16/06/2026
ក្រសួងបរិស្ថានប្រគល់ធុងសំរាមជូនវត្តអារាម និងសាលារៀននៅខេត្តសៀមរាប ដើម្បីលើកកម្ពស់ភាពស្អាត និងបៃតង
BC News| សីរី មុនី
សៀមរាប៖ ក្រសួងបរិស្ថាន បានប្រគល់ធុងសំរាមជាច្រើនជូនដល់វត្តអារាម និងសាលារៀននានាក្នុងខេត្តសៀមរាប នៅថ្ងៃទី១៦ ខែមិថុនា ឆ្នាំ២០២៦ ដើម្បីចូលរួមលើកកម្ពស់អនាម័យបរិស្ថាន សោភ័ណភាពទីក្រុង និងជំរុញការគ្រប់គ្រងសំណល់ឱ្យមានប្រសិទ្ធភាព ស្របតាមចក្ខុវិស័យរបស់រាជរដ្ឋាភិបាលក្នុងការកសាងកម្ពុជា ឱ្យក្លាយជាប្រទេសស្អាត បៃតង និងប្រកបដោយចីរភាព។
ពិធីប្រគល់នេះ បានប្រព្រឹត្តទៅក្រោមអធិបតីភាពដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តសៀមរាប ដោយមានការចូលរួមពីថ្នាក់ដឹកនាំ អាជ្ញាធរ មន្ត្រីរាជការ កងកម្លាំងប្រដាប់អាវុធ ព្រះសង្ឃ លោកគ្រូ អ្នកគ្រូ និងសិស្សានុសិស្សជាច្រើន។
កម្មវិធីនេះ គឺជាផ្នែកមួយនៃការអនុវត្តយុទ្ធនាការបរិស្ថានរបស់ក្រសួងបរិស្ថាន ក្រោមការដឹកនាំរបស់ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន ដែលបាននិងកំពុងជំរុញយ៉ាងសកម្មនូវចលនា «ថ្ងៃនេះ ខ្ញុំមិនប្រើថង់ប្លាស្ទិកទេ» ការគ្រប់គ្រងសំណល់រឹង ការបែងចែកសំរាមតាមប្រភេទ និងការលើកកម្ពស់វប្បធម៌រស់នៅស្អាតនៅទូទាំងប្រទេស។
ក្នុងឱកាសនោះ ក្រសួងបរិស្ថានបានផ្តល់ធុងសំរាមសរុបចំនួន ៣,៤៩២ធុង ជូនខេត្តសៀមរាប សម្រាប់ប្រើប្រាស់ក្នុងការគ្រប់គ្រងសំណល់ និងលើកកម្ពស់អនាម័យបរិស្ថាន។ ក្នុងនោះ រួមមាន ៣០៩ធុង សម្រាប់មណ្ឌលសុខភាព, ៣៦០ធុង សម្រាប់មណ្ឌលសុវត្ថិភាពជនភៀសសឹក និង ២,៨២៣ធុង ផ្តល់ជូនរដ្ឋបាលខេត្តសៀមរាប ដើម្បីបន្តបែងចែកជូនសាលារៀន វត្តអារាម និងស្ថាប័នពាក់ព័ន្ធនានា។ ជារួម ធុងសំរាមទាំង ៣,៤៩២ធុង នេះ នឹងរួមចំណែកយ៉ាងសំខាន់ក្នុងការពង្រឹងការគ្រប់គ្រងសំណល់ កាត់បន្ថយការបោះចោលសំរាមមិនត្រឹមត្រូវ និងលើកកម្ពស់សោភ័ណភាពបរិស្ថាននៅទូទាំងខេត្តសៀមរាប។
ថ្លែងក្នុងឱកាសនោះ ឯកឧត្តម ទៀ សីហា បានលើកឡើងពីសារៈសំខាន់នៃការចូលរួមថែរក្សាបរិស្ថាន និងអនាម័យសាធារណៈ ដែលជាកត្តាចម្បងក្នុងការរក្សាសោភ័ណភាព និងភាពទាក់ទាញរបស់ខេត្តសៀមរាប ជាពិសេសក្នុងនាមជាទីក្រុងទេសចរណ៍វប្បធម៌ និងប្រវត្តិសាស្ត្រដ៏សំខាន់របស់កម្ពុជា។
ការប្រគល់ធុងសំរាមទៅកាន់វត្តអារាម និងសាលារៀននាពេលនេះ នឹងជួយលើកកម្ពស់ការយល់ដឹងរបស់សិស្សានុសិស្ស ព្រះសង្ឃ និងប្រជាពលរដ្ឋ អំពីការរក្សាអនាម័យ ការទុកដាក់សំរាមឱ្យបានត្រឹមត្រូវ និងការចូលរួមថែរក្សាបរិស្ថាននៅក្នុងសហគមន៍របស់ខ្លួន។
តាមរយៈកិច្ចសហការរវាងក្រសួងបរិស្ថាន អាជ្ញាធរមូលដ្ឋាន និងស្ថាប័នពាក់ព័ន្ធ ខេត្តសៀមរាបត្រូវបានរំពឹងថា នឹងកាន់តែមានភាពស្អាត បៃតង និងទាក់ទាញ ស្របតាមគោលដៅក្លាយជាទីក្រុងទេសចរណ៍ប្រកបដោយនិរន្តរភាព និងជាគំរូនៃការអភិរក្សបរិស្ថាននៅកម្ពុជា៕
