in New York hotel ah zankhat a giak dingin inndei khat kawm hi. A lamdanna khatah tua inndei pen piakhat zong pia lo-in k*m 5 sung zanga tua bang ahihtheih na’ngin innsapna tawh kisai, mi’ theihloh thukhunte s*ksan hi. Ahi zongin a tawpna ah a paikhiat noplohna huhau-in thongkia thei ding dinmun tung hi.

Tua banga a valtaam innsap pa bangin dawimangpa zong i nuntakna sungah i etcik keileh hong thamcip thei hi ci-in James in hong hilhphawngna ah: “Dawimangpa langdo un, tua hileh note’ kiang pan taimang ding hi” (4:7). James in eite’ buaipih det pen a sianglo “lunggulhna” leh “ngaihsut maanlo” pan hideuh a (tg.1,3), tuate pen kiphatsakna, kaingawnna, lungsim sunga belh ngaihsut hoihlote ci hi. Tua siatzolna do zawh nadingin James in zuih ding thu nam nih hong pia hi. Tua pen “Pasian’ kiangah niamlutna” leh “Dawimangpa langdo” ding cih hi (tg.7). Niamlut cih ciangin i nuntakna sunga kihel thu khempeuh Pasian’ kiangah ap cihna hi. Dawimangpa langdo cih ciangin amah bang maha thalawptak gamtang ding cihna hi a, tua’ ading thungetna, tei sinsenin vilna leh Lai Siangtho’ lamlahna kisam hi.

Thukhun tawh kituakin, innsap pa a hawlkhia innteek pa bangin ei’n zong dawimangpa’ siatzolna kizosak lo dingin Pasian’ tha tawh i nolh thei hi. Tua bangin langdo hileng, James in “Note’ kiang panin taimang ding hi” a cih bangin Pasian in gualzawhna hong kamciam hi (tg.7).

Mawhna leh dawimangpa’ huzapna hemkhia-in “Pasian’ kiang zuan” leng (tg.8), T**a’ nopna lemna, lungdamna leh ngimnate i nuntakna sungah a dimzawa hong ten nadinga a phal ihi hi. Pasian’ ukna sungah i galpa thamzo lo hi. MARVIN WILLIAMS

Na nuntakna sung pan “innsap thamte” bangci hepkhiat ding na hiam? Pasian’ kiang niamlutna in hong bangci panpih thei hiam?

Vanglian Pasian, galte’ sawmsimna kiptak ka dozawh na’ng ka nuntakna a bupin nang’ tungah hong ki-apzosak in.
..AMEN...

KUMTAWN LAI SIANGTHO|LATE 120-122; 1 CORINTH 9

25/08/2026

NILAINI AUGUST 26
DANIEL 6:3-7, 9-11
Tua laitak ah tawlet hon sa-in ahih ngei bangin khukdinin mi khatin thum vei ta Pasian’ kiangah thu a ngen hi. [DANIEL 6:10]
THUNGEN NUNTAKNA II VANGLIATNA
အစဥ်မပြတ် ဆုတောင်းခြင်း၏တန်ခိုး
POWER OF CONSISTENT PRAYER

Academy Award a ngah limciing Denzel Washington in khangno limciing pawlkhat’ kiangah nisimin thungetna tawh vai a kipat na’ngun hanthawn hi. Tua bangin ”Zingsang sim khukdin” theih nadingin “Na khedap uh lupna nuai tawngah koih un” ci hi.

Thungetna a hun maanin neihtheih na’ng, geelna thak thak leh a tuamdeuh zong kisam kha dinga ahi zongin hih pen a khangkhangin Pasian’ mite, a diakin, haksatpen hunte-a a thadip, a kemcing zatzia hoih khat ahi hi. Kumpi Darius’ khutnuai-a nasem Daniel’ nuntakzia kimu thei hi. Gam buppi ukin amah kikoih a, minthang pah ahih manin tua in vaihawmpi dangte hehsak hi (6:3). Hazatna tawh Daniel a hepkhiat theih nading a sawmuh hangin mawhna a zontheih sun ding uh pen Daniel ii “A biakna tawh kisai” a thuman cihtakna bek a omlam phawk uh hi (tg.5). Vaihawmpi dangte k*mpipa khembawlin Daniel’ thungetna in thukhun palsat hi a cih laitak nangawnin Daniel in “A hih ngei bangin khukdinin … thungen hi” (tg.10).

Thungen nuntakna cih pen Daniel’ ading Pasian’ thadipna leh nopna lemna a ngah nadingin a kisam khat hi (Late 29:11). A siat nadinga ama’ mawhna zong thuneite a zawh na’ngin tua thungetna in amah huh hi. Tua dan mahin thungetna tawh Pasian’ kiang zuat hun khat maanmaanin lakna leh nisima i masak thu khatin koihna in amah tawh i kizopna hong phungvuh hi. Haksat hun i tuahkhak simin hong thadip ding pen Pasian’ vangliatna mah ahi hi. LISA M. SAMRA

Thunget hun maantaka lakna in na hamsatna sungah hong bangci thadip hiam? Lai Siangtho sunga kigelh thungetna bang nampen in tha hong pia hiam?

Kong it Pa aw, zingsang simin nangma’ thahatna leh hehpihna hong pia den ta in.
..AMEN...

KUMTAWN LAI SIANGTHO|LATE 119:89-176; 1 CORINTH 8

24/08/2026

LAITHAINI AUGUST 25
AMOS 9:2-4, 11-12, 14-15
Amaute ka encik ding hi. [AMOS 9:4]
PASIAN IN NA KHEMPEUH MU
ဘုရားသခင်အားလုံးကို မြင်တွေ့သည်
GOD SEES ALL
Michael leh k*m 5 gual a tanu Grace pen an sai khatah an vaikhak a ngak kawm cimphawngin buhteh kinei uh hi. Grace in ama’ hun ciangin Menu tawh a mai liahsakziau ahih manin Machael a nuihza mahmah hi. Ama’n a pa mu kei peuh leh a pa’n amah a mulo ding sa hi. Tua laitak nuihzahuai tawh a kibat hangin tua thu ka nung ngaihsutteh a thugil khat kihel ahihlam ka phawk hi. Pasian’ kiang pan i mawhnate kisel thei ding kisa ihi hiam? Ei’n amah mu kei peuhleng ama’n zong ei hong mulo ding ci-in i ngaihsunkha hiam?

Amos 9 ah hih dan thu khat kigen hi. Pasian in kamsangpa’ tungtawnin Israel mite’ kiangah mawh thukhenna pan a suakta ding a kisakkhakloh na’ngun hilhphawng hi. “A buk uh hangin amaute zongin ka mankhia ding hi” ci-a “amaute ka encik ding hi” ci hi (tg.3-4). Na khempeuh mu-in, na khempeuh a thei Pasian’ muhna pan kuamah suakta lo hi.

Ahi zongin tua hilhphawnna pen lametna thu tawh tonkhawm hi. Aneu 11-15 ah Pasian in puahkik ding ci-in kamciam pia hi: “A siasa David ukna gam keimah in ka puahkik dinga a vang teng hu-in, a sia teng ka puahkik ding hi” (tg.11). Pasian’ mite pen amau’ mawhna nunggute a thuak khit uh ciangin bawlhoihna ngah ding uh a, thupha tampi kipia ding hi (tg.13-15).

Pasian in i cinlahnate hong muh mah bangin i kis*knate zong mu-a maisak dingin leh puahpha dingin a baihsa-in om hi. Hih thuman thutak tawh tha la-in thukhualna leh hehpihna tawh kidim a siangtho a thuman i Pasian pom cinten ni. LESLIE KOH

Bang mawhnate tawh kinawkkha na hiam? Hong puahphakik dingin Pasian in hong ngakna bangci dawntuah sawm na hiam?

Na khempeuh a thei Pasian, nang’ kiang pan ka ngaihsut, ka lungphawn, ka kampau, ka gamtat a kisel thei khat zong om lo hi. Ka lametna nang’ sung bek ahih manin na thukhualna leh hehpihna hangin ka lungdam.
..AMEN...

KUMTAWN LAI SIANGTHO|LATE 119:1-88; 1 CORINTH 7:20-40

Address

Tedim Baptist Church/Yangon
Yangon
11111

Website

Alerts

Be the first to know and let us send you an email when Nisim Thalakna posts news and promotions. Your email address will not be used for any other purpose, and you can unsubscribe at any time.

Shortcuts

Share

Category