01/10/2026
#သင့်ရဲ့ သင်းအုပ်ကို မမုန်းပါနှင့်။
အသင်းတော်တစ်ခုမှာ သင်းအုပ်ဆရာဆိုတာ အမှားမရှိတဲ့ကောင်းကင်တမန်တစ်ပါး မဟုတ်ပါဘူး။
တစ်ဖက်မှာလည်း အသင်းသားတိုင်းရဲ့ စိတ်ကြိုက်ဖြစ်အောင် အမြဲပြောပေးရတဲ့သူလည်း မဟုတ်ပါဘူး။
သူဟာ ကိုယ်ပိုင်အားနည်းချက်တွေရှိနေသေးပေမယ့် ခရစ်တော်၏ အသင်းတော်ကို ပြုစုစောင့်ရှောက်ရန် ခေါ်ယူခံရတဲ့ လူသားတစ်ဦးဖြစ်ပါတယ်။
ဒါကြောင့် သင်းအုပ်ဆရာကို မချစ်နိုင်တော့တဲ့အချိန်၊ တရားဒေသနာကို မကြိုက်တဲ့အချိန်၊ အမှုတော်ဆောင်မှုတစ်ခုအပေါ် မကျေနပ်တဲ့အချိန်တိုင်းမှာ ချက်ချင်းဝေဖန်မယ့်အစား မိမိရဲ့နှလုံးသားကိုလည်း ပြန်စစ်ဆေးကြည့်ကြပါစို့။
#အသင်းတော်ကို ပိုမိုကျန်းမာစေဖို့အတွက် အောက်ပါအချက် (၁၀) ချက်ကို သတိပြုကြရအောင်။
➡၁။ #တရားဒေသနာသည် မိမိစိတ်ကြိုက် ဖျော်စပ်ထားသော ဖျော်ရည်မဟုတ်ပါ။
တရားဟောခြင်းဆိုတာ နားထောင်သူတိုင်း စိတ်ကြိုက်ဖြစ်အောင် အရသာဖျော်စပ်ပေးရတဲ့အရာ
မဟုတ်ပါဘူး။ တရားဟောသူရဲ့
အဓိကတာဝန်က ဘုရားသခင်၏ နှုတ်ကပတ်တော်ကို သစ္စာရှိစွာ ကြေညာပေးရန် ဖြစ်ပါတယ်။
တရားဒေသနာတစ်ပုဒ်ကို “မကောင်းဘူး၊ မထိရောက်ဘူး၊
အရသာမရှိဘူး” လို့ မဝေဖန်ခင်
မိမိကိုယ်ကိုလည်း မေးကြည့်သင့်ပါတယ်။
“ကျွန်ုပ်ဟာ ဘုရားသခင်ပြောချင်တဲ့စကားကို နားထောင်ချင်တာလား၊ ဒါမှမဟုတ် ကျွန်ုပ်နားထောင်ချင်တဲ့စကားကိုပဲ ရှာနေတာလား?”
"အကြောင်းမူကား၊ နောင်ကာလ၌ လူတို့သည် စင်ကြယ်သောဩဝါဒကို နားမခံနိုင်ဘဲ၊ ယားတတ်သော နားရှိလျှင်၊ မိမိတပ်မက်ခြင်းအတိုင်း များပြားသော ဆရာတို့နောက်သို့ လိုက်ကြလိမ့်မည်။ (၂ တိမောသေ ၄:၃)
➡၂။ #သူ့ရဲ့အချိန်တွေကိုပေးဆပ်နေသူပါ။
သင်းအုပ်ဆရာတစ်ဦး၏ အမှုတော်သည် တနင်္ဂနွေနေ့ တရားဟောစင်ပေါ်တက်ခြင်းနဲ့ မပြီးပါဘူး။
အသင်းသားတစ်ဦး နာမကျန်းဖြစ်တဲ့အခါ၊ မိသားစုတစ်ခု အခက်အခဲကြုံတဲ့အခါ၊ နာရေးရှိတဲ့အခါ၊ မင်္ဂလာရှိတဲ့အခါ၊ ဝိညာဉ်ရေးရာအကူအညီလိုတဲ့အခါ သူ့ရဲ့အချိန်၊ အားအင်နဲ့ စိတ်နှလုံးကို အသင်းတော်အတွက် ပေးဆပ်ရပါတယ်။
ဒါပေမယ့် ဒီအရာဟာ သင်းအုပ်ဆရာက မိသားစုတာဝန်ကို လျစ်လျူရှုသင့်တယ်လို့ မဆိုလိုပါဘူး။ မိမိမိသားစုကို စောင့်ရှောက်ခြင်းသည်လည်း အမှုတော်ဆောင်တစ်ဦး၏ အရေးကြီးတဲ့တာဝန်ဖြစ်ပါတယ်။
ထို့ကြောင့် မမြင်ရတဲ့နေရာမှာ
အသင်းတော်အတွက် ပေးဆပ်နေတဲ့ သူ၏အချိန်နှင့် အားအင်များကိုလည်း နားလည်ပေးကြပါစို့။
“ငါသည်သင်တို့ကို ချစ်ခြင်းမေတ္တာစိတ် တိုးပွားသည်အတိုင်း သင်တို့သည် ငါ့ကိုချစ်ခြင်းမေတ္တာစိတ် ဆုတ်ယုတ်သော်လည်း၊ သင်တို့ စိတ်ဝိညာဉ်၏ အကျိုးအလိုငှာ ငါသည် ကိုယ်ဥစ္စာကိုလည်းကောင်း၊ ကိုယ်ကိုလည်းကောင်း၊ ကုန်စေခြင်းငှာ အလွန်စေတနာရှိ၏။(၂ ကော ၁၂:၁၅)
➡၃။ #ဧည့်သည်ဆရာများနှင့် သင့်ရဲ့သင်းအုပ်ဆရာကို မနှိုင်းယှဉ်ပါနှင့်။
တစ်ခါတစ်ရံ ဧည့်သည်ဆရာတစ်ဦးသည် ကြိုတင်ပြင်ဆင်ထားသော တရားဒေသနာကောင်းတစ်ပုဒ်ကို လာရောက်ဟောကြားနိုင်ပါတယ်။ ဒါဟာ ကောင်းတဲ့အရာပါ။
ဒါပေမယ့် တစ်ခါတစ်ရံမှ ကြွရောက်လာတဲ့ ဧည့်သည်ဆရာတစ်ဦး၏ တရားဒေသနာနှင့် အသင်းတော်ရဲ့ နေ့စဉ်ဝိညာဉ်ရေးရာ၊ လူမှုရေး၊ အုပ်ချုပ်ရေးနဲ့ အသင်းသားများ၏ အခက်အခဲများကို နေ့စဉ်ရင်ဆိုင်နေရတဲ့ သင်းအုပ်ဆရာရဲ့ အမှုတော်ကို တိုင်းတာနှိုင်းယှဉ်ခြင်း မပြုသင့်ပါဘူး။
ဧည့်သည်ဆရာကိုလည်း လေးစားပါ။ မိမိရဲ့သင်းအုပ်ဆရာကိုလည်း တန်ဖိုးထားပါ။ လူတိုင်းမှာ မတူညီတဲ့ခေါ်ယူခြင်းနဲ့ တာဝန်ရှိပါတယ်။
“သင်တို့ကို အုပ်သောသူတို့၏ စကားကို နားထောင်၍ နှိမ့်ချလျက်နေကြလော့၊ သူတို့သည် ကိုယ်တိုင် စစ်ကြောခြင်းကို ခံရသောသူကဲ့သို့၊ သင်တို့ စိတ်ဝိညာဉ်၏ အကျိုးအလိုငှာ စောင့်နေကြ၏။ သင်တို့အကျိုးကို မဖြစ်စေတတ်သော ဝမ်းနည်းခြင်းမရှိ၊ ဝမ်းမြောက်ခြင်းရှိ၍၊ သူတို့သည် စစ်ကြောခြင်းကို ခံရမည်အကြောင်း သတိပြုလျက်နေကြလော့။
(ဟေဗြဲ ၁၃း၁၇)
➡၄။ #တရားဒေသနာကို အပြစ်မတင်မီ မိမိနှလုံးသားကို စစ်ဆေးပါ။
တရားဒေသနာကို နားထောင်တဲ့အခါ တရားဟောသူကိုပဲ စစ်ဆေးမနေပါနဲ့။ မိမိနှလုံးသားကိုလည်း စစ်ဆေးပါ။
တစ်ခါတလေ ပြဿနာက တရားဒေသနာမှာ မဟုတ်ဘဲ ကျွန်ုပ်တို့ရဲ့ နားထောင်ပုံမှာ ဖြစ်နိုင်ပါတယ်။
ဘုရားသခင်၏ နှုတ်ကပတ်တော်သည် မျိုးစေ့ဖြစ်လျှင် မိမိနှလုံးသားသည် ထိုမျိုးစေ့ကျရောက်သည့် မြေဆီလွှာဖြစ်ပါတယ်။
ထို့ကြောင့် သင်တို့သည်
မည်သို့ကြားရသည်ကို
သတိပြုကြလော့။ (လုကာ ၈:၁၈)
➡၅။ #ဝေဖန်ခြင်းထက် ဆုတောင်းပေးခြင်းကို ဦးစားပေးပါ။
သင်းအုပ်ဆရာတစ်ဦးအတွက် တရားဟောခြင်းသည် စင်ပေါ်မှာ မိနစ်အနည်းငယ်ပြောပြီး ပြီးသွားတဲ့အရာ မဟုတ်ပါဘူး။ ကျမ်းစာလေ့လာခြင်း၊ ဆုတောင်းခြင်း၊ ပြင်ဆင်ခြင်းနဲ့ ဝိညာဉ်ရေးရာဝန်ထုပ်ကို ထမ်းခြင်းတို့ ပါဝင်ပါတယ်။
ဒါကြောင့် “ဘာကြောင့် ဒီလိုမဟောတာလဲ” လို့ ဝေဖန်မယ့်အစား
“သင်းအုပ်ဆရာ ဒီနေ့ ဘုရားသခင်၏ နှုတ်ကပတ်တော်ကို သစ္စာရှိစွာ ဟောနိုင်ဖို့ ကျွန်ုပ် ဆုတောင်းပေးခဲ့ပြီလား?”
လို့ ကိုယ့်ကိုယ်ကို ပြန်မေးကြည့်သင့်ပါတယ်။
"ငါသည် ဧဝံဂေလိတရားကြောင့် သံကြိုးနှင့် ချည်နှောင်ခြင်းကိုခံလျက်၊ သံတမန်အမှုကို ပြုရသည်ဖြစ်၍၊
ထိုတရား၏ နက်နဲသောအရာကို ဖော်ပြခြင်းငှာ ငါသည်နှုတ်ကို ရဲရင့်စွာ ဖွင့်လှစ်ခြင်းအခွင့် ရှိမည်အကြောင်းကိုလည်းကောင်း၊ ထိုတရားကို ဟောပြောအပ်သည်နှင့်အညီ၊
ရဲရင့်စွာဟော ပြောမည်အကြောင်းကိုလည်းကောင်း၊ ငါ့အဖို့လည်း ဆုတောင်းကြလော့။"(ဧဖက် ၆:၁၉)
➡၆။ #မောရှေ၏လက်ကို ထောက်ပံ့ပေးသော အာရုန်နှင့် ဟုရကဲ့သို့ ဖြစ်ပါ။
အမှုတော်ဆောင်တစ်ဦးသည် အရာအားလုံးကို တစ်ယောက်တည်း မလုပ်နိုင်ပါဘူး။
ထွက်မြောက်ရာကျမ်း ၁၇ မှာ မောရှေ၏လက်များ ပင်ပန်းလာတဲ့အခါ အာရုန်နဲ့ ဟုရတို့က သူ့လက်ကို ထောက်ပံ့ပေးခဲ့ကြပါတယ်။ အသင်းတော်မှာလည်း ဒီလိုလူတွေလိုပါတယ်။
* သင်းအုပ်ဆရာ ပင်ပန်းတဲ့အခါ အပြစ်ရှာမယ့်သူမဟုတ်ဘဲ အားပေးမယ့်သူ ဖြစ်ပါ။
* သူ ဝန်ထုပ်ကြီးတဲ့အခါ ထပ်မတင်ပေးဘဲ ဝန်ခွဲထမ်းပေးပါ။
* သူ အားနည်းတဲ့အခါ အတင်းအဖျင်း မပြောဘဲ ဆုတောင်းပေးပါ။
သို့ရာတွင် မောရှေ၏လက်သည်ညောင်းသောကြောင့်၊ သူတို့သည် ကျောက်ကိုယူ၍ မောရှေကိုထိုင်စေပြီးလျှင်၊ အာရုန်နှင့် ဟုရတို့သည် တစ်ယောက်တစ်ဖက်နေ၍ သူ၏လက်ကိုမကြ၏။ သို့ဖြစ်၍ နေဝင်သည်တိုင်အောင် သူ၏လက်တို့သည် အမြဲနေလေ၏။ (ထွက် ၁၇း၁၂)
➡၇။ #အကျွမ်းတဝင်ဖြစ်လွန်း၍ ‘နာဇရက်မြို့’ မဖြစ်စေပါနှင့်။
အကျွမ်းတဝင်ဖြစ်လာခြင်းသည် ကောင်းတဲ့အရာတစ်ခု ဖြစ်နိုင်ပါတယ်။ ဒါပေမယ့် အကျွမ်းတဝင်ဖြစ်လွန်းတဲ့အခါ တန်ဖိုးမထားတော့ခြင်း ဖြစ်လာနိုင်ပါတယ်။
နာဇရက်မြို့သားများသည် ယေရှုကို “ဒီလူကို ကျွန်ုပ်တို့သိပါတယ်” ဆိုတဲ့ အမြင်နဲ့ ကြည့်ခဲ့ကြပါတယ်။ ထိုအကျွမ်းတဝင်မှုနဲ့ မယုံကြည်မှုကြောင့် ကိုယ်တော်သည် ထိုနေရာတွင် အံ့ဖွယ်အမှုများစွာ မပြုတော်မူခဲ့ပါ။
#ယနေ့လည်း မိမိသင်းအုပ်ဆရာကို နှစ်ပေါင်းများစွာ သိလာတဲ့အတွက် သူပြောတဲ့ ဘုရားသခင်၏ နှုတ်ကပတ်တော်ကို တန်ဖိုးမလျော့စေပါနှင့်။ လူကိုကြည့်ပြီး နှုတ်ကပတ်တော်ကို မပယ်ပါနှင့်။ နှုတ်ကပတ်တော်ကို နားထောင်ပြီး ဘုရားသခင်ကို ရှာပါ။
ယေရှုကလည်း၊ ပရောဖက်သည် မိမိမြို့၊ မိမိအဆွေနေရာ၊ မိမိအိမ်မှတစ်ပါး အခြားသောအရပ်၌ အသရေရှိသည်ဟု ထိုသူတို့အား မိန့်တော်မူ၏။
(မာကု ၆:၄)
➡၈။ #ဝိညာဉ်ရေးရာဝန်ထုပ်ကို ခွဲထမ်းပါ။
သင်းအုပ်ဆရာတစ်ဦးတည်းက အသင်းတော်တစ်ခုလုံးကို သယ်ဆောင်ဖို့ မလိုအပ်ပါဘူး။ အသင်းတော်သည် ခရစ်တော်၏ကိုယ်ဖြစ်ပြီး အသင်းသားတိုင်းမှာ မိမိတို့ရဲ့ အခန်းကဏ္ဍရှိပါတယ်။
ထို့ကြောင့်
* သင်းအုပ်ဆရာတစ်ဦးတည်း အားလုံးလုပ်ပေးရမယ်လို့ မမျှော်လင့်ပါနှင့်။
* အမှုတော်ရှိရင် ပါဝင်ပါ။
* လိုအပ်ရင် ကူညီပါ။
* ဝန်ထုပ်ရှိရင် ခွဲထမ်းပါ။
* အခက်အခဲရှိရင် ဆုတောင်းပေးပါ။
“ထမ်းရွက်စရာဝန်ချင်းတို့ကို အချင်းချင်းကူညီ၍ ထမ်းရွက်သောအားဖြင့် ခရစ်တော်၏တရားကို ကျင့်ကြလော့။ (ဂလာတိ ၆:၂)
➡၉။ #မကျေနပ်ချက်များကို အတင်းအဖျင်းမဟုတ်ဘဲ မေတ္တာဖြင့် ဖြေရှင်းပါ။
သင်းအုပ်ဆရာကို မကျေနပ်တာရှိနိုင်ပါတယ်။ အသင်းတော်ခေါင်းဆောင်မှုအပေါ် အမြင်မတူတာလည်း ရှိနိုင်ပါတယ်။ ဒါဟာ မဖြစ်ရဘူးလို့ မဆိုလိုပါဘူး။ အရေးကြီးတာက ဘယ်လိုဖြေရှင်းမလဲ ဆိုတာပါ။
နောက်ကွယ်မှာ ပြောခြင်း၊ အုပ်စုဖွဲ့ခြင်း၊ လူမှုကွန်ရက်ပေါ်မှာ သွယ်ဝိုက်ရေးသားခြင်းထက် မေတ္တာဖြင့် တိုက်ရိုက်တွေ့ဆုံဆွေးနွေးခြင်းက အသင်းတော်ကို ပိုတည်ဆောက်ပေးနိုင်ပါတယ်။
“ထိုကြောင့် သင်၏ညီအစ်ကိုသည် သင့်ကိုပြစ်မှားလျှင်၊ သူ့ဆီသို့သွား၍ နှစ်ယောက်တည်းချင်း သူ၏အပြစ်ကိုပြ၍ ဆုံးမလော့။ သူသည် သင်၏စကားကို နားထောင်လျှင် ညီအစ်ကို ကိုရပြီ။ (မဿဲ ၁၈:၁၅)
အမှားကို မဖုံးကွယ်ပါနှင့်။ ဒါပေမယ့် အမှားကို ဖြေရှင်းရာမှာလည်း မေတ္တာနှင့် သမ္မာတရား ကို အတူတကွ ကိုင်စွဲကြပါစို့။
➡၁၀။ #သင်းအုပ်ဆရာ၏ အမှုတော်ကို လေးစားပြီး ဝိညာဉ်ရေးရာခေါင်းဆောင်မှုကို တန်ဖိုးထားပါ။
သင်းအုပ်ဆရာသည် အပြစ်မရှိတဲ့သူ မဟုတ်ပါဘူး။ သူလည်း ဘုရားသခင်၏ ကျေးဇူးတော်ကို လိုအပ်နေတဲ့ လူသားတစ်ဦးပါပဲ။
ဒါပေမယ့် ခရစ်တော်၏ အသင်းတော်ကို ဦးဆောင်ရန် ခေါ်ယူထားသော အမှုတော်ဆောင်တစ်ဦးအဖြစ် သူ၏တာဝန်ကို လေးစားသင့်ပါတယ်။
#လေးစားခြင်းဆိုတာ အမှားအားလုံးကို မှန်တယ်လို့ ပြောခြင်းမဟုတ်ပါဘူး။
#နာခံခြင်းဆိုတာ သမ္မာကျမ်းစာနဲ့ မကိုက်ညီတာကို မျက်စိမှိတ်လိုက်ခြင်းမဟုတ်ပါဘူး။
အမှန်တရားကို မပျောက်စေဘဲ မေတ္တာနဲ့ ပြောနိုင်ခြင်း၊ အမှုတော်ကို မဖျက်ဆီးဘဲ ပြုပြင်ပေးနိုင်ခြင်း၊ သင်းအုပ်ဆရာကို မချိုးဖဲ့ဘဲ ဆုတောင်းပေးနိုင်ခြင်း
ဒါတွေက ကျန်းမာတဲ့အသင်းတော်ရဲ့ အမှတ်လက္ခဏာတွေ ဖြစ်ပါတယ်။
သင်တို့ကို အုပ်သောသူတို့၏ စကားကို နားထောင်၍ နှိမ့်ချလျက်နေကြလော့၊ သူတို့သည် ကိုယ်တိုင် စစ်ကြောခြင်းကို ခံရသောသူကဲ့သို့၊ သင်တို့ စိတ်ဝိညာဉ်၏ အကျိုးအလိုငှာ စောင့်နေကြ၏။ သင်တို့အကျိုးကို မဖြစ်စေတတ်သော ဝမ်းနည်းခြင်းမရှိ၊ ဝမ်းမြောက်ခြင်းရှိ၍၊ သူတို့သည် စစ်ကြောခြင်းကို ခံရမည်အကြောင်း သတိပြုလျက်နေကြလော့။
(ဟေဗြဲ ၁၃:၁၇)
နောက်ဆုံးမှာ ကတော့
* သင်းအုပ်ဆရာက ပြီးပြည့်စုံတဲ့သူ မဟုတ်ပါဘူး။
* အသင်းသူ/သားတွေလည်း ပြီးပြည့်စုံတဲ့သူတွေ မဟုတ်ပါဘူး။
ကျွန်ုပ်တို့အားလုံးဟာ ခရစ်တော်၏ကျေးဇူးတော်ကို လိုအပ်နေကြတဲ့သူတွေ ဖြစ်ကြပါတယ်။
* ဒါကြောင့် သင်းအုပ်ဆရာကို မုန်းမယ့်အစား ဆုတောင်းပေးကြပါစို့။
* ဝေဖန်မယ့်အစား လိုအပ်တဲ့အခါ မေတ္တာနဲ့ ပြုပြင်ပေးကြပါစို့။
* ဝန်ထုပ်ကို ထပ်တင်မယ့်အစား ခွဲထမ်းပေးကြပါစို့။
* အတင်းအဖျင်းပြောမယ့်အစား မျက်နှာချင်းဆိုင် မေတ္တာနဲ့ ဖြေရှင်းကြပါစို့။
* တစ်ဦးကိုတစ်ဦး ချိုးဖဲ့မယ့်အစား ခရစ်တော်၏ကိုယ်တော်ကို အတူတကွ တည်ဆောက်ကြပါစို့။
အသင်းတော်ဟာ သင်းအုပ်ဆရာတစ်ဦးတည်းရဲ့ အသင်းတော်မဟုတ်ပါဘူး။ အသင်းတော်ဟာ ခရစ်တော်၏ အသင်းတော်ဖြစ်ပါတယ်။
ထို့ကြောင့်—
* သင်းအုပ်ဆရာကို ချစ်ပါ။
* သင်းအုပ်ဆရာအတွက် ဆုတောင်းပါ။
* သင်းအုပ်ဆရာကို အားပေးပါ။
* လိုအပ်တဲ့အခါ မေတ္တာနှင့် သမ္မာတရားဖြင့် ပြုပြင်ပေးပါ။
ပြီးတော့ အရာခပ်သိမ်းကို ခရစ်တော်၏ ဘုန်းတော်အတွက် ပြုကြပါစို့။
သင်တို့သည် ခပ်သိမ်းသောအမှုတို့ကို ချစ်ခြင်းမေတ္တာစိတ်နှင့် ဆောင်ရွက်ကြလော့။ (၁ ကော၁၆:၁၄)
ခရစ်တော်၏အသင်းတော်ကို တစ်ဦးကိုတစ်ဦး ချစ်ခြင်း၊ လေးစားခြင်း၊ ဆုတောင်းခြင်းနှင့် အတူတကွ တည်ဆောက်ကြပါစို့။
Enoch Kyaw Thet
To God alone be the glory.
