26/10/2024
၃၀ ကြိမ်မြောက် သာမန်တနင်္ဂနွေနေ့ (၂၀၂၄)
ဩဝါဒ
၃၀ ကြိမ်မြောက် သာမန်တနင်္ဂနွေနေ့ (၂၀၂၄)
ချစ်လှစွာသော ယုံကြည်သူဓမ္မမိတ်ဆွေအပေါင်းတို့၊ ယနေ့ ၃၀ ကြိမ်မြောက် သာမန်တနင်္ဂနွေနေ့မှာ ကျွန်ုပ်တို့ ကြားနာ ထောက်ရှုရသည့်ကျမ်းသုံးကျမ်း ရှိပါတယ်။ ပထမကျမ်းကို ပရော်ဖက်ကြီး ဂျေရမိယ (ယေရမိ)ကျမ်းမှ ကောက်နုတ်ထားပြီး အစ္စရေးလူမျိုးတို့ကို ပြည်တော်ပြန်ဖို့ ဘုရားသခင် ကယ်တင်တော်မူသောကြောင့် ရွှင်လန်းစွာ သီချင်းဆိုကြလော့ဆိုပြီး မျှော်လင့်ခြင်းတို့ပြည့်ဝ၍ ဝမ်းမြောက်စရာသတင်းကောင်းကို ကြားနာရပါတယ်။ ဒုတိယကျမ်းကိုတော့ သံပေါလူး၏ ဟေဗြဲမြို့သားတို့ထံ ရေးသောစာမှ ကောက်နုတ်ထားပြီး ရဟန်းချုပ်အကြောင်းကို ပြောဆိုထားပါတယ်။ အဲဒီ ရဟန်းချုပ်သည် မိမိကိုယ်တိုင်၌ပင် အားနည်းချက်အမျိုးမျိုးရှိသဖြင့် အသိပညာကင်းမဲ့သည့် ဆိုးသွမ်းသူတို့အား ကြင်နာစွာ ဆက်ဆံနိုင်စွမ်းရှိသည်ဟု ဆိုပါတယ်။ ထို့နောက် ခရစ်တော်ကို ဘုရားသခင်မှ ၎င်းရဟန်းချုပ်နေရာကို ခန့်အပ်တော်မူကြောင်းကို ကြေငြာထားပါတယ်။ တတိယကျမ်းဖြစ်တဲ့ ဧဝံဂေလိကျမ်းကိုတော့ သံမာကုကျမ်းမှ ကောက်နုတ်ထားပြီး မျက်မမြင်ဘာတီမေဦးကို စက္ကုအလင်းပေးကုသ၍ ဝမ်းမြောက်စေခဲ့ပါတယ်။ ထို့အပြင် အဲဒီလို တန်ခိုးလက္ခဏာနဲ့ ကုသခြင်းဟာ ကာယကံရှင်ရဲ့ ယုံကြည်ခြင်းကြောင့် ဖြစ်တယ်လို့ မိန့်ဆိုခဲ့ပါတယ်။ ဒါ့ကြောင့် ခရစ်တော်က “သင်၏ယုံကြည်ခြင်း သင့်ကိုကယ်တင်တော်မူပြီ” ဟု မိန့်ဆိုခဲ့ပါတယ်။ ဤကျမ်းသုံးကျမ်းကို တရားထောက်ရှုခြင်းအားဖြင့် ကျွန်ုပ်တို့ရဲ့ ယုံကြည်ခြင်းနှင့် မျှော်လင့်ခြင်းကို ကျွန်ုပ်တို့ရဲ့ရဟန်းချုပ်ဖြစ်သော ခရစ်တော်ဘုရားရှင်၌ ထားရှိကြဖို့ တရားမှတ်ယူရပါတယ်။
ဒီနေ့ ဂျေရမိယရဲ့ ကျမ်းကို အဓိက တရားမှတ် ခွန်အားယူစေချင်ပါတယ်။ ဘာကြောင့်လဲဆိုတော့ ယနေ့ ကျွန်ုပ်တို့ ကြုံတွေ့နေရတဲ့ အတွေ့အကြုံနဲ့ တစ်ထပ်တည်းကျနေလို့ပါပဲ။ ဂျေရမိယရဲ့ သတင်းကောင်းပါးတဲ့အချိန်မှာ အစ္စရေးလူမျိုးတွေဟာ တိုင်းတစ်ပါးလက်အောက်မှာ တကွဲတပြားစီဖြစ်နေပြီး ဒုက္ခအမျိုးမျိုးနဲ့ ရင်ဆိုင်နေရပါတယ်။ လွတ်လတ်ခြင်းမရှိသလို မိမိနေရပ်ပြန်ရဖို့လည်း ဝေးနေချိန် ဖြစ်ပါတယ်။ အရာရာဆုံးရှုံးလို့ အနာဂတ်မဲ့ချိန်၊ မျှော်လင့်ချက် ကင်းမဲ့နေချိန် ဖြစ်ပါတယ်။
ဒီအစ္စရေးလူမျိုးတွေလိုပါပဲ။ ဒီနေ့ ကျွန်ုပ်တို့ရဲ့ နိုင်ငံသူ/သားများစွာဟာ အရာရာဆုံးရှုံးလို့ အနာဂတ်မဲ့နေကြပါတယ်။ လွတ်လပ်မှုပျောက်ဆုံးပြီး တရားမျှတမှုလည်း ကင်းမဲ့နေပါတယ်။ အဲဒီအစား ရက်စက်ကြမ်းကြုတ်မှုတွေနဲ့ နှိပ်စက်ခြင်းတွေကို ခါးစည်းခံနေရပါတယ်။ စစ်ပွဲများကြောင့် အိုးအိမ်တွေ မတရားဆုံးရှုံးကြရတယ်။ အသက်တွေ တန်ဖိုးမဲ့စွာ ဆုံးရှုံးနေရတယ်။ နေရပ်စွန့်ခွာပြီး မလုံမခြုံ ခိုလှုံနေကြရတယ်။ လူ့ဂုဏ်သိက္ခာတွေ ပျောက်ဆုံးနေရတယ်။ လူငယ်များစွာ အနာဂတ်ပျောက်သွားတယ်။ မျှော်လင့်ချက် မဲ့လာကြတယ်။
ဒီလိုအချိန်မှာ ဂျေရမိယရဲ့ မျှော်လင့်ခြင်းနဲ့ ဝမ်းမြောက်စရာသတင်းကောင်းကို လက်တွေ့ကျကျ ကြားရမယ်ဆိုရင် ကျွန်ုပ်တို့ ဘယ်လောက်ထိ ဝမ်းသာမိမလဲဆိုတာ တွေးမိပါတယ်။ စာနာမိပါတယ်။
ဂျေရမိယရဲ့ သတင်းကောင်းမှာ “ထာဝရဘုရားမိန့်ဆိုသည်ကား ယာကုပ်အမျိုးတို့ ရွှင်လန်းစွာ သီချင်းဆိုကြလော့။ ကိုယ်တော်၏လူမျိုးဟူသော အစ္စရေးအမျိုးတို့ကို ကယ်တင်တော်မူပြီ။ သူတို့ကို မြောက်ပြည်မှ ငါဆောင်ခဲ့၍ မြေကြီးစွန်းမှ သိမ်းမည်။ မျက်စိကန်းသောသူ၊ ခြေမစွမ်းသောသူ၊ ကလေးငယ်များနှင့် အမျိုးသမီးများပါလျက် အားလုံးကို ကယ်တင်မည်။ ဆုတောင်းပတ္ထနာပြုသော ထိုသူတို့ကို ငါပို့ဆောင်မည်။... အရပ်ရပ်သို့ ကွဲပြားလျက်ရှိသော လူမျိုးစုတို့ကို တဖန်စုစည်း၍ သိုးထိန်းသည် မိမိသိုးစုကို စောင့်ရှောက်သကဲ့သို့ ကိုယ်တော်သည် စောင့်ရှောက်တော်မူမည်။ သူတို့ထက် အင်အားကြီးသော လူ၏လက်မှ သူတို့ကို ကယ်လွှတ်တော်မူပါပြီ။”
မျှော်လင့်ခြင်းခွန်အားတို့ ပြည့်စုံနေတဲ့ သတင်းစကားဖြစ်ပါတယ်။ မကြာမီ ဒီလိုသတင်းစကားဟာ ဒုက္ခအမျိုးမျိုးခံစားနေရတဲ့ ကျွန်ုပ်တို့ဆီကို ရောက်လာတော့မှာ ဖြစ်ပါတယ်။ ဒါကို ယုံကြည်ခြင်းနဲ့ ဆက်လက် ဆုတောင်း၍ ကိုယ်လုပ်စရာရှိတာတွေကို ဆက်လုပ်နေကြရမှာ ဖြစ်ပါတယ်။ ကျွန်ုပ်တို့ရဲ့ ပန်းတိုင်အတွက် ယုံကြည်ချက်ဟာ အခြေခံနဲ့ အဓိက ဖြစ်ပါတယ်။
ယုံကြည်ခြင်းဆိုတာ မိမိမျှော်လင့်သောအရာများကို စိတ်ချသေချာခြင်းဖြစ်တယ်လို့ ဆိုပါတယ်။ ကျွန်ုပ်တို့ကို မျှော်လင့်ထားတဲ့ ပန်းတိုင်၊ တရားမျှတမှုနှင့် ငြိမ်းချမ်းသော ပန်းတိုင်ကို ရောက်ရှိဖို့ ယုံကြည်ရာတွေ ပျောက်သွားလို့ မရပါဘူး။ ကိုယ်ကျင့်တရားတွေ ပျောက်သွားလို့ မရဘူး။ ခံယူချက်ကောင်းတွေ ပျက်စီးသွားလို့ မရဘူး။ အဲဒီလို ယုံကြည်ချက်ကောင်းတွေကို ခိုင်ခိုင်မာမာ ကိုင်စွဲရင်း မျှော်လင့်ချက်နဲ့ လုပ်ဆောင်ကြတဲ့အခါ မျှော်လင့်ထားတဲ့အတိုင်း ဖြစ်လာမှာပါ။
ဒီနေ့ ဧဝံဂေလိကျမ်းထဲက ဘာတီမေဦးဟာ မျက်စိကုသခြင်းရလို့ ယုံကြည်ခဲ့တာ မဟုတ်ပါဘူး။ သူဟာ အရင်ယုံကြည်ခဲ့လို့ ကုသခြင်းခံခဲ့ရတာဖြစ်ပါတယ်။ ကျွန်ုပ်တို့ဘဝမှာ ဘာတီမေဦးလို မျက်စိအလင်း မကွယ်ဖူးဘူးဆိုရင်တောင် စိတ်ပိုင်းဆိုင်ရာ အလင်းပျောက်ကွယ်နေတတ်ပါတယ်။ ကိုယ့်ကျင့်တရားအလင်း ပျောက်ကွက်နေတတ်ပါတယ်။ တရားမျှတမှုအလင်း၊ စာနာမှုအလင်း ပျောက်ကွယ်နေတတ်ပါတယ်။ မျှော်လင့်ချက် အလင်းပျောက်ကွယ်နေတတ်ပါတယ်။ ဝိညာဉ်အလင်း ပျောက်ကွယ်နေတတ်ပါတယ်။ တရားဓမ္မအလင်း ပျောက်ကွယ်နေတတ်ပါတယ်။ ဒီနေ့ ပျောက်ကွယ်နေတဲ့ အလင်းကို ပြန်လည်ရရှိအောင် ဘာတီမေဦးလိုပဲ “ဒါဝိဒ်၏သား အကျွန်ုပ်ကို သနားပါ”လို့ ချည်းကပ်ဆုတောင်းကြပါစို့။
အလင်းရှင်ခရစ်တော်ဘုရားသည် ကျွန်ုပ်လောက ပျောက်ဆုံးနေသော အလင်းကျေးဇူး၊ သမ္မာတရားအလင်းကို အမြန်ဆုံး ကုသပေးပါစေ။ အာမင်။
ဒိုမီနီကန်ကိုယ်တော်
