12/05/2026
“မိခင်များနှင့်ဆိုင်သောအချက်(၃)ချက်”
သမ္မာကျမ်းစာထဲမှာ သားသမီးတွေနှင့်ပတ်သက်ပြီး မိခင်ဖြစ်သူတွေလုပ်ဆောင်ခဲ့ကြတဲ့အချက်တွေကို ဆင်ခြင်ကြည့်ရင်
(၁)ဘုရားသခင်က မိခင်တွေကို သားသမီးနှင့်ပတ်သက်သော အရာကို ပြောပြလေ့ရှိတယ်။
တရားသူကြီးမှတ်စာထဲမှာ ဒန်အမျိုး၊ဇောရာမြို့သား မာနော်ရဲ့ဇနီးဖြစ်သူက သားမဖွါးပဲ မြုံနေတဲ့သူဖြစ်တယ်။ဒါပေမယ့် တစ်ရက်မှာ မာနော်ရဲ့ဇနီးဖြစ်သူထံကို ဘုရားသခင်ရဲ့ကောင်းကင်တမန်ရောက်လာပြီး သင်ဟာ မြုံနေလို့ သားမဖွါးနိုင်ပေမယ့် ယခုမှစ ပဋိသန္ဓေယူပြီး သားယောကျ်ားကို ဘွားမြင်လိမ့်မယ်လို့ လာပြောတယ်။
မွေးလာမယ့်သားက အမိဝမ်းထဲကနေစပြီး ဘုရားသခင်ရဲ့နာဇရိလူအဖြစ်မွေးလာမှာဖြစ်တယ်။နာဇရိလူဆိုတာက ဘုရားသခင်ရဲ့ သီးသန့်ခွဲခြားခြင်းခံရသူ၊ဆက်ကပ်အပ်နှံခြင်းခံရသူဖြစ်တယ်။
နာဇရိလူအဖြစ် အဲဒီကလေးက မိခင်ရဲ့ဝမ်းထဲမှာရှိနေချိန်မှာ မိခင်ဖြစ်သူက စပျစ်ရည်၊သေရည်သေရက်နှင့် မစင်ကြယ်သောအစာကို စားခွင့်မရှိသလို၊မွေးလာမယ့်ကလေးလေးကိုလဲ မွေးလာကတည်းက ဆံပင်ရိတ်ခြင်းကိုမပြုလုပ်ရဘူးဆိုတဲ့အကြောင်း လိုက်နာကျင့်ဆောင်ရမယ့်အချက်တွေကို ကောင်းကင်တမန်က မာနော်ရဲ့ဇနီးကိုပြောပြထားတယ်။
ကြုံရတဲ့အကြောင်းအရာကို ခင်ပွန်းဖြစ်သူ မာနော်ကို ဇနီးဖြစ်သူက ပြန်ပြောပြထားတယ်။မာနော်ကလည်း ဘွားမြင်လာမယ့်ကလေးနှင့်ပတ်သက်လို့ ဘယ်လိုသွန်သင်ပြုစုရမလဲဆိုတာ ကောင်းကင်တမန်ကို ထပ်စေလွှတ်ပေးပြီး ပြောပြစေဖို့ ဘုရားသခင်ဆီမှာဆုတောင်းတဲ့အခါ ဘုရားက ကောင်းကင်တမန်ကို ထပ်စေလွှတ်ပြီး ပြန်ပြောပြစေခဲ့တယ်။
မိဘနှင့်သားသမီးတွေအကြားမှာ ဖခင်ဖြစ်သူထက် မိခင်ဖြစ်သူက သားသမီးတွေနှင့်အမြဲရှိနေတတ်သူတွေဖြစ်လို့ ဘုရားသခင်က မိခင်ဖြစ်သူဆီကို လာစကားပြောတာဖြစ်တယ်။ယုံကြည်သူမိခင်တွေဟာ မိမိရဲ့အတွေ့အကြုံ၊မိမိဖြစ်စေချင်တဲ့ဆန္ဒတွေအတိုင်း သားသမီးတွေကို ပုံသွင်းတဲ့သူတွေမဖြစ်ပဲ သားသမီးတွေကို ဘယ်လိုပြုစုပျိုးထောင်ရမယ်ဆိုတဲ့အချက်နှင့်ပတ်သက်ပြီး ဘုရားသခင်ထံက သွန်သင်ချက်တောင်းခံသူ၊ဉာဏ်ပညာတောင်းခံဆုတောင်းတတ်သောမိခင်တွေဖြစ်ဖို့ အရမ်းလိုအပ်တာဖြစ်တယ်။
၂။သားသမီးတွေနှင့်ပတ်သက်ရင် မှတ်ထားတတ်တဲ့မိခင်တွေဖြစ်တယ်။
ကိုယ်မွေးထားတဲ့ သားသမီးတွေနှင့်ပတ်သက်ပြီး သူတို့ရဲ့အသေးစိတ်အကြောင်းအရာတွေကစ သိရှိထားတတ်တာက မိခင်တွေဖြစ်တယ်။
သခင်ယေရှုနှင့်ပတ်သက်လို့ ဘွားမြင်တဲ့အချိန်မှာ သိုးထိန်းတွေက လာရောက်ဖူးမြော်တာ၊မိဘတွေနှင့်အတူတူ ဗိမာန်တော်မှာသွားတဲ့အချိန် သခင်ယေရှုက ကျန်ခဲ့ပြီး ဖာရိရှဲတွေနှင့်ပြောဆိုဆွေးနွေးခဲ့တာတွေကို မိခင်ဖြစ်သူမာရိက သူ့ရဲ့နှလုံးသားထဲမှာ မှတ်ထားတယ်။
သားသမီးတွေရဲ့ရှင်သန်ကြီးထွားမှု၊နေထိုင်ပြောဆိုမှုအစုစုကို မိခင်တွေက သိထားတာဖြစ်တယ်။သားသမီးတစ်ယောက်စီတိုင်းမှာရှိတဲ့ အားသာချက်တွေကို ဆက်ပြီးထိန်းသိမ်းဖို့ သူတို့ကို အသိအမှတ်ပြုသွန်သင်ပေးဖို့လိုအပ်သလို ၊အားနည်းချက်ဖြစ်တဲ့ ပြင်ဆင်ရမယ့်အချက်တွေကိုလဲ လမ်းကြောင်းမှန်ပေါ်ပြန်ရောက်ဖို့ ပြန်လည်တည့်မတ်ပြုပြင်ပေးတတ်တဲ့ ယုံကြည်သူမိခင်တွေဖြစ်ရမယ်။
ကိုယ်ဖြစ်ချင်တာတွေအတွက် သားသမီးတွေကို ပုံသွင်းတဲ့သူမဟုတ်ပဲ သားသမီးဖြစ်ချင်တဲ့အရာကို လမ်းကြောင်းမှန်အတိုင်း ပေါက်မြောက်ထူးချွန်သူတွေဖြစ်လာဖို့ မြေတောင်မြှောက်ပေးတတ်သူတွေဖြစ်ဖို့ အရမ်းလိုအပ်တာဖြစ်တယ်။
၃။သားသမီးတွေနှင့်ပတ်သက်လို့ မှတ်သားထားတဲ့အရာတွေကို ဆက်လက်သွန်သင်ပေးပါ။
ရှင်ပေါလုက သူ့ရဲ့ သားတပည့်ဖြစ်သူတိမောသေနှင့်ပတ်သက်ပြီး ဘယ်လိုမီးမောင်းထိုးဖော်ပြထားသလဲဆိုရင် “သင်၏အဘွားလောဣ၊အမိဉနိတ်၌ အရင်တည်သော ယုံကြည်ခြင်းတည်းဟူသော၊ငါသဘောကျသည်အတိုင်း သင်၌လည်းတည်သော ယုံကြည်ခြင်းစစ်”လို့ ဖော်ပြထားတာကို တွေ့ရတယ်။
တိမောသေရဲ့ မိခင်ဖြစ်သူ ဉနိတ်က ယုဒအမျိုးဖြစ်ပြီး ဖခင်ဖြစ်သူက ဟေလသလူမျိုးဖြစ်တယ်။
တံပိုးမညီတဲ့မိသားစုဖြစ်ပေမယ့် ငယ်ငယ်ရွယ်ရွယ်နှင့်အောင်မြင်သောအမှုတော်ဆောင်ဖြစ်လာခဲ့သူ တိမောသေရဲ့နောက်ကွယ်မှာ ပထမရာစုက ဘုရားကိုယုံကြည်သူတွေဖြစ်တဲ့ အဖွါးနှင့်မိခင်ဖြစ်သူကြောင့်ဖြစ်တယ်။ အဲ့ဒါအပြင် ဘုရားကို အမှန်တကယ်ချစ်ပြီး အမှုတော်အတွက်ဆက်ကပ်သူ ဆရာသမားကောင်းဖြစ်တဲ့ ရှင်ပေါလုရဲ့ သွန်သင်လမ်းပြမှုတွေကလဲ တိမောသေကို အောင်မြင်သောအမှုတော်ဆောင်ဖြစ်ဖို့ ပိုပြီး အားကောင်းစေခဲ့တာဖြစ်တယ်။
ကလေးအရွယ်ကတည်းက မိခင်ဖြစ်သူ ဉနိတ်က ဘုရားကို ဘယ်လိုကိုးကွယ်ယုံကြည်ရမယ်ဆိုတာ အချိန်တိုင်းမှာ သားဖြစ်သူကို သွန်သင်သင်ပြပေးခဲ့တာဖြစ်သလို ၊အဖွါးဖြစ်သူကလဲ မြေးဖြစ်သူကို ယုံကြည်ခြင်းနှင့်ပတ်သက်လို့ သွန်သင်ပေးခဲ့သူဖြစ်တယ်။
ယုံကြည်သူဖြစ်တဲ့မိခင်တွေက သားသမီးတွေကို ယုံကြည်ခြင်းကို အမွေလက်ဆင့်ကမ်းပေးသူတွေဖြစ်ရမယ်။သားသမီးတိုင်းကို ငယ်ကတည်းက ဘုရားရဲ့နှုတ်ကပတ်တော်နှင့်ပုံသွင်းသူဖြစ်ရမယ့်အပြင် သမ္မာတရားမှာ ကြီးထွားရင့်ကျက်စေသော ဆရာသမားလက်ထဲ အပ်တတ်သူဖြစ်ဖို့ အရမ်းကို အရေးကြီးတာဖြစ်တယ်။
ယုံကြည်ခြင်းအမွေအနှစ်ကို သားသမီးများအားအမွေပေးခြင်း၊ဘုရားကို ပထမဉီးစားပေးအသက်ရှင်တတ်စေရန် သားသမီးများကို သွန်သင်ပေးခြင်းဖြင့် ဘုရားရှေ့၊လူရှေ့မျက်နှာသာရသော၊မိဘများကို ဝမ်းမြောက်စေသောသားသမီးများပိုင်ဆိုင်သော မိခင်များအဖြစ် ဘုရားရှင်ကောင်းကြီးပေးပါစေ။
အခြေပြုကျမ်း။(တရားသူကြီး၊၁၃:၂-၄။ လု၊၂:၁၉။ လု၊၂:၅။ ၂တိ၊၁:၅။ တ၊၁၆:၁-၂။)
Pastor Moses Walter
Sunday Worship Service
MGC (Nay Pyi Taw)
10th May, 2026
