Temama

Temama Zavatra atao ahafahana Mihezaka miala na Mifady tanteraka ny hoe "TEZITRA - MALAHELO - MANKAHALA" mb

16/11/2022

Matio 6 : 24 « Tsy misy olona mahay manompo tompo roa; fa ny anankiray ho halany, ary ny anankiray ho tiany; na ny anankiray hombany, ary ny anankiray hohamavoiny. Tsy mahay manompo an'Andriamanitra sy Mamôna* ianareo. » [*Mamôna = harena]
Miarahaba antsika rehetra amin’ny anaran’i Jesosy Kristy Tompo.
Tafaresaka tamin’ny tanora maromaro aho omaly : ny votoatin’ny resaka dia ny fivavahana kristianina sy ny famadihana. Ireto tanora ireo dia samy mafana fo amin’ny asa fanompoana eo anivon’ny fiangonana misy azy tsirairay. Mafana fo koa anefa amin’ny fankatoavana ny fomban-drazana indrindra ny famadihana. Nisy anankiray aza moa niteny mintsy hoe raha ny fivavahana kristianina no tena marina dia efa ela ny malagasy no tsy nahantra, ka aleo sady mivavaka amin’ny razana ihany. Inty misy tantara kely angalana hafatra :
1- Nisy tanora iray, Kris ny anarany. Nitia vehivavy roa izy : I Fara sy I Soa. Nieritreritra izy fa mitovy ny ahavon’ny fitiavany azy ireo. Ny fanontanina napetrako tamin’ireto niresaka tamiko ireto dia izao : milamina ve sa tsy milamina i Kris ? Samy namaly izy rehetra hoe « tsy milamina ». Mino aho fa mitovy hevitra amin’izany daholo isika rehetra izay mamaky ity pejy ity.
2- Rehefa fantatr’izy roa vavy fa hay Kris sady mitia an’i Fara no mitia an’i Soa, dia nanantona azy aloha i Fara ka nilaza taminy fa tsy vitany intsony ny miaraka aminy satria mampirafy azy. Dia nanao toy izany koa i Soa. Votso-droa tampoka teo.
Raha fintinina dia izao : Tsy milamina ny lehilahy mitia vehivavy roa ary tena ho votso-droa no iafarany. Tadidio fa Jesosy, araka ity Matio 6 : 24 dia efa nilaza fa tsy hain’ny olona no manompo Tompo roa dia Andriamanitra sy Mamôna. Tsy milamina hoy isika teo. Tsy maintsy manao safidy ny olona iray : na mitia an’Andriamanitra, na mitia an’i Mamôna. Mihary harena eto an-tany na mihary harena ho any an-danitra. Fa raha mampirafy azy ireo isika dia sady tsy an’ny atsy no tsy an’ny aroa ka ho tena voa mafy tanteraka. Izay no mamaly an’ilay hoe : « maninona no malagasy no mahantra nefa kristianina ». Nefa maro amin’ny malagasy no kristianina no sady mamadika. Misy aza moa tena miompy sy mivavaka amin’ny kalanoro, zazavavindrano, vazimba, manantona mpimasy, mpanandro,etc… nefa milaza fa manompo an’i Kristy koa. Tena averiko indray : ho voa mafy tanteraka ohatran’i Kris.
Farany, Andriamanitra koa dia efa nametraka ny didy folo tamin’ny andron’i Mosesy. Ny voalohany amin’izany dia ny hoe « Aza manana andriamani-kafa, fa Izaho ihany. ». Misy olona manaraka tanteraka ny didy folo aza tsy tian’Andriamanitra (vakio Mar 10 : 17-27), maika fa misy iray tsy arahina ? Raha izaho sy ny ankohonako aloha, dia efa nisafidy ny hanompo an’i Jesosy Kristy ihany.
Ho an’Andriamanitra irery ihany ny Voninahitra. Amen.

08/11/2022

Indro, Izaho hanao anao ho tanàna mimanda sy andry vy ary manda varahina mba tsy ho leon'ny tany rehetra, na ny mpanjakan'ny Joda, na ny lehibeny, na ny mpisorony, na ny vahoaka.
— Jeremia 1 : 18

Jaona 13 : 34 -35 : « 34 Didy vaovao no omeko anareo, dia ny mba hifankatiavanareo; eny, aoka ho tahaka ny fitiavako ana...
09/08/2022

Jaona 13 : 34 -35 : « 34 Didy vaovao no omeko anareo, dia ny mba hifankatiavanareo; eny, aoka ho tahaka ny fitiavako anareo no mba hifankatiavanareo kosa. 35 Izany no hahafantaran'ny olona rehetra fa mpianatro ianareo, raha mifankatia. »
Miarahaba antsika mpamaky sy mpanaraka ity pejy ity amin’ny anaran’i Jesosy Kristy Tompontsika.
Teny efa haintsika tsianjery loatra ity teny ity. Fa kosa misy fampiharana azy tian’i Jesosy ampitaina amintsika androany.
Raha tena mpianatr’i Kristy isika dia mila mifankatia. Izany ihany no tena ahafantarana fa mpianany isika. Tsy misy singa lehibe ankoatran’izay. Iza avy no tokony hotiavina ary amin’ny fomba ahona ? Valiny : ny olona rehetra tsy misy ankanavaka na iza na iza, na avy aiza na avy aiza, na mahantra na manankarena, na mpitondra firenena na mpanohitra,….
1- Ny tenanao aloha : satria mila tia ny tenanao aloha ianao. Ahoana moa no itiavan’ny olona anao raha ianao aza tsy tia ny tenanao ? Mikarakara vantana ho mendrika ary indrindra ny manolotra ny tenanao sy ny fonao sy ny fanahinao ho an’Andriamanitra. Izany no fomba itiavanao ny tenanao.
2- Ny vady : satria « nofo iray ihany » (Gen 2 : 24) dia ohatran’ny itiavanao ny tenanao no tokony itiavanao ny vadinao, amin’ny lafiny rehetra, ary mety hihoatra aza. Tadidiko, nisy namanay izay, rehefa miara-misakafo amin’ny namana dia tena tolorany sakafo mihoatra noho ny azy sy ny sasany mihitsy ny vadiny !!!Tsy adino ny teny mamy sy oroka mandinika matetika.
3- Ny zanaka : azonao atao ny mikapoka fa tena fadio kosa ny mikasi-tanana zanaka raha maditra. Asehoy azy fa na maditra aza izy dia tianao foana sy indrindra tsy foin’i Jesosy mihitsy.
4- Ny zanaka koa dia tokony hahay hanaja ny ray aman-dreniny : amin’ny fiaraha-monina ankehitriny, noho ny fivoarana, dia tena vitan’ny zanaka mihitsy ny manao tsinotsinona ny ray aman-dreniny. Misy aza mahavita manompa mihitsy ;
Taloha, fomba fanaonay 3 mianadahy mpiray tampo amiko ny maka fotoana miaraka amin’i dada, mifampiresaka, mifananatra sy mifanoro hevitra mba hampirindra ny fiainam-pianakaviana. Misy namana izay, nitantara tamiko fa maka fotoana isan-kerinandro izy ireo, miaraka mivavaka amin’ny « vidéo-conférence ».
5- Ny fahavalo : na dia ny arahaba sy tsiky fotsiny dia mety ampy hampihena ny tsy fifankahazoanao aminy ;
6- Ny mpiara-miasa : tsy maintsy hisy ny mpitondra sy ny entina fa mila fahendrena sy fitoniana ny fifandraisana ka atao am-panajàna tanteraka ;
7- Ny mpitondra sy ny mpanohitra : ny hevitra no tsy mitovy fa ny mpitondra tokony hahay hihaina no mpanohitra ary ny mpanohitra kosa mila mahay milaza ny heviny.
Ialao hery ary ry kristiana namako isany fa sarotra tanterahina izany raha tsy tafaray tsara amin’i Jesosy ianao. Mangataha Hery sy Fanahy avy Aminy hahantaterahanao izany.
Ho an’Andriamanitra irery ihany ny Voninahitra. Amen.

03/07/2020

Mar 3 : 27 «Kanefa tsy misy olona afaka miditra ao an-tranon'ny mahery ka handroba ny entany, raha tsy afatony aloha ilay mahery, dia vao robainy ny ao an-tranony.»
Vakio Mar 3 : 01-35 : Raha fintinana fohy dia izaio, nanasitra sy nandroaka demonia maro I Jesosy, na tamin’ny andro sabata aza. Niampanga azy ny akabeazan’ny olona sy ny fariseo ary ny mpanora-dalàna, eny na dia ny reniny sy ny mpiray tampo Aminy aza. Amin’izao andron’ity aretina mandringana eran-tany ity dia miantso anao Jesosy. Betsaka ny matahotra na dia ny mankany am-piangonana aza. Aiza moa ny toerana haharesana ny asan’ny devoly raha tsy any am-piangonana indrindra indrindra. Izao kosa anefa. Mila mahery am-panahy isika. Mba ahazoanao izany Hery izany dia tsy misy afa-tsy ny firaisanao amin’I Jesosy am-pahamasinana ihany. Tsy noho ny herinao fa noho ny Herin’Andriamanitra no ahafahanao mandresy ny satana. Raha tsapanao hoe mbola tsy ampy Hery dia mijanona ihany aloha ka ataovy izay hiraisanao Aminy.

01/07/2020

Sal 19 : 7 «Tsy misy tsiny ny lalàn'i Jehovah, mamelombelona ny fanahy; mahatoky ny teni-vavolombelon'i Jehovah, mahahendry ny kely saina.»
Miditra amin’ny tapa-taona faharoa sahady isika. Betsaka ny zavatra nitranga teo amin’ny fiananao : Fahafatesana, fifaliana, faharariana, very asa, tsy ampy karama, …..Mifamahofaho sady mivadibadika ihany ity fiainana eto an-tany ity. Mahakivy, mahavery fanahy mbola velona, mila hitresaka ny loha, tsy hita izay atao. Toa mivavaka ihany fa tsy hita izay valiny.
Ry havako. Izao no ataovy ao an-tsaina. Lalana avy amin’Andriamanitra ho anao izany. Misy antony tsy mitovy isaky ny olona ny zava-mitranga rehetra. Raha efa mivaha ny olanao dia isaory Izy, derao Izy fa tsara. Raha Mbola tsy mivaha kosa dia izao no ataovy vao avy mamaky ity ianao. Mandohalia amin’ny toerana izay misy anao. Mivavaha, mibebaha. Lazao amin’I Jesosy androany, amin’ny fo torotoro anaty, ny fahorianao. Apetraho Aminy izany. Fa ho tsapanao fa hisy fiovana ny fiainanao raha ataonao am-pinoana izany. Raha sanatria hitanao fa mbola tsy misy fiovana, aza mitsahatra. Anontanio Izy amin’ny fahotana izany mbola mampisaraka anareo. Ka hibebaho ary aza miverina intsony.
Afaka mijoro vavolombelona eto izay te-hanao izany, mba ho hitan'ny rehetra fa Tsara sady be Voninvahtra Andriamanitra.

30/06/2020

Mpitsara : 2 «19 Kanjo nony maty ilay mpitsara, dia nanao ratsy indray izy mihoatra noho ny nataon'ny razany, fa nanaraka andriamani-kafa sy nanompo azy ary niankohoka teo anatrehany izy; tsy nitsahatra tàmin'ny fanaony na tamin'ny lalana nanaovany ditra izy.»
Miverina amintsika ity toko ity androany. Hojerentsika androny ny atao hoe andriamani-kafa.
Ny atao hoe andriamani-kafa dia ny zavatra rehetra na olona tianao na ataonao ambony noho Andriamanitra. Vao mifoha maraina dia ireo no tonga ao an-tsaina voalohany fa tsy Andriamanitra mbola mamindra fo sy manome fofon’aina anao indray. Isaory sy derao isa-maraina Izy noho izany.
Ireto ary misy andriamani-kafa izay ataontsika ambony noho Andriamanitra.
1- Ny vola : ny akabeazan’ny olona dia mieritreritra vola vao maraina. Inona no atao hahazoana azy. Inona no atao mba hampitomboana azy. Inona no atao mba tsy hahavery azy.
2- Ny vady : matetika koa io vady io koa dia ataontsika ambony noho Andriamanitra. Marina fa hoy ny tenin’Andriamanitra hoe : «Maneke ny vadinareo» (Efe 5 : 22, Kol 3 : 18, IPet 3 :1). Fa misy fetra izany : tahaka ny anekena ny Tompo, azaka izay mety hatao amin’ny Tompo. Izany hoe araky ny sitrapon’Andriiamanitra ihany.
3- Ny asa : mody alina, miasa sabotsy, miasa alahady. Tsy misy fotoana intsony ho an’ny fianakaviana indrindra ho an’Andriamanitra na dia ny alahady aza. Raha tsy miasa alahady dia hoe : «Maka aina e»
4- Ny razana sy ny ody gasy : fomba Malagasy, tsy hita izay maharatsy azy hoy ny sasany, ny famadihana. Diso zavatra iray loha anefa isika. Inona moa no antony hamadihana ? Angatahana tso-drano sy fitahiana amin’ny razana. Fa maninona ny razana no angataha tso-drano sy fitahiana. Ny razana ve no nanao ny lanitra sy ny tany ? Ny razana ve nandresy ny fahafatesana ? Ny razana ve no manome hanina ny goiaka sy ny zava-manan’aina rehetra ? Andriamanitra irety ihany no mahavta an’izany ? Ary ny tena loza dia misy kristiana mintsy manao famadihana. Lazaiko anao androany fa tena voa mafy ianao.
Santionany ihany ireo. Fa hamaranako azy androany :nisy namana mpiara-miasa amiko taloha izay. Samy naditra izahay. Fa ny maha-samihafa anay roa lahy dia izao : izaho niangona sy nanao asan’Andriamanitra arak’izay azoko natao, Io ranamana io kosa manohy ny fanaon’izao tontolo izao isaky ny alahady. Dia ho izy tamiko : «Adala ialahy, inona no iangonana sy anaovana adidy ary asan’Andriamanitra isan’andro nefa sady manao ny fanaon’izao tontolo izao ihany. Tandremo sao dia miara-tonga any an-danitra isika na miaraka any amin’ny afobe na izaho any an-dranitra fa ialahy any amin’ny afobe ». Tonga saina aho ry Havana. Tena ho voa mafy tokoa. Tsy maintsy misafidy. Ary naleoko nisafidy an’I Jesosy.

29/06/2020

Asa 15 : 1-35 «Ny nifandiran'ny sasany ny amin'ny famorana, sy ny nataon'ny Apostoly sy ny loholona tany Jerosalema tamin'izany]»
Zava-mitranga matetika eo anivon’ny fiangonana ny adi-hevitra momba ny fomba fivavahana sy ny fitsipika tokony arahina rehetra. Raha ity toko sy andinin-tsoratra masina ity no resahina dia momba ny famorana ny Jentilisa izay lasa kristiana no ady hevitra. Nifanaraka ihany izy ireo fa izao ihany no tsy azo atao : mihinana hena aterina amin'ny sampy sy ny rà sy ny zavatra kendaina ary ny fijangajangana (and 28-29).
Tamin’izahay nianatra Sekoly Alahady lehibe, dia miady hevitra izay teny voalaza ao anaty Baiboly momba ny tokatrano sambatra. Rehefa mandeha eo ny adi-hevitra ka hita fa misy tsy ifanarahana mihitsy dia misy ray aman-dreny izay mitsangana. Dia hoy izy ; «Ô ry reto a, aleo faranana ny adi-hevitra. Andao hivavaka fa Jesosy irery ihany no tompon’ny teny farany». Tamin’izany izahay dia miteny hoe : «Io indray ray aman-dreny. Tonga dia tsy misy adi-hevitra azo atao intsony fa faranany amin’ny vavaka.» Marina ny azy. Diso fomba fanao isika miady hevitra ny Tenin’Andriamanitra. Isika efa manana ray aman-dreny sy mpitarika ary mpaminany mihitsy aza izay miresaka amin’I Jesosy Kristy mivantana. Ireo olona ireo no milaza ny tena sitrapon’Andriamanitra ka tokony henointsika. Satria Kristy no Lohan’ny Fiangonana (Efe 5:23b).

Address

Androndrakely
Androndrakely
101

Telephone

+261341576643

Website

Alerts

Be the first to know and let us send you an email when Temama posts news and promotions. Your email address will not be used for any other purpose, and you can unsubscribe at any time.

Contact The Place Of Worship

Send a message to Temama:

Shortcuts

Share

Category