Masjidus salam - Al qasimi city, rathmalyaya, Puttalam

28/06/2026

*சமூகத் தலைமைகளுக்கு ஒரு தாழ்மையான திறந்த மடல்*

பிஸ்மில்லாஹிர் ரஹ்மானிர் ரஹீம்
மதிப்பிற்குரிய சமூகத் தலைவர்கள், கல்வி நிலைய பொறுப்பாளர்கள், ஆலிம்கள், மற்றும் நிகழ்ச்சி அமைப்பாளர்கள் அனைவருக்கும்…

அஸ்ஸலாமு அலைக்கும் வரஹ்மதுல்லாஹி வபரகாதுஹு.

இது குற்றம் சாட்டும் வார்த்தைகளல்ல.
இது விமர்சனத்தின் குரலுமல்ல.
இது ஒரு உம்மத்தின் உள்ளம் காய்ந்து எழும் அமைதியான துயரத்தின் சத்தம்.
இன்று எமது சமூகத்தின் உள்ளே ஒரு மென்மையான மாற்றம் நடந்து கொண்டிருக்கிறது. அது திடீரெனத் தோன்றிய தீயல்ல… மெதுவாக நுழையும் ஒரு பழக்கம்.
அறியாமலேயே, நாம் கல்வி, விழா, நிகழ்வு என்ற பெயரில் உலகின் பொழுதுபோக்கு வடிவங்களை மார்க்கத்தின் மேடைகளுக்குள் கொண்டு வரத் தொடங்கியிருக்கிறோம்.
ஆனால் அல்லாஹ் எம்மை நினைவூட்டுகிறான்:
"நிச்சயமாக தொழுகையும், என் வாழ்வும், என் மரணமும் அனைத்தும் உலகங்களின் இறைவனான அல்லாஹ்வுக்கே உரியது."
(அல்-அன்ஆம் 6:162)

எமது ஒவ்வொரு நிகழ்வும், எமது ஒவ்வொரு மேடையும், எமது ஒவ்வொரு தலைமுறையும் — இதை மறந்து விடுகிறதா?

நபி (ஸல்) எம்மை விட்டுச் சென்ற வழி வெளிச்சமானது. அதில் ஆடம்பரத்தின் தேவை இல்லை. கைத்தட்டலின் பசியில்லை. பாராட்டின் ஆசையில்லை.
அதில் இருந்தது — எளிமை, ஹயா, தக்வா, மற்றும் அல்லாஹ்வின் திருப்தி மட்டுமே.

"நான் உங்களை விட்டுச் செல்லும் வழி மிகத் தெளிவானது.அதனுடைய இரவுகள் பகலைப் போன்று தெளிவாக இருக்கும்..."
(திர்மிதீ)

அல்லாஹ் எம்மை நினைவூட்டுகிறான்:

"நீங்கள் இறைவனுக்கு பயந்து நடங்கள் (தக்வா உடையவர்களாக இருங்கள்), நிச்சயமாக அல்லாஹ் தக்வா உடையவர்களுடன் இருக்கிறான்."
(அல்-பகரா 2:194)

மற்றொரு வசனத்தில்:

"நிச்சயமாக அல்லாஹ்வின் முன்னிலையில் மிகவும் மதிப்பிற்குரியவர் உங்களில் அதிக தக்வா உடையவரே."
(அல்-ஹுஜுராத் 49:13)

தக்வா என்பது நிகழ்வுகளின் அழகில் அல்ல; நோக்கத்தின் தூய்மையிலும், முறையின் சரியானதிலும் இருக்கிறது.

நபி ﷺ கூறினார்கள்:
"ஹயா (வெட்க உணர்வு) ஈமானின் ஒரு பகுதி."

(ஸஹீஹ் புகாரி, ஸஹீஹ் முஸ்லிம்)

இந்த ஹயா என்பது தனிப்பட்ட வாழ்வில் மட்டுமல்ல; கல்விச்சூழல், நிகழ்ச்சி மேடைகள் மற்றும் சமூக வெளிப்பாடுகளிலும் பிரதிபலிக்க வேண்டிய ஒரு அடிப்படை பண்பு.

ஆனால் இன்று சில இடங்களில், நல்ல நோக்கத்துடன் தொடங்கிய நிகழ்வுகள் கூட, மெதுவாக வடிவம் மாறி, பார்வையாளர்களை கவரும் கலை நிகழ்வுகளாக மாறிவிடுகின்றன.
பிள்ளைகளின் திறமைகள் வெளிப்படுகின்றன… ஆனால் சில நேரங்களில், அவர்களின் அடக்கமும் ஹயாவும் மறைந்து போகும் அபாயமும் தோன்றுகிறது.
நபி (ஸல்) கூறினார்கள்:

"யார் ஒரு கூட்டத்தை ஒத்துப் போகிறாரோ, அவர் அவர்களிலேயே ஒருவராகிறார்."
(அபூதாவூத்)

இது உடைமையைக் குறித்தது மட்டுமல்ல… சிந்தனை, கலாச்சாரம், வாழ்க்கை முறை அனைத்தையும் குறிக்கும் எச்சரிக்கை.

மேலும், ரியா (முகஸ்துதி) பற்றிய எச்சரிக்கை மிகவும் நுட்பமானது; காரிருளில் கரும்பாறையின் மீது ஊர்ந்து செல்லும் கருப்பு எறும்பைப் போல அது மனிதனுக்குள் நுழைந்து விடலாம் என்று அறிஞர்கள் விளக்கியுள்ளனர்.

மதிப்பிற்குரிய தலைவர்களே…
நீங்கள் எடுக்கும் ஒவ்வொரு தீர்மானமும் ஒரு நிகழ்வை மட்டுமல்ல, ஒரு தலைமுறையின் மனநிலையையும் வடிவமைக்கிறது.
உங்கள் ஒப்புதல் ஒரு மேடையை மட்டுமல்ல… ஒரு வழிமுறையை நிலைநிறுத்துகிறது.
நாம் ஒரு கேள்வியை நம்முள் கேட்க வேண்டும்:
இது நபி (ஸல்) காட்டிய வழியா? அல்லது நாங்கள் விரும்பும் அழகான வடிவமா?
உண்மை கடினமாக இருக்கலாம். ஆனால் அந்த உண்மையே உம்மத்தை காப்பாற்றும்.

நாம் இழக்கக் கூடாதது நிகழ்வுகள் அல்ல…
நாம் இழக்கக் கூடாதது — எமது ஈமான், எமது ஹயா, எமது திசை.எமது இலக்கு.

இறுதியாக, ஒரு தாழ்மையான வேண்டுகோள்:
தயவுசெய்து ஒவ்வொரு நிகழ்வையும் அனுமதிக்கும் முன், ஒரு முறை நபி (ஸல்) அவர்களின் வழியை நினைவில் கொள்ளுங்கள்.
ஒரு முறை ஸஹாபாக்களின் எளிமையை நினைவில் கொள்ளுங்கள்.
ஒரு முறை அல்லாஹ்வின் முன் நிற்க வேண்டிய நாளை நினைவில் கொள்ளுங்கள்.
அல்லாஹ் எமது தலைவர்களையும், ஆலிம்களையும், சமூகத்தையும் நேர்வழியில் நிலைநிறுத்துவானாக.

14/06/2026

ஒரு பறவையை சிந்தித்துப் பார்த்தீர்களா?
"அவர்களுக்கு மேலே சிறகுகளை விரித்தும் மடக்கியும் பறக்கும் பறவைகளை அவர்கள் பார்க்கவில்லையா? அவற்றை நிலைநிறுத்துபவன் அர்ரஹ்மான் அல்லாமல் வேறு யாருமில்லை."
(சூரத்துல் முல்க் 67:19)
இந்தச் சிறிய பறவைக்கு யார் சிறகுகளை வடிவமைத்தான்?
வானில் சமநிலையுடன் பறக்கும் திறனை யார் கொடுத்தான்?
கூடு கட்டும் அறிவை யார் கற்றுக் கொடுத்தான்?
அல்லாஹ் தன்னை:
الخالق – படைப்பவன்,
البارئ – ஒவ்வொரு படைப்பையும் முழுமையாக உருவாக்குபவன்,
المصور – ஒவ்வொன்றிற்கும் தனித்துவமான வடிவம் அளிப்பவன்
என்று அறிமுகப்படுத்துகிறான். (59:24)
அவன் "بَدِيعُ السَّمَاوَاتِ وَالْأَرْضِ" – வானங்களையும் பூமியையும் முன்னுதாரணமின்றி உருவாக்கியவன். (2:117)
ஒரு பறவையின் சிறகில், அதன் கண்களில், அதன் பறப்பில் அல்லாஹ்வின் வல்லமையும் ஞானமும் வெளிப்படுகின்றன.
எனவே பறவையைப் பார்த்து ரசிப்பதோடு நிற்காமல், அதனைப் படைத்த ரப்பை நினைவுகூர்வோம்.
"நிச்சயமாக வானங்களையும் பூமியையும் படைத்ததிலும், இரவும் பகலும் மாறி வருவதிலும் அறிவுடையோருக்கு அத்தாட்சிகள் உள்ளன." (ஆல் இம்ரான் 3:190)

Enjoy the videos and music you love, upload original content, and share it all with friends, family, and the world on YouTube.

14/02/2026

ரமலானில் இஸ்லாமியக் கல்வி –குர்ஆனை கற்பதன் மாபெரும் முக்கியத்துவம்.

ரமலான் மாதம், முஸ்லிம்களின் வாழ்வில் அல்லாஹ் வழங்கிய மிகப்பெரிய அருளாகும். இந்த மாதம் பசியையும், தாகத்தையும் அனுபவிப்பதற்காக மட்டும் வழங்கப்படவில்லை; மாறாக, மனிதனை உள்ளார்ந்த முறையில் சீரமைத்து, அவனை இறைவனுக்குச் செம்மைப்படுத்தும் ஒரு தெய்வீகப் பயிற்சி காலமாகவே ரமலான் அமைந்துள்ளது. அந்தப் பயிற்சியின் மையமாக விளங்குவது இஸ்லாமியக் கல்வி, அதிலும் குறிப்பாக குர்ஆனை கற்பதும் கற்றவற்றின் அடிப்படையில் வாழ்வதுமாகும்.
ரமலான் மாதத்திற்கு இந்த மகத்தான சிறப்பு வழங்கப்பட்டதற்குக் காரணமே குர்ஆன். அல்லாஹ் தெளிவாகக் கூறுகிறான்:
“ரமலான் மாதம் – அதில்தான் குர்ஆன் இறக்கப்பட்டது; அது மனிதர்களுக்கு நேர்வழியாகவும், தெளிவான சான்றுகளாகவும், உண்மை மற்றும் பொய்யை வேறுபடுத்துபவையாகவும் உள்ளது” (பக்கரா 2:185).
இந்த வசனம், ரமலானையும் குர்ஆனையும் பிரிக்க முடியாத இரண்டு உண்மைகளாக நமக்கு முன் நிறுத்துகிறது. குர்ஆன் இல்லாத ரமலான், அதன் ஆன்மீக உயிரை இழந்த ஒன்றாகிவிடும்.
குர்ஆன் என்பது வெறும் ஓதப்பட வேண்டிய ஒரு புனித நூல் அல்ல. அது மனித வாழ்வின் ஒவ்வொரு கட்டத்திற்கும் வழிகாட்டும் தெய்வீக சட்டமாகும். அல்லாஹ் கூறுகிறான்:
“நிச்சயமாக இந்த குர்ஆன் மிகவும் நேரான பாதைக்கு வழிகாட்டுகிறது” (இஸ்ரா 17:9).
ஒரு மனிதனின் அகீதா, அவனது இபாதத், அவனது ஒழுக்கம், அவனது குடும்ப வாழ்க்கை, அவனது சமூகப் பொறுப்புகள் அனைத்தையும் சீர்படுத்தும் சக்தி குர்ஆனுக்கே உண்டு. ஆகவே, ரமலானில் குர்ஆனை கற்பதென்பது, ஒரே மாதத்தில் வாழ்வையே திருத்திக்கொள்ளும் வாய்ப்பாகும்.
நபி முஹம்மது ﷺ அவர்களின் வாழ்வு இதற்குச் சிறந்த முன்மாதிரி. நபி ﷺ அவர்கள் ரமலானை குர்ஆனுடன் தொடர்பை அதிகரிக்கும் மாதமாகக் கொண்டிருந்தார்கள். ஸஹீஹ் ஹதீஸில் வருகிறது:
“ஒவ்வொரு ரமலானிலும் ஜிப்ரீல் (அலை) நபி ﷺ அவர்களுடன் குர்ஆனை மீளாய்வு செய்து வந்தார்” (ஸஹீஹ் புகாரி).
வஹீ இறக்கப்பட்ட நபியும், வஹீ கொண்டு வந்த மலக்கும், ரமலானில் குர்ஆனை ஒன்றாக மீளாய்வு செய்தார்கள் என்றால், இந்த மாதம் குர்ஆனுக்காகவே ஒதுக்கப்பட வேண்டிய மாதம் என்பதை இது தெளிவாக உணர்த்துகிறது.
இந்த நபி வழியைச் சஹாபாக்களும் தங்கள் வாழ்வில் நடைமுறைப்படுத்தினார்கள். உஸ்மான் (ரலியல்லாஹு அன்ஹு) அவர்கள் ரமலானில் குர்ஆனுடன் மிக ஆழமான தொடர்பு கொண்டிருந்தார்கள். சில அறிவிப்புகளின்படி, அவர்கள் ஒரு நாளில் முழுக் குர்ஆனை ஓதிவிடுவார்கள். ஆனால் அதைவிட முக்கியமானது, இப்னு மஸ்ஊத் (ரலி) அவர்களின் அணுகுமுறை. அவர்கள் கூறினார்கள்: “நாம் பத்து வசனங்களை கற்றால், அதைப் புரிந்து, அதன்படி அமல் செய்யாமல் அடுத்த வசனங்களுக்கு செல்லமாட்டோம்.” இதன் மூலம், குர்ஆன் கல்வி என்பது வெறும் வாசிப்பல்ல; புரிதலும், நடைமுறையும் என்பதை அவர்கள் நமக்குக் கற்றுக் கொடுத்தார்கள்.
சஹாபாக்களின் பாதையில் நடந்த முன்னைய இஸ்லாமிய அறிஞர்களும் ரமலானில் குர்ஆனுக்கே முன்னுரிமை அளித்தார்கள். இமாம் மாலிக் (ரஹிமஹுல்லாஹ்) அவர்கள், ரமலான் வந்ததும் ஹதீஸ் வகுப்புகளையும் அறிவுப் பேசுகைகளையும் நிறுத்திவிட்டு, முழுமையாக குர்ஆன் வாசிப்பிலும் சிந்தனையிலும் ஈடுபட்டார்கள். இமாம் ஷாஃபிஈ (ரஹ்) அவர்கள் ரமலானில் பலமுறை முழுக் குர்ஆனை ஓதியதாக வரலாறுகள் பதிவு செய்கின்றன. இவர்களின் வாழ்வு நமக்கு ஒன்றை தெளிவாகச் சொல்கிறது: உண்மையான அறிஞர்கள், ரமலானில் வேறு அனைத்தையும் ஒதுக்கி வைத்து குர்ஆனை முன்னிலைப்படுத்தினார்கள்.
இன்றைய காலத்தில், பல முஸ்லிம்கள் ரமலானை உணவு, தூக்கம், சமூக ஊடக பயன்பாடு மற்றும் உலகியலான பொழுதுபோக்குகளோடு கழிப்பது ஒரு வருத்தமான உண்மை. ஆனால் ரமலான் என்பது குடும்பத்தோடு சேர்ந்து குர்ஆன் கற்கும் மாதமாகவும், பிள்ளைகளுக்கு இஸ்லாமிய அடிப்படை அறிவை ஊட்டும் மாதமாகவும், நம் வாழ்க்கையை குர்ஆனின் ஒளியில் மறுசீரமைக்கும் மாதமாகவும் மாற வேண்டும். அல்லாஹ் நபியவர்களுக்கு சொல்லிக் கொடுத்த துஆ, இந்த மாதத்திற்கு மிகவும் பொருத்தமானது:
“என் இறைவா! எனது அறிவை அதிகரிப்பாயாக” (தாஹா 20:114).
முடிவாக, ரமலான் என்பது ஒரு மாதம் மட்டுமல்ல; அது ஒரு மாற்றத்தின் அழைப்பு. இந்த மாற்றத்தின் மையமாக குர்ஆன் இருக்க வேண்டும். குர்ஆன் நம் அலமாரியில் வைக்கப்படும் நூலாக அல்ல, நம் இதயத்தில் பதியும் வழிகாட்டியாக மாறும்போதுதான், ரமலான் நம்முள் உண்மையான புரட்சியை ஏற்படுத்தும். இந்த ரமலான், குர்ஆனை மீண்டும் கண்டடையும் மாதமாக, குர்ஆனோடு வாழத் தொடங்கும் மாதமாக மாறட்டும். வல்லவன் அல்லாஹ் நம் அனைவரையும் பொருந்திக் கொள்வானாக.
ஆமீன் ஆமீன் யாரப்பல் ஆலமீன்.

வஸ்ஸலாமு அலைக்கும் வரஹ்மத்துல்லாஹி வபரக்காத்துஹூ.

12/12/2025

இஸ்லாம் மனித வாழ்க்கையின் ஒவ்வொரு தருணத்திற்கும் வழிகாட்டுகிறது. குறிப்பாக சூரியன் மறையும் நேரம் (மக்ரிப் நேரம் ஆரம்பிக்கும் முன் சில நிமிடங்கள்) என்பது குர்ஆன் மற்றும் ஹதீஸ்களில் ஒரு விசேஷமான, பாதுகாப்பு தேவைப்படும் நேரமாக குறிப்பிடப்பட்டுள்ளது. இந்த நேரத்திலே நபி முஹம்மத் ﷺ அவர்களும், சஹாபாக்களும், தங்கள் குடும்பத்தினரையும் குழந்தைகளையும் எவ்வாறு நடந்து கொள்ளச் செய்தார்கள்?
இதனை கீழே முழுமையாகக் காணலாம்.

1. சூரியன் மறையும் நேரம் – இது ஒரு சிறப்பு மற்றும் சோதனைக்குரிய நேரம்

நபி ﷺ அவர்கள் கூறினார்கள்:

“சூரியன் மறையும் நேரத்தில் ஷைத்தான் பரவி செல்கின்றான்.”
— சஹீஹ் புகாரி 3280, சஹீஹ் முஸ்லிம் 2012

இந்த ஹதீஸ் மனித சமுதாயத்திற்கு எச்சரிக்கை. இந்த நேரம் மனிதன் மிக எச்சரிக்கையாக இருத்தல் அவசியம்.

2. இந்த நேரத்தில் குழந்தைகளை வீட்டிற்குள் அழைத்து வைத்தல்

நபி ﷺ அவர்கள் கூறினார்கள்:

“சூரியன் முழுவதும் மறையும் வரை உங்கள் குழந்தைகளை வெளியில் விடாதீர்கள்;
அந்த நேரத்தில் ஷைத்தான் பரவுகிறான்.”
— சஹீஹ் புகாரி 3280

இது குழந்தைகளின் உடல்நலம், மனநலம் மற்றும் ஆன்மீக பாதுகாப்பு ஆகிய அனைத்திற்கும் பொருந்துகிறது.

ஏன்?

அந்த நேரத்தில் ஷைத்தான் அதிகமாக இயக்கமடைகின்றான்.

குழந்தைகள் பாதுகாப்பற்றவர்கள்; அவர்கள் எளிதில் பாதிக்கப்படக்கூடியவர்கள்.

3. கதவுகள், ஜன்னல்கள், பாத்திரங்கள் மூடுதல்

நபி ﷺ அவர்கள் கூறினார்கள்:

மேலும் உங்கள் வீட்டின் கதவுகளை மூடுங்கள், நீங்கள் கதவை மூடும்போது ‘பிஸ்மில்லாஹ்’ சொல்லுங்கள்,
ஏனெனில் ‘பிஸ்மில்லாஹ்’ சொல்லப்பட்டு மூடிய கதவை ஷைத்தானால் திறக்க முடியாது.”
— சஹீஹ் புகாரி 3280

மேலும்:

“உங்கள் குடங்களையும் பாத்திரங்களையும் மூடுங்கள் ஒரு குச்சியை கொண்டேனும்.”
— சஹீஹ் முஸ்லிம் 2014

இது உணவு பாதுகாப்பிற்கும், தீய சக்திகளிலிருந்து பாதுகாப்பிற்கும் முக்கியமானது.

4. இந்த நேரத்தில் தேவையற்ற வெளியே செல்வதைத் தவிர்த்தல்

சஹீஹ் ஹதீஸ்களில் வரும் எச்சரிக்கை:

ஷைத்தான் இரவு ஆரம்பத்தில் மிகச் சுறுசுறுப்பாக இருப்பான்

மனிதர்கள் தேவையற்ற வெளிச் செல்கைகளை தவிர்க்க வேண்டும்.

இதனால்:

விபத்துகள்

தீய எண்ணங்கள்

தகராறுகள்
இவற்றிலிருந்து பாதுகாப்பு கிடைக்கிறது.

5. மாலை நேர திக்ர்களை ஓதுதல் – பாதுகாப்பின் மிக முக்கியமான அம்சம்

சுன்னாவின்படி ஒவ்வொரு முஸ்லிமும் சூரியன் மறையும் நேரத்திற்குள் மாலை திக்ர்கள் ஓத வேண்டும்.

சஹீஹ் ஹதீஸில்:

“அல்லாஹ்வை திக்ர் செய்பவரையும், திக்ர் செய்யாதவரையும்
உயிருடன் இருக்கும் ஒருவரையும், இறந்த ஒருவரையும் போன்றவர்.”
— சஹீஹ் புகாரி 6407

மாலை அஸ்கார்கள்:

* ஆயத்துல் குர்சி
* மூன்றுகுல்சூராக்கள்
* حَسْبِيَ اللَّهُ لَا إِلٰهَ إِلَّا هُوَ، عَلَيْهِ تَوَكَّلْتُ وَهُوَ رَبُّ الْعَرْشِ الْعَظِيمِ

* أَعُوذُ بِكَلِمَاتِ اللَّهِ التَّامَّاتِ مِنْ شَرِّ مَا خَلَقَ
* بِسْمِ اللَّهِ الَّذِي لَا يَضُرُّ مَعَ اسْمِهِ شَيْءٌ فِي الْأَرْضِ وَلَا فِي السَّمَاءِ وَهُوَ السَّمِيعُ الْعَلِيمُ

இவை அனைத்தும் சஹீஹ் ஹதீஸ்களில் வருகின்றன.

6. மக்ரிப் அதான் ஒலித்தவுடன் வீண் செயல்களை நிறுத்துதல்

அதான் (பாங்கு)ஒரு அல்லாஹ்வின் அழைப்பு.

நபி ﷺ: கூறினார்கள்

“அத்தான் கேட்கும்போது பேசுவதை நிறுத்தி, முஅத்தின் சொல்வதைப் பின்பற்றுங்கள்.”
— சஹீஹ் முஸ்லிம் 384

7. மக்ரிப் தொழுகையை தாமதிக்காமல் தொழுதல்

நபி ﷺ அவர்கள் மக்ரிப் தொழுகையை உடனே தொழும்படி உத்தரவிட்டார்கள்

8. பெண்களுக்கான பிரத்யேக வழிகாட்டல்

பெண்களுக்கு நபி ﷺ அவர்கள் சிறப்பு வழிகாட்டுதல் செய்தார்கள்:

* வீட்டிலே மக்ரிப் தொழுகை செய்வது — அதிக நன்மை.

* வீட்டை பாதுகாத்தல், குழந்தைகளை உள்ளே அழைத்தல்.

* மாலை திக்ர் தவறாமல் ஓதுதல்.

இந்த நேரத்தில் தேவையில்லாத கதைகளை கதைத்துக் கொண்டிருத்தல் தொலைக்காட்சி பார்த்தல் தொலைபேசிப் பாவனை என்பவற்றை தவிர்த்தல்.

9. மனிதர்கள் இந்த நேரத்தில் என்ன செய்யக்கூடாது?

ஹதீஸ் அடிப்படையில்:

* வீண் சிரிப்பு
* வீண் பேச்சு
* பிள்ளைகளை தனியாக வெளியே விடுதல்
* கதவுகள் திறந்துவிடுதல்
* இருட்டில் தேவையில்லாமல் சுற்றித் திரிதல்

* சாபம்/திட்டல்/கோபம்

இவை அனைத்தும் ஷைத்தானின் தாக்கத்தை அதிகப்படுத்தும்.

10. இந்த நேரத்தில் செய்யவேண்டிய முக்கிய செயல்கள் – சுருக்கமாக

* குழந்தைகளை உள்ளே அழைத்தல்

* கதவுகள், ஜன்னல்கள், பாத்திரங்களை “பிஸ்மில்லாஹ்” கூறி மூடுதல்

* வீணான செயல்கள், கோபம், சண்டை தவிர்த்தல்

* மாலை நேர திக்ர்கள்

* மக்ரிப் அதான் கேட்டவுடன் தொழுகையை நிறைவேற்றுதல்

* வீட்டில் அமைதி நிலை பேணுதல்.

முடிவுரை

சூரியன் மறையும் நேரம் என்பது:

* பாதுகாப்பு தேவைப்படும் நேரம்
* திக்ர் செய்ய வேண்டிய நேரம்
* குடும்பத்தைக் கவனிக்க வேண்டிய நேரம்
* நபி ﷺ அவர்கள் தனியாகக் குறிப்பிடும் நேரம்

நபி ﷺ அவர்கள் காட்டிய இந்த வழிமுறைகளைப் பின்பற்றினால்:

* உடல் பாதுகாப்பு

* ஆன்மீக பாதுகாப்பு

* குடும்ப பாதுகாப்பு

* ஷைத்தானின் தாக்கத்தில் இருந்து பாதுகாப்பு

* வீடு நிறைந்த பரக்கத்

போன்ற விடயங்கள் கிடைக்கும் என்று ஹதீஸ்கள் உறுதி செய்கின்றன. எனவே மேற்படி விடயங்களை நாம் அனைவரும் எமது வாழ்வில் முழுமையாக எடுத்து நடப்பதற்கு முயற்சி செய்வோமாக அதற்கு அல்லாஹ் அருள் புரிவானாக ஆமீன் ஆமீன் யாரப்பல் ஆலமீன்

18/09/2025

https://www.facebook.com/share/v/17Q6W1t9oB/

14/09/2025

வழிதவறிச் செல்கின்ற சமூகத்தையும் பாவங்களில் ஈடுபடுகின்ற இளைஞர்களையும் சீர்திருத்துவது — ஆலிம்கள், சமூகத் தலைவர்கள், அதிபர்- ஆசிரியர்கள், பள்ளிவாசல் நிர்வாகிகள் ஆகியோரின் கட்டாயப் பொறுப்பு

(குர்ஆன் மற்றும் ஹதீஸின் வெளிச்சத்தில் ஓர் சிறிய ஆய்வு)
كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ وَتُؤْمِنُونَ بِاللَّهِ ۗ وَلَوْ آمَنَ أَهْلُ الْكِتَابِ لَكَانَ خَيْرًا لَّهُمْ ۗ مِّنْهُمُ الْمُؤْمِنُونَ وَأَكْثَرُهُمُ الْفَاسِقُونَ
" மனிதர்களுக்காக தோற்றுவிக்கப்பட்ட (சமுதாயத்தில்) சிறந்த சமுதாயமாக நீங்கள் இருக்கிறீர்கள்; (ஏனெனில்) நீங்கள் நல்லதைச் செய்ய ஏவுகிறீர்கள்; தீயதை விட்டும் விலக்குகிறீர்கள். இன்னும் அல்லாஹ்வின்மேல் (திடமாக) நம்பிக்கை கொள்கிறீர்கள்;. வேதத்தையுடையோரும் (உங்களைப் போன்றே) நம்பிக்கை கொண்டிருப்பின், (அது) அவர்களுக்கு நன்மையாகும் - அவர்களில் (சிலர்) நம்பிக்கை கொண்டோராயும் இருக்கின்றனர்;. எனினும் அவர்களில் பலர் (இறை கட்டளையை மீறும்) பாவிகளாகவே இருக்கின்றனர்.."
(சூரா ஆல்-இம்ரான்: 110)

ஒரு சமூகத்தின் நிலைமையும் அதன் எதிர்காலமும், அந்த சமூகத்தில் நிலவும் சீரிய நற்பண்புகள் மற்றும் இளைஞர்களின் ஒழுக்க நிலையைப் பொறுத்தே அமைகிறது. இளைஞர்கள் வழிதவறி பாவங்களில் மூழ்கும்போது, சமூகத்தின் ஒழுக்கவியல் வீழ்ச்சியடைந்து, அல்லாஹ்வின் சாபமும் தண்டனையும் நேரலாம். இவ்வாறு ஏற்படும் தீமைகளைத் தடுக்கவும், அவர்களை நேர்வழியில் கொண்டு வரவும், ஆலிம்கள்,சமூகத் தலைவர்கள், கல்வியாளர்கள், பள்ளிவாசல் நிர்வாகிகள் ஆகியோருக்கு கட்டாயமான பொறுப்பு இருக்கிறது.
இது ஒரு தனிப்பட்ட நற்குணச் செயல் மட்டுமல்ல; ஷரீஆ வல்லுநர்களின் கருத்துப்படி இது “பர்ழ் கிஃபாயா”வாகும்

1. குர்ஆன் வழிகாட்டுதல்

 நன்மையை ஏவுதல், தீமையைத் தடுத்தல் — ஒரு முக்கியக் கடமை
அல்லாஹ் تعالی கூறுகிறான்:
“மேலும், (மக்களை) நன்மையின் பக்கம் அழைப்பவர்களாகவும், நல்லதைக் கொண்டு (மக்களை) ஏவுபவர்களாகவும் தீயதிலிருந்து (மக்களை) விலக்குபவர்களாகவும் உங்களிலிருந்து ஒரு கூட்டத்தார் இருக்கட்டும் - இன்னும் அவர்களே வெற்றி பெற்றோராவர்.”
(அல்-இம்ரான்: 104)
இவ்வசனத்தில் “உங்களில் ஒரு சமூகமாக” என்று சொல்லப்படுவது — சமூகத்தில் உள்ள தலைவர்கள், அறிவாளிகள், அதிகாரம் கொண்டவர்கள் — இவர்களுக்கு முதன்மையான பொறுப்பு என்பதைச் சுட்டுகிறது.

 ஒழுக்கச் சீர்கேடு பரவாமல் தடுக்கல்

“உங்களில் அநீதிசெய்தவர்களுக்கு மட்டுமே அல்லாமல், (எல்லோரையும்) பாய்ந்து விடக்கூடிய ஒரு சோதனையைக் குறித்து எச்சரிக்கையாக இருங்கள்.”
(அல்-அன்பால்: 25)
இந்த வசனம், தவறுகளைப் பொதுமைப்படுத்தப்படாமல் தடுக்காவிட்டால், தண்டனை அனைவரையும் வந்தடையும் என்பதை எச்சரிக்கிறது.

2. நபி ﷺ அவர்களின் ஹதீஸ் வழிகாட்டுதல்

 அதிகாரமுள்ளோர் மாற்ற வேண்டும்

நபி ﷺ கூறினார்:
“உங்களில் யார் ஒரு தவறான செயலைக் காண்கிறார்களோ, அவர் அதைத் தனது கையால் (அதிகாரத்தின் மூலம்) தடுக்கட்டும்; முடியாவிட்டால், தனது நாவால் (வார்த்தை மூலம்) தடுக்கட்டும்; முடியாவிட்டால், தனது இதயத்தில் வெறுத்து விடட்டும் — அது தான் ஈமானின் மிகக் குறைந்த நிலை.”
(முஸ்லிம்: 49)

சமூகத் தலைவர்கள், ஆசிரியர்கள், ஆலிம்கள் — இவர்களுக்கு “கையால்” தடுக்கும் அதிகாரம் இருப்பதால், அவர்களின் கடமை மிகப்பெரியது.
 தவறைத் தடுக்காதவர்களின் தண்டனை

நபி ﷺ கூறினார்:
“மக்கள் ஒரு அநியாயக்காரனை (அல்லது பாவத்தில் ஈடுபடுபவனை) பார்த்தும், அவனைக் கையால் தடுக்காத பட்சத்தில், அல்லாஹ் விரைவில் அவர்களையெல்லாம் தண்டனையால் ஆட்கொள்வான்.”
(அபூ தாவூத்: 4338, திர்மிதி: 2168)

3. சமூகத் தலைவர்கள் மற்றும் கல்வியாளர்களின் குறிப்பிட்டப் பொறுப்பு

 ஆலிம்களின் பொறுப்பு

அறிவு கொண்டவர்கள், பாவத்தையும் தவறான சிந்தனையையும் வெளிச்சமிட்டு விளக்கி, நேர்வழிக்குக் கொண்டு வர வேண்டும்.
குர்ஆன்:
إِذۡ أَخَذَ ٱللَّهُ مِيثَٰقَ ٱلَّذِينَ أُوتُواْ ٱلۡكِتَٰبَ لَتُبَيِّنُنَّهُ لِلنَّاسِ وَلَا تَكۡتُمُونَهُ
தவிர வேதம் கொடுக்கப்பட்டோரிடம் அவர்கள் அதை மக்களுக்குத் தெளிவாக எடுத்துரைக்க வேண்டும், அதை மறைக்கக் கூடாது என்று அல்லாஹ் உறுதி மொழி வாங்கியதை (அம்மக்களுக்கு நபியே! நீர் நினைவுபடுத்துவீராக). அப்பால், அவர்கள் அதைத் தங்கள் முதுகுகளுக்குப் பின்னால் எறிந்து விட்டு; அதற்குப் (பதிலாகச்) சொற்ப கிரயத்தைப் பெற்றுக் கொண்டார்கள் - அவர்கள் (இவ்வாறு) வாங்கிக் கொண்டது மிகக் கெட்டதாகும்.
(ஆல்-இம்ரான்: 187)
 ஆசிரியர்கள் மற்றும் அதிபர்களின் பங்கு

இளைஞர்களின் கல்வி மற்றும் ஒழுக்கத்தை ஒருங்கிணைத்து, தவறான பழக்கவழக்கங்களில் விழாமல் காப்பது மிகப்பெரிய கடமை.
அவர்கள் வகுப்பறை, பாடசாலை மற்றும் சமூகம் என மூன்று மட்டங்களிலும் ஒழுக்கத்தை பரப்ப வேண்டும்.
 ஆசிரியர்கள் வகுப்பறைகளில் தங்கள் ஒவ்வொரு பாடமும் ஆரம்பிக்கும் முன்னர் ஓரிரு நிமிடங்களை ஆன்மீக அறிவுரைகளைக் கொண்டு ஆரம்பிக்க முடியும்
 பாடசாலையில் வாரம் தோறும் அனைத்து மாணவர்களையும் உள்வாங்கியதாக ஆன்மீக வழிகாட்டல் செயற்பாடுகள் நடத்த முடியும்
 மாதத்தில் ஒருமுறையாவது பெற்றோர்களையும் மாணவர்களையும் ஒன்றிணைத்ததாக ஆன்மீக வழிகாட்டல் கருத்தரங்குகள் நடத்த முடியும்

 பள்ளிவாசல் நிர்வாகிகள்

• பள்ளிவாசல் — சமூக மையம். அங்கே
 மத வகுப்புகள் (குர்ஆன் ஓதக் கற்றல் கற்பித்தல், தஜ்வீத், ஷரீஆ)

 இளைஞர் சந்திப்புகள் (இளமையின் மகத்துவம், சமூக மாற்றத்திற்கு இளைஞர்களின் பங்களிப்பு, அர்ஷ்யுடைய நிழலிலே வீற்றிருக்கக் கூடிய ஒரு கூட்டம் எனும் தலைப்புகளில் இளைஞர் மாநாடுகளை நடத்துதல்)

 தவ்ஹீத் மற்றும் நற்செயல் வழிகாட்டுதல்கள் — இவை அனைத்தும் திட்டமிட்ட வகையில் நடத்தப்பட வேண்டும்.

4. பாவங்களில் ஈடுபட்ட இளைஞர்களை சீர்திருத்தும் நடைமுறை வழிகள்

 முதலில் அவர்களுடன் நெருக்கமான உறவு உருவாக்கல் — அன்பும் கருணையும் கொண்டு.

 பாவத்தின் தீமையை அறிவித்தல் — குர்ஆன் மற்றும் ஹதீஸ் அடிப்படையில்.

 மாற்று நற்செயல் வழிகள் வழங்கல் — தொழில்நுட்பம், கல்வி.

 மத பிணைப்பை வலுப்படுத்தல் — தொழுகை, குர்ஆன் ஓதல், நல்ல நண்பர்கள்.

 சமூக ஆதரவு அமைப்புகள் உருவாக்கல் — இளைஞர் மன்றங்கள், மதக் கழகங்கள்

முடிவாக
வழிதவறிச் செல்கின்ற சமூகத்தையும் பாவங்களில் மூழ்கும் இளைஞர்களையும் சீர்திருத்துவது ஒரு விருப்பப்பணியல்ல, மாறாக ஷரீஅத் கட்டாயமாக்கிய பொறுப்பு ஆகும். குறிப்பாக சமூகத் தலைவர்கள், ஆலிம்கள், ஆசிரியர்கள், பள்ளிவாசல் நிர்வாகிகள் — இவர்களே முன்னணியில் இருந்து இப்பணியைச் செய்ய வேண்டும், தவறும் பட்சத்தில் சமூகம் அழிவு பாதையில் செல்வது கண் கூடு.

அல்லாஹ்வின் வாக்குறுதி:
“நீங்கள் நற்செயல் புரிந்தால், அது உங்களுக்கே நன்மை”
(அல்-இஸ்ரா: 7).
நிச்சயமாக நாம் ஜின்களிலிருந்தும், மனிதர்களிலிருந்தும் அநேகரை நரகத்திற்கென்றே படைத்துள்ளோம்; அவர்களுக்கு இருதயங்கள் இருக்கின்றன - ஆனால் அவற்றைக் கொண்டு அவர்கள் நல்லுணர்வு பெற மாட்டார்கள்; அவர்களுக்குக் கண்கள் உண்டு; ஆனால், அவற்றைக் கொண்டு அவர்கள் (இறைவனின் அத்தாட்சிகளைப்) பார்ப்பதில்லை; அவர்களுக்குக் காதுகள் உண்டு. ஆனால் அவற்றைக் கொண்டு அவர்கள் (நற்போதனையைக்) கேட்கமாட்டார்கள் - இத்தகையோர் கால்நடைகளைப் போன்றவர்கள். இல்லை! அவற்றை விடவும் வழி கேடர்கள்; இவர்கள் தாம் (நம்வசனங்களை) அலட்சியம் செய்தவர்களாவார்கள்.
(சூரா அஃராப்: 179)
எனவே நாம் அனைவரும் ஒன்றிணைந்து எமது சமூகத்தின் எழுச்சிக்காக முயற்சிப்போமாக.
வல்ல இறைவன் நம் அனைவரது முயற்சிகளையும் பொருந்தி கொள்வானாக.
வஸ்ஸலாமு அலைக்கும் வரஹ்மத்துல்லாஹி வபரக்காத்துஹு