10/04/2026
*ඉසුරුපුර බක්මහ උළෙල – 2026*
2026 වර්ෂයේ අප්රේල් මස 05 වන රිවි දින, දොඩම්ගොඩ Resolve Garden Hotel පරිශ්රයේදී "ඉසුරුපුර බක්මහ උළෙල – 2026" අති උත්කර්ෂවත් අන්දමින් පැවැත්විණි.
කළුතර දොඩම්ගොඩ ඉසුරුපුර ශ්රී සංඝරාජ මහා විහාරයේ විහාරාධිපති, දොඩම්ගොඩ ප්රාදේශීය ශාසනාරක්ෂක බල මණ්ඩලයේ නියෝජ්ය ලේඛකාධිකාරී, සිංහල මාධ්ය ශ්රී ඉන්දසර දහම් පාසලේ සහ ඉංග්රීසි මාධ්ය සිරි සුමේධ දහම් පාසලේ ප්රධානාචාර්ය, රාජකීය පණ්ඩිත, ත්රිපිටක විශාරද, මුළු දිවයිනටම සාමවිනිසුරු අතිපූජ්ය දොඩම්ගොඩ සිරි සුමේධ නායක ස්වාමීන් වහන්සේගේ ප්රධානත්වයෙන් සහ අනුශාසකත්වයෙන් මෙම උළෙල වර්ණවත් විය. ප්රදේශවාසීන්ගේ සහ දූ දරුවන්ගේ සහභාගීත්වයෙන් පැවැත්වුණු මෙය දහම් පාසලට පමණක් සීමා නොවූ පොදු ප්රජා මංගල්යයක් ලෙස සංවිධානය කර තිබීම විශේෂත්වයකි.
පෙරවරු 8.00 ට පන්සිල් සමාදන් කරවීමෙන් අනතුරුව, 8 ශ්රේණියෙන් ඉහළ තරගකරුවන් සඳහා වූ 'ගම හරහා දිවීමේ' තරගයෙන් උළෙල ආරම්භ විය. ඉන්පසුව සාම්ප්රදායික චාරිත්රයන්ට මුල්තැන දෙමින් කිරි ඉතිරවීම, පොල්තෙල් පහන දැල්වීම සහ දේශීය කැවිලි පෙතිවලින් සපිරි ආහාර මේසය භුක්ති විඳීම සිදු විය.
10, 11 ශ්රේණිවල දරු දැරියන්ගේ නර්තනයෙන් ඇරඹි විනෝදාත්මක අංග පේළිය, අනෙකුත් ශ්රේණි මෙන්ම ගුරු භවතුන් ඉදිරිපත් කළ නර්තනයන්ගෙන් ද හැඩවිය. කුඩා දරුවන් වෙනුවෙන් පැවැත්වුණු ටොෆි ඇහිඳීම සහ බැලූන් පිපිරවීම වැනි ක්රීඩාවල සිට සැමට විවෘතව පැවැත්වුණු හොඳම සිනාව, හොඳම ඇඬීම, ජන ගායනා, කොට්ට පොර, කඹ ඇදීම සහ සංගීත පුටු වැනි තරග දක්වා ඉසව් රැසක් මෙහිදී පැවැත්විණි. විශේෂයෙන්ම අලියට ඇස බැඳීම, කණා මුට්ටි බිඳීම සහ සැඟවුණු අමුත්තා සෙවීම වැනි තරගවලදී සැවොම මහත් උද්යෝගයකින් සහභාගී වූහ. ජයග්රාහකයින් සඳහා ත්යාග ප්රදානය කිරීමෙන් අනතුරුව, ජාතික ගීය ගායනයත් සමඟින් මෙම අභිමානවත් බක්මහ උළෙල නිමාවට පත්විය. බෝසත් පාරමී පදනම, ඉසුරුපුර නායකත්ව සංසදය සහ ඉසුරුපුර මාධ්ය ඒකකය එක්ව මෙම ප්රජා සත්කාරක මහා මංගල්යය ඉතා සාර්ථකව සංවිධානය කර තිබුණි.
පිටපත් රචනය:
ඔනාදි ජලංගනා
10 ශ්රේණිය
ඉසුරුපුර මාධ්ය ඒකකය
