Publication Lumière de la MEBSH

03/05/2026

03/05/2026

Nous serons heureux de vous compter parmi nos invités!

01/05/2026

*LESON DOMINIKAL 3 ME 2026*

*Tit: Lespri Bondye rele Banabas ak Pòl pou yon misyon mondyal*

*Lekti: Travay Apòt 13:1-3*

*Tèks dò: Yon jou, yo t ap fè sèvis pou Bondye, yo t ap fè jèn lè Sentespri a di yo: Mete Banabas ak Sòl apa pou mwen, pou yo fè travay mwen chwazi pou yo fè a. Travay Apòt 13:2*

*Entwodisyon:*
Nan leson pase a, nou te wè sa Bondye te fè pou lapòt Pyè nan lavil Jerizalèm. Bondye te delivre Pyè nan prizon an epi li te jije wa Ewòd. Jodi a n ap kòmanse ak etid *Travay Apòt chapit 13 la.* Pasaj sa kontinye ak istwa legliz lavil Antyòch nan peyi Siri ki te kòmanse nan *Travay Apòt chapit 11 la. Avèk chapit 13 la,* nou rive nan yon lòt faz liv Travay Apòt la, se misyon apot la pami payen yo.

Pou kòmanse ak leson nou jodi a, nou pral konsantre nou sou ministè Lapòt Pòl pami payen yo. Sa gen anpil enpòtans pou nou wè Pòl ak ekip li nan travay evanjelizasyon an. *Travay sa ki te anba pouvwa Sentespri a te pèmèt Legliz Jezikri a fè anpil pwogrè.*

Legliz lavil Antyòch la te devni *yon sant misyonè.* Se legliz sa a ki te voye premye misyonè yo pou yo ale pote Levanjil la kote ki pa t ko tande l. Ann gade kijan sa te rive epi ki enpòtans sa genyen pou nou jodi a.

*I. Sentespri a fè apèl 2 lidè nan legliz la.*
Kòm nou deja di, gen 2 vil Antiyòch: *Antyòch nan peyi Siri ak Antyoch nan peyi Pisidi* ke nou va rankontre pi devan nan *Travay Apòt chapit 13.* Antyòch nan *peyi Siri te yon gran vil avèk 500 mil abitan,* li te yon gran sant komèsyal. *Antyòch sa ki te vil kapital peyi Siri te devni dezyèm sant evanjelizasyon pou legliz primitiv la.*

Legliz Antyòch la te konsakre I *nan adorasyon, jèn ak lapriyè.* Nan yon jounen jèn ak lapriyè, *Sentespri a te pale byen klè pou legliz la mete Pòl ak Banabas apa pou y al anonse Levanjil la nan lòt peyi.* Sa vle di, Banabas ak Pòl ta dwe di legliz la orevwa. Eske fidèl legliz Antyòch yo te dwe dako ak yon desizyon konsa? *Sonje se te Banabas ak Pòl ki te premye dirijan legliz la;* se yo menm ki te fòme legliz la.

Eske te gen lidè ki deja prepare pou ranplase Banabas ak Pòl? *Vèsè premye a di nou te gen pwofèt ak doktè nan legliz la.* Doktè nan lang grèk la vle di moun ki anseye, ki bay enstriksyon. Vèsè premye a nonmen *Simeyon, Lisivis ak Manayen ki t ap dirije legliz la ansanm ak Banabas ak Pòl* nan lè Sentespri a te mande pou voye de (2) fondatè legliz la yo ale. Paske yo te kite Sentespri a dirije yo. Twa (3) lidè sa yo te kapab mennen legliz la nan yon kwasans espirityėl.

Alò, dèske se te Sentespri a ki te pale, tout moun te vin dako pou kite Banabas ak Pòl ale, malgre yo t ap fè bon travay. *Legliz la te fè yon gran sèvis de konsekrasyon kote tout ansyen yo te mete men sou tèt misyonè yo pou konsakre yo pou ministè evanjelizasyon.*

Ide santral nou jwenn nan vèsè sa yo se Sentespri a k ap dirije tout bagay. Li chwazi misyonè yo epi li voye yo kote I vle. Koman sa ye nan legliz nou? Eske se Sentespri a oubyen entèlijans lòm ak lachè a k ap dirije legliz pa nou?

*II. Evanjelizasyon mondyal ak legliz lokal.*
Tout legliz yo ansanm genyen devwa pou evanjelize lemonn antye. Pa gen yon legliz ki kapab jistifye endiferans li anvè gran tach sa a. Si yon legliz pa gen yon pwogram devanjelizasyon oubyen si li pa enterese nan evanjelizasyon, li pèdi rezon egzistans li. Nan bidjè chak legliz ta dwe genyen yon pousantaj pou lamisyon mondyal. Chak legliz gen pou rann kont devan Bondye sou jerans lajan li pandan ke gen anpil milyon moun ki pa konnen laverite Levanjil la.

Chak kretyen gen obligasyon pou obeyi kòmandman Kris la *(Matye 29:18-20; Mak 16:15).* Chak moun ki sove dwe gen yon sousi pou moun pèdi yo. Si nou vle reyèlman nan kominyon avèk Kris, nou dwe sousye nou de sa yo k ap mouri nan peche yo, paske se pou yo Kris te mouri. *Bondye rele chak kretyen pèsonèlman pou I priye, ale bay temwayaj epi fè sakrifis pou kòz Levanjil la.*

Bondye bezwen tout kalite moun nan chan travay li: *Evanjelis, anseyan, doktè, travayè, tout moun ki gen yon don espirityèl oubyen kèk talan natirèl. Chak kretyen ta dwe konprann nesesite pou li yon temwen pou Kris. Eske ou deside pou reponn Mèt la: *"Men mwen, Seyè, voye m."*

*Konklizyon:*
Leson jodi a te anseye nou sou apèl Pòl ak Banabas pou al preche Levanjil la nan lemonn antye. Nan *Travay 1:8,* Bondye te gentan bay lòd pou Levanjil la preche: *Jerizalèm, Jide, Samari epi nan dènye bout latè.* Ak apèl Pòl epi Banabas pou ale kòm misyonè, Levanjil la ta praI touche dènye bout latè. Lapot Pòl 'pra I sèvi tankou yon enstriman nan men Bondye pou travay sa.

*"Yon legliz ki pa yon legliz misyonè, li se yon legliz demisyone",* Evanjelizasyon ak lèv misyonè dwe pwen santral chak legliz. Lè nou pa fè sa, Bondye ap itilize tout mwayen pou akonpli plan li. Nou kwè ke Bondye ap itilize sitiyasyon difisil peyi Ayiti a pou kretyen yo ka gaye nan lemonn antye pou preche Levanjil la. Eske ou disponib nan men Seyè a kòm enstriman pou pote Levanjil la? Ou ka priye pou moun ale, bay lajan pou moun ale epi ale ou menm menm.

*Koman legliz ou ye nan kesyon evanjelizasyon an?*

+18493598495
Gwoup watsap
*Josué JEAN PIERRE*
*(El negro ⚫️ de Dios)*

*Devwa yo*

1) Vrè ou fo: Dezyèm sant misyonè a te tabli nan Antyoch nan peyi Pisidi ki se yon peyi nan Lazi Minè.

2) Ki gwo pwogram dezyèm sant legliz primitiv la te genyen ki te fè li grandi? Eske nou kapab genyen menm pwogram sa yo tou pou grandisman legliz?

3) Kisa Lespri Bondye a te di byen klè pou kretyen yo fè? Kòman Lespri a te rive di sa? (Nou kwè li te travay nan lespri moun yo pou yo te eksprime verite sa a.)

4) Ki reyaksyon legliz lè yo tande fòk fondatè yo kite?

5) Site 5 dirijan legliz Antyòch te genyen lè sa a. Nan ki kapasite yo t ap sèvi Bondye nan legliz la?

6) Vrè ou fo: Wòl yon dirijan legliz se prepare lidè ki kapab pran reskonsabilite nan legliz la.

7) Kisa moun legliz yo te fè pou yo voye Pòl ak Banabas ale?

8) An reyalite, ki pèsonaj ki t ap dirije legliz Antyoch?

9) Ki rezon egzistans chak legliz sou latè?

10) Ki gwo sousi legliz ta dwe genyen jodi a?

11) Eske ou angaje tèt ou nan lèv misyonè?

30/04/2026

*LESON DOMINIKAL 3 ME 2026*

*Tit: Lespri Bondye rele Banabas ak Pòl pou yon misyon mondyal*

*Lekti: Travay Apòt 13:1-3*

*Tèks dò: Yon jou, yo t ap fè sèvis pou Bondye, yo t ap fè jèn lè Sentespri a di yo: Mete Banabas ak Sòl apa pou mwen, pou yo fè travay mwen chwazi pou yo fè a. Travay Apòt 13:2*

*Entwodisyon:*
Nan leson pase a, nou te wè sa Bondye te fè pou lapòt Pyè nan lavil Jerizalèm. Bondye te delivre Pyè nan prizon an epi li te jije wa Ewòd. Jodi a n ap kòmanse ak etid *Travay Apòt chapit 13 la.* Pasaj sa kontinye ak istwa legliz lavil Antyòch nan peyi Siri ki te kòmanse nan *Travay Apòt chapit 11 la. Avèk chapit 13 la,* nou rive nan yon lòt faz liv Travay Apòt la, se misyon apot la pami payen yo.

Pou kòmanse ak leson nou jodi a, nou pral konsantre nou sou ministè Lapòt Pòl pami payen yo. Sa gen anpil enpòtans pou nou wè Pòl ak ekip li nan travay evanjelizasyon an. *Travay sa ki te anba pouvwa Sentespri a te pèmèt Legliz Jezikri a fè anpil pwogrè.*

Legliz lavil Antyòch la te devni *yon sant misyonè.* Se legliz sa a ki te voye premye misyonè yo pou yo ale pote Levanjil la kote ki pa t ko tande l. Ann gade kijan sa te rive epi ki enpòtans sa genyen pou nou jodi a.

*I. Sentespri a fè apèl 2 lidè nan legliz la.*
Kòm nou deja di, gen 2 vil Antiyòch: *Antyòch nan peyi Siri ak Antyoch nan peyi Pisidi* ke nou va rankontre pi devan nan *Travay Apòt chapit 13.* Antyòch nan *peyi Siri te yon gran vil avèk 500 mil abitan,* li te yon gran sant komèsyal. *Antyòch sa ki te vil kapital peyi Siri te devni dezyèm sant evanjelizasyon pou legliz primitiv la.*

Legliz Antyòch la te konsakre I *nan adorasyon, jèn ak lapriyè.* Nan yon jounen jèn ak lapriyè, *Sentespri a te pale byen klè pou legliz la mete Pòl ak Banabas apa pou y al anonse Levanjil la nan lòt peyi.* Sa vle di, Banabas ak Pòl ta dwe di legliz la orevwa. Eske fidèl legliz Antyòch yo te dwe dako ak yon desizyon konsa? *Sonje se te Banabas ak Pòl ki te premye dir

18/04/2026

*LESON DOMINIKAL 19 AVRIL 2026*

*Tit :* Pòl ede Banabas ak fondasyon Legliz Antyòch

*Lekti* : Travay Apòt 11 : 19-26

*Tèks dò* : pouvwa Bondye te avèk yo, anpil nan moun Lagrès yo rive kwè, yo te tounen vin jwenn Bondye. Travay Apòt 11 : 21.

*ENTWODIKSYON*

Levanjil la te kòmanse preche nan Jerizalèm epi li te fè anpil pwogrè. Disip yo te konsantre yo nan sant Jerizalèm lan jouk lè yon gwo pèsekisyon te leve kont kretyen yo. Youn pami dyak yo, Etyèn, te mouri anba Kont wòch ( Travay 7:54-60). Sa te fè anpil chretyen dispèse pou ale lòt kote. Tout kote yo te pase yo tap preche levanjil la. Bondye te pèmèt pèsekisyon sa pou levanjil la te ale pi lwen.

*I- LEVANJIL LA RIVE LAVIL ANTYÒCH*

Lavil Antyòch se vil kapital peyi Siri a (gen yon lòt vil Antyòch nan peyi pisidi). Nan tan apòt yo, lavil Antyòch nan peyi Siri te gen apeprè 500 mil abitan. Se te yon vil komèsyal ki rich, te gen tout kalite moun, ras ak pèp nan vil la. Se la dezyèm sant pou prediksyon levanjil la te ye.

*A. Lavil Antyòch resevwa mesaj Levanjil la*

Akòz pèsekisyon, kretyen yo te dispèse te rive nan Fenisi, Lil Chip ak nan Antyòch. Yo tap preche levanjil la bay jwif yo sèlman. Sepandan te gen kèk kretyen ki rive Antyòch ki anonse Levanjil la pou Grèk yo tou. Bondye te beni travay la epi li te pèmèt yon foul moun konvèti. Travay la te vin tèlman gran ke misyonè yo pat ase prepare pou fòme kwayan sa yo. Bri a te rive nan zorèy dirijan yo nan lavil Jerizalèm epi yo te delege Banabas pou ale Antyòch.

*B. Legliz Jerizalèm voye Banabas lavil Antyòch*

Nou kapab genyen don evanjelis, kote nou kapab wè anpil moun ap konvèti nan ministè nou, men fòk gen yon moun ak don apòt pou fòme legliz la, epi se konsa dirijan yo te voye Banabas pou mete baz yon nouvo legliz.

Banabas, delege legliz Jerizalèm lan, te yon nonm debyen, li pat yon vagabond ki ta pral bay move doktrin pou enterè tèt li pou detounen moun yo. Banabas te ranpli ak Sentespri a epi li te plen ak konfyans nan Bondye. Se karakteristik sa yo chak kretyen bezwen pou yo kapab pran yon pa aktif nan evanjelizasyon. Dayè tout moun ki ranpli ak Sentespri a se moun debyen yo ye pou fè bon travay nan Legliz. Banabas te kontan pou gwo pwogrè ki tap fèt, pou l' te wè kòman moun tap reponn ak apèl levanjil la.

*II- FÒMASYON LEGLIZ ANTYÒCH (25-30)*

Banabas te rive epi li te kòmanse egzòte tout nouvo kretyen yo pou kenbe fèm nan Seyè a. Anpil moun te vin konvèti menm jan ak nan Jerizalèm. Konsa li te bezwen èd.

*A. Banabas al chache Pòl lavil Tas (25-26)*

Travay la te vin anpil nan men Banabas, sa te fè li ale lavil Tas pou chache Pòl pou ede li ak travay la. Li te jwenn Pòl epi ansanm, yo te bati fondasyon Legliz Antyòch la. Sa te pran tout yon ane ansèyman pou mete Legliz la chita. Kwayan sa yo te tèlman fòme nan doktrin Kris la ke pèp payen yo te rele yo kretyen, sa vle di patizan Kris yo. Pita nou kapab wè ke Antyòch te devni yon gwo sant misyonè pou evanjelize lemonn. Jodi a, èske gen yon enterè evanjelizasyon nan Legliz yo ?

*B. Efè Levanjil la nan Antyòch (27-30)*

Nan menm lè sa, te gen kèk pwofèt ki te soti Jerizalèm monte Antyòch pou yo te kapab ede Legliz la nan lafwa. Nou pa konnen si pwofèt sa yo se te menm liy pwofèt Ansyen Testaman yo ki te toujou pwofetize avèk senbòl kòm nou wè Agabus te fè nan Travay 21:10. Jeremi ak lòt pwofèt yo te sèvi menm sistèm sa a. Wòl pwofèt Nouvo Testaman yo se te pliske yon predikatè òdinè, men se yon predikatè enspire ki tap kominike tout Revelasyon ki koresponn ak redaksyon Nouvo Testaman an jouk li te fin ekri. Jodi a, kwè ke nou genyen kèk pwofèt ilimine kap bay entèpretasyon klè de pawòl Bondye, k'ap anonse verite pawòl Bondye yo kòm sèl règ kretyen yo kapab swiv. Alò nou ta di ke Agabus te yon pwofèt Nouvo Testaman k'ap sèvi ak menm sistèm Ansyen Testaman pou fè prediksyon anpil bagay ki pral rive, men nou pa wè fòm pwofèt sa yo ankò nan Nouvo Testaman an.

Agabus te predikatè yon grangou ki te rive sou rèy Klod. Sa te mete kretyen yo nan anpil pwoblèm. Yo te anba pèsekisyon leta epi grangou tap kwense yo. Kretyen Legliz Antyòch yo te òganize yon sekou pou voye bay frè yo nan Jerizalèm ak nan lòt Legliz nan Jide. Se Pòl ak Banabas ki te pote sekou sa a nan non Legliz Antyòch. Nou wè jan Legliz Antyòch la te rive nan yon matirite espirityèl lè yo voye èd sa bay Legliz yo ki tap soufri.

Nou espère ke chak kretyen ap mete men yo nan evanjelizasyon pou genyen kèk nanm pou Bondye. Aprè sa nou bezwen anseye yo pou yo vin rive nan yon matirite espirityèl pou yo viv lavi ke Kris mande a.

*KONKLISYON*

Leson jodi a te anseye nou sou fondasyon Legliz Antyòch. Nou te etidye kòman levanjil la te rive la, fòmasyon Legliz la epi efè Levanjil la te fè nan lavi moun Antyòch yo.

Se te Banabas Legliz Jerizalèm te voye al fonde Legliz Antyòch. Men lè l' te rive, travay la te tèlman anpil, li tal lavil Tas al chache Pòl pou ede li. Se pastè sa yo te fè bon travay nan Antyòch. Travay yo te tèlman efikas, se nan lavil sa pou premye fwa yo pral rele disip Kris yo Kretyen, sa vle di moun kap swiv Kris. Kretyen sa yo te imite Kris la epi mete byen yo apa pou ede lòt moun ki nan bezwen. Ki kalite kretyen ou ye ? Èske wap imite Kris la epi prèt pou sekouri moun ki nan bezwen ?

*DEVWA YO*

1- Site dezyèm sant misyonè pou Legliz primitiv la.

2- Ki sitiyasyon vil sa nan lè sa a ?

3- Ki kalite moun ki te konpoze Legliz Antyòch ?

4- Ki diferans ki genyen ant moun ki gen don evanjelis ak don apòt ?

5- Kilès Banabas te ye ?

6- Site de premye pastè Legliz Antyòch.

7- Konbyen tan sa te pran pou dirijan yo te poze yon bon baz pou Legliz Antyòch ?

8- Ki wòl pwofèt Nouvo Testaman yo ? Ki wòl moun ki gen don ?

9- Ki kalite pwofèt Agabus te ye ? Èske nou genyen kalite pwofèt pwofesi jodi a ?

10- Ki gwo jès lanmou Legliz Antyòch te fè pou kretyen Jerizalèm yo ?

*Sous : ReyonLimyè2026*

*REPWODIKTÈ*

*Joseph Sophony POPULAIRE*
*Pastè Legliz Batis Fliyo / Aken*
*Télé : (+50946856368 / 33547608*
*[email protected]*

03/04/2026

*LESON DOMINIKAL 5 AVRIL 2026*

*Tit: Kris resisite*

*Lekti: Mak 15:42-16:7*

*Tèks dò: Ann fè Iwanj Bondye ... paske nan kè sansib li, li ban nou lavi ankò, lè li te fè Jezi leve sòti vivan nan lanmò. Sa fè nou viv ak anpil espwa.*
*1 Pyè 1:3*

*Entwodiksyon:*
Si Kris pat resisite, Levanjil la t ap san valè epi lafwa nou ta anven, li t ap san kontni. Pòl te konsidere rezirèksyon Jezi kòm yon evènman enpòtan anpil, paske li te fonde lafwa li sou li. Si Kris pa t resisite, peche nou yo pa t ap padone. Sa t ap di anpil pou Kris la pa ta resisite paske sakrifis li yo t ap anven (1 Korent 15:17-18). Men erèzman se pa konsa, Jezi resisite epi nou kapab gen asirans ke peche nou yo jwenn padon epi syèl la ouvri pou nou. Nan leson jodi a n ap etidye nan maten rezirèksyon sa a: antèman Jezi epi rezireksyon li.

*I. Antèman Jezi (Mak 15:42-47)*
Yo te kloure Jezi sou lakwa a vè nevè nan maten, men se jouk twazè nan lapremidi li mouri.

_*A. Evènman ki te pase nan vandredi aprè midi a*_
Jezi te mouri jou vandredi an anvan Saba a. Nan menm vandredi aprè midi sa a, anvan solèy kouche, Jozef Arimate, yon nonm fidèl epi ki t ap tann Wayòm Bondye a, te mande Pilat pou ba li kò Jezi. Se te koutim pou yo antere kò moun yo kloure sou lakwa yo anvan solèy kouche. Se avèk anpil kouraj Jozef t al m ande Pilat kò Jezi. Nou konnen Pilat te byen fache ak moun Sanedren yo paske Yo te fòse li kondane yon nonm ki te inosan.

Pilat te sezi lè li aprann ke Jezi te gentan mouri. Souvan kriminel yo te konn rete pann sou kwa a pou kèk jou anvan yo te mouri. Pilat te kite
Jozef pran kò a. Se te byen pou Jozef te vin reklame ko Jezi a paske yo pa ta kapab jete li menm kote ak kò kriminèl ki te sou lòt 2 kwa yo.

_B. Jozef antere ko. Jezi_
Alò, Jozef te desann ko Jezi, li vlope li nan yon lenn byen vlope, li mete li nan yon tonm tou nèf. Se te yon tonm ki te fouye nan woch, kòm sa te koutim lan nan tan sa a. Yo rapòte ke Nikodèm te la tou ap ede Jozef. Lè yo te fin d

29/03/2026

*LESON DOMINIKAL 22 MAS 2026*

*Tit: Nesans Samson yon Nazirea*

*Lekti: Jij 13:1-25*

*Tèks dò: Jij 13:24*
*Aprè sa, madanm lan fè yon pitit gason, li rele I Samson. Pitit la grandi, Seyè a te beni I.*

*Entwodiksyon:*
Pèp Izrayèl la te fèk pase anviwon 25 ane lapè
ak pwosperite. Men sa pat fè yo rekonesan anvè Bondye. Kè lòm dezespereman rebèl kont Bondye; yo pa janm wè sa Bondye fè pou yo. Chapit 13:1 retounen avèk menm kantik la: *Izrayèl fè sa ki pa fè Bondye kontan.* Poutèt sa Letènèl livre yo nan men Filisten yo, yon lènmi ki sòti nan Sidwès bò lanmè Mediterane. Tribi Dann te kòt a kòt ak Filisten yo. Lè yon moun abandonnen Bondye, li vin goute amètim, peche, ki antrene Jijman Bondye. *Pandan 40 ane opresyon Filisten yo,* se tribi Dann ki te plis soufri epi se nan tribi sa a liberatè a va sòti pou kòmanse delivre pèp la.

*I. Bondye anonse delivrans pou pèp la*
Yon bagay ki parèt nan tèks la, nou pa wè revèy nan pèp la ki mande Bondye gras. Vèsè a pa di nou ke pèp la kriye bay Letènèl, menm jan ak lòt delivrans sou lòt jij yo. *Sa vle di aparisyon Samson se yon ekspresyon gras ak mizèrikòd Bondye.* Bondye fè gras lè li vle, menm jan li te voye Jezikri nan gras li pou sove lèzòm, pa paske lèzòm te mande, men sèlman nan gras ak nan mizèrikòd li.

_*A. Samson pa t fin delivre pèp la nèt*_
Nan chapit 13:5 nou wè ke delivrans la pa va konplèt daprè prediksyon zanj la. Samson p ap fini chase definitivman tout lènmi yo, paske yon jou li te mouri kòm prizonye lènmi an *(16:30).* Li te sèlman kòmanse lit la, *men se Samyèl ak David ki te fini lit la (1 Sam. 8:1).* Pouki alò Samson pa t fin delivre pèp la anba opresyon ènmi? Sanble pèp la pa t kontribiye, epi yo pat resevwa gras Bondye avèk yon kè brize, yo te resevwa gras Bondye a an ven epi delivrans yo pa t acheve. Yo te oblije pote kwa Filisten yo pou anpil ane avan yo te fin delivre nèt.

_*B. Samson te resevwa konsekrasyon nan vant*_
Nou dwe note tou ke *Samson se te sèl jij ki te konsakre nan vant manman I (13:5).* Samson se te sèl nazirea, sa vle di: *"separe pou Bondye epi absteni de tout mal".* Nenpòt moun, gason oubyen fanm, ki ta fè yon ve nazirea, epi ki antre nan yon sòt sasèdòs ki endepandan de sasèdòs levit yo. Lè sa a moun sa a dwe konsakre li nèt nan sèvis Bondye pou toutan an, men pou Samson se te pou tout lavi li jouk lè li mouri (13:7).*Règ la se, pa koupe cheve, pa bwè diven ni bwason fò, pa touche anyen ki sal (Nomb 6:1-8).* Samson se te sèl Jij Bondye te kite mouri anba men ènmi li yo (16:20). Lavi Samson se yon gwo leson pou chak sèvitè Bondye. Se sa k fè liv jij la pase plis tan pou eksplike tout detay lavi li. Annou pran leson pou nou pa rive nan menm sitiyasyon ak li.

*II. Zanj lan anonse nesans Samson*
Labib pale nou sou twa 3 nazirea: *Samson, Samyèl ak Jan Batis.* Yo tout te pran nesans nan yon fanmi ini nan soumisyon ak Bondye. *Yon entèvansyon divin te make nesans yo.* Tout, manman yo te esteril, sa vle di yo pa t kapab fè pitit aprè plizyè lane maryaj. Men Bondye te reponn lapriyè yo epi ba yo pitit sa yo (1 Sam 1:11; Lik 1:15). *De (2) nan yo te resevwa vizit Bondye pou anonse nesans pitit yo.* Lè zanj lan te vizite fanmi Manoa, se madanm nan ki te resevwa vizitè selès la (13:3), epi zanj lan te egzije obsèvasyon Iwa nazirea pou manman pandan gwosès la epi pou pitit la pandan tout lavi li. Bondye te oblije egzije Iwa nazirea pou asire ke Samson va konsakre nan sèvis Bondye.

Manoa te priye pou yon lòt vizit zanj lan pou konfime mesaj la. Li te vle klè sou kòmandman li yo. Bondye te egzose lapriyè li, zanj lan te Retounen pou bay plis enstriksyon sou nesans timoun nan. Zanj la te parèt devan madanm nan ankò, epi madanm nan t al chache mari I pou pale ak zanj lan.

*Nou wè ke koup sa, maigre yo pat gen pitit, te gen inite ant yo.* Aprè yon antretyen ant *Manoa ke non li vle di "Mèveye".* Wi mèveye non Bondye kapab fè tout bagay (13:18; Ezayi 9:6). *Pita zanj Gabriyèl te revele non sa bay Jozef: Jezi Sovè (Mat 1:21).*

Manoa toujou pa t konprann vizitè a, li te vle ba li manje. Vizitè a te pwopoze I pito yon sakrifis pou Bondye. Lè Manoa te boule bèt la sou yon wòch ki te sèvi kòm lotèl, *zanj lan monte nan flanm nan epi disparèt,* Koulye a yo te rekonèt se te yon vizit Bondye menm. Sa se yon gras pou koup sa a fè eksperyans sa a ansanm. Nou kwè toujou aparisyon zanj lan se yon *Kristofani,* sa vle di se *aparisyon Kris nan Ansyen Testaman.* Manoa te kriye Iap mouri paske li te wè Bondye, men ankò madanm nan te gen revelasyon pou pataje avèk mari li, akòz sakrifis la nou pa p mouri. Nou kwè nou gen gwo leson pou tire nan gwo eksperyans sa a:

*1) Madanm Manoa te dwe konsakre I pou yon valè tan pandan peryòd gwosès li, se te byen klè paske li tap pote yon bebe ke Bondye mete apa pou li, li va yon anvwaye Bondye.*

*2) Pitit la ta dwe konsakre tout lavi li nan sèvis Bondye.*

*3) Se tout koup la ki te resevwa revelasyon Bondye pou yo kapab obeyi I tout bon vre.*

*4) Bondye fè nou gras pa mwayen sakrifis olokos li fè pou nou*

*Konklizyon:*
Èske noumenm kretyen tou pa *nazirea (mis à part) pou tout lavi nou pou nou sèvi Bondye.* Nou dwe etidye epi konprann pawòl Bondye pou nou kapab mete I an pratik. Nou sove pa gras Bondye, gras a sakrifis li te fè pou nou, nou pa p mouri men nou va viv pou tout letènite.

+18493598495
Gwoup watsap

*Referans: Reyon limyè 2026*
*Reekri pa: Josué JEAN PIERRE*
*(El negr⚫ de Dios)*

*Devwa yo*

1) Èske chapit 13:1 montre nou yon mouvman de revèy pami pèp Yzrayèl la menm jan sa te konn fèt anvan? Konpare avèk 3:9; 15; 4:3; 6:7 etc.

2) Ki lènmi ki t ap dominen sou Izrayèl epi pou konbyen tan?

3) Ki tribi ki te soufri plis agresyon ènmi an epi nan ki tribi liberatè a te sòti?

4) Kisa ou panse ki fè Samson pat kabab delivre pèp Izrayèl lanèt? 16:15-25.

5) Li Iwa nazirea nan Nonb 6:1-8 epi rezime I.

6) Site 4 nazirea nan Bib la.

7) Koman nou kapab eksplike lavi Samson?

8) Ki zanj sa a ki te anonse nesans Samson?

9) Estrateji batay Samson an, eske lite bon? Eske se nan Letènèl li soti? Eske Letènèl va pouse pèsonn nan peche? Gade 14:4; 1 Sam. 2:25. Note ke Samson te manje, kouche, viv ak ènmi li, eske se posib? Eske viv ak yon fanm etranje se pa peche?

10) Koman zanj lan te reponn Manoa ke li rele? Sa sa vle di pou ou.

11) Bay 4 gwo leson nou kapab tire nan vizit zanj lan?

12) Eske tout vrè kretyen pa yon nazirea pou. Letenèl?

14/12/2025

*LESON DOMINIKAL 7 DESANM *2025*

*Tit** : kèk fòm vyolans nan fanmiy

*Lekti* : Jenèz 4:3-8

*Tèks dò* : Bon pawòl you zanmi bay lavi, men move pawòl demanbre. Provèb 15:4

*ENTWODIKSYON*

Fanmiy se you enstitisyon ki la depi monn nan kreye. Nan sizyèm jou kreyasyon an, nou wè Bondye kreye lòm. Kreye gason ak fanmi, ki se de poto nan triyang lan, ki se : "papa, manman, pitit (fanmi nikleyè)". Li kreye yo li ba yo reskonsabilite li beni yo. Mari ak madanm gen misyon pou yo viv ansanm paske yo fè you sèl nan je Bondye (jenèz 2:24). Fanmiy lan dwe viv nan you pafèt kominyon. Fanm lan dwe soumèt ak mari l. Mari a dwe renmen madanm li kòm Kris renmen legliz li, timoun dwe obeyi paran yo(Efèz 5; 6:1-5). Papa pa dwe irite timoun yo. Se vrèman you anbyans kominyon ke Bondye vle pou fanmiy lan. Èske sa toujou konsa vre? Nou kapab reponn non.

Nan leson nou jodi a, annou wè ansanm kèk kote nan fanmiy nou ka wè vyolans. Nou wè l' nan : " pawòl, nan finans, nan neglijans".

I *- VYOLANS NAN PAWÒL*

Vyolans lan jwenn eksplikasyon li an fonksyon ak anpil faktè. Gen fanmi vyolans ki lakay yo, se pa kout baton fizik, se kout baton move pawòl mari ap di madanm, madanm ap di mari, pitit ap di manman ak papa. Fòm vyolans sa antre nan kategori nou rele vyolans moral. Bib la mande pou nou renmen youn lòt. Premye kote renmen dwe ye, se nan fanmi an. Fanmiy lan se premye Legliz la. Renmen se se you lòd, you kòmandman Bondye (Jan 13:35). Renmen se you reyalite lafwa(1 Jan 3:10 ; 4:14). Vèsè sa yo se ènmi vyolans. Otè liv pwovèb la, Salomon, li montre nou valè you pawòl dous genyen. Li fè kòlè desann.

Ann sispann fè vyolans : papa, manman, pitit, youn sou lòt nan pawòl nap di". Paske je Bondye sou nou (pwovèb 15:3). Yon lòt fòm vyolans nap wè, se nan finans.

II *- VYOLANS NAN FINANS*

Vyolans nan fanmiy an kapab konsidere tou, kòm you konpòtman pou abize, pou fè tò ak yon manm nan fanmiy an. Yon fanmi kap viv byen dwe gen sa nou rele mityalite. Se kote youn konplete lòt. Mityalite se you aspè pratike de sa nou rele kominyon fratènèl (Women 15:12, Efèz 4:25). Nou se manm youn lòt. Prensip sa aplike pou fanmi an tou. Finans nan you fanmiy mande yon jesyon pataje, you konpreyansyon. Pafwa nan fanmiy lan, mari ak madanm ap travay sa bon anpil, pafwa se youn kap travay, nan de ka, figi sa yo dwe gen konpreyansyon. Vyolans nan finans se lè gen gaspiyay, se lè gen eksplwatasyon, se lè gen neglijans. Se pa paske madanm lan rete nan kay la pou di nenpòt bagay lè nap pale de lajan. Depans nan fanmiy lan pa dwe fèt avèk vyolans ki vle di depanse kou moun fou. Yo dwe fèt ak konsantman mari ak madanm. Nou dwe konnen se Bondye ki sous tout sa nou genyen(Detewonòm 8:18). Ann evite tout neglijans.

*III- ÉVITE NEGLIJANS*

Neglijans nan you fanmi se you fòm vyolans. Neglijans ka kouvri tout eleman sa yo, nan ka vyolans nan fanmiy : " Move jès, mepri, imilyasyon". Tout sa yo se faktè ki mache ak neglijans. Konsekans yo konn fatal anpil. Yo defini neglijans kòm you konpòtman ki pa reponn ak sa ou dwe fè, pafwa li konn entansyonèl, pafwa mache ak oubli. Se you mank de swen, you mank de konsantrasyon nan sa nou dwe fè. Nan you fanmiy, Bondye bay reskonsabilite ak manman, papa, pitit. Lè nou pa fè travay nou, nou fayi ak misyon nou. Nan Jérémi 48:10, nou li: " Modi moun ki fè travay li ak neglijans, travay Bondye ba l fè a." Lè you papa pa fè travay li, lè li montre li ensousyan, sa se you peche, se you vyolans sou rès manm fanmiy an. Lè you madanm neglijan, ensousyan se you danje nan fanmiy lan. Paka gen kè kontan. Nan pwen pi gwo vyolans lè you moun ap soufri nan lespri li, lè li pa alèz lè kè l pa poze.

*KONKLISYON*

Vyolans nan fanmiy, gen anpil bagay ke nou ta dwe di ki pa di, nou wè sèlman twa aspè. Nou touche twa aspè sa yo ke nou jije sansib anpil. Sa nou dwe konnen kòm fanmiy chretyen, nou se limyè ak sèl sou tè a (Mat. 5:13). Nan tout sa nap fè nan vi nou, nou dwe you modèl. Si ta gen kèk bagay nou wè atravè leson sa a nan fanmi nou ki pa byen, ann korije yo. Konsa, Bondye ap jete benediksyon l sou nou.

*DEVWA YO*

1- Kisa ki you fanmiy nikleyè ?

2- Poukisa mari ak madanm gen pou misyon pou viv ansanm ?

3- Kòman you fanmiy dwe viv ?

4- Site reskonsabilite chak manm nan fanmiy lan dwe genyen.

5- Ki kote renmen dwe ye an premye ?

6- Kisa ki premye Legliz la ?

7- Ki valè you pawòl dous genyen daprè liv pwovèb la ?

8- Kisa vyolans nan finans lan ye ?

9- Kisa mityalite a ye ?

10- Kisa neglijans ye ?

11- Kisa jeremi 48:10 anseye nou ?

12- Nan ki domèn nan lavi ou vyolans te konn manifeste ?

*REPWODIKTÈ*

*Joseph Sophony POPULAIRE*
*Pastè Legliz Batis Fliyo/ Aken*
*Tél.: (+509) 46856368 / 33547608*

29/11/2025

*LESON DOMINIKAL 30 NOVANM 2025*

*Tit: Vyolans nan kèk domèn*

*Lekti: 1 Tesalonik 5:9-13*

*Tèks dò:*
*Se poutèt sa, annou youn ankouraje lòt, youn ede lòt, jan nou deja ap fè I la. 1 Tesalonik 5:11*

*Entwodiksyon:*
Nou chwazi tèks *1 Tesalonik* pou ilistre leson nou jodi a. Li pale sou yon domèn byen detèmine. Li pale sou kòman nou dwe konsidere moun ki bò kote nou, moun k ap travay nan mitan nou.

Jan nou te wè I nan leson pase a, vyolans se yon fè sosyal inivèsèl. Nou jwenn li manifeste nan plizyè domèn. Vi moun menm make ak vyolans. Nou rankontre vyolans tout kote nan fanmiy, legliz, nan travay. Vyolans gen anpil konplikasyon ladan I. Kote vyolans ye, li fè yon enpak kolektif, endividyèl. Se yon fòm dezòganizasyon sosyal, se yon move pwodwi, li kreye dezòd tout kote I manifeste. Nan seri leson nou, ki pa yon etid sistematik sou vyolans, n ap wè youn nan kote li manifeste, tou, se nan relasyon youn ak lòt.

Nan relasyon youn ak lòt, nou ka jwenn vyolans manifeste sou fòm sa yo:

a) Sikolojik,

b) Vèbal,

c) Fizik

Ki repons Bib la bay a eleman sa yo, lè moun ap sibi vyolans sou aspè sa yo.

*I. Vyolans Sikolojik*
Bib la mande pou n pa vyolan, pou nou pa agresif. Gen moun ki pa fè vyolans vèbal ak fizik sou moun, men li fè I soufri. Fòm soufrans sa a di anpil. Li atake moun nan mantal li, li kapab fè moun nan toujou ankòlè, rann li angwase, atriste. Fòm vyolans sa yo rele tou vyolans senbolik. Fizikman, ou pap wè tras, men, li fè anpil dega nan lavi moun k ap sibi I se yon fòm vyolans kalm, dous ki trè grav. Pa egzanp monte vwa w sou moun, fè bri sou moun, ba moun move rega. Vyolans ki pa fè bri, ki pa parèt deyò, atake souvan entegrite fizik, psikolojik moun k ap sibi I la. Ann wè sa Bib la di nan Efèz 4:1. Nou dwe sipòte youn lòt. Sipòte siyifi tolere epi menm andire kèk aksyon ak pawòl lakay yon moun nan kèk domèn. Ann pa fè vyolans sou moun. Pa di moun nenpòt pawòl, pa ba moun move rega pa fè bri sou moun. Ann pran prekosyon nan jan ke nou ap trete ak moun ki bò kote nou, sitou ak manm fanmiy nou.

*II. Vyolans vèbal (Women 12:10)*
Gen manyè pou moun pale ak moun. Gen bagay ou pa di moun. Gen manyè pou patwon pale ak anplwaye, gen manyè pou pwofesè pale ak elèv li. Gen manyè pou mari pale ak madanm li, pitit li (resipwòkman). Vyolans vèbal se yon malè pandye. Bib la mande pou n gen afeksyon youn pou lòt. Nan relasyon moun ak moun, nan lang franse a yo pale de "Relations interpersonnelles". Nou dwe gen respè. Nan manyè n ap eksprime nou, lanmou dwe domine. Nou dwe gen pasyans youn pou lòt. Youn anvè lòt. Nou vle di pa wè tèt nou anvan, wè moun ki anfas ou a byen. Wè èske w renmen moun rele sou ou. Konsa, sa ou pa renmen pou tèt ou, ou pa ka renmen I pou moun ki bò kote w, moun w ap viv avè I. Akote agresyon, vyolans vèbal gen tou vyolans fizik.

*III. Vyolans fizik (Galat 5:15)*
"Ne vous mordez pas les uns, les autres" Annou youn pa mòde lòt, nan yon tradisyon mo a, mo mòde se yon vyolans fizik men nan Galat 5:15 siyifikasyon pa agresyon fizik, li plis moral, li plis kou nan do, ipokrizi. N ap wè konsekans yon tèl aksyon kapab pwodwi nan kad vèsè a, nou wè 2 gwoup moun ki te anfas yon gwoup ki t ap fè pwomosyon lalwa, yon lòt ki t ap fè pwomosyon lagras. An Ayiti nou wè kòman moun pa ka ini yo, kòman 2 gwoup lè yo anfas, konn gen vyolans nan mitan yo.

Sa nou vle anseye nan leson sa a, Bondye pa vle vyolans sou nenpòt fòm li vini, vyolans fizik pa bon. Annou fè efò pou n pa gen pratik sa a nan vi nou. Efèz 4:32 nou dwe bon youn ak lòt.

*Konklizyon:*
Vyolans se yon sijè ki gen anpil paramèt. Nou jwenn li sou plizyè fòm, nan tout domèn: "Nan legliz, nan fanmiy, nan travay, nan lekòl, nan lari" etc. Sa nou dwe konnen, noumenm, ki se moun sove, ki fè lapè ak Kris, nou pa dwe vyolan. Nou dwe byen viv ak moun ki bò kote nou, nou dwe aji avèk lanmou. Pa fè presyon sou madanm ou, pitit ou, mari ou, frè w, sè w, travayè ou, Bib la pa di nou, pa pran desizyon ki fò. Men nou dwe toujou gade limit nou. Pa janm pèdi kontwòl tèt nou.

+18493598495 (Gwoup watsap)

Referans: Reyon limyè 2025
Reekri pa: Josué JEAN PIERRE
(El negro de Dios)

Devwa yo:

1. Lè vyolans yon kote kisa li fè?

2. Site kèk fòm vyolans manifeste.

3. Kisa vyolans sikolojik la ye?

4. Kisa vyolans vèbal la ye?

5. Nan twa kalite vyolans yo, kilès yon kretyen ka pratike.

6. Kisa vyolans fizik la ye?

7. Bay kék egzanp kòman moun konn pratike fòm vyolans sa yo.

8. Kisa vyolans senbolik la ye?

9. Kisa ki dwe domine lè n ap pale youn ak lot?

10. Kisa leson sa anseye w pèsonèlman?

Jean Gardy Auguste Clesidor Renald Naika Sanon @à la une @