Pejy IBC

29/05/2026

Ny sampany rehetra eo amiko izay tsy mamoa dia esoriny; fa ny sampany rehetra izay mamoa kosa dia amboariny, mba hamoa bebe kokoa.

23/03/2026

Mahatsapa fa tena mila an'Andriamanitra ve ianao anio? Aza manahy fa zavatra tena tsara izany faniriana izany.

Tompo ô, tena tiako hanenika ahy tanteraka ny fanatrehanao anio. Vizana sy reraka aho noho ireo zava-manahirana maro eo amin'ny fiainako manokana, eo anatrehan'ireo zava-mitranga samihafa manodidina ahy sy eran'izao tontolo izao.
Tompo ô, Omeko anao ny ahiahiko sy ny olako ary raisiko ny fiadanana avy aminao. Mangetaheta loatra ny fanahiko ka fenoy. Omeo ilay fifaliana miavaka avy aminao aho. Amin'ny anaran'i Jesosy.

09/03/2026

Sady mametraka ny fanahianao rehetra amin'Andriamanitra ianao no mamporisika ny hafa mba hanao toa izany koa.

08/03/2026

NA DIA MAHARARY AZA ...
Misy andinin-tsoratra masina miverimberina ao an-tsainao foana ve? Ho ahy, tato anatin'ny volana vitsivitsy, dia ny

📖 Salamo 37:5 foana izany, ary tiako ny hiara-mijery izany aminao anio: “Ankino amin’i Jehovah ny lalanao, ary matokia Azy, fa hataony izany.” (Salamo 37:5)

❓ Inona no tsapanao amin’io andininy io? Angamba fotoana fohy mampihetsi-po anao ka ilazanao hoe: “Eny, Tompo ô — indro ny fiainako. Manana fahatokiana Anao aho.”

🙇🏼‍♀️ 🙇🏼‍♀️ 🙇🏼‍♀️ Saingy raha tsy mihatsaravelatsihy isika, dia matetika fotoana miserana ihany ireny, ary vetivety dia adino… Ny tena manaitra ahy dia ilay teny hoe “ankino”. Ny teny hebreo niaviany dia midika hoe: “manakodia zavatra any amin’ny olon-kafa”, “manolotra”, na “mametraka”. - Andray é!

Alao sary an-tsaina izao: Entana mavesatra iray no akodia miala eo an-tsoroko ka apetraka eo an-tsorok’Andriamanitra.

Raha amin’ny fomba fanao andavanandro, izany dia midika fa atsahatro ny fiezahana hifehy ny zava-drehetra ato anatiko, ary omeko an’Andriamanitra ny zo hitarika — na dia amin’ny lalana hafa noho ny tiako aza izany.

I Jesosy mihitsy no ohatra lehibe indrindra ho antsika amin’izany. Tao anatin’ny fanaintainana mafy indrindra azonao eritreretina, dia mbola hoy Izy:
📖 “Ray ô, raha azo atao, dia avelao hiala amiko ity kapoaka ity; nefa aoka tsy ny sitrapoko anie no hatao, fa ny Anao.” (Matio 26:39)

✅ Tena vonona ny hiteny izany ve isika — ary amin’ny fo tokoa?

Mora ny miteny hoe: “Indro ny fiainako, manana fahatokiana Anao aho,” nefa moa ve tsapantsika fa midika koa izany hoe: “Tsy ny sitrapoko, fa ny sitraponao no aoka ho tanteraka — na dia maharary aza izany?”

Izay rehetra mahavita izany no tena nahatakatra an’izao:
✅ Na dia maharary aza, dia mbola ho amin’ny tsara hatrany no fikasan’Andriamanitra!

⁉️ Vonona ny hiteny izany ve ianao anio, ka amin’ny alalan’izany no hametrahanao ny entan’ny fiainanao eo an-tanan’ Andriamanitra?

Mahazo tombony be isika ao anatin'izany fifanakaozana izany. 😉

🙇🏼‍♀️ Eritrereto izany, ary tadidio…

Azo itokisana Izy! 💪🏾

28/02/2026

NY TENA NAMANA
Iza amin'ireto no hofidinao: hanana "namana" an-jatony izay mahafantatra anao fotsiny, nefa tsy tena mahalala anao marina -- izay miantso anao hoe namana saingy rehefa mety aminy ihany? Sa kosa, naleonao manana namana marina iray izay eo anilanao foana?

Ny mpanoratra ny Ohabolana, izay lazaina matetika fa ny mpanjaka Solomona, dia nilaza izao: "Misy naman'ny tena izay manimba ny tena, nefa misy namana izay mifikitra mafy mihoatra noho ny rahalahy." (Ohabolana 18:24).

Misy namana miditra eo amin'ny fiainantsika noho ny fifanakaikezana fotsiny: miasa amin'ny toerana iray ianareo, miara-mianatra ny zanakareo, na mpandeha amin'ny toerana iray ianareo. Saingy tsy noho ianao mahafantatra ny anaran'ny olona iray sy mifanaraka amin'ny tambajotra sosialy, dia midika izany fa tena namana ianareo. Rehefa ny fisakaizana marina no resahina, dia ny kalitao no zava-dehibe fa tsy ny habetsahana.

Na dia ny namana tena mahatoky indrindra aza dia mety handiso fanantenana anao indraindray, satria tsy misy olona tonga lafatra -- afa-tsy i Jesosy ihany. Izy no Namana fara tampony amin'ny fahamarinana. Raha mianatra avy amin'ny ohatra nomen'i Jesosy isika, dia misy toetra sasany mampiavaka ny namana marina sy araka an'Andriamanitra:

✅ Moa ve izy ireo tia an'Andriamanitra? Ny namana marina dia ilay hitondra anao hiverina amin'ny Mpamorona sy Mpamonjy anao amin'ny farany. Ilay hiara-hiatrika ny fanontanianao sy ny fisalasalanao, tsy misy fitsarana na fanamelohana. Ilay hilaza ny marina amim-pitiavana, na dia sarotra aza izany. Ilay hikatsaka ny hanome voninahitra an'Andriamanitra sy hanaja anao amin'ny maha namana anao.

✅ Moa ve izy ireo vonona hiatrika ny zavatra sarotra? Ny ankamaroan'ny olona dia faly ho namanao rehefa mahafinaritra, tsara, ary miroborobo ny fiainana, saingy vitsy no mifikitra eo rehefa tonga ny sarotra. Rehefa marary ianao, rehefa kivy, rehefa tsy takatry ny olona, na rehefa mila fanitsiana amim-pitiavana ny iray aminareo, dia mila zavatra mihoatra noho ny "namana amin'ny fotoana mahafinaritra" fotsiny ianao.

✅ Moa ve izy ireo vonona hitia mihoatra ny tenany? Ao amin'ny Jaona 15:13, dia nilaza i Jesosy hoe: "Tsy misy manana fitiavana lehibe noho izao, dia ny manolotra ny ainy hamonjy ny namany." Nasehon'i Jesosy ohatra izany tamin'ny nanomezany ny ainy ho antsika. Mety tsy hitaky ny ain'izy ireo izany, saingy vonona ny hanompo ny olona tiany ve izy ireo? Vonona ny hametraka an'Andriamanitra ho voalohany, ny hafa ho faharoa, ary ny tenany ho fahatelo ve izy ireo?

➡️ Ireo fanontaniana rehetra ireo dia torolalana tsara rehefa mitady fisakaizana mafy o***a. Saingy alohan'ny hitadiavanao namana manana ireo toetra ireo, dia jereo ao amin'ny fitaratra aloha ny tenanao. Raha te hanana izany fisakaizana izany ianao, dia ianao koa mila miaina ireo toetra ireo amim-pahamarinana sy amim-pahasoavana. Aoka ianao ho ilay namana marina irinao.

06/02/2026

"Ray ô, misaotra Anao fa tsy irery aho. Ianao no miaraka amiko, ary tsy izaho no voalohany niatrika izao ady izao. Tsy hitsoaka an-daharana aho. Ampitomboy ny heriko. Te-hihazakazaka tsara amin'ny fihazakazahako aho. Atsipiko daholo izay rehetra manakantsakana ary hihazakazaka manatona Anao aho. Misaotra fa miaraka amiko eo ianao. Amen."

15/01/2026

MANITSY NY FONTSIKA
Ny iray amin'ireo lohahevitra manan-danja indrindra ao amin'ny Baiboly dia ny fonao. Nandritra ny tantara rehetra ao amin'ny Soratra Masina, dia nasehon'Andriamanitra fa tsy ny volanao, ny fotoanao, na ny fanompoanao no tena mahaliana Azy, fa ny fonao.

Nahoana no zava-dehibe izany? Satria nampianatra ny mpianany i Jesosy fa ny fo no ivon'ny fiainantsika. Ny fihetseham-pontsika sy ny faniriantsika dia mikoriana avy amin'ny toetry ny fontsika. Raha mahazo toerana ao am-pontsika ny Tompo, dia hanaraka izany ny sisa rehetra amin'ny fiainantsika.

Ao amin'ny Matio 6:21, dia nilaza i Jesosy fa izay misy ny harenao, dia ho any koa ny fonao. Ireo zavatra sarobidy amintsika eo amin'ny fiainana no mampiharihary ny toerana misy ny fontsika marina tokoa. Ny zavatra eritreretintsika, ny zavatra andaniantsika vola, ary ny zavatra ampiasana ny herintsika—eo no misy ny fontsika.

Saingy tsy ampy ny mitandrina fotsiny ny fontsika mba tsy hitoetra amin’ireo zavatra ireo. Fa kosa, mila mampitodika ny fontsika hifantoka amin'i Jesosy isika. Ny apostoly Paoly dia mamporisika antsika hifantoka amin’ireo zavatra avy amin’Andriamanitra:

"Farany, ry rahalahy, na inona na inona marina, na inona na inona mendrika, na inona na inona mahitsy, na inona na inona madio, na inona na inona mahafinaritra, na inona na inona tsara laza—raha misy hatsaram-panahy na fiderana—dia heveru izany zavatra izany."Filipiana 4:8

Ity fomba fisainana ity no mampirosika ny fontsika hanao an'i Jesosy ho harena ambony indrindra mihoatra noho ny zavatra hafa rehetra eto an-tany.

Raha manontany tsotra tenanao ianao, aiza ny harenao amin'izao fotoana izao? Inona ireo zavatra andanianao ny fotoanao sy ny volanao? Eritrereto hoe ahoana no ampisehoan'ireo zavatra ireo ny tena misy ny fonao. Ny fandaniana fotoana amin'ny Tenin'Andriamanitra sy ny vavaka no fomba tsara indrindra hampitodika ny fontsika hiverina amin'ny Tompo.

30/12/2025

Tompo ô, Misaotra Anao tonga tety an-tany mba hiaraka aminay—hiaraka amiko. Fantatro fa Ianao no nanao ahy, tia ahy, ary nanolotra ny ainao mihitsy mba hamonjena ahy.
Ampio aho hahatsapa ny fanatrehanao eo amin’ny fiainako. Ampahatsiahivo ahy foana ireo fotoana rehetra, na tamin’ny mora na tamin’ny sarotra, izay naha teo anilako Anao foana.
Mametraka ny fitokiako Aminao aho anio.
Amin’ny anaran’i Jesosy, Amen.

25/12/2025

AKON'ILAY NOELY VOALOHANY
“Anio, ao amin’ny tanànan’i Davida, misy Mpamonjy teraka ho anareo; Izy no Kristy Tompo.”

Andininy efa fahenontsika matetika ity andininy ity. Saingy ho an’ireo mpiandry ondry nandre izany tamin’ny anjely tamin’ilay alina nahaterahan’i Jesosy, dia nanaitra sy nampitsangam-bolo an'izy ireo ny hevitry ny teny tsirairay. Tsy vazivazy fa tena fahatanterahan’ny fanantenan'izy ireo rehetra.
🎄 Mpamonjy. 🎄Teraka tany Betlehema, tanànan’i Davida. 🎄Ny Mesia. 🎄Ny Tompo.

Efa an-jatony taona ny Isiraely no niandry an’io teny fikasana io. Ny mpaminany Isaia efa nanambara hoe: “Fa Zaza no teraka ho antsika, Zanakalahy no omena antsika; ary ny fanapahana dia eo an-tsorony, ary ny anarany hatao hoe: Mpanolotsaina mahagaga, Andriamanitra mahery, Rain'ny mandrakizay, Andriandahy mampisy fiadanana” (Isaia 9:5).

Jeremia koa efa niresaka hoe hisy taranaka marina avy amin’i Davida, Mpanjaka hitondra am-pahendrena sy hampihatra ny rariny: “Indro, avy ny andro, hoy Jehovah, Izay hananganako rantsana marina ho an'i Davida, ka hanjaka Izy sady ho hendry ary hanao fitsarana sy fahamarinana amin'ny tany” (Jeremia 23:5).

Na i Mika aza efa nilaza mialoha fa any Betlehema, ilay tanànan’i Davida, no hateraka ny Mesia: “Fa ianao, ry Betlehema Efrata, na dia kely tsy ho isan'ny arivon'i Joda aza, dia avy ao aminao no hivoahan'izay ho Mpanapaka eo amin'ny Isiraely” (Mika 5:1).

Koa rehefa nambaran’ny anjely tamin’ireo mpiandry ondry tany an-tsaha iny fahaterahana iny, dia tsy vaovao tsotra fotsiny ilay izy, fa fahatanterahan’ny tenin’Andriamanitra mihitsy. Tsy zaza toy ny zaza rehetra ity zaza ity; Izy no ilay Mpanafaka efa nandrasana fatratra, ilay Voahosotra. Ny hoe "Mesia" mantsy dia midika hoe “Ilay Voahosotra,” anaram-boninahitra natokana ho an’izay nofidin’Andriamanitra manokana hamonjy ny olony.

Ary ity Mesia ity dia tsy tonga mba hihaja eo ambony seza fiandrianana volamena, fa dia teo an-tranon'omby no nandry, tamim-panetren-tena sy tamim-pitiavana. Tsy tonga Izy mba handresy an’i Roma izay nanjanaka azy ireo tamin'izany, amin’ny ady, fa mba handresy ny ota teo amin’ny hazo fijaliana. Tsy tonga Izy mba hanambony tena, fa mba hanandratra antsika kosa. Ny Tompo—dia Andriamanitra mihitsy—no nanakaiky antsika, araka ny teny efa nampanantenainy.

22/12/2025

20/12/2025

FINOANA MIHOATRA NY MAHAZATRA
Tovovavy kely niaina fiainana milamindamina tao Nazareta i Maria tamin’ny fotoana nanambaran’ny anjely taminy fa hiteraka ny Zanak’Andriamanitra izy (Lioka 1:31). Raha ny fihetsika mahazatra manoloana ny trangan-javatra tena manokana toa itony dia tokony natahotra mafy sy very hevitra tanteraka i Maria. Saingy kosa, namaly tamin’ny finoana i Maria. Finoana fa marina ny teny nolazain’ilay anjely taminy, nanao hoe: “Aoka ho tanteraka amiko araka ny teninao,” (Lioka 1:38).

Rehefa nahita izany finoana tsy voahozongozona izany i Elizabeta, dia nampitondrain’ny Fanahy Masina teny ka nankasitraka ny finoan’i Maria sy nitso-drano azy nanao hoe: "Sambatra izay nino; fa hisy fahatanterahan'izay zavatra nolazain'ny Tompo taminy!"

Amin’ireo teny tsotra ireo, dia mahita fampahatsiahivana isika mba hampitoetra ny finoantsika amin’ilay fahamarinana tsy miova fa "Mahatoky Andriamanitra" amin’ny fanatanterahana ny fampanantenany araka ny Teniny.

Ny fanambaran’i Elizabeta hoe, "Sambatra izay nino," dia tsy nandeha ho azy fotsiny; fa fanamafisana ho antsika ankehitriny. Ny antitranterina eto dia tsy ny fahatanterahan'ireo fampanantenana fotsiny ihany, fa ny fitahiana azo avy amin'ny finoana sy ny fitokisana ny drafitr'Andriamanitra indrindra indrindra.

Ary izany dia mandrisika antsika handinika ny dian'ny finoantsika manokana. Moa ve isika, tahaka an’i Maria, mifidy ny hanolotra ny fiainantsika sy hitoky amin’ny fampanantenan’Andriamanitra?
Androany, eo am-pitadiavana ny Tompo amin’ny alalan'ny vavaka, dia misaora ny Tompo noho ireo fitahiana nomeny nefa tsy mbola nangatahana taminy akory.
Mangataha fahaiza-manavaka mba hahafantarana ny tanan’Andriamanitra miasa, na dia toa mifanohitra amin’izany aza ny zava-misy.