https://www.facebook.com/1082267858299923/

Feon'ny Soratra Masina, Antsirabe (2026)

13/08/2026

Indraindray, tsy mila fanazavana lava ny zava-mitranga iray vao mampieritreritra.

⏩Mety ho kisendrasendra izany, mety ho fotoana tsotra ihany… fa ho an’izay mino, ny zava-mitranga rehetra dia mety hitondra lesona.

⏩Aza maika hitsara, aza maika hanameloka, ary indrindra aza mihevitra fa ny hafa ihany no mila fampitandremana.

⏩Ny mpitory teny koa dia mila mihaino ny Tenin’Andriamanitra. Ny mpampianatra koa mila ampianarina. Ny mpanitsy ny hafa koa mila manitsy tena.

⏩Satria mora ny manondro ny fahadisoan’ny hafa, fa ny tena fahendrena dia ny manana fahasahiana hijery ny tenantsika aloha.

⏩Aoka ny fiainantsika ho porofon’izay torintsika amin’ny vavantsika.

👉Alohan’ny hitsarana sy hampitandremana ny hafa, tsara ihany koa ny mandinika ny tenantsika.

📖Hoy i Jesosy: « Nahoana ianao no mahita ny sombin-kazo eo amin’ny mason’ny rahalahinao, nefa ny andry eo amin’ny masonao tsy tsikaritrao? » — Matio 7:3

12/08/2026

FOMBA FANDRESENA TAHOTRA

Ny tahotra dia anisan’ny zavatra lehibe manakana olona maro tsy hahatratra ny zavatra tokony hahatongavany. Tsy voatery hoe tsy manana fahaizana ianao; indraindray matahotra fotsiny ianao ny hanomboka.
🔸Matahotra ny tsy hahomby.
🔸Matahotra ny hotsikeraina.
🔸Matahotra ny ho diso.
🔸Matahotra ny ho lavina.
🔸Matahotra ny amin’izay holazain’ny olona.

👉Fa misy zavatra iray tokony ho fantatrao:
Tsy voatery hiandry tsy hatahotra ianao vao handroso.
Ny olona be herim-po dia tsy olona tsy matahotra.Fa Olona mahatsapa tahotra nefa mbola mandroso ihany.

📖Hoy ny Soratra Masina:
“Fa Andriamanitra tsy nanome antsika fanahy osa, fa fanahy mahery sy fitiavana ary fahononam-po.”
— 2 Timoty 1:7

1. Fantaro izay tena atahoranao

⏩Aza lazaina fotsiny hoe: “Matahotra aho.”
Anontanio ny tenanao:
“Inona marina no atahorako?”

🔸Matahotra tsy hahomby ve ianao?
🔸Matahotra ny hevitry ny olona ve?
🔸Matahotra ny ho very ve?
🔸Sa matahotra ny hiala amin’ilay zavatra mahazatra anao?

⏩Rehefa fantatrao ny fototry ny tahotrao dia mora kokoa ny miatrika azy.

2. Aza avela hanapa-kevitra ho anao ny tahotra
Mety hiteny aminao ny sainao hoe:
“Aza manandrana fa mety tsy hahomby ianao.”

⏩Fa tadidio: ny tsy fanandramana dia tsy midika hoe nandresy ianao; mety hidika fotsiny hoe nomenao fahefana ny tahotra.
⏩Indraindray, ny zavatra tena hanenenantsika any aoriana dia tsy ilay zavatra nataontsika ka tsy nety, fa ilay fahafahana nananantsika nefa tsy sahintsika nohararaotina.

3. Atombohy amin'ny dingana kely

🔸Tsy voatery hanova ny fiainanao manontolo ao anatin'ny iray andro ianao.
🔸Raha matahotra miteny ampahibemaso ianao, manomboha amin'ny olona vitsivitsy.
🔸Raha matahotra hanomboka tetikasa ianao, ataovy ny dingana voalohany.
🔸Raha matahotra ny hianatra zavatra vaovao ianao, mianara zavatra iray isan'andro.
👉Ny fahasahiana dia toy ny hozatra: mihamatanjaka rehefa ampiasaina.

4. Aza miaina noho ny hevitry ny olona

👉Io no iray amin'ireo tahotra lehibe indrindra mahatonga olona tsy handroso.
🔸Misy olona tsy hanaiky anao.
🔸Misy olona hitsikera anao.
🔸Misy olona hihomehy anao.
🔸Misy olona hilaza fa tsy ho vitanao.

⏩Fa tadidio:
🔸Ny olona mitsikera anao anio dia tsy voatery hiaina ny vokatry ny fanapahan-kevitrao rahampitso.
Koa aza avela ny hevitry ny olona hanoratra ny tantaran'ny fiainanao.

5. Ovay ny fomba firesakao amin'ny tenanao

🔸Aza miteny hoe:
“Tsy vitako.”
Soloy hoe:
“Mbola tsy haiko, fa afaka mianatra aho.”

🔸Aza miteny hoe:
“Matahotra aho ka tsy afaka.”
Soloy hoe:
“Matahotra aho, fa handroso ihany.”

⏩Tsy teny fotsiny izany. Ny fomba firesahanao amin'ny tenanao dia misy fiantraikany amin'ny fomba fijerinao ny tenanao sy ny zavatra atrehinao.

6. Tadidio fa tsy fahavalo foana ny tsy fahombiazana

🔸Mety tsy hahomby ianao.
🔸Mety ho diso ianao.
🔸Mety ho lavina ianao.
🔸Mety ho very ianao.
Fa tsy midika izany fa tapitra ny dianao.
Ny tsy fahombiazana iray dia tsy mamaritra ny maha-ianao anao. Lesona iray fotsiny eo amin'ny lalana mankany amin'ny fahombiazana izy.

📖Hoy ny Baiboly:
“Na dia lavo impito aza ny marina, dia mbola mitsangana ihany.”
— Ohabolana 24:16

⏩FARANY

👉Aza miandry ny andro tsy hisian'ny tahotra vao hanomboka.
👉Mandrosoa miaraka amin'ny tahotrao.
Satria raha miandry ho tonga lafatra ny toe-javatra ianao, dia mety handalo eo imasonao ny fahafahana maro.

🔸Ny tahotra miteny hoe:
“Ajanony.”
🔸Ny fahasahiana mamaly hoe:
“Hanandrana aho.”

🔸Ny tahotra miteny hoe:
“Ahoana raha tsy hahomby?”
🔸Ny fahasahiana mamaly hoe:
“Ary ahoana raha hahomby?”

👉Ary rehefa tonga ny fotoana hahitanao ny lasa, dia aza tonga amin'ny toerana ka miteny hoe:
“Nanana fahafahana aho, saingy natahotra aho.”

👉Fa enga anie ianao ho afaka hiteny hoe:
“Natahotra aho, saingy tsy navelako hifehy ahy ny tahotro. Nandroso aho, nianatra aho, lavo aho, nitsangana aho, ary lasa olona matanjaka kokoa aho.”

⏩Aza avela ho fonja hangeja anao ny tahotrao fa ataovy tohatra hitondra anao amin'ny ambaratonga manaraka eo amin'ny fiainanao.

12/08/2026

HIANARO NY MIFEHY NY TENANAO

Ny iray amin'ireo fahombiazana lehibe indrindra eo amin'ny fiainana dia tsy ny fahaizana mifehy olona hafa, fa ny fahaizanao mifehy ny tenanao.

👉Misy zavatra 3 tena tokony hianarantsika:

1. Mifehy ny fihetseham-po
Tsy voatery hamaly avy hatrany ianao rehefa tezitra. Indraindray, ny fahanginana mandritra ny fotoana fohy no mamonjy anao amin'ny teny mety ho hanenenanao mandritra ny taona maro.

2. Mifehy ny vava
Tsy izay rehetra fantatrao no mila tenenina. Ny olona matotra dia mahafantatra hoe rahoviana no hiteny, inona no holazaina, ary rahoviana no hangina.

3. Mifehy ny safidy
Ny fiainanao rahampitso dia voakasiky ny safidy ataonao androany. Raha te hiova ny fiainanao, aza miandry ny toe-javatra hiova; atombohy amin'ny tenanao ny fiovana.

⏩“Tsy afaka mifehy izay mitranga aminao foana ianao, fa afaka mifehy ny fomba hamalianao azy.”

Ohatra: mety hisy olona hanambany anao. Tsy azonao fehezina izay lazainy sy izay ataony,fa azonao fehezina kosa raha hamaly amin'ny fahatezerana ianao na hijanona ho tony.

🔸Izany no atao hoe fahamasinana ara-tsaina sy fahamatorana: tsy hoe tsy tezitra intsony, fa hoe tsy avelanao hibaiko ny fanapahan-kevitrao ny fahatezeranao.

🔸Aza mandany hery be amin'ny fiezahana hifehy ny olona sy ny zavatra tsy azonao fehezina. Atombohy amin'ny tenanao.
🔸Rehefa hainao ny mifehy ny fahatezeranao, dia tsy mora entin'ny olona ianao.
🔸Rehefa hainao ny mifehy ny vavanao, dia mihena ny teny hanenenanao.
🔸Rehefa hainao ny mifehy ny safidinao, dia manomboka miova ny hoavinao.

⏩“Ny fandresena lehibe indrindra dia tsy ny fandresena ny hafa, fa ny fandresena ny tenanao.”

08/08/2026

RAHA MIFANKATIA ISIKA

1 – Raha mifankatia isika
Dia hiova lanitra vao, izao fiainana izao
Koa ampanjakao ilay fitia
Dia ho sambatra isika raha mifankatia

Dia ilay fitia ô ô ô, dia ilay fitia ô ô ô
Dia ilay fitia namoizany ny ain’Izy Tompo
Tsisy mitia ô ô ô, tsisy mitia ô ô ô
Afa-tsy izay mahafoy ny ainy ho an’ny tiany

2 – Ianao ‘zay milaza fa mamy ny fitia
Moa ve mba fantatrao ‘zao fiainana ‘zao?
Koa ampanjakao ‘lay fitia
Dia ho sambatra isika raha mifankatia

3 – Ianao ‘zay mitory fa mamy ny fitia
Aza atao kobakam-bava fotsiny ireny
Fa tsisy hafa-tsy ny fitia
No afa-manova ity tany ity

07/08/2026

AZA MANDANY FOTOANA AMIN'NY OLONA TSY MITONDRA SOA HO ANAO

Ny fotoana no iray amin'ireo harena sarobidy indrindra ananan'ny olona. Rehefa very ny vola dia mbola azo averina,ny vola fitady hoy ny fitenenana..fa rehefa very ny fotoana dia tsy misy afaka mamerina azy intsony.

Izany no antony maha-zava-dehibe ny fisafidianana tsara ireo olona iarahanao sy iresahanao isan'andro.

Tsy midika akory izany hoe tokony hanambany na hanilikilika olona ianao. Fa midika kosa hoe mila mahafantatra hoe iza no manampy anao hitombo, ary iza no mandany ny fotoananao nefa tsy mitondra zavatra tsara eo amin'ny fiainanao.

Misy olona rehefa miaraka aminy ianao dia resaka fanaratsiana, fifosana, fitarainana,fitsikerana fiainan'ny hafa ary zavatra tsy mampandroso foana no resahana aminy. Rehefa miala eo ianao dia reran-tsaina, very fotoana fotsiny ,ary tsy misy zavatra azonao akory.

Etsy ankilany kosa, misy olona rehefa miresaka aminy ianao dia mahazo hevitra vaovao, fahalalana vaovao ,aingam-panahy, na fahasahiana hanao dingana vaovao. Ireo no olona mampitombo ny fomba fisainanao sy manosika anao hanakaiky kokoa ny tanjonao.

Raha te hanova ny fiainanao ianao, dia diniho koa ny tontolo iainanao. Satria matetika, ny olona iarahanao matetika no misy fiantraikany amin'ny fomba fisainanao, ny fanapahan-kevitrao, ary ny ho avinao.

Aza matahotra ny hampihena ny fotoana laninao amin'ny resaka tsy misy vokany. Ampiasao izany fotoana izany hianarana, hananganana business, hamakiana boky, hanatsarana ny fahaiza-manao, na hiarahana amin'ny olona afaka mampandroso anao.

Tsarovy fa ny ho avinao dia tsy miankina amin'ny nofinofinao fotsiny, fa miankina koa amin'ny olona avelanao hisy fiantraikany amin'ny fiainanao isan'andro.

Safidio ny olona mampitombo ny lanjan'ny fotoananao, fa tsy ireo mandany azy. Satria izay laninao anio no hanorina na handrava ny ho avinao rahampitso.

📖"Aza mety hofitahina hianareo; ny fikambanana ratsy manimba ny fitondran-tena tsara."
— 1 Korintiana 15:33

📖"Koa tandremo tsara izay fitondran-tenanareo, mba tsy ho tahaka ny adala, fa ho tahaka ny hendry, ka hararaoty ny andro azo anaovan-tsoa, satria ratsy izao andro iainantsika izao."
— Efesiana 5:15–16 :::

07/08/2026

RY HAVAKO,
🙋 Soso-kevitra amim-pitiavana ihany izao; anao hatrany ny safidy.

Tsy ny olona rehetra no mendrika hiadian-kevitra. Misy adihevitra sasany izay tsy mitady ny marina akory, fa mitady handany ny fotoananao, hampahatezitra anao, ary hanakorontana ny fiadananao.
Koa raha azo atao, aza mandany ny fotoananao miady hevitra amin'ireto olona ireto :

🔹 Ny olona tia ady fa tsy tia ny fahamarinana.
🔹 Ny olona mandà ny porofo na dia mazava tsara aza izany.
🔹 Ny olona maneso sy manambany fa tsy mihaino sy mandinika.
🔹 Ny olona tsy manaiky diso na oviana na oviana, fa manamarina ny tenany hatrany.
🔹 Ny olona efa nanapa-kevitra hifikitra amin'ny heviny, ka tsy misokatra amin'ny fahamarinana.

Tsarovy fa tsy ny fandresena adihevitra no tanjon'ny mpino, fa ny fampahafantarana ny fahamarinana amin'ny fitiavana. Rehefa hitanao fa mihidy ny fo, tsy mihaino ny saina, ary lasa fifamaliana fotsiny ny resaka, dia fahendrena ny mijanona.

Hoy ny Apostoly Paoly:

📖"Fa halaviro ny ady hevitra adaladala sy ny fifandirana ary ny ady teny... fa tsy mahasoa sady zava-poana izany." (Titosy 3:9)

Ary hoy koa ny Ohabolana:
📖"Voninahitry ny olona ny manalavitra ny ady." (Ohabolana 20:3)

Indraindray, ny fahanginana no valiny hendry indrindra. Tsy fahalemena ny miala amin'ny adihevitra tsy misy vokany, fa mariky ny fahamatorana sy ny fahendrena.
Aza avela hangalatra ny fotoananao, ny fiadananao, ary ny fifandraisanao amin'Andriamanitra ,ny adihevitra tsy mitondra fanorenana.

Raha misy olona mbola vonona hihaino sy hitady ny marina dia resaho amim-pitiavana. Fa raha olona tia fifandirana fotsiny, dia aleo atolotra am-bavaka toy izay homena fotoana tsy misy vokany.

Arovy ny fotoananao. Arovy ny fiadananao. Arovy ny fijoroanao ho vavolombelon'i Kristy. Satria misy adihevitra tsy tokony handresena, fa tokony hialana.

05/08/2026

⏩Ny teny hoe Franc-maçonnerie dia avy amin'ny teny frantsay :
🔹Franc = "afaka", "malalaka" (free).
🔹Maçon = "mpanao trano" na "mpanao tano vato" (mason.. Cathédrale)

⏩Maro ny tsaho sy hevitra samihafa momban'ny franc maçonnerie,misy mihevitra azy ho fikambanana miafina manana hery lehibe, misy kosa mihevitra azy ho fikambanana ara-pirahalahiana mifototra amin'ny fitondran-tena sy ny fahendrena...Ka anio isika dia hijery ny tena momba azy..

1. NY NIANDOHAN'NY FRANC MAÇONNERIE TAMIN'NY MOYEN ÂGE.

Tamin'ny Moyen Âge (manodidina ny taonjato faha-5 ka hatramin'ny faha-15), mbola tsy nisy ilay Franc-maçonnerie maoderina fantatsika ankehitriny. Ny nisy tamin'izany fotoana izany dia ireo fikambanan'ny mpanao trano (guildes de bâtisseurs), indrindra ireo mpanao trano vato (stone masons) izay nanana fahaiza-manao manokana tamin'ny fanorenana katedraly, lapa ary trano lehibe.
Ireo mpanao trano ireo dia olona tena nohajaina satria sarotra ny asany: nahay nandrefy, nanamboatra vato, nikajy rafitra ary namorona trano avo sy matanjaka. Noho ny fivezivezen'izy ireo avy amin'ny toerana iray mankany amin'ny toerana hafa dia nanana rafitra sy famantarana manokana izy ireo mba hahafantarana ny mpikambana ao amin'ny fikambanany.

⏩Nanana fitsipika momba ny asa sy ny fitondran-tena;fianarana miafina momba ny teknikan'ny fanorenana;famantarana sy teny fanekena hoenti-mamantatra ireo mpikambana.

⏩Tamin'izany vanim-potoana izany anefa, ireo fikambanana ireo dia fikambanan'ny mpanao asa tanana fa tsy fikambanana ara-pilozofia na ara-panahy toy ny Franc-maçonnerie ankehitriny.

2. FIOVAN'NY FRANC MAÇONNERIE TAMIN'NY FANORENANA KATEDRALY HO FIKAMBANANA ARAM-PIRALAHIANA.

🔹Nanomboka niova ny endriny tamin'ny faran'ny Moyen Âge sy indrindra tamin'ny taonjato faha-17. Nihena ny fanorenana katedraly lehibe, ka nihena koa ny herin'ireo fikambanan'ny mpanao trano nentim-paharazana.
Nanomboka niditra tao amin'ireo fikambanana ireo kosa ireo olona tsy mpanao trano intsony, toy ny manam-pahaizana, mpanoratra, mpanao politika ary olona liana amin'ny filozofia sy ny fanatsarana ny fiaraha-monina.
Avy amin'izany no nivoahan'ilay antsoina hoe Franc-maçonnerie spéculative: tsy ny fanorenana trano ara-batana intsony no tena ifantohana, fa ny "fanorenana" ny olona amin'ny alalan'ny fahendrena, ny fitondran-tena ary ny fahaizana mieritreritra.

3. NY FRANC MAÇONNERIE MAODERINA.

Ny fiandohan'ny Franc-maçonnerie maoderina dia matetika ampifandraisina amin'ny taona 1717, rehefa natsangana tany Londres ny Grand Lodge of England, izay iray amin'ireo hetsika lehibe nametraka rafitra maoderina ho an'ilay fikambanana.
Nanomboka niparitaka tany Eoropa sy tany amin'ny faritra hafa izy. Nisy rafitra vaovao, ambaratonga samihafa (degrés), fombafomba, marika ary fampianarana ara-moraly.

🔹Ny marika malaza ampiasain'ny franc maçonnerie dia :
👉ny efamira sy ny kompà (équerre et compas);
👉ny litera "G" amin'ny sampana sasany;
👉ny sary an'ohatra momba ny fanorenana.(Tandindona)

4. NY FRANC MAÇONNERIE SY NY FINOANY AN' ANDRIAMANITRA.

🔹Tsy fivavahana ny Franc-maçonnerie . Tsy manana Baiboly na boky masina tokana arahina, tsy manana mpitondra fivavahana, ary tsy mitaky fomba fivavahana iray.
🔹Na izany aza, misy sampana sasany, indrindra ireo antsoina hoe "régulières", izay mitaky ny mpikambana hino ny fisian'ny Mpamorona na Hery Ambony, antsoiny hoe "Grand Architecte de l'Univers".

5.AFAKA HO FRANC MAÇONNERIE VE NY KRISTIANINA.
🔹 Sarotra ny hiteny hoe :"ENY" na "TSIA" avy hatrany fa mba ahafantsika misafidy ny finoana tokony harahintsika dia andeha hijery indray isika ny fijoroana vavolombelona nataon'ireo mpikambana niala.

⏩ i Serge Abad-Gallardo sy Maurice Caillet, dia franc maçonnerie nandritry ny taona maro :
🔹Araka ny fijoroana vavolombelon'i Serge Abad-Gallardo, izay mpikambana taona maro tao amin'ny Franc-maçonnerie dia nanoratra boky izy mitantara ny zavatra niainany tao amin'ny franc maçonnerie, anisan'ny nolazainy taminy boky iray nosoratany fa ny fikambanana franc maçonnerie dia nitondra azy hanompo an'i Losifera nefa tsy fantany.
Izay no nahatonga azy nanome ny lohatenin'ilay boky hoe "Je servais Lucifer sans le savoir".Ao amin'io boky io, ary koa ao amin'ny "Le Secret maçonnique ou vérité catholique", dia manazava izy fa ny rites (fombafomba), ny symboles (marika), ary ny fampianarana sasany tao amin'ny loge dia ahitana fomba2 satanika sy okilta ary manana heviny ara-panahy tsy mifanaraka amin'ny finoana kristiana ny ankamaroany.

👉Toy izany koa i Maurice Caillet, nanoratra ny boky "J'étais franc-maçon", izay nitantara ihany koa izy fa fahendrena sy fahamarinana no saika ho karohina tany kinanjo tsy izany no hitany fa zavatra mifanohitra amin'ny evanjely sy ny maha Kristianina,..nilaza ihany koa izy ireo fa enjana ny ady aram panahy nolalovany tamin'izireo niala....ka izany no nanosika azy niala ho Franc maçonnerie ka niverina ho katolika ...

👉Ao amin'ny commentaires ny tohiny 🙏🙏

23/07/2026

🤷 Aza avela hibaiko ny fiainanao ny hevitry ny olona

🥱- Celibataire ianao: Rahoviana no hanambady? Ho antitra am-pitsanganana eo
🥱- Manambady ianao: Rahoviana no hiteraka?
🥱- Miteraka ianao: Rahoviana vao asiana zandriny?
🥱- Tonga ilay zandriny: Nareo koa mamokatra foana
🥱- Iray na roa ny zanakao: Ireo ve ho ampy?
🥱- Miteraka 4 na 5 ianao: Ireo ve ho velona?
🥱- Mahia ianao: Mijaly am-panambadiana koa angamba ireny
🥱- Matavy: Tendan-kanina loatra, voky fanabeazan'aizana angamba
🥱-Sahirana ianào: Inona koa izay ireny?
- Manana ianao: Tsy ampahafirin'izay manana koa itony
🥱- Tsy nianatra ianao: Intony koa tena bado, tsy ampy solaitra...
🥱- Nianatra mafy ianao: Mandany andro ery nefa tsy mankaiza akory. Ondanana fotsiny ny diplôma. Jereo zao zay tsy nianatra maninona?
🥱 Mangina ianao: "Miavona be!"
🥱 Be resaka ianao: "Tsy mahay mangina mihitsy!"
🥱 Mivavaka matetika ianao: "Misehoseho ho masina!"
🥱 Tsy hita am-piangonana ianao indray andro: "Efa nihemotra angamba!"
🥱 Miasa mafy ianao: "Tsy manam-potoana ho an'ny fianakaviana!"
🥱 Miala sasatra ianao: "Kamo be!"
🥱 Mizara ny fanananao ianao: "Miseho tsara fanahy!"
🥱 Tsy mizara ianao: "Tena tia tena!"
🥱 Manao ny marina ianao: "Milaza tena ho lavorary!"
🥱 Manao fahadisoana indray mandeha ianao: "Hitanay ihany ny tena toetranao!"
🥱 Mitory ny Filazantsara ianao: "Manery olona hino!"
🥱 Tsy mitory ianao: "Tsy sahy mijoro amin'ny finoanao!"

😁 Na inona na inona ataonao dia hisy foana olona hahita zavatra hanakianana anao. Koa aza miaina mba hankasitrahan'ny olona, fa miaina mba hankasitrahan'Andriamanitra.

👉aza avela ho ny feon'ny olona no hitarika ny fiainanao, fa ny Tenin'Andriamanitra. Ny olona dia mety hidera anao anio, nefa hanaratsy anao rahampitso. Fa Andriamanitra kosa tsy miova, ary ny fitsarany no marina.

Aza mandany ny fotoananao hanaporofoana ny tenanao amin'izay olona tsy mety afa-po. Fa mandania ny fotoananao kosa hiaina amin'ny fahamarinana sy hankatò an'Andriamanitra.

Tsarovy: Tsy ianao no tompon'andraikitra amin'ny hevitry ny olona momba anao, fa ianao no tompon'andraikitra amin'ny toetranao eo anatrehan'Andriamanitra.

Koa rehefa manakiana anao ny olona, dia aza maika hamaly. Rehefa maneso anao izy, aza maika hifanditra. Avelao ny fiainanao sy ny asanao no hamaly azy.
Satria amin'ny farany, tsy ny fitsaran'ny olona no hamaritra ny hasarobidinao, fa ny fitsaran'Andriamanitra. Ary tsara lavitra ny ankasitrahan'Andriamanitra toy izay derain'izao tontolo izao.

🔥Matio 7:5: "Ry mpiatsaravelatsihy, esory aloha ny andry eo amin'ny masonao, ary amin'izay vao ho hitanao tsara ny hanesoranao ny sombin-kazo eo amin'ny mason'ny rahalahinao.....

10/07/2026

TOETRA 10 TOKONY HASEHON'NY RAIM-PIANAKAVIANA AMIN'NY ZANANY
"Ny ray dia tsy antsoina fotsiny hoe ray, fa voantso ho mpitaiza, mpiaro ary mpitarika ny ankohonany."

1. ❤️ Tiavo ny zanakao.
📖 Efesiana 5:25; Kolosiana 3:21
Ny fitiavana no fototry ny fitaizana rehetra. Tsy ampy ny milaza hoe: "Tiako ianao", fa tokony ho hita amin'ny fihetsika isan'andro izany. Ny ray tia dia manokana fotoana ho an'ny zanany, mihaino azy, mampahery azy ary maneho fitiavana na amin'ny fotoana mora na amin'ny fotoana sarotra. Ny zanaka mahatsapa fa tiana dia mitombo ao anatin'ny fahatokisana sy ny filaminana.

2. 🛡️ Arovy sy karakarao izy.
📖 1 Timoty 5:8
Andriamanitra dia nanankina ny zanaka tamin'ny ray mba hiarovany azy. Tsy fiarovana amin'ny loza ara-batana ihany no ilaina, fa fiarovana amin'ny fitaoman-dratsy, ny fahotana ary ny fampianarana diso koa. Tokony hikarakara ny filany ara-batana, ara-tsaina ary ara-panahy ny ray.

3. 📚 Ampianaro ny lalan'Andriamanitra.
📖 Deoteronomia 6:6–7; Ohabolana 22:6
Ny fanabeazana lehibe indrindra azon'ny ray omena ny zanany dia ny fampianarana azy hahalala sy hanaja an'Andriamanitra. Ny harena mety ho lany, ny diplaoma mety ho very hasina, fa ny Tenin'Andriamanitra mitoetra mandrakizay. Koa ampianaro hivavaka, hamaky Baiboly ary hankatò an'Andriamanitra ny zanakao.

4. 🤝 Miezaha ho ohatra tsara.
📖 1 Korintiana 11:1
Ny zanaka dia mianatra amin'ny zavatra hitany kokoa noho ny zavatra reny. Raha mandainga ny ray nefa mampianatra ny zanany tsy handainga dia hikorontana ny fanabeazana. Raha mivavaka, marina, mahatoky ary manetry tena kosa ny ray dia lasa fianarana velona ho an'ny zanany izany.

5. 😊 Mahareta ary aza mampahakivy ny zanakao.
📖 Kolosiana 3:21
Mila fanitsiana ny zanaka, saingy tsy tokony hatao amin'ny hatezerana na fanalam-baraka izany. Ny fananarana amim-pitiavana dia manarina, fa ny teny masiaka sy ny hatezerana tafahoatra dia mandratra ny fo ary mety hampihemotra ny zanaka.

6. ⚖️ Ataovy amim-pahamarinana sy rariny ny fitaizana.
📖 Mika 6:8
Aza manavakavaka ny zanakao. Aza tia ny iray ka manao tsinontsinona ny hafa. Rehefa misy fahadisoana dia tsarao amin'ny rariny; rehefa misy ezaka tsara dia derao amin'ny fahamarinana. Ny rariny ampianarina ao an-trano no hanampy azy hiaina amim-pahitsiana eo amin'ny fiaraha-monina.

7. 🙏 Mivavaha ho an'ny zanakao ary tariho amin'ny finoana.
📖 Josoa 24:15
Ny ray no tokony ho mpitarika ara-panahy ao an-tokantrano. Mivavaha miaraka amin'ny zanakao, ampianaro ny Tenin'Andriamanitra ary asehoy amin'ny fiainanao ny atao hoe finoana marina. Ny ray mivavaka ho an'ny zanany dia mametraka azy eo ambanin'ny fitarihan'Andriamanitra.

8. 👂 Henoy ny zanakao ary omeo fotoana izy.
📖 Jakoba 1:19
Mila ray mahay mihaino ny zanaka. Indraindray tsy vola no ilainy indrindra, fa sofina mihaino sy fo mahatakatra. Rehefa zatra mihaino azy ny ray dia tsy hatahotra hizara ny olany aminy ny zanaka.

9. 💪 Mazotoa miasa mba hanome izay ilain'ny ankohonanao.
📖 1 Timoty 5:8
Ny asa dia fanomezam-boninahitra an'Andriamanitra. Ny ray mazoto miasa amim-pahitsiana dia tsy mamelona ny ankohonany fotsiny, fa mampianatra ny zanany koa ny hasin'ny fahazotoana, ny fahamarinana ary ny andraikitra.

10. ❤️ Mamela heloka sy manitsy amim-pitiavana.
📖 Efesiana 6:4
Tsy misy zanaka tsy mety diso. Ny ray hendry dia mahay manitsy rehefa ilaina, nefa mahay mamela heloka koa rehefa mibebaka ny zanany. Ny tanjon'ny fanitsiana dia ny hanarina, fa tsy ny handrava. Tahaka ny Ray any an-danitra izay mamindra fo amintsika, dia tokony haneho famindram-po amin'ny zanany koa ny ray eto an-tany.

Ny ray araka ny sitrapon'Andriamanitra dia tsy refesina amin'ny harenany, ny lazany na ny fahefany, fa amin'ny fitiavana asehony, ny ohatra velona avelany ary ny fomba itaizany ny zanany.
Ny vola sy ny fananana mety ho levona, fa ny zanaka notezaina tao anatin'ny fahamarinana sy ny Tenin'Andriamanitra kosa dia lova velona haharitra hatramin'ny taranaka fara mandimby.

Noho izany, ry raim-pianakaviana, aza miezaka ho ray lehibe eo imason'izao tontolo izao fotsiny, fa miezaha ho ray mendrika eo anatrehan'Andriamanitra. Ny zanakao dia tsy hahatsiaro indrindra izay rehetra novidinao ho azy, fa hahatsiaro mandritra ny androm-piainany ny fomba nitiavanao, nitarihanao ary nitaizanao azy. Izany no lova sarobidy indrindra azon'ny ray avela ho an'ny zanany.

06/07/2026

Androany isika dia hiresaka,hanazava momban'ilay Biby fito loha resahiny Boky Apokalipsy....Mety efa nahare fanazavana sy resaka momban'io biby io ihany isika saingy ity fanazavana hoentiko ity dia tsy avy amin'ny antokom pivavahana manokana toy ny hoe Catholique, Protestante,Jesosy Mamonjy ....sns...fa ity dia fanazavana tsoahina avy amin'ny Baiboly manokana mba hitondra lesona ho antsika tsirairay hialana amin'ny fampianaran-diso sy ny fanaratsiana ny hafa.

1. Inona ilay biby fito loha?

👉Ao amin'ny Apokalypsy 13:1 dia nahita "biby niakatra avy any an-dranomasina" i Jaona. Tsy biby ara-bakiteny io, fa tandindona, satria feno tandindona ny bokin'ny Apokalypsy.

2. Inona no dikan'ny biby?

👉Ao amin'ny Daniela 7:17 dia efa nomena ny fanalahidy:
"Ireo biby lehibe efatra dia mpanjaka efatra izay hitsangana amin'ny tany."
Ary ao amin'ny Daniela 7:23:
"Ny biby fahefatra dia fanjakana fahefatra eto an-tany."
Noho izany, ao amin'ny faminaniana, ny biby dia maneho fanjakana na fahefana mpitondra, fa tsy biby ara-bakiteny.

3. Inona no dikan'ny loha fito?

👉Ao amin'ny Apokalypsy 17:9-10 dia ny Baiboly mihitsy no manazava:
Ny loha fito dia tendrombohitra fito.
Ary mpanjaka fito koa izy ireo.
Midika izany fa misy heviny roa mifamatotra: toerana sy fitondrana na mpanjaka.

4. Inona no dikan'ny ranomasina?

👉Ao amin'ny Apokalypsy 17:15:
"Ny rano... dia olona sy vahoaka ary firenena sy samy hafa fiteny."
Noho izany, ny biby miakatra avy amin'ny ranomasina dia manondro fahefana mipoitra eo anivon'ny vahoaka sy ny firenena maro.

LESONA HO ANTSIKA KRISTIANINA

Ny tanjony faminaniana momba ilay biby fito loha dia tsy ny hanomezantsika anaran'olona na anarana antokom-pivavahana, fa ny hampitandrina antsika fa hisy fahefana sy rafitra hanohitra an'Andriamanitra sy hanandrana hamitaka ny olona.

Noho izany, aza variana manondro olona na fikambanana, fa miezaha hahatakatra ny hafatra tian'ny Soratra Masina hampitaina. Ny fanontaniana lehibe tsy tokony ho hoe: "Iza ilay biby?" fa hoe: "Moa ve aho mahatoky an'i Kristy ka tsy ho voafitaky ny ratsy?"

Ny Apokalypsy dia nosoratana mba hampahery ny mpino, hampitandrina azy ireo, ary hanome toky fa na dia toa mahery aza ny herin'ny ratsy, dia i Jesosy Kristy no Mpanjakan'ny mpanjaka, ary Izy no handresy amin'ny farany.

"Koa aoka isika tsy hatahotra ny biby, fa hatahotra ny hiala amin'Andriamanitra. Tsy ny fahalalana ny mombamomba ilay biby no mamonjy, fa ny fahatokiana an'i Kristy sy ny fankatoavana ny Teniny."

Feon'ny Soratra Masina

13/08/2026

12/08/2026

12/08/2026

08/08/2026

07/08/2026

07/08/2026

05/08/2026

23/07/2026

10/07/2026

06/07/2026

Address

Website

Alerts

Shortcuts

Share

Category

Listing takedown request