19/05/2026
🔴 ජේසුස් වහන්සේව කුරුසියේ තබා ගැසු ඇණ ගලවාගෙන බැස තමන්ව ගලවා ගැනීමට නොහැකිවූ ඔහු අන් අයව ගලවන්නේ කෙසේද ❓
යන ප්රශ්නයට පිළිතුර සොයාගත යුත්තේ ජේසුස් වහන්සේම තුළින් මිස වෙනත් මූලාශ්ර වලින් නොවේ.
👉 මෙම ප්රශ්නය අද ඊයේ පැමිණි එකක් නෙවෙයි, ජේසුස් වහන්සේ කුරුසියේ ඇණ ගසා සිටි මොහොතේත් එතැන සිටි ඵරිසිවරුන්, නායක පූජකයන් සහ උන්වහන්සේ සමගම එහා පැත්තේ ඇණගැසූ සොරෙකු විසින් ඉහත ප්රශ්නයම ජේසුස් වහන්සේට මතු කළහ. 👇
📜 එය බයිබලයේ ලියවී ඇත්තේ මෙසේය "මොහු අන් අය ගැළෙවුවේය, තමන්ව ගලවාගන්න බැරිය" (මතෙව් 27:42) කියමින් උන්වහන්සේට සමච්චල් කළහ.
🟡 ජේසුස් වහන්සේගේ ධර්මයට අනුව මෙයට දෙන පිළිතුර ප්රධාන කරුණු කිහිපයක් ඔස්සේ වටහා ගනිමු.
1.කුරුසියෙන් ගැලවෙන්න බැරිකම නිසා නොව, කැමැත්තෙන්ම දඬුවම විඳිම
📜 ජේසුස් වහන්සේ යනු දෙවියන් වහන්සේගේ පුත්රයායි. උන්වහන්සේට කුරුසියෙන් බැසීමට හෝ දේවදූතයන් සේනාංකයක් කැඳවා තමන්ව බේරාගැනීමට සම්පූර්ණ බලය තිබු බව උන්වහන්සේ ප්රකාශ කළ සේක (මතෙව් 26:53).
➡️ නමුත් උන්වහන්සේ එසේ නොකළේ බැරිකම නිසා නොව, උන්වහන්සේගේම කැමැත්තෙන්ම මිනිස් වර්ගයා වෙනුවෙන් ජීවිතය පූජා කිරීමට තීරණය කළ නිසයි.
📜 "මාගේ ජීවිතය මා කෙරෙන් කිසිවෙක් නොගනියි, මමම එය පවරමි. එය පවරන්ට මට බලය ඇත, නැවත එය ගන්ටත් මට බලය ඇත." (යොහන් 10:18).
2. "ගැළවීම" ලෝකයාට ලබා දීම
🟡 මිනිසුන් බලාපොරොත්තු වූයේ ලෞකික, දේශපාලනික හෝ ශාරීරික ගැළවීමක් (උදාහරණයක් ලෙස රෝම අධිරාජ්යයෙන් නිදහස් වීම හෝ ශාරීරික මරණයෙන් බේරීම).
නමුත් ජේසුස් වහන්සේ ලෝකයට පැමිණියේ ඊට වඩා උසස්, සදාකාලික ගැළවීමක් ලබා දීමටයි.
📜 මක්නිසාද පාපයේ කුලී නම් මරණයය (නිරය) නුමුත් දෙවියන්වහන්සේගේ දීමනාව නම්, අපගේ ස්වාමිවූ යේසුස් ක්රිස්තුස්වහන්සේ තුළ සදාකාල ජීවනයය (රෝම 6:23).
◻️ බයිබලයට අනුව මිනිසා පාපය නිසා දෙවියන් වහන්සේගෙන් වෙන් වී, සදාකාලික විනාශයට (නිරයට) උරුමකම් කීවෝය. ජේසුස් වහන්සේ මිනිසුන්ව ගලවාගත්තේ පාපයේ දඬුවමෙන් සහ සදාකාලික මරණයෙනි. එම සදාකාලික ගැළවීම දීමට නම්, කෙනෙකු පාපයට අදාළ දඬුවම වන්දි වශයෙන් ගෙවිය යුතුව තිබුණි.
📜 නුමුත් දෙවියන්වහන්සේ අප කෙරෙහි ඇති තමන්වහන්සේගේ ප්රේමය පෙන්වන්නේ අප පව්කාරයන්ව සිටියදීම අප වෙනුවට ක්රිස්තුස්වහන්සේගේ මරණය විඳීමෙන්ය (රෝම 5:8).
3. මිනිසාගේ පාපයට පූජාවක් ඔප්පු කිරිම
🟡 දෙවියන් වහන්සේගේ යුක්තිය ඉටු වීමට නම් පාපයට දඬුවමක් තිබිය යුතුයි. මිනිසාට තමන්ගේම පාපයට වන්දි ගෙවීමට නොහැකි නිසා, කිසිදු පාපයක් නොකළ නොකැලැල් ශුද්ධවූ ජේසුස් වහන්සේ මිනිසා වෙනුවෙන් "ආදේශකයෙකු" ලෙස ඉදිරිපත් වී, මිනිසා විඳිය යුතු දඬුවම උන්වහන්සේ පිට පවරාගත් සේක.
🔥 වැදගත්ම කොටස මෙයයි
➡️ ජේසුස් වහන්සේ කුරුසියෙන් බැස තමන්ව ගලවාගත්තේ නම්, මිනිස් වර්ගයාට කිසිදාක පාපයෙන් ගැළවීමක් අත් වන්නේ නැත. උන්වහන්සේ ඇණ ගලවාගෙන තමන්ව බේරා නොගත්තේ, තමන්ව බේරාගත්තොත් අන් අයව බේරාගැනීමට නොහැකි වන නිසයි. ජේසුස් වහන්සේ ලෝකයා නිසා එම ඳුක විඳදරාගත් සේක.
📜 "උන් වහන්සේ අපගේ වැරදි නිසා තුවාල ලැබූ සේක, අපගේ අදමිටුකම් නිසා පොඩි කරනු ලැබූ සේක... උන් වහන්සේගේ තුවාලවලින් අපට සුවය ලැබී තිබේ." (යෙසායා 53:5)
4. මරණය පරාජය කර උත්ථානය වීම
🟡 කතාව කුරුසියෙන් අවසන් වන්නේ නැත. ඉහත ප්රශ්නය අසන බොහෝ දෙනා මෙම කොටස ප්රතික්ෂේප කරති. ජේසුස් වහන්සේ කුරුසියේ මියගොස්, වළලනු ලැබ, තුන්වන දින මරණය පරාජය කරමින් උත්ථාන වී නැවත නැගිටුනු සේක.
👉 බයිබලයේ පිළිතුරට අනුව, ජේසුස් වහන්සේ අන් අයව ගලවන්නේ කෙසේද යන ප්රශ්නයට අතිශය වැදගත් සාක්ෂිය මෙයයි.
◻️ උන්වහන්සේ මරණයෙන් නැවත නැගිටීම තුළින් ඔප්පු කළා උන්වහන්සේට මරණය සහ පාපය කෙරෙහි බලය ඇති බව. එම නිසා, උන්වහන්සේව විශ්වාස කරන සෑම කෙනෙකුටම මරණයෙන් පසු සදාකාලික ජීවනය දීමට උන්වහන්සේට පුළුවන. එම නිසා මරණය ඔබේ කතාවේ අවසානය නොවේ.
📜 භය නොවෙන්න; මක්නිසාද කුරුසියෙහි ඇණ ගසනලද ජේසුස් වහන්සේව නුඹලා සොයන බව දනිමි. උන්වහන්සේ මෙහි නැත; උන්වහන්සේ කී ලෙසම නැගුටුණුසේක (ශු.මතෙව් 28:5-6).
🔥 "ජේසුස් වහන්සේ කුරුසියේ ඇණ ගලවාගෙන තමන්ව ගලවා නොගත්තේ උන්වහන්සේට ඒ සඳහා බලය නැති නිසා නොව, උන්වහන්සේ ඔබව සහ මාව පාපයෙන් ගලවාගැනීමට ඇති අසීමිත ප්රේමය නිසා, ස්වේච්ඡාවෙන්ම ඒ දුක විඳීමට තීරණය කළ බැවිනි."
📜 මක්නිසාද කුරුසියේ වචනය විනාශවන්නන්ට මෝඩකමය; නුමුත් ගැළවෙන්නාවූ අපට ඒක දෙවියන්වහන්සේගේ බලයය (1 කොරෙන්ති 1:18).
මෙය දෙවියන් වහන්සේගේ පණිවිඩයයි, කං ඇත්තෝ අසත්වා!!!
✍️ Praneeth Gunaratne
