Fidei Defensor Ministry

Fidei Defensor Ministry The ministry Focuses in Evangelism, Spiritual warfare, Deliverance,Counselling, Nurturing Faith, Dis

31/07/2026

*FIDEI'S DAILY DEVOTION*
_31st July 2026_

HUMIT NA PATHIAN APAN

*Sam:69:14*
_Buannawi a kipan hon humbit inla, hon tumsak mahmah ke'n; hon hote lak ah leh tui thukpi a kipan humbit in hon omsak in._

*Sam:69:15*
_Tui lian in hon tummang kei hen la, tui thukpi'n leng hon valh kei hen, kokhuk in leng a kam hon chih khum kei hen._

*ZILLAI*
Tulai in vuahtui hong tam in, tui let, tui in a tuah, men kichim chih hong tam mahmah hi.

Tuate a lauh huai kom kom in _leitung nuntakna ah, i kha a ding a pauhhuai; tuihual in hon tup a, a hon taih a, leitung lam nopsakna in hon chilkhum a, tangtawn a suahtak non louh ding a lah huai pen ahi hi._

Toupa ei a ding a hotdamna, kulhpi muan huai ahi ahi.
> Hiai Sam gelhtu thum na dawng Pathian pen zong, ei Pathian ahih man Toupa min i phat hi.

Toupa panpihna ngen le hon d**g ding a masa ahihman in Toupa i pahthawi hi.

🖊 _Evan Langchinthang Naulak_

26/07/2026

*FIDEI'S DAILY DEVOTION*
_26th July 2026_

*HINSAK KIK A OM*

*Ephesate:2:5*
_tatleknate ziak a si i hih hilhial lai in leng, Khrist toh a hon hihhing a (hehpihna a hotdam na hita uh),_

*ZILLAI*
Misi a hingsak kik thei Pathian lou omlou hi. Dr ten zong a hithei ding in i koih kei uhi.

Ei zong
* Bawldik theihlouh,
* Se gawp,
* lungtang suangbang a tak ta
i hih lai in Jesu Khrist ah hinsak kik in i om uhi.

> Hiai pen mah ahi, i sangamte' kha, a site a ding a lametna om sun.

_Toupa'n a ittna in, a sisa te i hih hil hial lai in leng, a ittna a hon hotdam ziak in kipahthu i gen hi._

🖊 _Evan Langchinthang Naulak_

25/07/2026

*FIDEI'S DAILY DEVOTION*
_25th July 2026_

*KHUALZIN MI DEIH HAU*

*1 Peter:2:11*
_Deih mahmahte aw, mikhual leh khualzin na hih ziak un kha dou naknakpa sa utnate tawpsan di'n nou k'on ngen hi;_

*ZILLAI*
Khualzin ten a azinna gam ua vanpuak ding ahauh luat uh hiam, a zin na gam a nuam asak luat chiang un tua a zinna gam uh a khelah mahmah uhi.

Tua mah bang in khovel ah khualzin ihihman, ei zong i khualzin na ah kikhual lua, taksa utna te toh lawm bawl lua ihihleh, _i tunna ding gam sang in i khual zinna gam i tel zok khak ding lauh huai mahmah hi._

Huai ziak in Peter in hiai hichi in hon thu hilh hi.
* _Mikhual leh_
* _khualzin na hih ziak un_
_kha dou naknakpa sa utnate tawpsan di'n nou k'on ngen hi;_

*Toupan simtute i taksa utna uh tawpsan zou ding in hatna hon pia hen.*

🖊 _Evan Langchinthang Naulak_

21/07/2026

*FIDEI'S DAILY DEVOTION*
_21st July 2026_

*TOUPA A THEICHIAN MI*

*1 Johan:2:4*
_A thupiakte zuilou a, Amah ka thei, chimi tuh amah mi zuauthei ahi, thutak amah ah a om kei hi._

*ZILLAI*

Skulpu khat in a naupang pa kiang a laigelh dingdan a hilh a, aman leng ka thei chi zen pi in, a skulpu hilhdan in gelhkei leh a thei lou pi eive ki chiding hi.

Tua mah bang in, Pathian thei kichi na pi a, amah deihdan hihlou mi pen Pathian theilou/neilou hikha zo ding hi.

Pathian thei leh nei mi in a Pathian deihdan te semkhia hi.

*Toupa thei a, a thupiak te zui tu hi ding in simtute Toupa'n hon vualzawl hen*

🖊 _Evan Langchinthang Naulak_

19/07/2026

*FIDEI'S DAILY DEVOTION*
_20th July 2026_

*GAMLUAH NADING THUGUK*

*Sam:37:34*
_Toupa tuh ngak inla, lampi tuh tawn in, huchi'n gam luah ding in a hon pahtawi ding hi: mi gilou-saloute hihmanthat a a om utuh na mu ding hi._

*ZILLAI*
Pi-leh-pu te' hun a pat in tuni d**g gam poimoh na kimangilh lou a, tamtak in amau hatna leh pilna in gam lak a sawm sek uhi, himahleh, Toupa'n
* Amah ngak a
* Alampi tawn te kiang ah gamluah ding ahi uh ana chi hi.

Amau hatna kisuang a, diktatlou tak a gam ngahte bel hihmangthat a om ding uh ahi akichi hi.

Toupa ngakzou a, adeihdan lampi zui thei tawntung ding in Simtute Toupa'n hon vualzawl hen.

🖊 _Evan Langchinthang Naulak_

19/07/2026

*FIDEI'S DAILY DEVOTION*
_19th July 2026_

*KHELHNA A HON KESAK THILTE*

*Sam:37:8*
_Heh tawpsan inla, thangpaih kisik in: ki hihlungkham nuam ke'n, thil hihkhelh ah a hong ke maimah nak hi._

*ZILLAI*

Gari a pei a thep leh a thepsak tu ding,
* Ling hiam,
* Suanghiam,
* S*k kilh hiam
om sek hi.

Tua mah bang in khelhna a hon kesak thil omte:
*Hehna*,
*Thangpaih* *lungkhamna,*
Hiaite koihkhe ding in sam laigelhtu in hon thuhilh hi. _Hiai te toh Christian hinkhua zat pen gari,pei thep hinapi, a tai tei tei toh kibang a, koimah tan kitung lou ding hi.

*_Heh tawpsan a, thangpaih kisik a, ki hihlungkham nuam lou ding in simtute Toupa'n honvualzawl hen._*

🖊 _Evan Langchinthang Naulak_

17/07/2026

*FIDEI'S DAILY DEVOTION*

_18th July 2026_

*Nungzuihna man*

*Philippite:3:8*
_Hi taktak hi, ka Toupa theihna manpha ziak in thil tengteng ka tanta hi. Huan, thil tengteng ninneng bang phet in ka sim a Khrist ka tan theihna ding in,_

*ZILLAI*
Paul in leitung siamna lam, sahkhua lamsiamna leh khotang ah dinmunsangtak anei hi, bannah, Rome mi hihna nei ahihman in hamphatna tampi a nei hi.
_Himahleh aman hiaite taisan in Jesu mah a bel tinten a, tuate ninneng in ka sim hi chi lel hi_

Jesu Khrist zuihna ah taisanding tampi aom hi.
* Paul in lei thupina leh dinmun thupitak te a taisan a,
* Peter in a nekmuhna Ngabengna a taisan a,
* Matthai in a summuhna Siahdonna inn a taisan uhi.
*Nang Jesu nungzuihna ah bang na taisan ta a?*

*Simtute, Toupa nungzui a, leitung thupina te, ei hon tuailuai sakthei te koihkhe ngam ding in Toupan hon vualzawl hen!!!*

_Evan Langchinthang Naulak_

17/07/2026

*FIDEI'S DAILY DEVOTION*
_17th July 2026_

*HONSAMPA A SIANGTHOU BANG A SIANGTHOU DING*

*1 Peter:1:15*
_nou hon sampa a siangthou bang in nou leng na tatdan tengteng uah hong siangthou zaw un;_

*1 Peter:1:16* _Noute na siangthou ding uh ahi, kei ka siangthou ngal a, chih gelh ahi._

*ZILLAI*
Ukrane President Volodymyr Zelenskyy in US te president Donald Trump a va muh in informal deuh a puan nak a sih ziak in press te apan dotna ana om a, tamtak in kizatak louhna ahi chi in moh asa mahmah uhi.

> En zong i muh di pa, a honsam pa i theihchet kei leh kizepding dingdan theihlouh ziak a zahlak khak theih hi.

Ei honsampa pen _Siangthou_ ahih lam mangilh louh a hoih hi, honsam pa kiang a pai ding a kisa ihih man in, ei zong ikihih siangthou hunta ahi.. huchu lou in zaw i zahlak ka ding uh hi.

*Ei honsampa a siangthou bang in, simtute leng siangthou thei zel ding Toupa'n hon vualzawl hen.*

🖊 _Evan Langchinthang Naulak_

16/07/2026

*FIDEI'S DAILY DEVOTION*
_16th July 2026_

*ZE-ETNA LEH KHEMNA BANGZIAK A OM?*

*Jakob:1:2*
_Ka unaute aw, na ginna uh ze-etna in kuhkalna a siam chih thei in, khemna chiteng na tuah chiang un, kipahna ngen in sim un,_

*ZILLAI*
Naanglem khit phet pen duailou ahihman in thil igak na a i zatleh kitan pahpah hi. Zat a hong hihtheih nang in tuia kidiah a, akidiah sawtleh duai hoih in zattheih pah hi.

_Huai man bang in ze-etna leh khemna i tuah chiang in Pathian in zatna ding hon nei a, huai ding a hon kisakkholsak ahi chi in lungnuam ni_

*Ze-etna leh khemna i tuah chiang, in Pathian in hon zatnopna om a, tua ding a hon kisa kholsak eive chi thei ding in, simtute Toupan hon vualzawl hen*

🖊 _Evan Langchinthang Naulak_

14/07/2026

*FIDEI'S DAILY DEVOTION*
_15th July 2026_

*DIABAWL MUN AWN LOU*

*Ephesate:4:27*
_Diabol leng mun awn sam kei un._

*ZILLAI*

Gamsa in amah mun nei a, amah mun ah gamsadang ava paikhak chiang in heh in ana hangmah mah a, _'ka gam ah thu hon nei kei in_' chi hileh kilawm in ana delh khe zel uhi.

_Ei mihing ten le i gamgi i vengbit ding i moh puak ahi. Paul in a gen bang in, adiak in melma pa diabawl pen thuneihna nengchik leng piak louh ding ahi. Hiai diabawl mun awt leh awtlouh pen eimah sepkhiak ding ahi hi._

*Diabawl mun awnlou a Pathian in gamgi honpiak pen kembit zou ding in simtute Toupa'n hon vualzawl hen.*

🖊 _Evan Langchinthang Naulak_

Address

Grace Studio Building, Top Floor, Opposite CBA Office, Teddim Road, Gouchinkhup Veng New Lamka
Churachandpur

Telephone

+918258057654

Website

Alerts

Be the first to know and let us send you an email when Fidei Defensor Ministry posts news and promotions. Your email address will not be used for any other purpose, and you can unsubscribe at any time.

Contact The Place Of Worship

Send a message to Fidei Defensor Ministry:

Shortcuts

Share

Category