14/08/2026
ක්රිස්ටි මිහිඳුකුළ මහතා. 🕯️ (1937-2026)
එදා මෙදා තුර වූ දූවේ පාස්කුව තුළ නොමැකෙන අද්විතීය සළකුණක් වූ, 'මිහිඳුකුළසූරිය ජෝසප් ඇන්ටනි ක්රිස්ටෝපර් ප්රනාන්දු' එහෙමත් නැත්නම් බොහෝ අය 'ක්රිස්ටි මිහිඳුකුළ' නමින් හඳුනන අප සහෘදයා සමිඳුන් තුරුළට පත් වූ බව ඉතා සංවේගයෙන් යුක්තව දැනුම් දෙන්නෙමු.
එමෙන්ම ඔහුගේ ආත්මය වෙනුවෙන් ඔබගේ පෞද්ගලික යාච්ඤා වලදී සිහිකරන මෙන්ද කාරුණීකව ඉල්ලා සිටිමු.
දූව පාස්කුව වෙනුවෙන් ක්රිස්ටි මිහිඳුකුළ මහතා එක් වන්නේ කුඩා අවදියේ සිටමය. එවක කාන්තා භූමිකාවන් සඳහා කාන්තාවන් යොදා නොගන්නා සමයක ස්ත්රී චරිතයන් හරහා එක් වන එම මහතා පසුව රෝමානු සොල්දාදුවෙක් ලෙස පාස්කු නාට්යයේ නිරූපණයෙහි යෙදෙන්නට විය.
දූව පාස්කුවෙහි සුවිශේෂිත වූ හැරවුම් ලක්ෂයක් ලෙස 1962 වර්ෂයේදි ක්රිස්තු චරිතය සඳහා ජීවමාන නළුවෙක් යොදාගන්නට එවක ග්රාමයේ වැඩිහිටි ප්රජාව යෝජනා කළ අතර ඔවුන්ගේ අදහස වූයේ එවක උස හීන්දෑරි, මනා කටහඬකින් හෙබි, විසිපස් වියැති තරුණයෙක් වූ ක්රිස්ටි මිහිඳුකුළ මහතාවයි.
එනයින් ගත් කළ එම මහතා වනාහී ප්රතිමා පාස්කුව සහ ක්රිස්තු චරිතය සඳහා ජීවමාන නළුවෙක් යොදාගනිමින් කළ පාස්කුව යා කල විශේෂිතම පුරුක වේ.
1939 වර්ෂයේදී දූව මීසම් සේවකව සිටි, මරිය ගැති ගෞරවනීය කලාශූරි මර්සලින් ජයකොඩි පියතුමන්ගේ, නව පිටපත සඳහා ජීවමාන නළුවන් රඟපෑම සඳහා හඳුන්වා දුන්නද ක්රිස්තුස්වහන්සේ, මරියතුමිය සහ ශ්රාවක ජුවාම් යන චරිත ත්රිත්වය 1962 වර්ෂය තෙක්ම ප්රතිමාවන් පමණක් යොදා ගැනිනි. එලෙසම උක්ත නව පිටපත සඳහා උන්වහන්සේට ශුද්ධවූ බයිබලය මෙන්ම එක්සත් රාජධානියේ විසූ නවකතා සහ වේදිකා නාට්යය තිරපිටපත් ලේඛිකාවක් වූ ඩොරති එල්. සේයර්ස් මහත්මියගේ "The Man Born To Be King" යන පුස්තකයද පාදක වූ බව සඳහන් කළ යුත්තේය.
අවසන් වරට පාස්කුව සඳහා ක්රිස්ටි මිහිඳුකුළ මහතා සක්රීයව සිය රංගනයෙන් දායක වන්නේ 2009 වර්ෂයේ අප්රියෙල් 04වන සිකුරාදා දින, දූව පාරම්පරික පාස්කු සංවිධානය සහ කැළණිය විශ්ව විද්යාලයේ නාට්යය සහ රංග කලා අධ්යතන අංශය සුසංයෝගයෙන් බිෂොප් විද්යාලීය ශ්රවණාගාරයේදී වේදිකාගත කරන ලද විශේෂිත දර්ශණ වාරය තුළින් ය. එවක එම මහතා හැත්තෑ දෙහැවිරිදි (72) වියෙහි පසු වූයේය.
එලෙසම එදාමෙදා තුර දූව පාස්කු ඉතිහාසය තුළ මෙන්ම, ලාංකීය පාස්කු ඉතිහාසය තුළද වැඩිම වාර ගණනක් ක්රිස්තුස්වහන්සේගේ චරිතය සඳහා පණ පොවන ලද යමෙක් වේ නම්, ඒ ක්රිස්ටි මිහිඳුකුළ මහතායි. එම මහතා සෑම අයෙක් අතරම ප්රකටව ඇත්තේ සිනාමුසු මුහුණින් යුක්තව සිටින ප්රියමනාප නිහතමානි පුද්ගලයෙක් ලෙසිනි. පාස්කු නාට්යයේ මෙන්ම සිය ජීවන රඟ මඩලේද ක්රිස්තුස්වහන්සේගේ ජීවිතය සිය දිවියටද ආලෝකයක් ලෙස එක් කොටගත් එම මහතාට සමිඳුන් තුරුළෙහි සදා සාමය අපි සැම ප්රාර්ථනා කරන්නෙමු.
🕯️ අගෝස්තු මස 15 වන සෙනසුරාදා දින සවස 04:00ට කටුවාපිටිය මහිමගොඩැල්ල වත්ත ශ්රී කුරුස දේවස්ථානයට දේහය රැගෙන එනු ලබන අතර පසුව අවසන් කටයුතු සවස 04:30ට මීගමුව සෙල්ලකන්ද සුසාන භූමියේදි සිදු කෙරේ.
“තවද දෙවියන් වහන්සේගේ අදහස ලෙස කැඳවනු ලැබූවන්ට, එනම්, උන් වහන්සේට ප්රේම කරන අයට, සියල්ලෙහි දී ම උන් වහන්සේ ඔවුන්ගේ යහපත පිණිස ක්රියා කරන බව අපි දනිමු.” (රෝම 8:28) 🕊️
©️Duwa Passion Play - දූවේ පාස්කු
