30/07/2024
“ သေခြင်းတရားဆိုတဲ့ကိစ္စကြီးကို
ပြေပြေလည်လည်ရင်ဆိုင်နိုင်ဖို့ဆိုတာ
တော်ရုံအရည်အသွေးနဲ့မရနိုင်ပါဘူး “
ကိုယ်ချစ်ရတဲ့သူတစ်ယောက်နဲ့
သေကွဲကွဲရတယ်ဆိုတာက
ကိုယ့်ဘဝရဲ့အစိတ်အပိုင်းတစ်ခုပဲ
ပျက်စီးဆုံးရှုံးသွားတာနော်၊
ကိုယ်သေပြီဆိုရင်တော့
ကိုယ့်ဘဝတစ်ခုလုံးပျက်စီးသွားတာပါ၊
ဒါလေးကိုကွဲပြားအောင်သိစေချင်တယ်။
ကိုယ်တိုင်ပျက်စီးသွားပြီဆိုတဲ့
အခြေအနေကိုစဉ်းစားကြည့်လိုက်၊
ဘဝရော၊ပိုင်ဆိုင်မှုတွေရော၊
ကိုယ်နဲ့ပတ်သက်တာမှန်သမျှအားလုံး
ဘာမှမကျန်တော့ဘူး၊ဟုတ်လား..?
ဒါကို တချို့သောပုဂ္ဂိုလ်တွေက
သေခြင်းတရားဆိုတာကြီးကို
သေသေခြာခြာသဘောမပေါက်ပဲနဲ့
“ သေတစ်နေ့ မွေးတစ်နေ့ပေါ့ကွာ “တဲ့။
သေခြင်းတရားဆိုတာကြီးကို
ပြေပြေလည်လည် ရင်ဆိုင်နိုင်ဖို့ဆိုတာ
တော်ရုံအရည်အသွေးနဲ့မရပါဘူး၊
ဘုန်းဘုန်းကတော့ မရဘူးလို့ပဲထင်တယ်၊
ကိုယ့်ရဲ့ပိုင်ဆိုင်မှုတစ်ဝက်လောက်ကို
စိတ်ကူးနဲ့ပဲဆုံးရှုံးကြည့်လိုက်၊
စိတ်ကို မထိခိုက်နိုင်ဘူးလား..?
နည်းနည်းလောက်ပျက်စီးတာတောင်
မခံနိုင်ကြဘူးဆိုရင်
ဘဝတစ်ခုလုံးပျက်စီးရတော့မဲ့ကာလမျိုးမှာ
ကိုယ့်ကိုယ်ကို ငါခံနိုင်လိမ့်မယ်လို့
ဘာကြောင့် အထင်ကြီးနေတာလဲ..?
တော်ရုံအသိဉာဏ်ရှိရုံလောက်နဲ့တော့
မလွယ်ဘူးလို့ထင်ပါတယ်။
အဲဒီတော့ သေခြာပေါက်ပျက်စီးရမဲ့ကိစ္စကြီးကို
ဘုန်းဘုန်းတို့ ဘယ်လိုရင်ဆိုင်ကြမလဲဆိုရင်
ငါဟာ ပျက်စီးရမဲ့ဘဝကိုရထားတာ၊
ငါဟာ သေလူတစ်ယောက်ပဲ၊
ငါ့ရဲ့ရှင်သန်ခြင်းဟာ တည်မြဲတာမဟုတ်ဘူး၊
သေဆုံးခြင်းသာလျှင် မြဲတယ်၊
ငါသာလျှင်မဟုတ်ဘူး၊သတ္တဝါအားလုံးဟာ
သေမျိုးသေနွယ်တွေချည်းပဲလို့
ဘဝရဲ့ပျက်စီးခြင်းအမှန်တရားကို
စဉ်းစားလိုက်မယ်ဆိုရင် အကျိုးကျေးဇူးတွေ
မြောက်များစွာကိုရနိုင်ပါတယ်တဲ့။
အဲဒီ အကျိုးကျေးဇူးများစွာအနက်က
ထင်ရှားတဲ့အကျိုး(၂)မျိုးကတော့-
မကောင်းမှုကိုထိတ်လန့်တဲ့သဘော၊
ကောင်းမှုကိုမြတ်နိုးတဲ့သဘောလေးတွေ
အလိုအလျောက်ဖြစ်လာနိုင်တယ်နော်။
ရှင်းရှင်းပြောရရင်
သေခြင်းကိုစဉ်းစားဆင်ခြင်မယ်ဆိုရင်
မကောင်းမှုကိုလုပ်ဖို့ထိတ်လန့်တယ်၊
ကြောက်ရွံ့တယ်၊မလုပ်ဝံ့တော့ဘူး၊
ကောင်းမှုကိုမြတ်နိုးတဲ့စိတ်၊
ဆောင်ရွက်လိုစိတ်တွေထက်သန်လာတယ်၊
အဲဒါသည် ဘဝရဲ့အရေးအကြီးဆုံးပဲနော်။
သစ္စာရွှေစည်ဆရာတော်🙏🙏🙏
