နှလုံးသားအာဟာရ

17/08/2026

🚦ဆင်းရဲမှာကြောက်ရင် မနှမြောနဲ့
နှမြောတဲ့သူဟာ ဆင်းရဲတတ်တယ်။
နှမြောတာ့ မပေး၊ မပေးတော့ မရ၊
ဒါ သဘာဝပဲ။ဒါနမရှိသူဟာ ဆင်းရဲတယ်။

🚦ရုပ်ဆိုးမှာကြောက်ရင် ဒေါသမကြီးနဲ့။
ဒေါသကြီးတဲ့သူဟာ ရုပ်ဆိုးတတ်တယ်။

🚦ဘဝအဆင့်နိမ့်မှာကြောက်ရင် မာနမကြီးနဲ့။
မာနကြီးတဲ့သူဟာ အမျိုးနိမ့်ဘဝတို၊
တိရစ္ဆာန်ဘဝတို့ ရောက်တတ်တယ်။

🚦အထီးကျန်မှာကြောက်ရင် မနာလိုစိတ်
မများနဲ့။ မနာလိုစိတ်များတဲ့သူဟာ
အထီးကျန်တတ်တယ်။

🚦ဉာဏ်ထိုင်းမှာကြောက်ရင် မေးဖို့
ဝန်မလေးနဲ့။ မမေးတဲ့သူဟာ မသိဘဲ
ထိုင်းသွားတတ်တယ်။

🚦ရောဂါထူမှာကြောက်ရင် မညှင်းဆဲမနှိက်စက်နဲ့။
သူတပါးကိုညှင်းဆဲနှိပ်စက်တဲ့သူဟာ ရောဂါထူတတ်တယ်။

🚦 အသက်တိုမှာကြောက်ရင် သူများအသက်မသတ်နဲ့။
သူ့တပါးအသက်ကို သတ်တဲ့သူဟာ အသက်တိုတတ်တယ်။

ကျမ်းကိုး- စူဠကမ္မဝိဘင်္ဂသုတ်
(မနာပဒါယီဆရာတော်အရှင်ဝိစိတ္တ)

#တရားတော်များ #နာယူမှတ်သားနိုင်ကြပါစေ🙏🙏🙏 #တရားအသိဖြင့်ဘ၀တွေအေးချမ်းကြပါစေ #ဘေးအန္တရာယ်ကင်းကြပါစေ🙏🙏🙏 #ကြီးပွားတိုးတက်န်ိုင်ကြပါစေ

17/08/2026

မိဘနဲ့ ရှိနေတဲ့အချိန်မှာ၊
မိဘအသက်ရှိနေတဲ့အချိန်မှာ မိဘနဲ့ ရန်ဖြစ်၊
မိဘပေးတာကို သတိမထားဘူး။
မိဘက မပေးတဲ့ဟာပဲ
သတိထားမိတယ်ဆိုရင်
စိတ်ထဲမှာ toxin - အဆိပ် ဖြစ်နေတယ်။

ဘယ်မိဘမှ အကုန်လုံး ပေးနိုင်တယ်ဆိုတာ မရှိပါဘူး။
ပိုက်ဆံပေးနိုင်ရင်
တစ်ချို့က နွေးထွေးမှုမပေးနိုင်ဘူး။
အပြည့်အစုံမပေးနိုင်ဘူး။

အဲ့ဒီမပေးတာကိုပဲ
ကိုယ့်စိတ်ထဲမှာ စွဲကပ်နေတယ်။
ပေးတာကိုကျတော့ စိတ်ထဲမှာ
အသိအမှတ်မပြုဘူးဆိုရင်
စိတ်ထဲမှာ toxin အဆိပ်တွေရှိနေတယ်။
ဒါလေးကို အရင်ဆေးကြောရမယ်။
Purify လုပ်ရမယ်။

အောက်စဖိုဒ့်ဆရာတော်
စိတ်ချမ်းသာမှုဘယ်မှာရှိသလဲ တရားတော်
ဓမ္မဒါန -ဆရာတော်ဓမ္မcollections

16/08/2026

"ယသော်ဓရာထေရီရဲ့ ပါရမီဖြည့်ဘက်နှလုံးသား”
••••••••••••••••••••🌺••••••••••••••••••••••

မိထွေးတော်နှင့် သာကီဝင်မင်းသမီးတို့
ဘိက္ခုနီဝတ်ခွင့်ရကြောင်းကို ယသော်ဓရာ ကြားသိခဲ့သည်။
သို့သော် ယသော်ဓရာ၏ အသံတို့သည် တိတ်ဆိတ်
ငြိမ်သက်နေဆဲ တဖြည်းဖြည်း အတွေးတွေ ဝင်လာနေ၏။

မောင်တော်ဘုရား၏ ကိုယ်ပွားအဖြစ်
သားတော်ရာဟုလာကို အချစ်တွေ့ပုံရခဲ့သည်။
သားတော်ကို အားကိုးခဲ့သည်။ မျှော်လင့်ခဲ့သည်။
မိမိ၏ ဘဝ၌ အရေးပါဆုံးသူအဖြစ် ယုံကြည်မိခဲ့သည်။
ကပိလဝတ်၏ထီးနန်းသည် သားတော်ရာဟုလာ၏
လက်ထဲတွင် ရှိရလိမ့်မည်ဟု ထင်ထားခဲ့သည်။

တစ်ချိန်က ကပိလဝတ်နန်းတွင်း၌ တွေ့မြင်နေကျ
မျက်နှာများမှာ အလျှိုလျှို ထွက်ခွါသွားကြပြီ။
ထိုသူတို့၏ အမူအရာ အသွင်သဏ္ဍာန်တွေ
တစ်စတစ်လေမျှပင် မတွေ့ရတော့။
အယုတ်ဆုံးထို သူများ၏အငွေ့အသက်ပင်
နန်းတော်၌ မကျန်ရစ်ကြ။
ယောက်မတော် ဇနပဒကလျာဏီလည်း
မယ်တော်ရင်း ဂေါတမီထံ၌ ဘိက္ခုနီဖြစ်သွားခဲ့ပြီ။

တကယ်တမ်းတွင် ကပိလဝတ်ပြည်နန်းတော်ထဲမှာ
မိမိတစ်ယောက်တည်းသာ ကျန်နေသည်။
ကပိလဝတ်ကို စိုးစံမည့်သူ ဘယ်သူလဲ…။
ထီးနန်းကို အုပ်စိုးဆက်ခံမည့်သူ အဘယ်နေရာက
ရောက်လာမည်လဲ။ ယသော်ဓရာ ရင်တွင်းဝယ် တင်းကျပ်လာသည်။
စိုးရိမ်တုန်လှုပ်လာသည်။
အတွေးများ၌ ထိတ်လန့်စရာများ နှောကာရေရွတ်မိ၏။

အို… ဘုန်းတော်ကြီးလွန်းပါတဲ့ မောင်တော်အရှင်ဘုရား။
အရှင်ဘုရားရဲ့အတုနှိုင်းမရှိတဲ့ ဉာဏ်တော်ဟာ
သတ္တဝါတွေ အတွက်တဲ့လား။
အရှင်ဘုရားရဲ့အနတ္တတရားဟာ အရာအားလုံး
သတ္တဝါတွေ အားလုံး အတွက်တဲ့လား။
အရှင်ဘုရား အဆုံးအမအောက်ကို လူတွေ
တဖြည်းဖြည်း ရောက်သွားကြကုန်ပြီလေ။
ဒါဟာ.. အရှင်ဘုရားရဲ့အကျိုးစီးပွား မဟုတ်ဘူးလား။
ဆွေတော်မျိုးတော်တွေရဲ့အကျိုးစီးပွားအတွက်ရော
မကျင့်ဆောင်တော့ဘူးလား။

အခုဆိုရင် ကပိလဝတ်ဟာ အရှင်သခင် မဲ့နေပါပြီကော။
သားတော်ရာဟုလာကို တပည့်တော်မအား
ပြန်လည်စွန့်လွှတ် ပေးသနားတော်မူပါ။
ကပိလဝတ်ရဲ့ ဂုဏ်သရေအတွက် ထီးနန်းကို
ဆက်ခံပါစေ အရှင်ဘုရား။
ဝေဒယိတသုခရဲ့နောက်ကွယ်မှာ သောက၊ ပရိဒေဝတွေဟာ
တကယ်ရှိတာ ဟုတ်ပါရဲ့လား ဘုရား။

ယသော်ဓရာသည် အလင်းနှင့် အမှောင်ကြား
လှမ်းနေရသကဲ့သို့ ရှိနေ၏။
အလင်းဘက်ရောက်လိုက် အမှောင်ဘက်ရောက်လိုက်နှင့်
ဟန်ချက် မထိန်းတတ်သကဲ့သို့ ဖြစ်လေသည်။
ဘဝအဆက်ဆက်က မျိုးစေ့ချထားခဲ့သော
ဒါန၊ သီလ၊ ဘာဝနာတို့၏ အစို့အညှောက်ထွက်ချိန်တန်ပြီဟု
ဘုရားရှင်က သိတော်မူသည်။

ရင့်သန်သော ပါရမီကို လှုပ်နှိုးရန် အချိန်ရောက်ပြီဟု
ဘုရားရှင်က သိတော်မူသည်။
ထို့ကြောင့် ဘုရားရှင်က မဟာကရုဏာတော်ကို
ယသော်ဓရာဆီသို့ တွေဝေမှုကင်းလွတ်သွားရန်
ဖြန့်ကျက်တော် မူလိုက်လေသည်။

“အသင်ယသော်ဓရာ ငါဘုရားတွင်
ကိုယ်ကျိုးအစီးအပွားဟူသော အတ္တကား
မြူတစ်မှုန်မျှပင် မကပ်ငြိပါပေ။
သံသရာများစွာမှာ လှည့်ပတ်ခဲ့ရသမျှ သတ္တဝါများအတွက်
အကျိုးစီးပွားကိုသာ ရည်သန်ခဲ့ပေတယ်။
အလုံးစုံသော လူ၊ နတ်၊ ဗြဟ္မာတို့ကို
မဟာကရုဏာတော်ဖြင့်သာ အကျိုးဆောင်ခြင်းဖြစ်ခဲ့တယ်။
သဗ္ဗညုတဉာဏ်တော်သည် ငါဘုရားအတွက် သက်သက်မဟုတ်။
အဝိဇ္ဇာဟုဆိုအပ်သော လောကသံသရာ ဝဲဂယက်အတွင်း၌
ရှိသည့် ဒုက္ခတရားများမှ လွတ်မြောက်သင့်
လွတ်မြောက်ထိုက်သူများ အတွက် ကျင့်ဆောင်ခြင်းသာဖြစ်ပေတယ်။

သင်ယသော်ဓရာလည်း အရိယသစ္စာကိုမြင် တွေ့နိုင်စွမ်းရှိပါလျှက်
သင်မေ့လျော့နေခဲ့တာ ဖြစ်ပေတယ်။”

ယသော်ဓရာ၏ ဦးခေါင်းသည် ငိုက်စိုက်ညွှတ်ကျသွားသည်။
ဘုရားရှင်က သူမရင်ထဲ၌ ကျန်ရှိနေသေးသော
အတ္တငုတ်တိုကလေးကို ဆွဲနုတ်ပေးခဲ့လေပြီ။
ပါရမီဖက်၏ နှလုံးသားကို ငြိမ်းအေးစင်ကြယ်စေလေပြီ။
လောကီနှင့် လောကုတ္တရာ၏ဆန့်ကျင်ဘက်
အလင်းအမှောင်ကို ယသော်ဓရာ သီးခြားစီနားလည်ခဲ့ပြီ။
မိမိ၏သံသရာသည်လည်း နောက်ဆုံးဘဝပင်
ဖြစ်ချေပြီဟု ယုံကြည်လိုက်သည်နှင့် တစ်ပြိုင်နက်…

ဘဝသံသရာများစွာမှ ဖြည့်ဆည်းခဲ့ရသော
ပါရမီဖြည့်ဖက်၏ ကုသိုလ်တို့သည်
အစဉ်ကျကျ လိုက်ပါလာခဲ့သည်။
ယသော်ဓရာအမှူးရှိသော ရံရွေတော်များလည်း
ဘိက္ခုနီ ဖြစ်သွားကြသည်။

ဝိပဿနာကို လွန်ကဲစွာ အားထုတ်မှုဖြင့်
လေးဆယ့်ငါးရက်အတွင်းပင် ယသော်ဓရာသည်
အရဟတ္တဖိုလ်သို့ ဆိုက်ရောက်လေသည်။
ယသော်ဓရာထေရီသည် ပုဗ္ဗေနိဝါသဉာဏ် အရာ၌
လွန်စွာပင် မြင်နိုင်ခဲ့သည်။

အရှင်သာရိပုတ္တရာ အရှင်မောဂ္ဂလာန်၊
အရှင်ဗာကုလတို့ကဲ့သို့ပင် အရှင်မယသော်ဓရာသည်လည်း
အသင်္ချေသော ကပ်ကမ္ဘာမှဖြစ်ခဲ့သော ခန္ဓာအစဉ်ကို
မြင်နိုင်စွမ်းခဲ့သည်။ ဘုရားရှင်က ယသော်ဓရာထေရီကို
မဟာဘိညဧတဒဂ်အရာ၌ ထားလေသည်။

နောင်လာမည့် သုံးဆယ့်ရှစ်နှစ်အကြာ
( မဟာသက္ကရာဇ် ၁၄၆ ခုနှစ် ) ကာလတွင်
ယသော်ဓရာထေရီ၏ အတိတ်ကံသည်၄င်း
အနာဂတ်ကံသည်၄င်း ချုပ်ငြိမ်း ပြီးဆုံးသွားမည်ကို
ဘုရားရှင်မှတစ်ပါး မည်သူမျှ တင်ကြိုမသိရှိခဲ့။

အရှင်သုမန (ရွှေဂူ)၏
ပါရမီဘက်နှလုံးသားဆောင်းပါးမှ
Donated by #ဓမ္မစာပေများ

16/08/2026

ငါမဟုတ်တာ လုပ်ရင်…
ငါ့အမေ အရှက်ရလိမ့်မယ်
ငါ့အဖေ အရှက်ရလိမ့်မယ်

ငါ့ရဲ့မိသားစု အရှက်ရလိမ့်မယ်
ငါ့ရဲ့ဆွေမျိုးသားချင်းတွေ
ငါ့ရဲ့ မိတ်ဆွေတွေ အရှက်ရလိမ့်မယ်

အဲဒီတော့ ပတ်ဝန်းကျင်
အရှက်ရမယ့်အလုပ်
ငါမလုပ်သင့်ဘူး" … လို့

လောကကို …ကိုယ့်ရဲ့ပတ်ဝန်းကျင်ကို…
အလေးထား ဆင်ခြင်သုံးသပ်ပြီး
အကုသိုလ်ကို ရှောင်ကြဉ်ရမယ် ……

🙏🏻ကျေးဇူးရှင်ဆရာတော်ကြီးဒေါက်တာနန္ဒမာလာဘိဝံသ🙏🏻

16/08/2026

14/08/2026

#ကိုယ့်ရဲ့အချိန်ကောင်းအရွယ်ကောင်းတွေကို
#သူများအတွက်နဲ့ပဲ_အချိန်ကုန်ခဲ့ရတာ_တစ်သံသရာလုံး။

🌺လူမသိလေ ပိုကောင်းလေ🌺
🔵"ချင်"တွေကို ရှောင်ရတယ်🔵

အများနဲ့ တရားတက်ရတာ အားရှိစရာကောင်းတယ်။
သူလည်းတရားတက် ကိုယ်လည်းတရားတက်၊
သူလည်းတရားကြိုးစား ကိုယ်လည်း တရားကြိုးစား၊
အဲလိုအချိန်မျိုးမှာ မလိုက်နိုင်မလုပ်နိုင်ရင်
ကိုယ့်တစ်ယောက်တည်း လုပ်ဖို့ဆိုသွားပြီ။
လုပ်ဖြစ်ဖို့တောင် မလွယ်တော့ဘူး။

ဒါကြောင့်မို့ ကျန်းမာတုန်း၊ အဖော်ကောင်းတုန်း၊
တရားစခန်းရှိတုန်း စိတ်ရောကိုယ်ပါ ကြိုးစားရမယ်၊၊
တရားကြိုးစားတယ်ဆိုတာ သူများနောက်မှာမကျန်ခဲ့ရဘူး။
ဘယ်လိုက သူများနောက်ကျန်ခဲ့မလဲဆိုရင်၊
စနစ်တကျထိုင်တဲ့သူနဲ့ ကိုးရိုးကားယားထိုင်တဲ့သူမှာ
ကိုးရိုးကားယားထိုင်တဲ့သူက ကျန်ခဲ့မှာပဲ။

ရှူပြီးထိုင်တဲ့သူနဲ့ ငိုက်ပြီးမှိန်းပြီးထိုင်တဲ့သူမှာ
ငိုက်ပြီးမှိန်းပြီးထိုင်တဲ့သူက ကျန်ခဲ့မှာပဲ၊
စကားမပြောတဲ့သူနဲ့ စကားချည်းပြောနေတဲ့သူမှာ
စကားပြောပြောနေတဲ့သူက ကျန်ခဲ့မှာပဲ၊
တရားအသိကပ်ပြီး နားတဲ့သူနဲ့ အသိမကပ်ပဲ ကိစ္စများနေတဲ့သူမှာ
အသိမကပ် ကိစ္စများတဲ့သူက ကျန်ခဲ့မှာပဲ။

🍀တရားကျင့်တယ်ဆိုတာ ထင်ပေါ်ဖို့ နာမည်ကြီးဖို့
သူများချီးမွမ်းခံဖို့ ကျင့်တာမဟုတ်ဘူး။
ဒါကြောင့် တရားကျင့်တဲ့အခါမှာ
#ဘယ်သူမှမသိလေ_ကောင်းလေပဲ၊
သိုသိုသိပ်သိပ်နဲ့ ပိပိရိရိနေပြီး ကျင့်ရတယ်။
ကြွားရတဲ့ အလုပ်မဟုတ်ဘူး။
ကိလေသာကို သတ်ရတဲ့အလုပ်။
လူမသိလေ ကောင်းလေပဲ။🍀

ဥပမာ ကိုယ်တရားစခန်းဝင်နေတယ်
တရားထိုင် တရားအားထုတ်နေတယ်။
ဘယ်သူမှ မသိလေကောင်းလေပဲ၊
တရားကို ပိုင်ပိုင်နိုင်နိုင်ကျင့်လို့ရတယ်။
ကျင့်လို့ပင်ပန်းသွားရင် အသိကပ်ပြီး အနားယူ၊
စကားမပြောနဲ့၊၊ စကားပြောပြောနေတာ၊
သတိလက်လွတ်နေနေတာတွေက တရားရဲ့အနှောင့်အယှက်ပဲ၊
ဘုန်းကြီးရဲ့ ဆရာသမားပြောတာ ဘုန်းကြီးမှတ်ထားတယ်။

တရားသမားက စကားတစ်လုံး ပြောလိုက်တိုင်း
သမာဓိက တောင်တစ်လုံး ခြားသွားတယ်တဲ့၊၊
ဒါကြောင့် တရားကျင့်ရင် ဝစီပိတ်ပြီးကျင့်တာက အကောင်းဆုံးပဲ။
လောကီမှာ စီးပွားရေးလုပ်နေသလိုမျိုး စကားများနေလို့ မရဘူး။
ကြိုးစား…။
အသုဘတွေ၊ တရားချိန်တက်တဲ့အခါမှာလည်း
သေချာပြင်ဆင်ခဲ့ရတယ်။ ၆နာရီထိုင်ချိန် ဖြစ်ဖြစ်
၃နာရီထိုင်ချိန်ဖြစ်ဖြစ် အဲလိုတရားချိန်တွေ
အဓိဋ္ဌာန်ပြည့်ဖို့ အောင်ဖို့က အပေါ့အလေး
သွားချင်တာမျိုး မဖြစ်အောင် ထိုင်ခါနီးမှာ
အစားအသောက် ဆင်ခြင်ရတယ်။
နေရာတကာမှာ အဲလို ဉာဏ်ဦးစီးထားရတယ်။
ခေါ်ချင်တာ ပြောချင်တာ၊ ကြည့်ချင်တာ၊ သိချင်တာ၊
သွားချင်တာ စားချင်တာ အဲလိုလောကီတွေကိုလည်း
စွန့်ထားရတယ်။

🌺မခေါ်ချင်နဲ့၊ မပြောချင်နဲ့။
မသိချင်နဲ့၊မမြင်ချင်နဲ့၊
မသွားချင်နဲ့ မလာချင်နဲ့။
အဲဒီ ''ချင်'' တွေကိုရှောင်ရတယ်။🌺

တရားက အဖျက်အဆီးပေါတယ်။
အနှောင့်အယှက်ပေါတယ်။
အတိုက်အခိုက်ပေါတယ်။
ဘာလို့ဆို တရားကျင့်လို့ ရသွားရင်
အနည်းဆုံး အခြေအနေက အပါယ်လွတ်မယ်။
ပစ္စုပ္ပန် တရားကျင့်နေတဲ့အချိန်မှာ ကိုယ့်အတွက်ချည်းဖြစ်နေတာ
အပြင်က သားကိစ္စသမီးကိစ္စ အဖေကိစ္စ အမေကိစ္စ
အလုပ်ကိစ္စဘာကိစ္စ ညာကိစ္စတွေ ဆွဲခေါ်လို့
အပြင်ရောက်သွားရင် သူများအတွက် ဖြစ်သွားပြီ။
ဒါကြောင့်တရားက အဖျက်ပေါတယ်။

တရားအားထုတ်နေတဲ့ နေရာကနေ
အပြင်ရောက်သွားအောင် ဆွဲထုတ်သွားမယ့်
အကြောင်းအရာတွေက အများကြီး။
#ကိုယ့်ရဲ့အချိန်ကောင်းအရွယ်ကောင်းတွေကို
#သူများအတွက်နဲ့ပဲ_အချိန်ကုန်ခဲ့ရတာ_တစ်သံသရာလုံး။အခုလိုကျန်းမာတုန်း တရားစခန်းရှိတုန်း
ကိုယ့်အတွက်ကိုယ် တရားလုပ်ပြီး
အချိန်ကုန်သွားတာက အဖိုးတန်ဆုံးပဲ၊၊

ဘယ်လိုအကြောင်းတရားမှ လာမတိုက်ခတ်ခင်၊
လာနှောင့်မယှက်ခင် တရားအားထုတ်ခွင့်ရနေတဲ့
အချိန်လေးမှာ တန်ဖိုးထားပြီး သတိဉာဏ်ရှိရှိနဲ့
သေသေချာချာ တိတိကျကျ ပိုင်ပိုင်နိုင်နိုင်လေး
မခိုမကပ်ပဲ အားထုတ်ကြ။

#တွံတေးသဲအင်းဂူဆရာတော်ဘဒ္ဒန္တဝေပုလ္လ
✍️အရှင်ဝိသုဒ္ဓ(ကျောက်လုံးကြီးတောရ)