01/12/2025
🙏🏻🙏🏻🙏🏻
好想同大家分享一個, 可能係最奇怪嘅遣散大會
嗯, 我地岩岩星期日有個員工活動, 係遣散大會。因為隨住我地日益增加嘅社關開支, 照顧嘅人越黎越多, 我地已經可以肯定出唔哂完整11月人工俾同工們, 而12月都唔知點應付。所以最後我地認為, 最負責任嘅做法, 就係直白陳述機構情況, 等大家作個決定, 決定自己事奉上嘅去留, 願意離開嘅可以確保得到完整11月人工。香港人人生活都有壓力, 事奉者都一樣, 所以離開都係好正常嘅決定。
結果, 出奇地我地有接近100位同工選擇留低, 不斷重覆問佢地知唔知自己落左個咩決定, 一再重申呢條路唔易行, 最後都無一個改變主意。 因為佢地都唔想離開呢個群體, 唔想離開佢地陪緊嘅街坊, 想盡力留得幾耐就得幾耐。而最最最最意想不到嘅位係, 當中仲有幾位係到做左段時間嘅同工, 係呢個時候大聲咁講佢地要決志信主, 其中一位仲大聲舉手講, “我信! 我忍左好耐想講架啦!”, 仲要唔止一位, 而係一位接一位咁決志, 果下我真係呆左, 之後就聽到大家嘅歡呼聲同掌聲。為咩會係一個聽完自己可能會無糧出, 可能要再搵工嘅情況下, 一個要決定去留嘅沉重大會上, 去落呢個決定呢? 上主真係獨行奇事。
不過明天起, 我地營運上都會有D轉變。因為最後都有部份同工要負責任地另覓出路, 所以我地人手要重新整合,
所以由明天起:
土瓜灣鋪 及 大角咀鋪
餐廳營運會無限期暫停, 只做社關服務直到有足夠人手為止。
而觀塘同牛頭角同埋其他飯盒服務會保持運作。
我地會盡全力保住所有事工, 但不論長者送飯, 難民支援, 戒毒更新及宿舍, 職業培訓等等, 我地到目前為止都得唔到任何政府支助, 而黎到我地到嘅人, 卻越黎越多人。我地唔放棄, 因為同工同受惠人都仍然有盼望, MANNA會越黎越好。
係呢到, 反正都可能行到最後一里路, 我就寫得赤裸D光豬D。我希望大家可以持續支持我地整個機構社關事工, 我地好希望可以得到大家嘅支持, 包括:
1. 長期奉獻
2. 一部二手7人車 (我地更新事工多行動不便嘅戒毒人仕, 同埋接送物資)
3. 一個免租工廈單位 (我地二手物資存放 及 手工整作班WorkShop)
4. 義工, 葵涌工場早上8點30分到10點30分, 長者送飯需要穩定包裝工友, 可有津貼, 歡迎無經驗朋友或者精明媽咪
會睇到呢到嘅朋友, 我相信都大約了解我地事工做咩, 所以唔係到多講, 但如果都想再了解多D, 可以PM我地, 我地願意慢慢介紹俾大家知, 到底大家係支持緊一件點樣嘅事。
所以個遣散大會失敗左, 最後變成一個集體敬拜, 重新出發嘅誓師大會。但可以再行幾遠, 就睇上主決定啦。
#可能係香港唯一一個
#遣散失敗大會
#其實都有好多香港人支持緊我地
#只係我地唔生性
#想持續同更多人同行
