Seed of Faith Church Ministries

Seed of Faith Church Ministries Seed of Faith in Jesus Christ

30/08/2026

សូមស្វាគមន៍ ការថ្វាយបង្គំព្រះរួមគ្នា

១យ៉ូហាន ៤.៤
ពួកកូនតូចៗអើយ អ្នករាល់គ្នាមកពីព្រះ ហើយក៏ឈ្នះវិញ្ញាណទាំងនោះដែរ ពីព្រោះព្រះដែលគង់ក្នុងអ្នករាល់គ្នា នោះទ្រង់ធំជាងអានោះ ដែលនៅក្នុងលោកីយផង

កុំជ្រើសរើសជឿតែផ្នែកខ្លះនៃសេចក្ដីពិត សូមញែកគេចេញជាបរិសុទ្ធ ដោយសារសេចក្ដីពិតរបស់ទ្រង់ ឯសេចក្ដីពិត គឺជាព្រះបន្ទូលរបស់ទ្រង់...
25/08/2026

កុំជ្រើសរើសជឿតែផ្នែកខ្លះនៃសេចក្ដីពិត

សូមញែកគេចេញជាបរិសុទ្ធ ដោយសារសេចក្ដីពិតរបស់ទ្រង់ ឯសេចក្ដីពិត គឺជាព្រះបន្ទូលរបស់ទ្រង់(យ៉ូហាន ១៧:១៧)។

សេចក្ដីពិតនៃព្រះបន្ទូលព្រះមិនអាស្រ័យលើចំណូលចិត្តផ្ទាល់ខ្លួនឡើយ។ អ្នកមិនអាចទទួលយកផ្នែកមួយ ហើយបដិសេធផ្នែកមួយទៀតបានទេ។ ព្រះបន្ទូលព្រះគឺជាសេចក្ដីពិតដាច់ខាត វាមានភាពពេញលេញ ជាប់លាប់ និង អាចទុកចិត្តបាន។ ជាអកុសល មានមនុស្សមួយចំនួននិយាយថា ពួកគេមិនជឿលើផ្នែកខ្លះនៃព្រះគម្ពីរទេ ឧទាហរណ៍៖ ការយាងឡើងទៅស្ថានសួគ៌របស់ព្រះយេស៊ូវគ្រីស្ទ។ អ្នកមិនមែនជាគ្រីស្ទបរិស័ទឡើយ ប្រសិនបើ អ្នកមិនជឿថាព្រះយេស៊ូវបានយាងឡើងទៅស្ថានសួគ៌។

ព្រះគម្ពីរបានបង្ហាញយ៉ាងច្បាស់ថា ទ្រង់ត្រូវបាននាំឡើងទៅស្ថានសួគ៌។ ចូររំឭកពាក្យរបស់ទេវតាដែលបាននិយាយទៅកាន់ពួកសិស្សនៅ កិច្ចការ ១:១១ ថា៖ «ពួកអ្នកស្រុកកាលីឡេអើយ ហេតុអ្វីបានជាឈរងើយមើលទៅលើមេឃដូច្នេះ ព្រះយេស៊ូវនេះឯង ដែលព្រះបានលើកពីអ្នករាល់គ្នាឡើងទៅលើស្ថានសួគ៌ ទ្រង់នឹងយាងមកវិញ តាមបែបដដែល ដូចជាអ្នករាល់គ្នាបានឃើញទ្រង់ទៅនោះដែរ»។ នោះមិនមែនជារឿងប្រៀបធៀបទេ វាបានកើតឡើងពិតមែន ហើយជាការពិតដែលមិនអាចប្រកែកបាន៖ ព្រះអម្ចាស់យេស៊ូវបានយាងឡើងទៅស្ថានសួគ៌។

មុនទ្រង់ មានលោក ហេណុក (ហេព្រើរ ១១:៥) និង លោក អេលីយ៉ា (សូមអាន ២ពង្សាវតារក្សត្រ ២:៩-១១) ដែលអ្នកទាំងពីរនេះត្រូវបាននាំឡើងទៅស្ថានសួគ៌។ ទាំងនេះគឺជាព្រឹត្តិការណ៍ពិត ដែលបង្ហាញអ្នកថា របៀបដែលព្រះទ្រង់ធ្វើកិច្ចការគឺមានភាពប្រាកដ ហើយព្រះបន្ទូលរបស់ទ្រង់គឺអាចទុកចិត្តបាន។ ដូច្នេះ ប្រសិនបើមាននរណាម្នាក់ចោទសួរអំពីផ្នែកមួយនៃព្រះបន្ទូល តើវានឹងទៅដល់ត្រង់ណាទើបឈប់?

ក្នុងនាមជាគ្រីស្ទបរិស័ទម្នាក់ ប្រសិនបើអ្នកមិនជឿថា ព្រះយេស៊ូវបានយាងឡើងទៅស្ថានសួគ៌នោះទេ វាមានន័យថា អ្នកក៏មិនជឿថាមានស្ថានសួគ៌ដែរ។ ហេតុផលមួយដែលយើងនឹងទៅស្ថានសួគ៌ គឺដោយសារអ្វីដែលព្រះយេស៊ូវបានមានបន្ទូលនៅក្នុងការអធិស្ឋានរបស់ទ្រង់ទៅកាន់ព្រះវរបិតា ក្នុងគម្ពីរយ៉ូហាន ១៧:២៤ ថា៖ «ឱព្រះវរបិតាអើយ ឯពួកអ្នកដែលទ្រង់ប្រទានមកទូលបង្គំ នោះទូលបង្គំចង់ឲ្យគេនៅជាមួយនឹងទូលបង្គំ ក្នុងកន្លែងដែលទូលបង្គំនៅដែរ...»។

ទ្រង់ចង់ឲ្យយើងឃើញស្ថានសួគ៌ និងឃើញថា អ្វីៗទាំងអស់ដែលទ្រង់បានប្រាប់យើង គឺសុទ្ធតែជាការពិត។ ទ្រង់ចង់ឲ្យយើងមកចូលរួមដោយផ្ទាល់នៅអ្វីដែលកើតឡើងនៅស្ថានសួគ៌ រួចត្រឡប់មកជាមួយទ្រង់វិញ ដើម្បីគ្រប់គ្រងលើប្រជាជាតិទាំងឡាយអស់រយៈពេលមួយពាន់ឆ្នាំ មុនពេលការជំនុំជម្រះមកដល់។ អាលេលូយ៉ា! ដូច្នេះ ព្រះគម្ពីរបានបង្ហាញថា មានស្ថានសួគ៌ គឺជាការពិត។

ជីវិតរបស់អ្នកនៅក្នុងព្រះគ្រីស្ទមិនមែនមានកម្រិតត្រឹមតែពិភពលោកបច្ចុប្បន្ននេះទេ។ មានអនាគតមួយនៅជាមួយទ្រង់។ ហេតុនេះ សូមជឿលើព្រះបន្ទូលទាំងស្រុង កុំជ្រើសរើសជឿតែផ្នែកខ្លះនៃសេចក្ដីពិត។ កុំកសាងជំនឿរបស់អ្នកលើទ្រឹស្តី ឬការសន្មតរបស់មនុស្ស។ ចូរទទួលយកព្រះបន្ទូលយ៉ាងពេញលេញមកកសាងជីវិតរបស់អ្នកលើសេចក្ដីពិតទាំងស្រុងនៃព្រះបន្ទូលរបស់ព្រះ។

ការប្រកាសសារភាពជំនឿ
ឱព្រះអម្ចាស់អើយ ព្រះបន្ទូលរបស់ទ្រង់គឺពេញលេញ និង ល្អឥតខ្ចោះ ហើយអាចទុកចិត្តបានទាំងស្រុង។ ជីវិតរបស់ទូលបង្គំត្រូវបានកសាង និងតាំងឡើងលើសេចក្ដីពិតទាំងស្រុងនៃព្រះបន្ទូលរបស់ទ្រង់។ ទូលបង្គំដើរនៅក្នុងពន្លឺនៃអ្វីៗទាំងអស់ដែលទ្រង់បានបើកសម្ដែងនៅក្នុងព្រះបន្ទូលរបស់ទ្រង់។ ហេតុនេះ ជីវិតរបស់ទូលបង្គំគឺល្អប្រសើរ និងពោរពេញដោយសិរីល្អ នៅក្នុងព្រះនាមព្រះយេស៊ូវគ្រីស្ទ។ អាម៉ែន។

Note: I translated from Rhapsody of Realities. . . a daily devotion on 22th August 2026 by pastor Chris Oyakhilome

ការលើកទ្បើងទៅជួបព្រះគ្រីស្ទ នែ ខ្ញុំប្រាប់អ្នករាល់គ្នាពីសេចក្ដីអាថ៌កំបាំង គឺថាយើងទាំងអស់គ្នានឹងមិនដេកលក់ទៅទេ(១ កូរិនថូស ...
24/08/2026

ការលើកទ្បើងទៅជួបព្រះគ្រីស្ទ

នែ ខ្ញុំប្រាប់អ្នករាល់គ្នាពីសេចក្ដីអាថ៌កំបាំង គឺថាយើងទាំងអស់គ្នានឹងមិនដេកលក់ទៅទេ
(១ កូរិនថូស ១៥:៥១)

មនុស្សខ្លះនិយាយថា ពួកគេមិនជឿលើការលើកឡើងទៅស្ថានសួគ៌ (Rapture) របស់ពួកជំនុំឡើយ។ ប៉ុន្តែ តើការមិនជឿរបស់ពួកគេអាចផ្លាស់ប្ដូរអ្វីមួយបានដែរឬទេ? ទេ! សេចក្ដីពិតមិនត្រូវបានកំណត់ដោយមតិយោបល់របស់ពួកគេឡើយ វាត្រូវបានកំណត់ដោយព្រះបន្ទូលព្រះ។ ទោះបីជា មានគេជឿឬមិនជឿក៏ដោយ ក៏ព្រះបន្ទូលព្រះគឺច្បាស់លាស់ណាស់៖ ការលើកឡើងទៅស្ថានសួគ៌នឹងកើតឡើង ហើយវានឹងកើតឡើងក្នុងពេលឆាប់ៗនេះ ទៀតផង។

សាវ័កប៉ុលហៅរឿងនេះថា ជាសេចក្ដីអាថ៌កំបាំងមួយ៖ ១ កូរិនថូស ១៥:៥២ «តែទាំងអស់គ្នានឹងបានផ្លាស់ប្រែទៅក្នុង១រំពេចវិញ គឺក្នុង១ប៉ប្រិចភ្នែកប៉ុណ្ណោះ ក្នុងកាលដែលឮសូរត្រែក្រោយបង្អស់ ដ្បិតត្រែនឹងឮឡើងមែន នោះពួកស្លាប់នឹងរស់ឡើងវិញ មិនពុករលួយទៀតឡើយ រួចយើងរាល់គ្នានឹងបានផ្លាស់ប្រែទៅ»។ មិនមែនមនុស្សទាំងអស់នឹងស្លាប់នោះទេ ប៉ុន្តែទាំងអស់គ្នានឹងត្រូវផ្លាស់ប្រែ។ អ្នកដែលស្លាប់ក្នុងព្រះគ្រីស្ទនឹងត្រូវប្រោសឱ្យរស់ឡើងវិញមុនគេ ហើយអ្នកដែលនៅរស់នឹងត្រូវផ្លាស់ប្រែរូបកាយ។

សាវ័កប៉ុលពន្យល់បន្ថែមនៅក្នុង ១ ថេស្សាឡូនិច ៤:១៦-១៧ ថា៖ «ព្រោះព្រះអម្ចាស់ទ្រង់នឹងយាងចុះពីស្ថានសួគ៌មក ដោយស្រែកបង្គាប់១ព្រះឱស្ឋ ទាំងមានឮសំឡេងមហាទេវតា នឹងត្រែរបស់ព្រះផង នោះពួកស្លាប់ក្នុងព្រះគ្រីស្ទនឹងរស់ឡើងវិញ ជាមុនបង្អស់ រួចយើងរាល់គ្នាដែលកំពុងតែរស់នៅ ក៏នឹងបានលើកឡើងទៅក្នុងពពកជាមួយគ្នាទាំងអស់ ដើម្បីឲ្យបានជួបជុំនឹងព្រះអម្ចាស់នៅនាអាកាស យ៉ាងនោះ យើងនឹងនៅជាមួយនឹងព្រះអម្ចាស់ជាដរាបទៅ»។ ពាក្យដែលមានគូសបន្ទាត់ពីក្រោមគឺ "នឹងបានលើកឡើងទៅ" (caught up) គឺជាប្រភពនៃពាក្យថា "លើកឡើងទៅជួបព្រះគ្រីស្ទ" (rapture)។

អ្នកប្រហែលជាមិនឃើញពាក្យថា "ការលើកឡើងទៅជួបព្រះគ្រីស្ទ" (Rapture) នៅក្នុងព្រះគម្ពីរផ្ទាល់នោះទេ ប៉ុន្តែអ្នកនឹងឃើញអត្ថន័យរបស់វា ត្រូវបានបង្ហាញយ៉ាងច្បាស់។ យើងនឹងត្រូវបានលើកឡើងទៅជួបព្រះអម្ចាស់នៅលើអាកាស។ សូមពិចារណាផងដែរអំពីឃ្លាដែលថា៖ «...ព្រះទ្រង់នឹងនាំអស់អ្នក ដែលដេកលក់ទៅ ក្នុងព្រះយេស៊ូវឲ្យបានមកជាមួយនឹងទ្រង់ដែរ» (១ថែស្សាឡូនីក ៤:១៤)។ អ្នកដែលបានស្លាប់នៅក្នុងព្រះគ្រីស្ទមិនមែនជាអ្នកដែលបាត់បង់ឡើយ ពួកគេនឹងក្លាយជាផ្នែកមួយនៃព្រឹត្តិការណ៍ដ៏រុងរឿងនេះ។

នេះមិនមែនជាគំនិតថ្មី ឬជាក្តីសង្ឃឹមមិនពិតនោះទេ វាគឺជាមូលដ្ឋានគ្រឹះនៃជំនឿគ្រីស្ទបរិស័ទ។ សាវ័កប៉ុលបានបញ្ជាក់យ៉ាងច្បាស់ថា ប្រសិនបើ អ្នកស្លាប់មិនរស់ឡើងវិញទេនោះ ជំនឿរបស់យើងគឺឥតប្រយោជន៍ (១កូរិនថូស ១៥:១៧-១៩)។ ប៉ុន្តែព្រះគ្រីស្ទបានរស់ឡើងវិញហើយ ហើយដោយសារទ្រង់មានព្រះជន្មរស់នៅ ទើបក្តីសង្ឃឹមនេះពិតជាប្រាកដមែន។ កុំឱ្យមតិផ្ទុយគ្នា ឬអ្នកដែលបដិសេធការពិតអំពីការលើកឡើងទៅជួបព្រះអម្ចាស់ (Rapture) មកធ្វើឱ្យអ្នករង្គោះរង្គើ ឬផ្លាស់ប្តូរចិត្តឡើយ។ ព្រះអម្ចាស់យេស៊ូវមិនត្រឹមតែនឹងយាងមកវិញប៉ុណ្ណោះទេ ប៉ុន្តែទ្រង់នឹងយាងមកក្នុងពេលឆាប់ៗនេះ។

នៅពេលណាមួយឆាប់ៗនេះ សំឡេងត្រែនឹងបន្លឺឡើង។ សំឡេងរបស់មហាទេវតា (archangel) នឹងត្រូវបានគេឮ។ ហើយយើងនឹងត្រូវបានលើកឡើងទៅជួបទ្រង់។ នេះគឺជា ក្តីសង្ឃឹមដ៏មានពររបស់យើង។ ចូរចងចាំជានិច្ចអំពីព្រឹត្តិការណ៍នៃការលើកឡើងទៅជួបព្រះអម្ចាស់នេះ ចូររៀបចំខ្លួន និងអរសប្បាយនៅក្នុងភាពប្រាកដប្រជានៃការយាងមកដល់របស់ទ្រង់ដែលជិតមកដល់។

ការអធិស្ឋាន
ឱព្រះវរបិតាអើយ ទូលបង្គំសូមអរព្រះគុណទ្រង់ សម្រាប់ភាពប្រាកដប្រជានៃព្រះបន្ទូលរបស់ទ្រង់។ ចិត្តរបស់ទូលបង្គំអរសប្បាយចំពោះសេចក្តីពិត អំពីការយាងមកវិញរបស់ព្រះគ្រីស្ទដែលជិតមកដល់។ ហេតុដូច្នេះហើយ ទូលបង្គំរស់នៅដោយមានការរំពឹងទុក មានជំនឿ និងមានការត្រៀមខ្លួនរួចរាល់ ដោយដឹងថា ទូលបង្គំនឹងត្រូវបានលើកឡើងទៅជួបទ្រង់នៅលើអាកាស។ ទូលបង្គំនៅតែរឹងមាំ មិនរង្គោះរង្គើ និងពោរពេញដោយអំណរ ដោយរស់នៅដើម្បីទ្រង់ នៅក្នុងនាមព្រះយេស៊ូវគ្រីស្ទ។ អាម៉ែន។

Note: I translated from Rhapsody of Realities. . . a daily devotion on 21th August 2026 by pastor Chris Oyakhilome

23/08/2026

ស្វាគមន៍ ការថ្វាយបង្គំព្រះ
កូល៉ុស ១.២៧
ក្នុងពួកសាសន៍ដទៃ គឺថា ព្រះគ្រីស្ទទ្រង់សណ្ឋិតនៅក្នុងអ្នករាល់គ្នា ដែលជាទីសង្ឃឹមយ៉ាងឧត្តម

ការនាំមនុស្សមកស្គាល់ព្រះ ដូច្នេះ ចូរឲ្យពន្លឺរបស់អ្នករាល់គ្នា បានភ្លឺនៅមុខមនុស្សលោកយ៉ាងនោះដែរ ដើម្បីឲ្យគេឃើញការល្អ ដែលអ្ន...
21/08/2026

ការនាំមនុស្សមកស្គាល់ព្រះ

ដូច្នេះ ចូរឲ្យពន្លឺរបស់អ្នករាល់គ្នា បានភ្លឺនៅមុខមនុស្សលោកយ៉ាងនោះដែរ ដើម្បីឲ្យគេឃើញការល្អ ដែលអ្នករាល់គ្នាប្រព្រឹត្ត រួចសរសើរដំកើង ដល់ព្រះវរបិតានៃអ្នករាល់គ្នា ដែលគង់នៅស្ថានសួគ៌ (ម៉ាថាយ ៥:១៦)

ជួនកាល នៅពេលដែលអ្នកប្រាប់គេឱ្យនាំមនុស្សមកស្គាល់ព្រះ គំនិតរបស់ពួកគេតែងតែនឹកឃើញភ្លាមៗដល់មនុស្សដែលពួកគេស្គាល់ស្រាប់ ដូចជាអ្នកជិតខាង អ្នករស់នៅផ្ទះ ឬបន្ទប់ជាមួយគ្នា មិត្តភក្តិ មិត្តរួមការងារ ឬសាច់ញាតិ។ វាជាមនុស្សដដែលៗដែលពួកគេ បានព្យាយាមធ្វើទីបន្ទាល់ប្រាប់អស់រយៈពេលជាច្រើនឆ្នាំមកហើយ ប៉ុន្តែបុគ្គលនោះមិនទាន់មានការឆ្លើយតបអ្វីឡើយ។ ដូច្នេះ រាល់ពេលដែលមានការលើកឡើងអំពីការនាំមនុស្សមកស្គាល់ព្រះ គំនិតរបស់ពួកគេតែងតែងាកទៅរកមនុស្សទាំងនោះ។

ទោះបីជាការគិតបែបនេះមិនមែនជារឿងខុសឆ្គងក៏ដោយ ប៉ុន្តែអ្នកចាំបាច់ត្រូវយល់ដឹងបន្ថែមទៀតអំពីរបៀបនៃការនាំមនុស្សមកស្គាល់ព្រះ។ មនុស្សដែលនៅជិតស្និទ្ធនឹងអ្នកបំផុត ជារឿយៗមិនត្រូវការការបញ្ចុះបញ្ចូលដដែលៗនោះទេ។ ជីវិតរបស់អ្នកបានបង្ហាញជាទីបន្ទាល់ប្រាប់ពួកគេរួចទៅហើយ។ ព្រះអម្ចាស់មិនបានមានបន្ទូលថា ចូរនិយាយរហូតទាល់តែពួកគេឃើញការល្អរបស់អ្នក ហើយលើកតម្កើងព្រះវរបិតានៅស្ថានសួគ៌នោះទេ។ ផ្ទុយទៅវិញ ទ្រង់បានមានបន្ទូលថា ចូរឱ្យពន្លឺរបស់អ្នក ភ្លឺទ្បើង ត្រង់នេះសំដៅទៅលើឥរិយាបថ និងចរិតលក្ខណៈបែបគ្រីស្ទបរិស័ទរបស់អ្នក ព្រមទាំងការរស់នៅស្របតាមព្រះបន្ទូល។ អ្វីៗទាំងអស់នេះបានបង្ហាញពីព្រះគ្រីស្ទទៅកាន់ពួកគេរួចជាស្រេច។

ដូច្នេះ កុំប្រែក្លាយការផ្សាយដំណឹងល្អទៅជាការឈ្លោះប្រកែកគ្នាឥតឈប់ឈរ ឬការការពន្យល់ដដែលៗជាមួយមនុស្សដដែលៗទាំងនោះឡើយ។ ប៉ុន្តែអ្វីដែលសំខាន់ជាងនេះទៅទៀតនោះគឺ ចូរអធិស្ឋានសម្រាប់ពួកគេ។ ចូររស់នៅតាមព្រះបន្ទូលនៅចំពោះមុខពួកគេ។ ចូរឱ្យជីវិតរបស់អ្នកដែលប្រព្រឹត្តដូចព្រះគ្រីស្ទ ក្លាយជាទីបន្ទាល់ដ៏ជាក់ស្តែង។ ពួកគេនឹងសង្កេតមើល ពិចារណា ហើយថ្ងៃណាមួយនឹងត្រៀមខ្លួនរួចរាល់ដើម្បីស្វែងរកចម្លើយ។ នៅពេលនោះ ការពន្យល់ដ៏សាមញ្ញមួយគឺអាចបំពេញសេចក្តីត្រូវការរបស់ពួកគេ។

ប៉ុន្តែ ដរាបណាពួកគេនៅតែបន្តប្រឆាំង និងជជែកតវ៉ាជាមួយអ្នក ចូរអ្នកងាកទៅរកអ្នកដទៃវិញ។ កុំបណ្តោយឱ្យភាពស្និទ្ធស្នាលមកកំណត់ដែនកំណត់នៃការផ្សព្វផ្សាយរបស់អ្នក។ មានមនុស្សជាច្រើនដែលមិនទាន់បានឮដំណឹងល្អ មានអ្នកដែលត្រៀមខ្លួនរួចរាល់ និងមានអ្នកដែលនៅក្រៅរង្វង់ទំនាក់ទំនងជិតស្និទ្ធរបស់អ្នក ដែលនឹងទទួលយកដំណឹងល្អនៅពេលអ្នកនិយាយ។ ចូរទៅរកពួកគេ។ ចូរចែករំលែកដំណឹងល្អជាមួយអ្នកដែលមានចិត្តបើកចំហ និងមានឆន្ទៈទទួលយក។

ជួនកាល អារក្សសាតាំងប្រើប្រាស់មនុស្សដែលចូលចិត្តប្រឆាំងទាំងនោះ ដើម្បីរំខាន និងទាញចំណាប់អារម្មណ៍របស់អ្នក ដោយធ្វើឱ្យអ្នកជាប់រវល់ជាមួយពួកគេ ខណៈពេលដែលអ្នកផ្សេងទៀតដែលត្រៀមខ្លួនរួចរាល់ ប៉ុន្តែមិនទាន់ទទួលបានដំណឹងល្អនៅឡើយ។ កុំធ្លាក់ក្នុងអន្ទាក់នោះឡើយ។ ចូរឱ្យប្រាជ្ញានាំផ្លូវអ្នក។ ចូរធ្វើកិច្ចការដោយមានគោលបំណងច្បាស់លាស់។ ចូរចាំងពន្លឺនៅកន្លែងដែលអ្នកស្ថិតនៅ ប៉ុន្តែត្រូវទៅកន្លែងដែលព្រះវិញ្ញាណដឹកនាំអ្នក។

ការប្រកាសដោយជំនឿ
ខ្ញុំត្រូវបានដឹកនាំដោយប្រាជ្ញារបស់ព្រះ ដើម្បីទទួលបានលទ្ធផលល្អក្នុងការនាំយកព្រលឹងមនុស្សមកឯព្រះ។ ពន្លឺរបស់ខ្ញុំចាំងនៅគ្រប់ទីកន្លែង ហើយមនុស្សនៅក្នុងពិភពលោករបស់ខ្ញុំបានឃើញជីវិតរបស់ខ្ញុំដែលមានព្រះគ្រីស្ទគង់នៅ ហើយពួកគេលើកតម្កើងព្រះ។ ជីវិតរបស់ខ្ញុំគឺជាទីបន្ទាល់នៃសេចក្តីពិត សិរីល្អ និងសេចក្តីសុចរិតរបស់ព្រះ ហើយតាមរយៈខ្ញុំ មនុស្សជាច្រើនត្រូវបាននាំមកទទួលការសង្គ្រោះនៅថ្ងៃនេះ ខ្ញុំប្រកាសនៅក្នុងនាមព្រះយេស៊ូវគ្រីស្ទ។ អាម៉ែន។

Note: I translated from Rhapsody of Realities. . . a daily devotion on 20th August 2026 by pastor Chris Oyakhilome

ការបើកបង្ហាញនៃសេចក្តីពិត យើងខ្ញុំលះចោលអស់ទាំងការលាក់កំបាំងដែលគួរខ្មាស ឥតប្រព្រឹត្តដោយឧបាយកល ឬបំប្លែងព្រះបន្ទូលឡើយ គឺយើងខ...
20/08/2026

ការបើកបង្ហាញនៃសេចក្តីពិត

យើងខ្ញុំលះចោលអស់ទាំងការលាក់កំបាំងដែលគួរខ្មាស ឥតប្រព្រឹត្តដោយឧបាយកល ឬបំប្លែងព្រះបន្ទូលឡើយ គឺយើងខ្ញុំផ្ទុកផ្តាក់ខ្លួន នឹងបញ្ញាចិត្តរបស់មនុស្សទាំងអស់ នៅចំពោះព្រះ ដោយសំដែងសេចក្ដីពិតវិញ (២កូរិនថូស ៤:២)។

ព្រះគម្ពីរនិយាយអំពីការបើកបង្ហាញ "សេចក្តីពិត”។ ប៉ុន្តែ តើអ្វីជាសេចក្តីពិត? យើងរកឃើញចម្លើយនៅក្នុងព្រះបន្ទូលរបស់ព្រះអម្ចាស់យេស៊ូវនៅក្នុងគម្ពីរយ៉ូហាន ១៧:១៧ "...ឯសេចក្ដីពិត គឺជាព្រះបន្ទូលរបស់ទ្រង់" ព្រះបន្ទូលរបស់ព្រះជាសេចក្តីពិត។ ទោះយ៉ាងណាក៏ដោយ មិនមែនអ្វីៗទាំងអស់ដែលបានដកស្រង់ចេញពីព្រះគម្ពីរ គឺជាព្រះបន្ទូលនៃសេចក្តីពិតទេ។ ដើម្បីបញ្ជាក់ថា នោះជាព្រះបន្ទូលរបស់ព្រះ វាត្រូវតែស្របទៅនឹងគោលលទ្ធិរបស់ព្រះយេស៊ូវគ្រីស្ទ និងសេចក្ដីដែលបានចែងនៅក្នុងដំណឹងល្អ។ ដំណឹងល្អរបស់ព្រះយេស៊ូវគ្រីស្ទ គឺជាការបើកបង្ហាញនូវសេចក្ដីពិតដ៏ទេវភាព។
ក្រៅពីដំណឹងល្អ សេចក្ដីពិតត្រូវបានបិទបាំង ប៉ុន្តែនៅក្នុងដំណឹងល្អវិញ សេចក្ដីពិតត្រូវបានបើកបង្ហាញឲ្យឃើញច្បាស់វិញ។ សេចក្ដីពិតមិនត្រូវបានគេស្គាល់ឡើយ រហូតទាល់តែព្រះអម្ចាស់យេស៊ូវគ្រីស្ទបានលេចមក។ ទ្រង់គឺជាអង្គដែលបើកបង្ហាញផែនការ គោលបំណង ព្រះទ័យ គំនិត និងមតិយោបលរបស់ព្រះ។ ហេតុនេះហើយបានជាលោកប៉ុលប្រើពាក្យថា «បើកបង្ហាញ/សំដែង» ជាភាសាក្រិក៖ Phanerosis។ វា​ជា​ពាក្យ​​ដែល​បាន​ប្រើ​នៅ​ក្នុង ១កូរិនថូស ១២:៧ ថា​៖ «ហើយទ្រង់ប្រទានឲ្យព្រះវិញ្ញាណសំដែងមកក្នុងគ្រប់គ្នា ដើម្បីឲ្យបានកើតផល»។

ការបើកបង្ហាញនៃវិញ្ញាណ គឺជាវិញ្ញាណដែលលេចចេញមកខាងក្រៅ តាមរយៈទិដ្ឋភាពផ្សេងៗរបស់ទ្រង់។ ដូចគ្នានេះផងដែរ ការបើកបង្ហាញនៃសេចក្ដីពិត គឺជាសេចក្តីពិតដែលលេចចេញមកខាងក្រៅ - ពោលគឺជាព្រះបន្ទូលរបស់ព្រះ ដែលស្ថិតនៅក្នុង និងតាមរយៈយើង។ ដើម្បីឱ្យអ្នកអាចរស់នៅ ក្នុងព្រះយេស៊ូគ្រីស្ទបានយ៉ាងប្រាកដ អ្នកចាំបាច់ត្រូវតែមានចំណេះដឹងព្រះបន្ទូលរបស់ទ្រង់ ព្រោះអ្នកមិនអាចសំដែងចេញអ្វីដែលអ្នកមិនដឹងនោះទេ។

អ្នកត្រូវតែស្គាល់សេចក្ដីពិតជាមុនសិន ទើបអាចដើរក្នុងសេចក្ដីពិតបាន ហើយដូចដែលមានចែងក្នុងព្រះគម្ពីរ ៣យ៉ូហាន ១:៤ ថា៖ «គ្មានសេចក្ដីណាដែលនាំឲ្យខ្ញុំអរសប្បាយ លើសជាងសេចក្ដីនេះទេ គឺដែលឮនិយាយថា ពួកកូនខ្ញុំកំពុងតែប្រព្រឹត្តតាមសេចក្ដីពិតនោះឯង»។ នៅពេលដែលអ្នកបានទទួលយកសេចក្ដីពិតរបស់ព្រះចូលទៅក្នុងចិត្តគំនិតរបស់អ្នក សេចក្តីពិតនោះគ្រប់គ្រងផ្នត់គំនិតរបស់អ្នក។ វាបានក្លាយជាវិធីនៃការគិត សម្រួចរបៀបគិត ការមានគំនិតយោបល់របស់អ្នក។ ព្រះបន្ទូលរបស់ព្រះបានជ្រួតជ្រាបចូលទៅក្នុងអត្តចរិករបស់អ្នក ហើយកំពុងតែបង្ហាញចេញមកក្រៅតាមរយៈការប្រព្រឹតរបស់អ្នក។

ដូច្នេះ បំណងព្រះហឫទ័យរបស់ព្រះមិនមែនគ្រាន់តែចង់ឱ្យមាត់របស់អ្នកនិយាយអំពីសេចក្ដីពិតប៉ុណ្ណោះទេ គឺទ្រង់ចង់ឱ្យអ្នករស់នៅដោយអនុត្តន៍តាមសេចក្ដីពិតនោះយ៉ាងពិតប្រាកដ។ នេះគឺជាអ្វីដែលអ្នកមិនត្រូវរស់នៅដោយពឹងផ្អែកលើការសន្មតយកនោះទេ។ ចូរសិក្សាព្រះបន្ទូល ដើម្បីស្គាល់កាន់តែច្បាស់។ ព្រះគម្ពីរចែងថា៖ «ចូរឲ្យយើងបានស្គាល់ព្រះយេហូវ៉ាចុះ ហើយមានព្យាយាមនឹងស្គាល់ទ្រង់តទៅ...» (ហូសេ ៦:៣)។ នេះគឺជាការត្រាស់ហៅរបស់អ្នក៖ ដើម្បីឲ្យបានស្គាល់ និងបង្ហាញសេចក្ដីពិតយ៉ាងច្បាស់លាស់ ប្រកបដោយការជឿជាក់ និងព្រះចេស្តា។ សូមថ្វាយសិរីល្អដល់ព្រះ!

ការអធិស្ឋាន
ឱព្រះវរបិតាអើយ ទូលបង្គំសូមអរព្រះគុណទ្រង់សម្រាប់ដំណឹងល្អនៃព្រះយេស៊ូវគ្រីស្ទ ដែលជាការបើកបង្ហាញនូវសេចក្ដីពិត។ ការយល់ដឹងរបស់ទូលបង្គំត្រូវបានបំភ្លឺដោយព្រះវិញ្ញាណរបស់ទ្រង់ ហើយទូលបង្គំដើរនៅក្នុងពន្លឺនៃព្រះបន្ទូលរបស់ទ្រង់ជានិច្ច។ នៅថ្ងៃនេះ ទូលបង្គំបង្ហាញឱ្យឃើញនូវសេចក្ដីពិត ព្រមទាំងបង្ហាញពីសេចក្ដីសុចរិត និងសិរីល្អរបស់ទ្រង់ នៅក្នុងនាមព្រះយេស៊ូវគ្រីស្ទ។ អាម៉ែន។

Note: I translated from Rhapsody of Realities. . . a daily devotion on 19th August 2026 by pastor Chris Oyakhilome

សេចក្ដីសុចរិតរបស់ព្រះដោយសារសេចក្ដីជំនឿ ដ្បិតព្រះគ្រីស្ទជាចុងបំផុតនៃក្រិត្យវិន័យ សំរាប់ជាសេចក្ដីសុចរិតដល់អស់អ្នកណាដែលជឿ (...
18/08/2026

សេចក្ដីសុចរិតរបស់ព្រះដោយសារសេចក្ដីជំនឿ

ដ្បិតព្រះគ្រីស្ទជាចុងបំផុតនៃក្រិត្យវិន័យ សំរាប់ជាសេចក្ដីសុចរិតដល់អស់អ្នកណាដែលជឿ (រ៉ូម ១០:៤)។

មានសេចក្ដីពិតដ៏សំខាន់មួយដែលអ្នកត្រូវយល់អំពីសុចរិតភាព៖ វាទទួលបានមកដោយសារការជំនឿ មិនមែនដោយសារការប្រព្រឹត្តនោះទេ។ ព្រះគម្ពីរបានបង្ហាញពីភាពខុសគ្នានេះយ៉ាងច្បាស់នៅក្នុងគម្ពីរ រ៉ូម ៩:៣០-៣២។ ពួកសាសន៍ដទៃបានទទួលសុចរិតភាព ដោយសារពួកគេបានទទួលវាដោយជំនឿ។ ប៉ុន្តែសាសន៍អ៊ីស្រាអែល ដែលព្យាយាមស្វែងរកវាតាមរយៈក្រឹត្យវិន័យ មិនបានទទួលវាឡើយ ព្រោះពួកគេស្វែងរកវាដោយសារការប្រព្រឹត្ត។

ព្រះគម្ពីរចែងយ៉ាងច្បាស់ថា គ្មាននរណាម្នាក់អាចត្រូវបានរាប់ជាសុចរិតដោយសារការប្រព្រឹត្តតាមក្រឹត្យវិន័យឡើយ៖ «យើងដឹងថា មនុស្សមិនបានរាប់ជាសុចរិត ដោយប្រព្រឹត្តតាមក្រិត្យវិន័យនោះឡើយ គឺដោយសេចក្ដីជំនឿ ជឿដល់ព្រះយេស៊ូវគ្រីស្ទវិញ… ពីព្រោះគ្មានមនុស្សណាបានរាប់ជាសុចរិតដោយប្រព្រឹត្តតាមក្រិត្យវិន័យឡើយ» (កាឡាទី ២:១៦)។ ម្យ៉ាងទៀត គម្ពីរ រ៉ូម ៣:២១-២២ ចែងថា៖ «ប៉ុន្តែឥឡូវនេះ សេចក្ដីសុចរិតផងព្រះ ដែលមានទាំងក្រិត្យវិន័យនិងពួកហោរាធ្វើបន្ទាល់ឲ្យផង នោះបានលេចចេញមកហើយ គឺជាសេចក្ដីសុចរិតរបស់ព្រះ ដែលបានដោយសារសេចក្ដីជំនឿ ជឿដល់ព្រះយេស៊ូវគ្រីស្ទ ក៏សំរាប់គ្រប់អស់អ្នកណាដែលជឿផង…»។

សាសន៍អ៊ីស្រាអែលបានព្យាយាមបង្កើតសុចរិតភាពផ្ទាល់ខ្លួនរបស់ពួកគេ តាមរយៈក្រឹត្យវិន័យ ហើយវាបានបរាជ័យ៖ «ដោយពួកគេ ពុំស្គាល់របៀបដែលព្រះ‌ជា‌ម្ចាស់ប្រោសមនុស្សលោកឲ្យសុចរិត ពួកគេ ខំប្រឹងធ្វើឲ្យខ្លួនសុចរិតដោយខ្លួនគេផ្ទាល់ គឺពុំព្រមទទួលរបៀបដែលព្រះ‌ជា‌ម្ចាស់ប្រោសមនុស្សឲ្យសុចរិតនេះទេ» (រ៉ូម ១០:៣ KSV2005)។

ព្រះគម្ពីរចែងថា ពួកគេមានចិត្តខ្នះខ្នែងចំពោះព្រះ ប៉ុន្តែមិនមែនដោយយោងតាមចំណេះដឹងត្រឹមត្រូវនោះទេ។ សភាពការណ៍នេះនៅតែបន្តកើតមានរហូតមកដល់សព្វថ្ងៃ។ មនុស្សជាច្រើនមានចិត្តខ្នះខ្នែង មានចំណង់ខ្លាំងក្លា និងមានចិត្តស្មោះត្រង់ក្នុងការស្វែងរកសេចក្ដីសុចរិត។ ពួកគេខិតខំប្រឹងប្រែង ដើម្បីទទួលបានអ្វី ដែលព្រះបានប្រទានឱ្យដោយឥតគិតថ្លៃរួចទៅហើយ។ ប៉ុន្តែ ពួកគេភ្លេចចំណុចសំខាន់គឺការចុះចូល ឬការទទួលយកសេចក្ដីសុចរិតរបស់ព្រះ ដែលកើតឡើងតាមរយៈជំនឿលើព្រះយេស៊ូវគ្រីស្ទ។
សេចក្ដីសុចរិតរបស់ព្រះគឺជាអំណោយទានដែលអ្នកទទួលបាន មិនមែនជាអ្វីដែលអ្នកត្រូវខំប្រឹងធ្វើដើម្បីទទួលបាននោះទេ៖ «...ពួកអ្នកដែលទទួលព្រះគុណដ៏បរិបូរ នឹងអំណោយទានជាសេចក្ដីសុចរិត នោះនឹងបានសោយរាជ្យក្នុងជីវិតលើសទៅទៀត ដោយសារតែម្នាក់ដែរ គឺជាព្រះយេស៊ូវគ្រីស្ទ» (រ៉ូម ៥:១៧)។ គម្ពីរ ២កូរិនថូស ៥:២១ ចែងថា៖ «ដ្បិតឯព្រះអង្គ ដែលមិនបានស្គាល់បាបសោះ នោះព្រះទ្រង់បានធ្វើឲ្យត្រឡប់ជាតួបាប ជំនួសយើងរាល់គ្នាវិញ ដើម្បីឲ្យយើងរាល់គ្នាបានត្រឡប់ទៅជាសេចក្ដីសុចរិតរបស់ព្រះ ដោយនូវព្រះអង្គនោះឯង»។

កុំព្យាយាមបង្កើតសេចក្ដីសុចរិតផ្ទាល់ខ្លួន តាមរយៈការប្រព្រឹត្តឡើយ។ ចូរទទួលយកអ្វីដែលព្រះបានប្រទានដល់អ្នកនៅក្នុងព្រះគ្រីស្ទ។ នៅក្នុងសំបុត្រ ភីលីព ៣:៩ សាវ័កប៉ុល ត្រូវបាននាំដោយវិញ្ញាណរបស់ព្រះ បានថ្លែងនូវពាក្យដ៏អស្ចារ្យនេះថា៖ «ហើយឲ្យគេបានឃើញខ្ញុំនៅក្នុងទ្រង់ ដោយសេចក្ដីសុចរិតដែលមកពីសេចក្ដីជំនឿដល់ព្រះគ្រីស្ទ មិនមែនដោយសេចក្ដីសុចរិតរបស់ខ្លួនខ្ញុំ ដែលមកពីក្រិត្យវិន័យនោះទេ គឺជាសេចក្ដីសុចរិតដែលមកពីព្រះ ដោយសេចក្ដីជំនឿវិញ»។ អាលេលូយ៉ា!

អធិស្ឋានប្រកាសសេចក្តីជំនឿ
ខ្ញុំជាសេចក្ដីសុចរិតរបស់ព្រះនៅក្នុងព្រះគ្រីស្ទយេស៊ូវ ហើយខ្ញុំរស់នៅដោយដឹងច្បាស់អំពីស្ថានភាពដ៏ត្រឹមត្រូវរបស់ខ្ញុំចំពោះព្រះ ទាំងមានចិត្តក្លាហាន ជឿជាក់ និងទទួលបានជ័យជម្នះ។ ខ្ញុំគ្រប់គ្រងជីវិតតាមរយៈព្រះយេស៊ូវគ្រីស្ទ ដោយបង្ហាញចេញពីប្រាជ្ញា សិរីរុងរឿង និងសេចក្ដីពិតរបស់ទ្រង់។ ខ្ញុំប្រកាសនៅក្នុងនាមព្រះយេស៊ូវគ្រីស្ទ។ អាម៉ែន។

Note: I translated from Rhapsody of Realities. . . a daily devotion on 18th August 2026 by pastor Chris Oyakhilome

17/08/2026

រៀនពីព័ន្ធកិច្ចព្រះវិញ្ញាណ

កាលណាព្រះអង្គនោះ គឺជាព្រះវិញ្ញាណនៃសេចក្ដីពិតបានមកដល់ នោះទ្រង់នឹងនាំអ្នករាល់គ្នាចូលក្នុងគ្រប់ទាំងសេចក្ដីពិត... (យ៉ូហាន ១៦:១៣)។

មានរឿងសំខាន់មួយដែលអ្នកត្រូវយល់នៅក្នុងដំណើរជីវិតរបស់អ្នកជាមួយព្រះ៖ ការទទួលព្រះវិញ្ញាណបរិសុទ្ធ មិនមែនមានន័យថា អ្នកយល់ដឹងអំពីកិច្ចការរបស់ទ្រង់ ដោយស្វ័យប្រវត្តិនោះទេ។ ព្រះវិញ្ញាណបរិសុទ្ធត្រូវបានប្រទានមកដើម្បីដឹកនាំ និងណែនាំអ្នកឱ្យយល់ដឹងទាំងស្រុងអំពីសេចក្ដីពិតព្រមទាំងជួយអ្នកឱ្យសម្រេចបានគោលបំណងដែលព្រះអម្ចាស់បានកំណត់សម្រាប់ជីវិតរបស់អ្នក។ ប៉ុន្តែ អ្នកត្រូវតែចុះចូលចំពោះទ្រង់ និងសិក្សាព្រះបន្ទូល ដើម្បីស្វែងយល់អំពីកិច្ចការរបស់ទ្រង់នៅក្នុងជីវិតរបស់អ្នក។

បើគ្មានព្រះវិញ្ញាណបរិសុទ្ធទេ ព្រះគម្ពីរនៅតែជាអ្វីដែលមិនទាន់ត្រូវបានបើកបង្ហាញឱ្យយល់ច្បាស់ ប៉ុន្តែតាមរយៈកិច្ចការរបស់ព្រះវិញ្ញាណ អ្នកទទួលបានការយល់ដឹង និងអាចយល់ច្បាស់អំពីព្រះហឫទ័យដ៏ល្អឥតខ្ចោះរបស់ព្រះ។ រឿងនេះត្រូវបានបង្ហាញយ៉ាងច្បាស់នៅក្នុងពួកជំនុំសម័យដើម។ មុនពេលព្រះវិញ្ញាណបរិសុទ្ធយាងមកដល់ ការយល់ដឹងរបស់ពួកគេអំពីព្រះគម្ពីរត្រូវបានកំណត់ដោយប្រពៃណី និង ហេតុផលរបស់ជនជាតិយូដា។ ប៉ុន្តែ បន្ទាប់ពីពួកគេបានទទួលព្រះវិញ្ញាណបរិសុទ្ធ ពួកគេបានចាប់ផ្តើមរៀនសូត្រ និងយល់អំពីព្រះគម្ពីរតាមរបៀបថ្មីមួយ។

ទោះជាយ៉ាងណាក៏ដោយ ការយល់ដឹងរបស់ពួកគេមានលក្ខណៈរីកចម្រើនជាលំដាប់។ ឧទាហរណ៍ នៅដំបូងឡើយ ការបញ្ចូលសាសន៍ដទៃឱ្យទទួលបានសេចក្ដីសង្គ្រោះដែរ នោះជារឿងមិនច្បាស់លាស់សំរាប់ពួកគេ។ នៅពេលដែលសាវ័កពេត្រុសបានទៅផ្ទះរបស់លោកកូនេលាស ដែលជានាយទាហានរ៉ូម៉ាំង មានការខ្វែងគំនិតគ្នាកើតឡើង។ ពួកគេបានសួរសំនួរដេញដោលគាត់អំពីការដែលគាត់បានទៅទីនោះ។ នេះបង្ហាញថា ការយល់ដឹងរបស់ពួកគេនៅមានកម្រិត ទោះបីជាពួកគេបានទទួលព្រះវិញ្ញាណបរិសុទ្ធរួចហើយក៏ដោយ។

តាមរយៈកិច្ចបម្រើរបស់សាវ័កប៉ុល ទើបការបើកសម្ដែងអំពីការផ្សាយដំណឹងល្អទៅកាន់ពិភពលោកទាំងមូលបានក្លាយជាការច្បាស់លាស់។ លោកបាននាំមកនូវការយល់ដឹងថា សេចក្ដីសង្គ្រោះគឺសម្រាប់មនុស្សទាំងអស់ ដោយលាតសន្ធឹងទៅដល់ចុងបំផុតនៃផែនដី ដូចដែលព្រះអម្ចាស់បានមានបន្ទូល។ អាថ៌កំបាំងដែលថា ពួកសាសន៍ដទៃត្រូវបានរួមបញ្ចូលនៅក្នុងដំណឹងល្អនៃសេចក្ដីសង្គ្រោះរបស់ព្រះគ្រីស្ទ ដែលបានបើកបង្ហាញដល់គាត់តាមរយៈការបើកសម្ដែងពីព្រះ។

ព្រះវិញ្ញាណបរិសុទ្ធគឺជាគ្រូរបស់អ្នក នៅពេលអ្នកសិក្សា ទ្រង់បើកភ្នែករបស់អ្នក ពង្រីកការយល់ដឹងរបស់អ្នក និងនាំអ្នកឱ្យយល់កាន់តែស៊ីជម្រៅអំពីសេចក្ដីពិតរបស់ព្រះ។

ការអធិស្ឋាន
ឱព្រះវរបិតាអើយ ទូលបង្គំសូមអរព្រះគុណទ្រង់សម្រាប់ព្រះវិញ្ញាណបរិសុទ្ធ ដែលបង្រៀន និងដឹកនាំទូលបង្គំទៅរកសេចក្ដីពិតទាំងស្រុង។ នៅពេលទូលបង្គំសិក្សាព្រះបន្ទូលរបស់ទ្រង់កាន់តែច្រើន ការយល់ដឹងរបស់ទូលបង្គំក៏កាន់តែភ្លឺស្វាងឡើង។ ទូលបង្គំរីកចម្រើនក្នុងប្រាជ្ញា និងការបើកសម្ដែង ហើយរស់នៅស្របតាមគោលបំណងដ៏ពេញលេញរបស់ទ្រង់សម្រាប់ជីវិតរបស់ទូលបង្គំ។ ទូលបង្គំអធិស្ឋាននៅក្នុងនាមព្រះយេស៊ូវគ្រីស្ទ។ អាម៉ែន។

Note: I translated from Rhapsody of Realities. . . a daily devotion on 17th August 2026 by pastor Chris Oyakhilome

បណ្ណាល័យគំនិត ព្រះយេស៊ូវទ្រង់ជ្រាបពីគំនិតរបស់គេ ក៏មានបន្ទូលថា៖ «ហេតុអ្វីបានជាអ្នករាល់គ្នាមានគំនិតអាក្រក់ក្នុងចិត្តដូច្នេ...
17/08/2026

បណ្ណាល័យគំនិត

ព្រះយេស៊ូវទ្រង់ជ្រាបពីគំនិតរបស់គេ ក៏មានបន្ទូលថា៖ «ហេតុអ្វីបានជាអ្នករាល់គ្នាមានគំនិតអាក្រក់ក្នុងចិត្តដូច្នេះ» (ម៉ាថាយ ៩:៤)។

តើអ្នកដឹងទេថា យើងមានការទទួលខុសត្រូវចំពោះវាសនារបស់យើង ច្រើនជាងអ្វីដែលមនុស្សភាគច្រើនបានដឹងទៅទៀត? អ្វីដែលកើតឡើងនៅក្នុងជីវិតរបស់អ្នក គឺពាក់ព័ន្ធយ៉ាងខ្លាំងទៅនឹងខ្លួនអ្នក—ការសម្រេចចិត្តរបស់អ្នក ពាក្យសម្តីរបស់អ្នក គំនិតរបស់អ្នក និងរចនាសម្ព័ន្ធនៃគំនិតរបស់អ្នក។ ជីវិតរបស់អ្នកនឹងក្លាយទៅជាយ៉ាងណានោះ គឺភាគច្រើនអាស្រ័យលើការបង្កើតឡើងដោយគំនិតរបស់អ្នក។

ព្រះអម្ចាស់យេស៊ូវបានសួរនូវសំណួរដ៏គួរឱ្យចាប់អារម្មណ៍មួយនៅក្នុងបទគម្ពីរខាងលើថា៖ «ហេតុអ្វីបានជាអ្នកគិតបែបនេះ?» សំណួរនោះគឺសំដៅទៅលើឫសគល់នៃបញ្ហាប្រឈមរបស់មនុស្សជាច្រើន។ ហេតុផលរបស់ពួកគេគឺជាដើមហេតុដែលនាំឱ្យពួកគេបរាជ័យ។ អ្នកគិតបែបនេះគឺដោយសារតែព័ត៌មានដែលអ្នកទទួលបានតាមរយៈបទពិសោធន៍កន្លងមក។ នោះគឺជាបណ្ណាល័យក្នុងគំនិតរបស់អ្នក ពោលគឺប្រៀបដូចជា «សៀវភៅ» ដែលដាក់តម្រៀបនៅលើធ្នើរនៃគំនិតរបស់អ្នក។

គំនិតដែលអ្នកបានទទួលយក អ្វីៗដែលអ្នកបានស្តាប់ និងគំនិតយោបល់ដែលអ្នកបានទទួលយក គឺជាអ្វីដែលបានបង្កើតរូបរាងជីវិតរបស់អ្នក។ អ្នកគឺជាលទ្ធផលនៃព័ត៌មានដែលអ្នកបានទទួលយកចូលទៅក្នុងខ្លួន។ អ្នកមិនអាចគិតហួសពីអ្វីដែលអ្នកបានស្តាប់ និងរំពឹងគិតជាប្រចាំនោះទេ។ នេះហើយជាមូលហេតុដែលការសញ្ជឹងគិតលើព្រះបន្ទូល គឺមានសារៈសំខាន់បំផុតសម្រាប់គ្រីស្ទបរិស័ទគ្រប់រូប។ ក្រៅពីការធ្វើឱ្យចិត្តគំនិតរបស់អ្នកកាន់តែប្រសើរឡើង និងត្រូវបានលើកកម្ពស់នោះ វាថែមទាំងនាំមកនូវភាពរុងរឿង និងជោគជ័យដ៏ល្អប្រសើរ ដែលមិនអាចប្រកែកបាន និងគ្មានទីបញ្ចប់ទៀតផង (សូមអាន យ៉ូស្វេ ១:៨ AMPC និង ១ ធីម៉ូថេ ៤:១៥ AMPC)។

មនុស្សមួយចំនួននិយាយថា ពួកគេស្តាប់ព្រះបន្ទូល ប៉ុន្តែដោយសារខ្វះការសញ្ជឹងគិត ពួកគេធ្វើឱ្យឥទ្ធិពលនៃព្រះបន្ទូលនោះបាត់បង់ទៅវិញ ដោយសារតែគំនិត និងឥទ្ធិពលផ្សេងៗដែលផ្ទុយពីព្រះបន្ទូល។ ព្រះយេស៊ូវគ្រីស្ទបានមានបន្ទូលថា មនុស្សធ្វើឱ្យព្រះបន្ទូលរបស់ព្រះគ្មានប្រសិទ្ធភាពតាមរយៈទំនៀមទម្លាប់របស់ពួកគេ (ម៉ាកុស ៧:១៣) ពោលគឺជំនឿ និងគំនិតដែលទទួលបានពីសង្គម ការចិញ្ចឹមបីបាច់ និងបរិស្ថានជុំវិញខ្លួន។ ប៉ុន្តែ ការសញ្ជឹងគិតជួយកែសម្រួល និងធ្វើឱ្យចិត្តគំនិតរបស់អ្នកមានភាពស៊ីសង្វាក់គ្នាជាមួយព្រះបន្ទូល។

ដូច្នេះ ចូរយកចិត្តទុកដាក់ និងជ្រើសរើសដោយប្រុងប្រយ័ត្ននូវអ្វីដែលអ្នកអនុញ្ញាតឱ្យចូលមកក្នុងគំនិត ឬឃ្លាំងនៃគំនិតរបស់អ្នក។ អ្នកគឺជាអ្វីដែលឆ្លុះបញ្ចាំងពីគំនិតរបស់អ្នក៖ សុភាសិត ២៣:៧ ចែងថា «ដ្បិតគេគិតក្នុងចិត្តយ៉ាងណា គេក៏យ៉ាងនោះដែរ...»។ ហេតុនេះ ចូរបំពេញចិត្តរបស់អ្នកដោយព្រះបន្ទូល រហូតទាល់តែវាក្លាយជាកម្លាំងដ៏សំខាន់បំផុតក្នុងការគិតរបស់អ្នក។ ចូរអនុញ្ញាតឱ្យព្រះបន្ទូលនោះកំណត់របៀបនៃការគិត ការឆ្លើយតប និងទស្សនៈរបស់អ្នកចំពោះពិភពលោក។ កុំទុកចិត្តគំនិតរបស់អ្នកឱ្យស្ថិតនៅតាមយថាហេតុឡើយ ចូរពង្រឹងវាដោយព្រះបន្ទូល។

ការអធិស្ឋាន
ឱព្រះវរបិតាអើយ ទូលបង្គំសូមអរព្រះគុណទ្រង់សម្រាប់ព្រះបន្ទូលរបស់ទ្រង់ ដែលធ្វើឱ្យគំនិតរបស់ទូលបង្គំថ្មីឡើងវិញ និងកែប្រែជីវិតរបស់ទូលបង្គំ។ ទូលបង្គំថែរក្សាគំនិតរបស់ខ្លួន និងលះបង់ខ្លួនឯងចំពោះព្រះបន្ទូល ដោយអនុញ្ញាតឱ្យវាគ្រប់គ្រងគំនិត និងដឹកនាំការសម្រេចចិត្តរបស់ទូលបង្គំ។ ទូលបង្គំបដិសេធរាល់ឥទ្ធិពលទាំងឡាយណាដែលផ្ទុយពីសេចក្ដីពិតរបស់ទ្រង់។ ទូលបង្គំនឹងដើរក្នុងផ្លូវប្រកបដោយប្រាជ្ញា ហើយជីវិតរបស់ទូលបង្គំនឹងបង្កើតបានជាលទ្ធផលដែលលើកតម្កើងព្រះនាមទ្រង់។ ទូលបង្គំអធិស្ឋាននៅក្នុងនាមព្រះយេស៊ូវគ្រីស្ទ។ អាម៉ែន។

Note: I translated from Rhapsody of Realities. . . a daily devotion on 16th August 2026 by pastor Chris Oyakhilome

បង្ហាញភស្តុតាង៖ ជីវិតនៅក្នុងអ្នក តែឯអ្នក ចូរឲ្យមានគំនិតនឹងធឹង ក្នុងគ្រប់ការទាំងអស់វិញ ចូរទ្រាំទ្រនឹងសេចក្ដីលំបាក ចូរឲ្យអ...
16/08/2026

បង្ហាញភស្តុតាង៖ ជីវិតនៅក្នុងអ្នក

តែឯអ្នក ចូរឲ្យមានគំនិតនឹងធឹង ក្នុងគ្រប់ការទាំងអស់វិញ ចូរទ្រាំទ្រនឹងសេចក្ដីលំបាក ចូរឲ្យអ្នកធ្វើការជាគ្រូផ្សាយដំណឹងល្អចុះ ព្រមទាំងបំពេញការងាររបស់ខ្លួនគ្រប់ជំពូកផង (២ធីម៉ូថេ ៤:៥)។

តាមរយៈព្រះវិញ្ញាណនៅ១ធីម៉ូថេ៦:១២សាវ័កប៉ុលបានផ្តល់ការដាស់តឿនដ៏ចាំបាច់បំផុតមួយថា “ចូរខំប្រឹងតស៊ូ ដោយការតយ៉ាងល្អនៃសេចក្ដីជំនឿ ចូរតោងចាប់ជីវិតអស់កល្បជានិច្ចឲ្យខ្ជាប់....”

ផ្ទុយទៅវិញ ទ្រង់ចង់ឱ្យជីវិតនោះលេចចេញជារូបរាងនៅក្នុង និងតាមរយៈអ្នក។ ទ្រង់ចង់ឱ្យអ្នកបង្ហាញឱ្យឃើញយ៉ាងច្បាស់នូវជីវិតដ៏ទេវភាពដែលមាននៅក្នុងខ្លួនអ្នក។ ចូរធ្វើឱ្យវាលេចចេញជាភស្តុតាង។ ចូរបង្ហាញវាឱ្យឃើញ។ ចូរឱ្យគេមើលឃើញវានៅក្នុងជីវិតរបស់អ្នក។ ជីវិតដែលអ្នកបានទទួលនៅក្នុងព្រះគ្រីស្ទមិនមែនជាជីវិតដែលនៅស្ងៀម ឬអសកម្មនោះទេ ប៉ុន្តែវាឆ្លើយតបទៅនឹងការយល់ដឹង និងការចូលរួមរបស់អ្នក។

ភីលេម៉ូន១.៦បានលើកទ្បើងថា «ខ្ញុំសូមឲ្យសេចក្ដីប្រកបនៃសេចក្ដីជំនឿរបស់អ្នក បានកើតការឡើង ឲ្យបានយល់ព្រមតាមគ្រប់ទាំងការល្អ ដែលនៅក្នុងខ្លួនយើង សំរាប់ព្រះគ្រីស្ទយេស៊ូវ»។ ចូររំលឹកខ្លួនឯងជាញឹកញាប់ថា ជីវិតរបស់ព្រះគឺស្ថិតនៅក្នុងអ្នក។ ការមានស្មារតី ឬការជឿជាក់យ៉ាងមុតមាំរបស់អ្នកលើរឿងនេះ បង្កើតឱ្យមានភាពក្លាហាន។ ភាពក្លាហានក្នុងការជាន់លើពស់ និងសត្វខ្យាដំរី ព្រមទាំងលើអំណាចទាំងអស់របស់ខ្មាំងសត្រូវ ដោយដឹងថាគ្មានអ្វីអាចធ្វើឱ្យអ្នករងគ្រោះថ្នាក់បានឡើយ ដូចដែលព្រះគម្ពីរបានចែង។ ពាក្យសម្ដី សកម្មភាព និងការឆ្លើយតបរបស់អ្នក ក្លាយជាភស្តុតាងបញ្ជាក់ថា ជីវិតដែលមាននៅក្នុងខ្លួនអ្នក គឺជាការពិត។

ព្រះអម្ចាស់យេស៊ូវបានមានបន្ទូលថា៖ «ទីសំគាល់ទាំងនេះនឹងជាប់តាមអស់អ្នកដែលជឿ គឺថា គេនឹងដេញអារក្សដោយនូវឈ្មោះខ្ញុំ ហើយនឹងចេះនិយាយភាសាថ្មី នឹងចាប់កាន់ពស់បាន ឬបើគេផឹកអ្វីពុល នោះមិនធ្វើឲ្យអន្តរាយទេ ហើយគេនឹងដាក់ដៃលើមនុស្សជំងឺឲ្យបានជាផង» (ម៉ាកុស ១៦:១៧-១៨)។ ទាំងនេះគឺជាភស្តុតាង ឬជាទីសម្គាល់មួយចំនួនដែលកើតឡើងជាមួយអ្នកដែលមានជីវិតអស់កល្បជានិច្ច។

យើងជាអ្នកឈ្នះនៅក្នុងព្រះគ្រីស្ទយេស៊ូវ ដោយទទួលបានជ័យជម្នះជានិច្ច ក្នុងគ្រប់រឿងរ៉ាវទាំងអស់ និងគ្រប់ទីកន្លែង។ ជីវិតដែលមាននៅក្នុងខ្លួនអ្នក នាំមកនូវការប្រោសឱ្យជា ការរំដោះ និងការផ្លាស់ប្តូរជីវិតដល់អស់អ្នកដែលត្រូវការ។ នៅពេលអ្នកនិយាយ អ្វីៗក៏ប្រែប្រួល។ នៅពេលអ្នកធ្វើសកម្មភាព ជីវិតដ៏ទេវភាពក៏ត្រូវបានបង្ហាញឱ្យឃើញ។ នេះគឺជាការត្រាស់ហៅរបស់អ្នក៖ គឺការបង្ហាញជីវិតរបស់ព្រះ ឱ្យបានច្បាស់លាស់ រហូតដល់គ្មាននរណាម្នាក់អាចបដិសេធបានឡើយ។ ហើយនៅពេលអ្នកធ្វើដូច្នេះ ជីវិតរបស់អ្នកនឹងក្លាយជាទីបន្ទាល់នៃព្រះចេស្តា និស្ស័យធម្មជាតិរបស់ទ្រង់ និងសិរីល្អរបស់ទ្រង់។ អាលេលូយ៉ា!

ការអធិស្ឋាន
ឱព្រះវរបិតាអើយ ទូលបង្គំសូមអរព្រះគុណទ្រង់សម្រាប់អំណោយទាននៃជីវិតអស់កល្បជានិច្ច ដែលមាននៅក្នុងទូលបង្គំ។ នៅថ្ងៃនេះ ទូលបង្គំបង្ហាញឲ្យឃើញយ៉ាងច្បាស់នូវជីវិតនេះ ដោយបង្ហាញពីនិស្ស័យធម្មជាតិរបស់ទ្រង់ បង្ហាញពីព្រះចេស្ដារបស់ទ្រង់ និងដើរដោយមានអំណាចគ្រប់គ្រងលើបញ្ហានានា។ ជីវិតរបស់ទូលបង្គំគឺជាទីបន្ទាល់នៃសិរីល្អ និងសេចក្ដីសុចរិតរបស់ទ្រង់។ ទូលបង្គំអធិស្ឋាននៅក្នុងនាមព្រះយេស៊ូវគ្រីស្ទ។ អាម៉ែន។

Note: I translated from Rhapsody of Realities. . . a daily devotion on 15th August 2026 by pastor Chris Oyakhilome

Address

Prey Toteng Village Otaki Commune Thmor Koul District Battambang Province
Battambang

Website

Alerts

Be the first to know and let us send you an email when Seed of Faith Church Ministries posts news and promotions. Your email address will not be used for any other purpose, and you can unsubscribe at any time.

Shortcuts

Share

Category