EKAR Md Stanislas Kostka Ambohijanahary Antehiroka

25/05/2026

📌𝙃𝙖𝙛𝙖𝙩𝙧𝙖 𝙖𝙫𝙮 𝙖𝙢𝙞𝙣'𝙞 𝙈ô𝙥𝙚𝙧𝙖 𝙏𝙖𝙝𝙞𝙧𝙮 𝙑𝙞𝙠𝙚𝙧𝙖:

🙏Misaotra antsika rehetra tamin'ny fiaraha-mivavaka, fifanotronana, tolotra sy fanomezana isan-karazany, fiaraha-mifety
🙏Andriamanitra anie hamaly fitia antsika
🙏Md Philbert hivavaka ho antsika
🙏Ny Fanahy Masina hanenika ny fiainantsika
🙏Dia mifampivavaka hatrany

Ekar Md Stanislas kostka Ambohijanahary ❤️

24/05/2026

« Mpankahery sy mpanazava ary mpampihavana ny Fanahy Masina »
Mankalaza ny Pantekôty isika amin’ity Alahady ity izay fahatsiarovana ny nidinan’ny Fanahy Masina tamin’i Masina Maria sy ny Apôstôly. Ny voalohany tonga ao an-tsaina dia ny hoe rehefa nandray ny Fanahy Masina ny Apôstôly dia niteny fiteny samihafa. Io tantara io dia mampahatsiaro ny nanaparitahan’Andriamanitra ny vahoaka teo amin’ny tilikambon’ny Babela tamin’ny alalan’ny tsy fifankahazoana fitenenana (jen 11, 5-9). Eto kosa dia io fitenenana io ihany no hamondronan’Andriamanitra ny olona rehetra satria ny tokony hivelomantsika dia tsy hoe fitoviana toy ny tany Babela fa fiombonana ao anatin’ny fahasamihafana. Ary ny finoana dia tsy natao ho an’ny Jody ihany fa natao ho an’ny olona rehetra.
Ankoatra izay, ny tiana hisarihana ny saintsika dia ny fanontaniana hoe oviana marina no tena nandraisan’ny mpianatra ny Fanahy Masina ? Ny Vakiteny voalohany dia milaza hoe ny andro Pantekôty izany hoe dimampolo andro taorian’ny Paka. Ny Evanjelin’i Md Joany kosa dia milaza fa ny harivan’ny Paka dia efa nomen’i Jesoa ny Fanahy Masina ny Apôstôly. Ny olana ho antsika dia tsy ny fotoana na ny andro fa ny hevitra ao ambadika. Ka na ny Vakiteny voalohany na ny Evanjely dia samy maneho ny dikan’ny fidinan’ny Fanahy Masina ho antsika.
Voalaza fa ny andro Pantekôty no nidina ny Fanahy Masina. Araka izany dia, toy ny Paka, tsy isika Kristianina no voalohany nankalaza ny Pantekôty fa nolovaintsika tamin’ny Jody. Ny Pantekôty ho azy ireo dia atao ihany koa hoe fetin’ny herinandro (Eks 34, 22 ; Lev 23, 15-21 ; Det 16, 9-12) ka ankalazana zavatra roa : ny fetin’ny voaloham-bokatra, anolorana ho an’ny Tompo ny santa-bokatry ny tany, sy fahatsiarovana ny nanomezana ny Lalàna tao Sinai. Koa Pantekôty no nidina ny Fanahy Masina mba hanehoana fa ny Fanahy no mampahavokatra antsika (Ga 5, 22-23) ary izy no tokony ho Lalàna anaty mibaiko ny fiainantsika.
Ao amin’ny Evanjely dia ny harivan’ny Paka, izany hoe ny andro voalohany amin’ny herinandro sy ny fihetsika nataon’i Jesoa « mitsoka » no nidinan’ny Fanahy Masina. Ka ireo zavatra roa ireo dia samy mampahatsiaro ny fahariana tany am-piandohana (jereo Jen 1-2). Ny andro voalohany amin’ny herinandro no nanombohana ny fahariana ary ilay mitsoka eto dia fihetsika nataon’Andriamanitra mba hahatonga ny olombelona hanana aina. Noho izany ny fandraisana ny Fanahy Masina dia anehoana fa olom-baovao ary manana aina vaovao ka manomboka fiainana vaovao izay mandray ny Fanahy Masina.
P. Andriamirijanirina Jean Flavien

22/05/2026

Aza adino ny mitondra labozia amin'ny Alahady Pantekôty

19/05/2026

MIARO NY TRANOBE IOMBONANA
Hery ahafahantsika mitarika ireo fanamby sy olana eto amin’izao tontolo izao ny fibanjinantsika an’i Jesoa nitsangan-ko velona. Raha nitanondrika sy feno alahelo i Maria Madelena nibanjina ny fasana dia tonga i Kristy nanontany azy hoe : « Nahoana ianao no mitomany ? », « Iza no tadiavinao ? ».
Tsy kisendrasendra ny firesahan’ny Evanjely momba ilay saha nandevenana an’i Jesoa. Tsy nahafantatra an’i Jesoa avy hatrany i Maria Madelena, teto akikin’ny fasana, fa nihevitra azy ho mpiandry ny saha. Mampatsiahy antsika ny iraka fototra nankinin’Andriamanitra amintsika olombelona io toerana io : manajary sy mitahiry ny tranobe iombonana.
Nitia hatramin’ny farany i Jesoa teo ambonin’ny hazofijaliana ary rehefa nitsangana Izy dia tanterany ny iraka nampanaovina azy. Nanomboka teo ny asan’ilay Olom-baovao izay manavao ny zavatra rehetra eto an-tany.
Araka izany, tsy very akory ny paradisa fa hita indray. Ny fahafatesana sy ny fitsanganan’i Jesoa ho velona dia tonga fototry ny aim-panahy amin’ny hai-tontolo iainana manontolo, izay ihaonan’ny finoana sy ny siansa ao amin’ny fijery mibanjina ny voahary. Ilàna fibebahan’ny fo sy fomba fiaina vaovao anefa izany, hoy ny Papa François.
Ity fiovam-po ekolojika ity izay tsy afa-misaraka amin’ny fibebahana Kristianina dia manova ny lohasahan-dranomasontsika ho Jerosalema vaovao. Mitaona antsika hanao asa mivaingana izany ka hiaro ny olona sy ny zava-boahary amin’ny fitsiriritan’ny ambodia, amin’ny alalan’ny herin’ilay Zanakondrin’ny Mpiandry an’izao tontolo izao.
Ahirato àry ny masontsika hijery ilay saha hita indray. Ilay paradisa nampanantenaina, anataterahantsika rehetra am-pitiavana ny asa nakinin’Andriamanitra tamintsika.
(Katesizy, Papa Léon XIV, 19 nov 2025) – Lolly

17/05/2026

« Ny fiainana mandrakizay dia ny mahalala an’Andriamanitra »
Avy nankalaza ny niakaran’ny Tompo any an-danitra isika dia mitantara ny fiainan’ireo mpianatra tao aorian’izany ny Soratra Masina. Voalaza fa zavatra roa no toetra namaritra ny fiaraha-monin’izy ireo.
Voalohany, niray saina izy ireo. Averin’i Lioka tanisaina ny anaran’ireo Apôstôly, anehoana fa ireo mpianatra niaraka tamin’i Jesoa sy nahita ny fijaliany sy ny fahafatesany ary ny fitsanganany ho velona ihany ireo manohy ny fiainana. Fa fampahatsiahivana ihany ko any hoe samy manana ny toetrany sy ny maha izy azy izy ireo, ary afaka miara-monina sy miombona niray saina.
Faharoa, ny faharetana mivavaka. Tsy hoe izy ireo irery no nivavaka niaraka tamin’i Masina Maria sy ny rahalahin’i Jesoa. Izany hoe fianakaviambe no miombona mivavaka. Ao amin’ny Evanjely dia miseho fa i Jesoa mihitsy no ohatra ho antsika amin’ny Vavaka. Ka ny vavaka dia resaka am-pitiavana amin’Andriamanitra. Tsy resaky ny tia tena fa resaky ny olon-tiana. Tian’i Jesoa loatra isika ary mameno ny fony sy fitiavany manontolo ka Izy no mivavaka sy mangataka ho antsika. Io vavak’i Jesoa io ihany koa dia manambara ny mistery lalin’ny fiainany. Lazainy ao fa Zanaka Izy : « Raiko ô », hoy Izy, raha nanomboka vavaka. Toe-po ilaina voalohany io raha hivavaka isika. Mandray an’Andriamanitra ho Ray, akaikin’ny fo. Manaraka izany dia lazainy ao koa fa Andriamanitra Izy ary efa nisy talohan’izao rehetra izao. Tokony tsy ho adinointsika mandrakariva fa sady tena Andriamanitra i Jesoa no tena Olombelona. Etsy ankilany dia hita mazava eto fa asa sy iraka notanterahin’i Jesoa teto an-tany ny hanambara ny misterin’Andriamanitra. Mbola asa tanterahintsika ankehitriny koa izany satria hoy i Jesoa : « efa nitandrina ny Teninao izy ireo ». Ka ny mitandrina tsy hoe mihaino fotsiny fa tena miaina sy mampihatra. Noho izany, ny Tenin’Andriamanitra no tena fiainan’ireo mpianatr’i Kristy. Hita taratra eo aminy noho izany Andriamanitra. Ny tanjon’i Jesoa amin’izany dia ny fiainana mandrakizay ho antsika.
P. Andriamirijanirina Jean Flavien

16/05/2026

❤️« Lazaiko marina aminareo fa isaky ny nanao izany tamin’ny anankiray amin’ireto zandriko kely indrindra ireto ianareo, dia nanao izany tamiko. » ❤️ Mt 25, 40b
Misaotra ny « Association Mamiratra »🙏

15/05/2026

Tontosa soamatsara ny Fitsidihana Pastôraly teto anivon'ny Eglizintsika izay notarihin'i Môpera Vikera Jeneraly Raiamandreny avy ao amin'ny Diôsezy. Misaotra azy isika ary misaotra antsika ihany koa tamin'ny fikarakarana, fa indrindra tonga maro be. Ireto ary ny hafatra:
🙏Fitiavam-bavaka: ny vavaka no tena maha Kristianina antsika fa tsy ny fandraisana Sakramenta. Ary ny adidy voalohany ho an'izay vita Batemy dia ny mivavaka
🙏Manentana ny olona hivavaka: miezaka mitarika ny hafa hanatona an'Andriamanitra
❤️Atao izay hifankatiavana, indrindra ny samy tomponandraikitra; sambatra ny mpampihavana
💛Mavitrika mirotsaka anaty Fikambanana Masina sy vaomieranasa: miezaka mampiroborobo ny Fikambanana Masina sy Vaomiera
✝️Fiainana ny Litorjia: Andriamanitra no atao laharam-pahamehana
🥖Ezaka amin'ny fivoaram-pivelomana: mila misasatra rehefa miaraka amin'Andriamanitra. Aza miavon-draharaha fa izay misy dia atao. Mila miasa, fa ny mangalatra; mametsifetsy; manao kely tsy mba mamindro; manao kolikoly, ihany no fadio

14/05/2026

HAFATRY NY FIVONDRONAMBEN'NY EVEKAN'I MADAGASIKARA NY 13 MEY 2026

13/05/2026

12/05/2026

Manantena mba hampita aina
Ny Pakan’i Kristy no manazava ny misterin’ny fiainana ka ahafahantsika manantena, na eo aza ny fahasahiranana. Tokony horaisin’ny olombelona ho fanomezana io mistery io, manomboka amin’ny andro voalohany mandra-pahatapitry ny aina. Io no anton’ny fanontaniana momba ny fisiana ka manentana antsika hikaroka ny heviny, ny fiozotrany, ary ny tanjony mandritra ny diantsika ety an-tany.
Noho izany, manampy antsika hihoitra amin’ny fahasahiranana eo amin’ny fiainana ny fananana fanantenana, amin’ny alalan’ny fahatokisana ny fitiavan’ny Ray izay nahary antsika tamin’ny fitiavana sy tao anatin’ny fitiavana.
Toa zary aretina mahazo ny olombelona ankehitriny ny tsy fahampian’ny fahatokisana amin’ny fiainana. Tsy raisina ho toy ny fahafahana nomena ho fanomezana intsony ny fiainana fa lasa mampiahiahy, ary indraindray aza heverina ho toy ny ambana, izay tsy maintsy tandremana. Tsy tokony hatahotra anefa isika fa haneho amin-kerim-po ny hoe miaina sy mampita aina, izay mahatonga antsika ho « mpitia ny aina », araka ny endrik’Andriamanitra.
Ny mampita aina noho izany dia midika hoe matoky an’Andriamanitra sy mampivelatra ny maha-olona amin’ny endriny rehetra, manomboka amin’ny anjoria mahafinaritra amin’ny maha reny sy maha ray, izay nanome aina tamin’ny alalan’ny fitiavana sy tao amin’ny fitiavana, eny fa na dia tamin’ny toe-javatra sarotra ara-piaraha-monina nitadiavantsika vahaolana aza. Midika ho fanoloran-tena ho an’ny soa iombonana ihany koa ny fampitàna aina.
Ampian’ny herin’i Kristy nitsangan-ko velona àry isika, ka ndeha hiatrika ireo fanamby momba ny aina ireo.
(Katesizy, Papa Léon XIV, 26 novambra 2025) - Sitraka