Մխիթարեան Մայրավանք Սուրբ Ղազար - Monastero Armeno Mechitarista San Lazzaro

28/05/2026

ՕՐՀՆԷ՛ ՏԷՐ ՀԱՅ ԺՈՂՈՎՈՒՐԴԸ

Օրհնէ՛ Տէր Աստուած, մեր սիրելի ժողովուրդը, որ առաջին քրիստոնեայ ազգը եղաւ եւ քու Որդիիդ ետեւէն քալեց դարերու ընթացքին:
Տուաւ մարդկութեան ու սուրբ Եկեղեցիիդ, մեծամեծ հայրապետներ, ճգնասուն վանականներ, մարտիրոսներ ու զօրականներ, որոնք ապրեցան աստուածային սիրովդ ու մեռան սրբութեամբ:
Օրհնէ՛ Տէր մեր Հայրենիքը, եւ տուր որ օրէ օր աւելի զարգանայ նիւթական եւ գիտական ասպարէզներու մէջ, բայց մանաւանդ հոն աճի եւ ծաւալի Քրիստոսի Աւետարանին լոյսը: Տուր որ մեր եղբայրներն ու քոյրերը նմանին հին դարերու մեր հաւատացեալ ժողովուրդին ու կանգնեն տաճարներ ու մատուռներ:
Օրհնէ՛ Տէր աշխարհի չորս ծագերուն ցրուած մեր հայրենակիցները, մանաւանդ անոնց զաւակները եւ շնորհէ որ ապրին երջանիկ ու լի քու շնորհքներովդ: Օրհնէ մեր կայտառ երիտասարդները եւ կոյսերը, որ ըլլան իմաստուն, բարեպաշտ ու մաքուր բարքերով:
Օրհնէ՛ Տէր մեր բոլոր կրօնաւորները, Կաթողիկոսներէն սկսեալ, մինչեւ ամենահամեստ աբեղան ու քահանան եւ տուր որ մնան իրենց կարգի բարձրութեան վրայ եւ հովուեն Հայ ժողովուրդը սրբութեամբ ու եռանդուն հոգիով:
Օրհնէ՛ Տէր մեր բոլոր ղեկավարները եւ ազգին առաջնորդները. Տուր մեր ազգին իմաստո'ւն, աստուածավախ եւ հայրենանուէր կառավարիչներ որ կանգուն եւ ապահով պահեն մեր հայրենի երկիրը ու կերտեն մեր ժողովուրդի բարօր ու երջանիկ ապագան:
Տո՛ւր Տէր որ հասնինք մեր ազգային արդար երազներուն: Տիրանանք մեր հայրենի հողերուն եւ իրաւունքներուն եւ ցոյց տանք աշխարհի որ Աստուած կը սիրէ առաջին քրիստոնեայ Հայ ժողովուրդը: Ցոյց տանք բոլորին թէ արդարութիւնը ուշ կամ կանուխ կը յաղթանակէ:
Տո՛ւր Տէր որ աշխարհի բոլոր Հայերը, Հայրենիքի, թէ Սփիւռքի մէջ, ապրին միաբան ու համերաշխ եւ անկեղծ սիրով:
Այս բոլորը կը խնդրենք Տէր, Քրիստոսի չարչարանքներուն ու Խաչին անունով, որոնց կը միացնենք մեր բիւրաւոր Նահատակներու արեան ձայնը: Մեր Ցեղասպանութեան Մարտիրոսներու բարեխօսութեամբ, որ սուրբերու դասին բարձրացան, կը խնդրենք Տէր, օրհնէ մեր փառապանծ ժողովուրդը եւ դրախտավայր Հայաստանը: Ամէն

27/05/2026

ՄԽԻԹԱՐԵԱՆ ՄԻԱԲԱՆՈՒԹԻՒՆԸ ԿԸ ՆՇԷ ՀԱՅՐ ԱՐԻՍՏԱԿԷՍ ՎՐԴ. ՄԱՆՈՒԿԵԱՆԻ ՁԵՌՆԱԴՐՈՒԹԵԱՆ 70-ԱՄԵԱԿԸ ԵՒ 99-ՐԴ ՏԱՐԵԴԱՐՁԸ

Կիրակի, Մայիս 24-ին` Հոգեգալստեան տօնին, Մխիթարեան Միաբանութիւնը Սուրբ Ղազարի Մայրավանքին մէջ նշեց իր աւագ միաբան՝ Արիստակէս Վրդ. Մանուկեանի 99-րդ տարեդարձը եւ իր ձեռնադրութեան 70-ամեակը, տօն մը, որ իր մէջ կ՚ընդգրկէր Եկեղեցւոյ եւ մեր ազգին նուիրումով իմաստաւորուած դար մը կեանք, որուն ընթացքին, իբրեւ քահանայ, դաստիարակ եւ իր ժողովուրդի հովիւ, խոր հոգեկան դրոշմ ու վառ յիշատակներ թողած է բոլոր գաղութներուն մէջ, ուր ծառայած է։
Հայր Արիստակէս ծնած է Ճարապլուս (Սուրիա), 1927-ին, ծագումով սասունցի եւ մարաշցի Մեծ Եղեռնի վերապրող ծնողքի զաւակ։ Սուրբ Ղազար մտաւ 1947-ին (առաջին կոչումը համաշխարհային երկրորդ պատերազմէն ետք) եւ 1956-ին ձեռնադրուեցաւ աբեղայ, երբ սկիզբ առաւ իր բեղուն կղերական գործունէութիւնը, Աղեքսանդրիա, Սուրիա, Լիբանան, Հայաստսն եւ հուսկ Վենետիկ, նոյն բացառիկ կենսունակութեամբ, որու ծանօթ են իր միաբան եղբայրները եւ Վենետիկի գաղութի հաւատացեալները եւ որու վրայ վկայ եղան անգամ մը եւս Հոգեգալստեան Կիրակին, երբ Հայր Արիստակէս Սուրբ Պատարագ մատուցեց։
«Խաչակիր ժողովուրդ եղած ենք», ըսաւ իր քարոզին մէջ։ «Եւ մենք հաւատացած ենք… Միշտ ջարդուած, միշտ հալածուած… բայց ուր ալ երթաս, օտար երկրի մէջ, հայերը ի՞նչ կ՚ընեն՝ եկեղեցին, դպրոց մը, հոգեւորական մը, որ այդ պզտիկներուն հայերէն սորվեցնէ, խաչ հանել սորվեցնէ»։
Ու աւելցուց. «Այս է մեր պատմութիւնը, որուն համար օրհնուած ենք»։ Քարոզը եզրափակելով, ըսաւ. «Մի՛ վախնաք, հայերս օրհնուած ենք՝ այո՛, խաչուած, բայց յարութիւն կ՚առնեն»։
Սուրբ Պատարագէն վերջ, Մխիթարեան վարդապետները ներկաներուն հիւրընկալեցին սեղանատան մէջ, ուր սեղանի օրհնութենէն վերջ, յանուն իր միաբան եղբայրներուն, Հայր Համազասպ Վրդ. Քէշիշեան շնորհաւորեց Հայր Արիստակէսը արեւշատութեամբ օժտուած իր նուիրեալ կեանքին համար, որ արդէն մտած է հարիւրամեակի շեմին։

24/04/2026

23/04/2026

https://www.lapiazzaweb.it/news/eventi/661116/venezia-ricorda-il-genocidio-armeno-un-programma-di-iniziative-per-la-giornata-del-ricordo.html?fbclid=IwdGRzaARWDZ5jbGNrBFYNcWV4dG4DYWVtAjExAHNydGMGYXBwX2lkDDM1MDY4NTUzMTcyOAABHl2X-SU7P3W9CZfP7x7tfhTHXcXccNv50Ts3zILQtvOUyO0ea_rC7OC-5xqR_aem_zbcCKceesr9o-WaOkMpqKQ&sfnsn=scwspwa

Il 24 aprile cerimonia in Auditorium Santa Margherita

23/04/2026

ԱՒԵՏԻՔ ԻՍԱՀԱԿԵԱՆԻ ՅՈԲԵԼԵԱՆԻՆ ԱՌԹԻՒ ՎԵՆԵՏԻԿԻ ՄԷՋ ՅՈՒՇԱՔԱՐ ԶԵՏԵՂՈՒԵՑԱՒ

Աւետիք Իսահակեանի ծննդեան 150-ամեակի յոբելեանի առթիւ, 17 Ապրիլին Վենետիկի մէջ կատարուեցաւ յուշաքարի մը քօղազերծման արարողութիւնը այն տան մուտքի կողքին, ուր վաստակաւոր հայ գրողը բնակած է 1921-1926-ին, այսպէս քաղաքին լաբիւրինթոսային քարտէսին աւելցնելով ուղեքար մը եւս, որ կը խորհրդանշէ վենետահայ հարուստ եւ հազարամեայ պատմութիւնը։

Ձեռնարկին ներկայ կը գտնուէին եւ խօսք առին Հայաստանի Հանրապետութեան կրթութեան, գիտութեան, մշակոյթի և մարմնամարզի նախարարի տեղակալ ԱլֆրեՏ Քոչարեան, Հայաստանի Դեսպան Վլատիմիր Կարապետեան եւ Արհ. Լեւոն Արք. Զէքիեան, Վենետիկի փոխքաղաքապետ Սիմոնէ Վենտուրինի, եւ Վենետիկի Հայաստանի Պատուոյ Հիւպատոս Գագիկ Սարուխանեան, ինչպէս նաեւ Մարտիրոս Սարեանի տուն-թանգարանի տնօրէնուհի Պելլա Իսահակեան, որ յայտնի նկարիչին ինչպէս նաեւ Աւետիք Իսահակեանի ծոռնուհին է։ Մխիթարեան Միաբանութենէն ներկայ էին Հ. Վահան Վրդ. Օհանեան, Հ. Սերոբ Վրդ. Չամուրլեան, եւ Հ. Համազասպ Վրդ. Քէշիշեան, որ իր սրտի խօսքը բերաւ բացումէն վերջ տեղի ունեցած ընդունելութեան մը ընթացքին մօտակայ սրահի մը մէջ, անդրադառնալով մեծանուն բանաստեղծի կերպարին եւ իր սերտ կապերուն միաբան հայրերուն հետ, նշելով որ այս առթիւ Ս. Ղազար Մայրավանքի քառանկիւնին մէջ ցուցադրուած են պաստառներ նուիրուած Աւետիք Իսահակեանի եւ Մխիթարեան Հայրերու բարեկամութեան։

Իսահակեանի բնակարանի հասցէն էր Տորսոտուրօ (Dorsoduro) 2266, որ կը պատկանէր Վենետիկի ազնուական Տէ Մարքի (De Marchi) ընտանիքին։ Տունը շատ մօտ է Մխիթարեան Միաբանութեան Մուրատ Ռափայէլեան Վարժարանին, ուր աշակերտած է Իսահակեանի որդին, Վիգէն. ««Տորսոտուրօ փողոցում գտնուող այս տունը` N 2266, որտեղ ապրեցինք վեց տարի, պարտէզով շրջապատուած մի հին առանձնատուն էր, որը Վենետիկի համար հազուագիւտ բան էր», գրած է Վիգէն Իսահակեան: «Պատկանում էր հինաւուրց վենետիկեան Տէ Մարքիների ազնուական ընտանիքին․․․ Հօրս աշխատասենեակը երկրորդ յարկում էր, նայում էր պարտԷզին: ԱղաՒնիները գալիս էին, նստում պատուհանի եզրին և ղունղունում, ուտելիք պահանջում։ Սենեակում էին հօրս գրասեղանը և թախտը։ Հայրս պատին ամրացրել էր Հայաստանի քարտէՍը և իր սիրելի մօր՝ Ապլայի պատկերը: Այս սեղանին հայրս գրեց իր ստեղծագործութիւններից մի քանի ընտիր գոհարներ, ինչպիսիք են՝ «Ռավեննայում» կամ էլ «Հայրենիքիս»․․․ Այդ գրասեղանին գրեց իր անկրկնելի «Լիլիթը», նաև մի սիրային բանաստեղծութիւն` ներշնչուած Ռիալթօ կամրջին հանդիպած մի անծանօթ վենետիկուհով, մշակեց «Սասմա Մհեր» բանաստեղծութիւնը: Հրապարակեց բանաստեղծական մի նոր ժողովածու՝ «Աշնան ծաղիկներ» վերնագրով: Հօրս ստեղծագործական կրակը կարծես նորից արթնացել էր», շարունակեց ան:

Յուշաքարը կը խորհրդանշէ երկու երկիրներու միջեւ մշակութային երկխօսութիւնը։ Յուշաքարի վրայ ուրուագծուած է Ռիալթոյի կամուրջը, որ «Մի մրահոն աղջիկ տեսա Ռիալթոյի կամուրջին․․․» յայտնի բանաստեղծութեան խորհրդանիշ է և Վարպետի սիրելի ճարտարապետական կառոյցներէն մէկուն՝ Երերոյքի տաճարի զարդանախշը։ Յուշատաքարին վրայ եղած գաղտնագիրով (QR code} այցելուները կրնան կապը բանալ «Իսահակեանը և Վենետիկը» տեսանիւթին։ Յուշաքար ճարտարապետ Հայկ Ասատրեանի գործն է։
Ծրագիրը իրականացաւ Հայաստանի Կրթութեան եւ Արտաքին Գործոց նախարարութիւններու համատեղ ջանքերով՝ Իտալիոյ Հայաստանի դեսպանութեան աջակցութեամբ, եւ Աւետիք Իսահակեանի Տուն-Թանգարանի եւ Վենետիկի Հայաստանի պատուոյ հիւպատոսութեան կազմակերպութեամբ:

22/04/2026

ՄԻՋԱԶԳԱՅԻՆ ԳԻՏԱԺՈՂՈՎ ՆՈՒԻՐՈՒԱԾ ՄԽԻԹԱՐ ԱԲԲԱՀՕՐ ԾՆՆԴԵԱՆ 350 ԱՄԵԱԿԻՆ

Մխիթար Աբբահօր ծննդեան 350ամեակի յոբելեանին առթիւ, Ս. Ղազար Մայրավանքին մէջ տեղի պիտի ունենայ Միջազգային գիտաժողով, 19-22 Հոկտեմբեր 2026, «Մխիթար Սեբաստացիի դարաշրջանը» խորագիրով։

Յայտագիրը եւ այլ տեղեկութիւններ յաջորդաբար պիտի ծանուցուին։

14/04/2026

11/04/2026

#Մխիթարեան #ՄխիթարեանՄիաբանութիւն #ժամերգութիւն

06/04/2026

ՕՐ ՄԵՌԵԼՈՑ- պաշտօն հանգստեան