15/09/2026
பொதுக்கூட்டம் - சர்வமதத் தலைவர்கள், சிவில் சமூக செயற்பாட்டாளர்களின் பங்கேற்பு.
மட்டக்களப்பு திருப்பெருந்துரையில் தென்னிந்திய திருச்சபை, யாழ்ப்பாண ஆதீனத்தின் புதிய ஆலயக் கட்டிடம் திறந்து வைக்கப்பட்டதைத் தொடர்ந்து, பேராயர் பேரருட்திரு கலாநிதி வி. பத்மதயாளன் அவர்களின் தலைமையில் சிறப்பான பொதுக்கூட்டம் நடைபெற்றது.
இப்பொதுக்கூட்டத்தில் சர்வமதத் தலைவர்கள், சிவில் சமூக செயற்பாட்டாளர்கள், திருச்சபை உறுப்பினர்கள் மற்றும் பொதுமக்கள் பலர் கலந்து கொண்டனர். ஆலோசனைக்கும் வழிகாட்டலுக்குமான ஆலிம்கள் அமைப்பின் காத்தான்குடி தலைவர் சாஜகான் மௌலவி அவர்களும், திருப்பெருந்துரை முருகன் ஆலயத்தின் பிரதம குருக்கள் அவர்களும் கலந்து கொண்டு தமது வாழ்த்துச் செய்திகளையும் ஆசிகளையும் வழங்கினர்.
மேலும், மட்டக்களப்பு மாவட்ட சிவில் சமூக செயற்பாட்டாளர்கள் ஒன்றியத்தின் தலைவர் திரு. சிவயோகநாதன் சீலன் அவர்களும் இந்நிகழ்வில் கலந்து கொண்டு வாழ்த்துச் செய்தியை வழங்கினார்.
இந்நிகழ்வின் முக்கிய அம்சமாக, திருப்பெருந்துரை பகுதியில் தென்னிந்திய திருச்சபையின் பணிகளை முன்னெடுப்பதில் அர்ப்பணிப்புடன் உழைத்தவர்களுக்கு கௌரவம் வழங்கப்பட்டது. திருமதி புஷ்பராணி, திரு. தேவமனோரஞ்சன் மற்றும் திரு. தர்ஷன் ஆகியோர் பொன்னாடை அணிவிக்கப்பட்டு கௌரவிக்கப்பட்டனர்.
அதேவேளை, தென்னிந்தியா திருச்சபை, யாழ்ப்பாண ஆதீனத்தின் பேராயர் பேரருட்திரு கலாநிதி வி. பத்மதயாளன், பொருளாளர் திரு. ஜோ. இன்பராஜ் மற்றும் சென்னைப் பேராயத்திலிருந்து வருகை தந்த அருட்பணி பிரின்ஸ் ஆகியோரும் திருச்சபை மக்களினால் பொன்னாடை அணிவித்து கௌரவிக்கப்பட்டனர்.
பொதுக்கூட்டத்தில் உரையாற்றிய பேராயர், திருச்சபையின் எதிர்காலப் பணிகள் குறித்து எடுத்துரைத்ததுடன், தென்னிந்தியா திருச்சபை தனது பணிகளை சமூகத்தின் அனைத்து தரப்பினருடனும் இணைந்து முன்னெடுக்க எப்போதும் தயாராக இருப்பதாகத் தெரிவித்தார். குறிப்பாக சர்வமதத் தலைவர்கள், சிவில் சமூக செயற்பாட்டாளர்கள் மற்றும் மனித உரிமைப் பணியாளர்களுடன் இணைந்து சமாதானம், நல்லிணக்கம், சமூக நீதி மற்றும் மனிதநேயப் பணிகளை முன்னெடுப்பதற்கான திருச்சபையின் அர்ப்பணிப்பையும் அவர் வலியுறுத்தினார்.
மதங்களுக்கிடையிலான நல்லுறவையும் சமூகங்களுக்கிடையிலான ஒற்றுமையையும் வலுப்படுத்தும் வகையில், திருச்சபையின் எதிர்காலப் பணிகள் அமைந்திருக்க வேண்டும் எனவும் பேராயர் குறிப்பிட்டார்.
திருப்பரந்துரையில் புதிய ஆலயம் திறந்து வைக்கப்பட்டுள்ள இந்நிகழ்வு, ஒரு புதிய வழிபாட்டுத் தலத்தின் ஆரம்பம் மட்டுமன்றி, இப்பகுதி மக்களின் ஆன்மிக வாழ்வுக்கும் சமூக நல்லிணக்கத்திற்கும் சேவைக்கும் புதிய அத்தியாயத்தைத் திறந்து வைக்கும் நிகழ்வாகவும் அமைந்துள்ளது.
