07/12/2024
လိုချင်လို့ တောင့်တသော်လည်း ဘယ်တော့မှ မရနိုင်တဲ့ အရာ(၅)မျိုး
=ၐၐၐၐၐၐၐၐၐၐၐၐၐၐၐၐၐၐၐၐၐၐၐၐၐၐၐၐၐၐၐၐၐၐၐၐၐၐၐၐ=
အဆက်
၁။ အိုတတ်တဲ့သဘောတရားကို မအိုပါနဲ့၊
၂။ နာတတ်တဲ့ သဘောတရားကို မနာပါနဲ့၊
၃။ သေတတ်တဲ့ သဘောတရားကို မသေပါနဲ့၊
၄။ ကုန်တတ်တဲ့ သဘောတရားကို မကုန်ပါစေနဲ့၊
၅။ ပျက်စီးတတ်တဲ့ သဘောတရားကို မပျက်စီးပါစေနဲ့လို့ ဘယ်သူမှ တောင့်တလို့မရဘူး။
သို့ပေမဲ့ မင်းကြီး အကြားအမြင် ဗဟုသုတနည်းတဲ့ ပုထုဇဉ်တွေဟာ ဒီတရားတွေနဲ့ ရင်ဆိုင်တွေ့လာရတဲ့အခါ ''အော် အိုတယ်, နာတယ်, သေတယ်, ကုန်တယ်, ပျက်စီးတယ်ဆိုတာ ငါ့တစ်ယောက်တည်းမှာပဲ ရွေးပြီး ဖြစ်နေတာမဟုတ်ဘူး၊
တကယ်တော့ ဒီဘဝမှာ ရောက်နေတဲ့သူတွေ, ဒီဘဝကဘဝတစ်ပါး ပြောင်းသွားတဲ့သူတွေကစပြီး သတ္တဝါမှန်သမျှမှာလဲ ဒီသဘောတရားတွေ ဖြစ်နေကြတာပဲ၊ အဲဒီလို သတ္တဝါအားလုံးမှာ ဖြစ်နေရဲ့သားနဲ့ ငါတစ်ယောက် တည်းပဲ ပူဆွေးနေမယ်၊ ငိုကြွေးနေမယ်၊ ပင်ပမ်းနေမယ်၊ ရင်ဘတ်ထု အော်ဟစ်နေမယ်၊ တွေဝေ မိန်းမောနေမယ်ဆိုရင် ငါ့မှာ စားချင်သောက်ချင်စိတ်လည်း ရှိတော့မှာမဟုတ်တော့ဘူး၊ အလုပ်လုပ်ချင်စိတ်လည်း ရှိတော့မှာမဟုတ်တော့ဘူး၊ ငါ့ရုပ်ဟာလည်း ကြည့်လို့ရှုလို့ မကောင်းနိုင်တော့ဘူး၊ ငါ့ရန်သူတွေလည်း ဝမ်းမြောက်ဝမ်းသား ဖြစ်ကုန်ကြတော့မှာပဲ၊ ငါ့မိတ်ဆွေတွေလည်း ဝမ်းနည်းပက်လက်ဖြစ်ကုန်ကြတော့မှာပဲ'' လို့ ဒီလို အမှန်အတိုင်း မဆင်ခြင်နိုင်ကြဘူး။
ဒီလိုမဆင်ခြင်နိုင်တော့ ဒီတရား(၅)မျိုးနဲ့ တွေ့ကြုံရတဲ့အခါ ပူဆွေးတယ်၊ ငိုကြွေးတယ်၊ ပင်ပမ်းတယ်၊ ရင်ဘတ်ထုပြီး အော်ဟစ်တယ်၊ တွေဝေမိန်းမောတယ်။ မင်းကြီး ဒီလို အကြားအမြင်ဗဟုသုတနည်းတဲ့ ပုထုဇဉ်မျိုးကို အဆိပ်ပြင်းတဲ့ သောကဆူးတစ်ချောင်းစူးခံထားတဲ့သူ၊ မိမိကို မိမိ ပူလောင်အောင် လုပ်နေတဲ့သူလို့ ဆိုရမယ်။
အကြားအမြင် ဗဟုသုတများတဲ့ ပုထုဇဉ်ကျတော့ အဲဒီလိုမဟုတ်ဘူး ဇာတိအစရှိတဲ့ တရားတွေနဲ့ ကြုံတွေ့လာတဲ့အခါ ခုနားက ပြောခဲ့သလိုမျိုး အမှန်အတိုင်း ဆင်ခြင်နိုင် သည်းခံနိုင်တယ်။
အဲဒီလို အမှန်အတိုင်းအတိုင်း ဆင်ခြင်နိုင် သည်းခံ နိုင်တော့ သောကဆူး မစူးတော့ဘူး သောကဆူးကို နှုတ်ပစ်နိုင်သွားတယ်၊ မိမိကိုယ်ကို မပူလောင်စေပဲ အေးအေးချမ်းချမ်း နေသွားနိုင်တယ်။
မင်းကြီး လောကမှာ သမဏဖြစ်စေ၊ ဗြာဟ္မဏဖြစ်စေ နတ်ဖြစ်စေ၊ ဗြဟ္မာဖြစ်စေ လုံးဝတောင့်တလို့ မရနိုင်တဲ့ အရာ(၅)မျိုးဆိုတာ အဲဒီတရား(၅)မျိုးပါပဲ။
အရှင်နာရဒက ဒီလိုဟောလိုက်တော့ ဘုရင်မုဏ္ဍက ‘အရှင်ဘုရား.. ဒီတရားဒေသနာကို ဘယ်လိုတရား ဒေသနာ မျိုးလို့ ခေါ်ပါသလဲ ဘုရား’ လို့ မေးလိုက်တဲ့အခါ အရှင်နာရဒက ‘မင်းကြီး သောကဆူးကို နှုတ်ပစ်တတ်တဲ့ တရားဒေသနာ မျိုးပါ’လို့ မိန့်လိုက်တယ်။ မှန်လိုက်တာဘုရား တပည့်တော် ဒီဒေသနာကို နာကြားရတဲ့အတွက် သောက ဆူးကို နှုတ်နိုင်ခဲ့ပြီ’လို့ ပြောပြီး ပြန်သွားတယ်။
ဘုရင်မုဏ္ဍဟာ နန်းတော်ကို ပြန်ရောက်တော့ သူ့ရဲ့ ဘဏ္ဍာစိုးကို ခေါ်ပြီး ပြောလိုက်တယ် ‘မိတ်ဆွေ ပိယက ဘဒ္ဒါမိဖုရားရဲ့ အလောင်းကို မီးသင်္ဂြိုဟ်လိုက် ပြီးရင် အရိုးဂူလေးတစ်ခုလုပ်လိုက်ပါ၊ ဒီနေ့ကစပြီး ငါ ရေချိုးတော့မယ်၊ အမွှေးနံ့သားတွေလည်း လိမ်းတော့မယ် ထမင်းလည်းစားတော့မယ် တိုင်းရေးပြည်ရေးတွေကိုလည်း ဆောင်ရွက်တော့မယ်’...
#အင်္ဂုတ္တရနိကာယ်၊ ပဉ္စကနိပါတ်၊ မုဏ္ဍရာဇဝဂ္ဂ၊ နာရဒသုတ္တန် #
