17/02/2026
Tazkira Hazrat Haji Shah Muhammad Makhdoom Chishti Sabri Naqshbandi Amrohvi (Alaihir Rahma)
Hazrat ki wiladat 1885 iswi mein shehar Amroha ke Mohalla Quraishiyan mein ek ilmi, muazzaz aur ruhani gharane mein hui. Aap ka talluq Hazrat Shah Abdul Hadi (Alaihir Rahma) ki nasli aulaad se tha,aur aap Shams-ul-Aarifeen Hazrat Haji Shah Muhammad Ibrahim (4th Sajjada Nasheen , Dargah Shah Abdul Hadi) ke farzand e asghar (sab se chote sahebzade) thay.
>Taleem-o-Tarbiyat
Aap ne ibtidaayi darsi kutub apne biradar-e-buzurg Hazrat Maulana Shah Sulaiman Ahmad Chishti (5th Sajjada Nasheen Dargah shah Abdul Hadi R.Ah) se ghar par parhin. Iske baad Madrasa Islamia Arabia Jame Masjid Amroha mein barson tak Hazrat Maulana Syed Ahmad Hasan Muhaddis Amrohvi se Fiqh aur Hadees ki taleem haasil ki. Farsi ki takmeel Hazrat Maulana Wilayat Husain Arif aur Hazrat Maulana Abdul Aziz Amrohvi se ki. Baad azan, ek taweel arse tak Bhopal mein ba-silsila-e-mulazmat bataur Superintendent Engineer muqeem rahe.
>Sulook aur Khilafat
Bhopal mein qayam ke dauran ek muddat tak Hazrat Maulana Shah Abu Ahmad Naqshbandi ke halqa-e-iradat mein shamil reh kar iktisab-e-faiz kiya. Neez, Aarif-billah Hazrat Hafiz Zahoor Ahmad Naqshbandi se Silsila Naqshbandia mein bait hue aur ijazat-o-khilafat haasil ki. Silsila-e-Chishtia Sabria mein aap apne waalid-e-maajid Hazrat Haji Shah Muhammad Ibrahim aur biradar-e-buzurg Hazrat Shah Sulaiman Ahmad Chishti se bait dast girafta aur majaz thay.
>Ausaf-o-Kamalaat
Aap nihayat Muttaba-e-Kitab-o-Sunnat, ibadat guzar, shab-zinda-dar (raaton ko ibadat karne wale), zakir-o-shaghil, khaleeq, mutawaze (aajiz) aur wasee-ul-qalb buzurg they. Maamulaat mein apne ajdad aur aslaaf ki zindagi ka sacha aks aur namoona thay. Aap ko Tareekh aur Tasawwuf par gehri nazar thi. Tareekh-e-Abjadi akhz karne mein khaas malka haasil tha Piraana-saali (umardarazi) ke bawajood aap ka hafiza nihayat qawi tha aur maamulaat intehai wasee they.
>Murideen
Zila Amroha, Moradabad aur bairoon-e-Amroha ke aksar log aap se munsalik aur iradat-mand thay.
> Wisaal aur Khulafa
Aap ne 1969 mein is daar-e-faani se k***h farmaya. Aap ke mumtaz murideen aur ijazat-yaftagan mein:
Aap ke nawase, Hazrat Shah Mahmood-ul-Hadi (Madazillah-ul-Aali)
(Maujooda Sajjada Nasheen Dargah shah Abdul Hadi R.Ah)
* Hazrat Anees Ahmad Farooqi Fareedi (Alaihir Rahma) shamil hain.
> Tehreer: ✍️Ahqar-ul-Ibad Anwar-ul-Hadi Siddiqui
