11/05/2026
🌺 #ဝိပဿနာက_အကြွေးမရ🌺
ဖြစ်တိုင်းမှတ်ရှု ရုပ်နာမ်စု၊
စွဲမှုကင်းပျောက်သည်-တဲ့။
'' ဖြစ်တိုင်းမှတ်ရှု '' ဆိုတာက
မြင်တိုင်း,ကြားတိုင်း,နံတိုင်း,စားသိတိုင်း,
ထိသိတိုင်း,ကွေးတိုင်း,ဆန့်တိုင်း,
လှုပ်ရှားတိုင်း,စိတ်ကူး စဥ်းစား ကြံစည်တိုင်း
အဲဒါတွေကို ချက်ချင်းရှုရမယ်လို့ ဆိုလိုတယ်။
ဒါကြောင့် မြင်တိုင်း မြင်တိုင်း
ယခုမြင်ရင် ယခု ရှု၊
ဒီလို ချက်ချင်း ချက်ချင်းရှုသွားရတယ်၊
အကြွေးမထားရဘူး။
ဝိပဿနာက အကြွေးမရဘူး၊
စျေးဝယ်ရာမှာ အကြွေးရသလို
ဝိပဿနာရှုရာမှာတော့ '' နောက်မှရှုမယ် ''လို့
ဒီလို အကြွေးထားလို့မရဘူး။
ချက်ချင်း လက်ငင်း ရှုရှုသွားမှ ရတယ်။
ဒါမှ စွဲလမ်းမှုက မဝင်ရောက်နိုင်တာ။
ဒီလို ချက်ချင်း လက်ငင်းမရှုနိုင်ဘဲ
အကြွေးကျန်သွားရင်တော့ အဲဒီအာရုံမှာ
စွဲလမ်းမှုတွေက ဝင်ရောက်သွားတယ်။
အဲဒီလို စွဲလမ်းပြီးမှတော့ ပြန်ပြီး ရှုပေမယ့်လို့
မူလအစွဲအလမ်းက မပျောက်တော့ဘူး။
#ဝီထိစိတ်ဖြစ်စဥ်
****************
ဒီနေရာမှာ ''ချက်ချင်း ရှုရမယ်'' ဆိုတာက
မြင်ပြီးလျှင်ပြီးချင်း လက်ငင်း ရှုဖို့ပါပဲ၊
ကျမ်းဂန်စကားဖြင့်ပြောရရင်
စက္ခုဒွါရဝီထိ ဆုံးသွားလျှင်သွားချင်း
တဒနုဝတ္တက မနောဒွါရဝီထိတွေ မဖြစ်သေးခင်
ဦးအောင်ရှုရမယ်လို့ ဆိုလိုပါတယ်။
အဆင်းကိုမြင်ရာမှာ ဝီထိစိတ် ဖြစ်ရိုးဖြစ်စဥ်က ဒီလိုရှိပါတယ်၊
ပထမ ထင်ပေါ်လာတဲ့ အဆင်းကိုမြင်တယ်၊
အဲဒါကို ''မြင်ဝီထိ'' လို့ မှတ်ထားပါ။
ပြီးတော့ အဲဒီ မြင်ပြီးအဆင်းကို
ပြန်လည်ဆင်ခြင်တယ်၊
အဲဒါကို ''ဆင်ခြင်ဝီထိ'' လို့ မှတ်ထားပါ။
ပြီးတော့ မြင်ရတဲ့အဆင်းတွေကို ပေါင်းစပ်ပြီးတော့
ပုံသဏ္ဍန် အထည်ဒြပ်အနေနဲ့ ထင်မြင်သွားတယ်၊
အဲဒါကို ''ဒြပ်ဝီထိ''လို့ မှတ်ထားပါ။
ပြီးတော့မှ အမည်ပညတ်တွေကို သိသွားတယ်၊
အဲဒါကို ''အမည်ဝီထိ'' လို့ မှတ်ထားပါ။
မတွေ့ဖူးလို့ အမည်မခေါ်တတ်တဲ့
ဝတ္ထုမျိုးဆိုရင်တော့ ဒီအမည်ဝီထိ မဖြစ်နိုင်တော့ပါဘူး။
အဲဒီ ၄-ဝီထိထဲမှာ ပထမ မြင်ဝီထိဖြစ်စဥ်က
ဖြစ်ဆဲပစ္စုပ္ပန် အဆင်းပရမတ်ကို မြင်သိသွားတယ်။
ဒုတိယ ဆင်ခြင်ဝီထိမှာ မြင်ပြီး
အတိတ်အဆင်းပရမတ်ရုပ်ကိုပဲ ပြန်ဆင်ခြင်တယ်။
ဒီဝီထိ ၂-ခုလုံး အဆင်းပရမတ်ကိုချည်းအာရုံပြုကြတယ်၊
ပညတ်ကို မရောက်သေးဘူး၊ ထူးတာကတော့
ပစ္စုပ္ပန်နဲ့ အတိတ် ဒါလောက်ပဲ ထူးခြားတယ်၊
ပရမတ်အာရုံချင်းကတော့ အတူတူပါပဲ။
တတိယဒြပ်ဝီထိကျတော့
ပုံသဏ္ဌာန် အထည်ဒြပ်ပညတ်တွေကို ရောက်သွားပြီ။
စတုတ္ထ အမည်ဝီထိကျတော့
အမည်ပညတ်ကိုတောင် ရောက်သွားပြီ။
ဒီက နောက်ဆက်ပြီးဖြစ်တဲ့ ဝီထိတွေကျတော့
အဲဒီအထည်ဒြပ်အမည်တွေနဲ့စပ်ဆိုင်တဲ့
ပညတ်အမျိုးမျိုးတွေကို ရောက်သွားတယ်။
ဒီစိတ်အစဥ်တွေက ဝိပဿနာမရှုရတဲ့သူတွေမှာ
ဖြစ်ရိုးဖြစ်စဥ်တွေပဲ၊ အဲဒီဖြစ်စဥ်တွေကို
တိုတိုနဲ့မှတ်ဖို့ ဆောင်ပုဒ် ကတော့.....
🍀ထင်ဆဲ ဆင်းဓာတ်၊မြင်လတ်ဦးစွာ၊
မြင်ပြီးတရား၊ စဥ်းစားပြန်ရာ။
သဏ္ဌာန်ဒြပ်၊ ပညတ်ပေါ်ကာ၊
မည်နာမ၊ သိရ နောက်ဆုံးမှာ-တဲ့။🍀
(မဟာစည်ဆရာတော်ဘုရားကြီး ရေးသားတော်မူသော ''ဝိပဿနာအခြေခံတရားတော်'' မှ ထုတ်နုတ် ရေးသားပူဇော်ပါသည်။)
🙏🙏🙏🙏🙏
ဓမ္မဒါနလှူဒါန်းသူ စိုးယုမွန်
