06/10/2026
കൊരട്ടിമുത്തിക്ക് സ്നേഹസമ്മാനമായി വിശ്വാസത്തിന്റെ പതാക
കൊരട്ടിമുത്തിയുടെ തിരുനാളിന് ആത്മീയതയും സ്നേഹവും ഇഴചേർത്ത അപൂർവ സമ്മാനവുമായി ഒരു കുടുംബം.
കൊരട്ടി സെന്റ് മേരീസ് ഫൊറോന പള്ളിയിലേക്ക് തിരുനാൾ കൊടിയേറ്റിന് മുന്നോടിയായി പുതിയ പതാകയാണ് കുടുംബം സമർപ്പിച്ചത്. ഇരിങ്ങാലക്കുട വെള്ളാങ്ങല്ലൂർ സ്വദേശികളായ കാനംകൂടം വീട്ടിൽ ദീപു ജോർജ്, ഭാര്യ സംഗീത, അമ്മ അൽഫോൻസ എന്നിവരാണ് രണ്ടരലക്ഷം രൂപ ചെലവഴിച്ച് പതാക തയ്യാറാക്കി നൽകിയത്.
അന്ന ജെനിഫർ കമ്പനി ഉടമകളായ കുടുംബം കൊരട്ടിമുത്തിയോടുള്ള വിശ്വാസത്തിന്റെയും നന്ദിയുടെയും അടയാളമായാണ് പതാക സമർപ്പിച്ചത്. 9.5 അടി നീളവും 4.5 അടി വീതിയുമുള്ള പതാകയുടെ രൂപകൽപ്പന നിർവഹിച്ചത് വിജയ് ശങ്കറാണ്. എട്ടുമണിക്കൂർവീതം ഒമ്പത് ദിവസം തുടർച്ചയായി അധ്വാനിച്ചാണ് പതാക പൂർത്തിയാക്കിയത്. ഇറക്കുമതി ചെയ്ത ജെറി സിൽക്ക് ത്രെഡ് ഉപയോഗിച്ച് 21,03,465 എംബ്രോയ്ഡറി തുന്നലുകളാണ് ഈ പതാകയിൽ ഒരുക്കിയിരിക്കുന്നത്. ഓരോ തുന്നലിലും വിശ്വാസത്തിന്റെ സമർപ്പണവും പ്രാർത്ഥനയുടെ ആത്മാർഥതയും നിറച്ചാണ് പതാക ഒരുക്കിയതെന്ന് കുടുംബം പറഞ്ഞു.
കൊരട്ടിമുത്തിയുടെ തിരുനാൾ കൊടിയേറ്റിന് മുന്നോടിയായി സ്നേഹസമ്മാനം പള്ളിക്ക് കൈമാറി. അൽഫോൻസയെയും മകൻ ദീപു ജോർജിനെയും വികാരി ഫാ. ജോൺസൺ കക്കാട്ട് ആദരിച്ചു.
