29/05/2026
" වෙසක් පොහෝදින මුළු ලොවම දිනූ බුද්ධ දිවාකරයාණෝ " ✨
නමෝ බුද්ධාය....!!!☸️☸️☸️
සාරාසංඛ්ය කල්ප ලක්ෂයක් පෙරුම්දම් පුරා බුද්ධත්වයට පත්වුණු සිද්ධාර්ථ බෝසතාණන් වහන්සේ,අප සරණ ගිය ගෞතම සම්මා සම්බුදු රජාණන්වහන්සේ තමයි අපගේ ශාස්තෘන් වහන්සේ වෙන්නේ. අප අසා තිබෙනවා උන් වහන්සේ මහා ගුණ කඳකින් යුක්තව වැඩ සිටිය බව. බුදු කෙනෙකුගේ ගුණ තවත් බුදු රජාණන්වහන්සේ නමකට හැර වෙන කිසිම දෙවියෙකුට බ්රහ්මයෙකුට පවා මෙතෙකැයි කියා පවසන්නට හැකියාවක් නොමැති බව අටුවාවෙහි සඳහන් වෙනවා.
භාග්යවතුන් වහන්සේගේ ගුණ අනන්තය අප්රමාණය. සාමාන්ය ජනයාට තබා රහතන් වහන්සේලාටද අවිවිෂයය. රහතන් වහන්සේලාට පවා දැනගත නොහැකි නොවැටහෙන බොහෝ බුදුගුණ ඇත්තේය. දැනගත් කෙනෙකුට පවා බුදු ගුණ ප්රකාශ කර නිම කිරීමට කාලයක් නැත්තේය.
"බුද්ධොපි බුද්ධස්ස භණෙය්ය වන්නං,
කප්පම්පි චෙ අඤ්ඤමහාසමානෝ,
ඛීයේථ කප්පෝ චිරදීඝමන්තරේ,
වණ්ණෝ න ඛීයේථ තථාගතස්ස"
යන ගාථාවෙන් භාග්යවතුන් වහන්සේ විසින් වෙන දෙයක් නොවදාරමින් බුදු ගුණ පමණක්ම කල්පයක් පුරාම දේශණා කලද ඉතා ඉක්මනින්ම කල්පය ගෙවීයන නමුත් බුදු ගුණ කීම අවසන් නොවන බව වදාරා ඇත.
සාමාන්ය ජනයාට පවා බුදු ගුණ දැන ගත හැක්කේ ඉතාම ස්වල්පයකි.
සාමාන්ය ජනයාගේ බුදු ගුණ දැනීමට වඩා මහත්වූ දැනුමක් එක් සෝතාපන්න උතුමෙකුට ඇතයයිද,
සෝතාපන්න උත්තමයන් සියයකට දහසකට ඇති බුදු ගුණ දැනුමට වඩා වැඩි දැනුමක් එක සකෘදාගාමි උතුමෙකුට ඇතයයිද,
සකෘදාගාමි උත්තමයන් සියයකට දහසකට ඇති බුදු ගුණ දැනුමට වඩා වැඩි දැනුමක් එක අනාගාමි උතුමෙකුට ඇතයයිද,
අනාගාමි උත්තමයන් සියයකට දහසකට ඇති බුදු ගුණ දැනුමට වඩා වැඩි දැනුමක් එක අරහත් උතුමෙකුට ඇතයයිද,
සාමාන්ය රහතන් වහන්සේ නමකට ඇති බුදු ගුණ දැනුමට වඩා වැඩි දැනුමක් අසූමහා ශ්රාවක රහතන් වහන්සේලාට ඇතයයිද,
අසූමහා ශ්රාවක රහතන් වහන්සේලාට අතරින් මහා කාශ්යප අනුරුද්ධ මහා කච්චාන මහා කොට්ඪිත යන මහ රහතන් වහන්සේලාට බුදු ගුණ දැනුමක් ඇතයයිද,
ඒ සතර මහා රහතන් වහන්සේලාගේ බුදු ගුණ දැනුමට වඩා වැඩි දැනුමක් අග්ර ශ්රාවකයන් වහන්සේලාට ඇතයයිද,
උන් වහන්සේලා අතුරෙන් මහත්වූ වැඩි බුදු ගුණ දැනුමක් සැරියුත් මහ රහතන් වහන්සේට ඇතයයිද,
සැරියුත් මහ රහතන් වහන්සේට වඩා වැඩි බුදු ගුණ දැනුමක් පසේබුදු රජාණන්වහන්සේ නමකට ඇතයයිද,
ඉඳින් මේ සක්වල පුරාම සිව්රු කොණින් සිව්රු කොණ ගෑවෙන සේ පසේ බුදු රජාණන්වහන්සේලා වැඩ හිඳ බුදු ගුණ සිතන අවස්ථාවක් වේද, ඒ අවස්ථාවේදී සක්වල පුරා වැඩ සිටින සියළුම පසේ බුදු රජාණන්වහන්සේලාගේ බුද්ධ ඥාණයට වඩා වැඩි බුද්ධ ඥාණයක් එක් ලොව්තුරා සම්මා සම්බුදු රජාණන්වහන්සේ නමකට ඇත්තේය,
(සම්පසාදනීය සූත්ර අටුවාව)
නුවණැති ශ්රාවකයින්ගෙන් අග තැන්පත් සැරියුත් මහ රහතන් වහන්සේට උවද හරියටම පෙනෙන බුදු ගුණ ඇත්තේ ස්වල්පයක් බවද,
උන් වහන්සේ පවා බුදු ගුණ මෙපමණයැයි අනන්තයි අප්රමාණයි පිළි ගන්නේද උන් වහන්සේට පෙනෙණ දැනෙන බුදු ගුණ අනුව නොපෙනෙන නොදැනෙන මහා බුද්ධ ගුණස්කන්ධය අනුමානයෙන් සිතා ගැනීමෙන් බවද,
එක් එක් පැත්තකින් යොදුන් නවය බැගින් යොදුන් දහඅටක බිම් පෙදෙසක් යට කරගෙන ගලා බසිනා චන්ද්රභාගා නම් ගංගාවෙන් ඉදිකටු සිදුරකින් ගත් වතුර ප්රමාණය ඉතාම ස්වල්පයක් වන්නාසේම,
මහ පොළොවෙන් ඇඟිල්ලට ගත් පස් ටික ඉතාම ස්වල්පයක් වී පොළොවේ පස් බොහෝ වන්නාසේම,
මහ සයුරට ඇඟිල්ල දිගුකලවිට ඇඟිල්ල කෙලින් ඇති ජලය ස්වල්පයක් වී සයුරෙහි ජලය බොහෝ වන්නාසේම,
අහසට ඇඟිල්ල දිගුකලවිට ඇඟිල්ල කෙලින් ඇති අහස ස්වල්පයක් වී ඉතිරි අහසම බොහෝ වන්නාසේම,
සැරියුත් මහ රහතන් වහන්සේට උවද හරියට පෙනෙන දැනෙන බුදු ගුණ ඉතාම ස්වල්පයක් බවද,හරියට නොපෙනෙන නොදැනෙන බුදු ගුණම බොහෝ වැඩි බවද සම්පදසාදනිය සූත්ර අට්ඨ කථාවෙහිම දක්නට ඇත.
(ඇසුර රේරුකාණේ චන්ද්රවිමල මහා නාහිමියන්ගේ "සූවිසි මහා ගුණය" පොත් වහන්සේ)
මෙසේ කියනවා තබා සිතන්නටවත් බැරි තරම් ගුණ සමුදායකින් යුතුව මහා කරුණාවකින් යුතුව වැඩ සිටි අපගේ ශාස්තෘන් වහන්සේ තරම් උත්තම මිනිස් රත්නයක් සරණ යන්නට ලැබීම කෙතරම් භාග්යයක්ද. ඒ උතුම් ශාස්තෘන් වහන්සේට අපගේ නමස්කාරය වේවා.....!!!
සාමාන්ය ලෝකයා හට භාග්යවතුන් වහන්සේගේ අනන්ත ගුණස්කන්ධය ගැන යම් ප්රමාණයකට දැන ගැනීම පිණිස භාග්යවතුන් වහන්සේ විසින් බුද්ධ ගුණ නවයකට බෙදා බුදුගුණ ඇතුලත්කොට බුදු ගුණ පාඨයක් වදාරලා තියෙනවා.
"ඉතිපි සො භගවා අරහං,සම්මා සම්බුද්ධෝ, විජ්ජාචරණ සම්පන්නෝ, සුගතෝ, ලෝකවිදූ,අනුත්තරෝ පුරිසදම්ම සාරථී, සත්ථා දේව මනුස්සානං, බුද්ධෝ, භගවාති."
මෙම ගාථාවේ සරළ තේරුම අපි කව්රුත් දන්නවා. ඒමේ ලිපියෙන් අපි භාග්යවතුන් වහන්සේ කෙතරම් ගුණ කඳකින් යුක්ත මනුෂ්ය රත්නයක්දැයි අපගේ පුංචි සිතට දැනෙනා ලෙසට හඳුනා ගැනීමට උත්සාහ කරමු.
ඔබ සැමට පින්බර වෙසක් පුන් පොහොය දිනයක් වේවා.. 🪔
තෙරුවන් සරණයි....!!! 🙏🙏🙏
