Malagasy mianatra Deen

Malagasy mianatra Deen Informations de contact, plan et itinéraire, formulaire de contact, heures d'ouverture, services, évaluations, photos, vidéos et annonces de Malagasy mianatra Deen, Centre religieux, Aix-en-Provence.

Ny fahasamihafana fototra eo amin'ny fisian'i Allah sy ny fisian'ny zava-boahary.Io lohahevitra io dia afaka azavaina am...
19/08/2026

Ny fahasamihafana fototra eo amin'ny fisian'i Allah sy ny fisian'ny zava-boahary.

Io lohahevitra io dia afaka azavaina amin'ny alalan'ireto teboka roa ireto:
1- Voalohany: Araka ny fanazavana tany aloha, dia zava-boahary avokoa ny fisian'ny tontolo hita maso rehetra — eny, na dia ny tontolo ara-panahy toy ny fisian'ny anjely aza —, izany hoe fisiana miankina tanteraka amin'ny Hafa izay nanome azy ny fisiana (sy ny faharetan'izany fisiana izany eo aminy).

2-Faharoa: Ny Hafa izay nanome izany fisiana izany, araka ny lojika ara-tsaina, dia mahaleo tena tanteraka amin'ny fisiany (efa nazavaina tany aloha ny antsipiriany momba izany).

Fehiny:
Ny fisian'izao rehetra izao dia fisiana miankina amin'ny Hafa mandrakariva, fa kosa ny fisian'Ilay Hafa izay iankinany dia tsy maintsy mahaleo tena tanteraka Izany amin'izany.

Io fanambarana io dia mifanaraka amin'izay voalazan'ny Finoana Silamo momba ny fisian'i Tompo Allah — Ilay Tsitoha —, araka izay hita ao amin'ny:
1. Boky Kora'any Masina:
• Surah Ash-Shura, andininy faha-11:
((لَيْسَ كَمِثْلِهِ شَيْ‌ءٌ))
« Tsy misy na inona na inona ka mitovy Aminy. »

• Surah Fatir, andininy faha-15:
((يا أَيُّهَا النَّاسُ أَنْتُمُ الْفُقَراءُ إِلَی اللَّـهِ وَ اللَّـهُ هُوَ الْغَنِيُ الحميد))
« Ry olombelona! Ianareo no mahantra sy miankina tanteraka amin'i Allah (mila Azy amin'ny zavatra rehetra), fa i Allah kosa no Tsy Miankina sy Ampy ho an'ny Tenany, ary Mendrika ny Fiderana Rehetra. »

2. Hadita (Ahadith):
• Voaray tamin'i Imam Ali ibn Musa al-Rida (A.S.), avy amin'ny rainy, avy amin'ireo raimbeny, avy amin'ny Amir al-Mu'minin Ali (A.S.), fa nilaza ny Mpaminany (S.A.W.):
« Nilaza i Allah Ilay Avo Indrindra sy Manana ny Voninahitra rehetra: (Tsy tena mahalala Ahy izay olona mampitovy Ahy amin'ny zava-boahariko)»
(At-Tawhid, nosoratan'i Cheikh As-Saduq, pejy 68)

• Nilaza i Amir al-Mu'minin Ali ibn Abi Talib (A.S.):
« Ny fiderana rehetra dia ho an'i Allah, Izay mampiseho ny fisiany amin'ny alalan'ny zava-boahariny, ary mampiseho ny maha-Mandrakizay Azy amin'ny alalan'ny fipoiran'ny zava-boahariny taty aoriana. »
(Nahj al-Balagha, pejy 211, Lahateny faha-152)

• Nilaza i Abu al-Hasan, Imam al-Rida (A.S.):
« Ary raha nanontany azy ilay lehilahy hoe: (Ambarao amiko, oviana Izy no teo (nisy)?)
Namaly azy i Abu al-Hasan (A.S.): (Ambarao amiko aloha hoe: oviana Izy no TSY TEO, ka hambarako anao hoe oviana Izy no teo?)»
(Al-Kafi, Volume 1, pejy 78).

Nanoratra: pejy Malagasy mianatra Deen.

Araka ny fijerin'ny Finoana Silamo izay voarakitra ao amin'ny Kor'any Masina, dia anisan'ny fampianarana lehibe naniraha...
17/08/2026

Araka ny fijerin'ny Finoana Silamo izay voarakitra ao amin'ny Kor'any Masina, dia anisan'ny fampianarana lehibe nanirahana ireo Mpaminany sy Iraka ho an'ny olombelona ny famporisihana lalandava ny olona hisaina, ary ny fampandrisihana azy handinika lalina ny momba ny tenany sy izao rehetra izao.
Heverina ho fototra voalohany amin'ny Finoana Silamo izany amin'ny fiantsoany sy ny fandreseny lahatra ny olona handray ny fampianarany — amin'ny alalan'ny fampiasana voambolana amam-pomba fiteny samihafa sy amin'ny endrika miverimberina ao amin'ireo andininy masina.

Ny mikasika an'i Allah sy ny toetrany dia iray amin'ireo foto-kevitra nampahatsiahivin'ny Kor'any Masina indrindra ny olombelona, amin'ny alalan'ny fampandrisihana ny fampiasana ny saina handinika ireo zava-mahagaga ao amin'izao tontolo izao izay voarafitra amin'ireo lalàna mirindra sy hita maso, ary koa amin'ny alalan'ny fandinihana ny tenany sy ny maha-izy azy. Izany dia hita amin'ny alalan'ireo andininy roa amby efatrapolo sy roan-jato (244) ao amin'ny Kor'any Masina, mba ho fampahatsiahivana sy fanairana ny sain'ny olombelona.
Iray amin'ireo andininy ireo ity andininy ity:
* Sourah Al Baqarah: andininy (164)
((إِنَّ فِي خَلْقِ السَّماواتِ وَ الْأَرْضِ وَ اخْتِلافِ اللَّيْلِ وَ النَّهارِ وَ الْفُلْكِ الَّتِي تَجْرِي فِي الْبَحْرِ بِما يَنْفَعُ النَّاسَ وَ ما أَنْزَلَ اللَّـهُ مِنَ السَّماءِ مِنْ ماءٍ فَأَحْيا بِهِ الْأَرْضَ بَعْدَ مَوْتِها وَ بَثَّ فِيها مِنْ كُلِّ دَابَّةٍ وَ تَصْرِيفِ الرِّياحِ وَ السَّحابِ الْمُسَخَّرِ بَيْنَ السَّماءِ وَ الْأَرْضِ لَآياتٍ لِقَوْمٍ يَعْقِلُونَ))

Dikany:
«Hamafisina, fa amin'ny famoronana ny lanitra sy ny tany manontolo, sy ny fifandimbiasan'ny alina sy ny andro, ireo sambo izay mikorisa eny amin'ny ranomasina mitondra izay mahasoa ny olombelona, sy ny ranon'orana izay ampidinin'i Allah avy any an-danitra ka anomezany aina indray ny tany aorian'ny nahafatesany, sy ny famparitahany eny aminy ny karazana biby rehetra, sy ny fitarihana ny rivotra ary ny rahona ampiasaina eo anelanelan'ny lanitra sy ny tany; dia tena porofo famantarana tokoa izany ho an'ireo olona mampiasa ny sainy».

Araka ny firafitry ny lahatsoratra amin'ity andininy ity dia tonga amin'ny endrika fanehoana porofo momba izay voarakitra ao amin'ny andininy teo alohany — dia ny hoe manana Tompo (Allah) tokana izao rehetra izao, ary Izy Ilay Tokana Mpamindra fo (Rahman) izay mandrotsaka ampitahatra ny famindram-pony ho an'ny rehetra, ary Be Fiantrana (Rahim) izay mitarika mankany amin'ny fahasambarana amin'ny fiainana any ankoatra; Izy no Tomponareo, ary tsy misy Tompo tena izy sy marina mendrika ho tompoina afa-tsy Izy irery ihany.
Ary ity andininy ity dia maneho izany amin'ny alalan'ny foto-kevitra lehibe efatra:
1- Voalohany: Ny Famoronana
2- Faharoa: Ny Fifandimbiasan'ny alina sy ny andro
3- Fahatelo: Ny Firotsahan'ny orana, izay miteraka ny famelomana indray ny tany sy ireo biby, zava-manan'aina rehetra.
4- Fahaefatra: Ny Fitarihana ny rivotra, ary ny rahona.

Nanoratra: pejy Malagasy mianatra Deen.

Ny fahalalana ireo lalàn’ny fizika dia tsy manafoana velively ny filana ontology momba ny Mpahary fototra iorenan’ireo l...
12/08/2026

Ny fahalalana ireo lalàn’ny fizika dia tsy manafoana velively ny filana ontology momba ny Mpahary fototra iorenan’ireo lalàna ireo.
Afaka hazavaina izany hevitra izany amin'ny alalan'ireto teboka ireto:

1- Voalohany: Ny filan'ny lalàna fitoerana ara-pita.
Mba hahatonga ireo lalàna ireo ho afaka miasa sy hisy fiantraikany manokana, dia mitaky ny fisian'ny fotoana, ny habaka, ny hery ary ny matiera izy ireo. Tsy ara-dôjika anefa ny hiheverana fa ireo lalàna ireo ihany no namorona ireto singa efatra ireto, kanefa ny fisian'ireo lalàna ireo amin'ny maha lalàna azy dia miankina tanteraka amin'ny fisian'ireo singa ireo aloha mba hahafahan'izy ireo misy fiantraikany.

2- Faharoa: Ny filan'ny lalàna Mpanorina na Saina mpametraka.
Mizotra araka ny rafitra tena mirindra sy milamina izao rehetra izao, ka avy amin'izany no iterahan'ny zava-mitranga samihafa toy ny fiainana. Fa kosa, ny fandrindrana ireo lalàna mifehy izao tontolo izao amin'ny fomba sy fandrefesana manokana nahatonga ny fisian'ireo tranga samy hafa ireo dia mitaky ny fisian'ny Antoko Manan-tsaina nampisy azy amin'izany endrika izany.
Ohatra: Ny fandalinana ny mekanisma na ny fomba fiasan'ny fitaovana iray sy ny fahafehezana izany dia tsy manafoana velively ny filana ilay Injeniera namolavola sy nandrafitra izany mekanisma izany mba hahatonga ilay fitaovana hiasa.

3- Fahatelo: Ny filana fototry ny Vokatra amin'ny Anton'ny Fisiana.
Ny filan'ny vokatra (effet) ny Anton'ny Fisiana (Cause) dia filana fototra eo amin'ny maha izy azy, izay mitohy eo amin'ny fiforonany voalohany sy ny faharetany, ary tsy afa-misaraka aminy na dia indray mipi-maso aza. Ka noho izany, izao rehetra izao manontolo dia vokatra izay tsy afaka misaraka amin'ny Mpahary—Ilay mamatsy azy ireo lalàna ireo.

* Ny voalaza ao amin'ny Kor'any:
1. Sura Luqman (31:25):
((وَ لَئِنْ سَأَلْتَهُمْ مَنْ خَلَقَ السَّماواتِ وَ الْأَرْضَ لَيَقُولُنَّ اللَّـهُ قُلِ الْحَمْدُ لِلَّـهِ بَلْ أَكْثَرُهُمْ لا يَعْلَمُونَ))

«Ary raha anontanianao izy ireo hoe: «Iza no nahary ny lanitra sy ny tany? »,Dia hiteny tokoa izy ireo hoe: «Andriamanitra (Allah)», Teneno hoe: «Dera ho an'i Andriamanitra!» Saingy ny ankamaroan'izy ireo dia tsy mahalala».

2. Sura Az-Zukhruf (43:9):
((وَ لَئِنْ سَأَلْتَهُمْ مَنْ خَلَقَ السَّماواتِ وَ الْأَرْضَ لَيَقُولُنَّ خَلَقَهُنَّ الْعَزِيزُ الْعَلِيمُ))
«Ary raha anontanianao izy ireo hoe: «Iza no nahary ny lanitra sy ny tany?» hiteny tokoa izy ireo hoe: «Ilay Mahery sy Mahalala ny zavatra rehetra no nahary azy ireo».

Nanoratra pejy Malagasy mianatra Deen.

Iray amin'ireo porofo ara-tsaina manamarina ny fisian'Ilay Namorona izao rehetra izao ny «Porofon'ny Rafitra sy Lamina (...
07/08/2026

Iray amin'ireo porofo ara-tsaina manamarina ny fisian'Ilay Namorona izao rehetra izao ny «Porofon'ny Rafitra sy Lamina (Argument of Design)» na «برهان النظم والضبط الدقيق».
Afaka hazavaina amin'ny alalan'ireto teboka ireto izany:
• Voalohany (Premise I): Ny tontolo ara-boajanahary, araka ny fandinihana ara-tsiansa sy ara-pandrenesana mivantana, dia milahatra araka ny rafitra sarotra, feno ary mirindra, izay mizotra mankany amin'ny tanjona manokana.
Oh. (I)- Ny firindran'ny zotra sy ny fizotrany (Sens de rotation et d'orbite):
Ny fihodinan'ny Tany amin'ny tenany (rotation propre) sy ny fihodinany manodidina ny Masoandro (révolution orbitale) dia mifanaraka tanteraka amin'ny fihodinan'ny Masoandro amin'ny tenany. Izao fihodinana mifanaraka amin'ny fihagandron'ny famantaranandro mivadika izao (prograde / sens anti-horaire, avy any Andrefana mankany Atsinanana) dia manamarina fa avy amin'ny rafitra sy rahona entona ary vovoka iray ihany (nébuleuse solaire) no niforonan'ny Masoandro sy ny Tany.

Oh. (II)- Ny atidoha dia manana sela ambaony miliara maro mampita hafatra amin'ny alalan'ny fahazavana sy simia (influx nerveux) amin'ny hafainganam-pandeha mahagaga, izay mandray ny fampahalalana avy amin'ny fitaratry ny maso, ny sofina, ny hoditra izy, mandika izany eo no ho eo, ary mandefa ny valiny any amin'ny hozatra mifanaraka amin'izany mba hahafahanao mihetsika na miteny.

• Faharoa (Premise II): Araka ny fitsipiky ny lojika ara-tsaina mazava sy ny antony, ny rafitra sy ny filaharana dia tsy afaka hivoaka avy amin'ny zavatra tsy manana rafitra na avy amin'ny kisendrasendra; ny zavatra iray izay tsy manana toetra kanto na rafitra dia tsy afaka miteraka rafitra kanto sy mirindra.

• Fehin-kevitra (Fehin-kevitra): Noho izany, ny fisian'ny rafitra mirindra tsara dia mitaky mazava ny fisian'ny Saina Mpandamina sy Mpamorona Voalohany, Izay manana sitrapo, fahalalana feno, fahefana tsy voafetra, ary fahendrena lehibe.

> Andinina vitsivitsy nalaina tao amin'ny Kor'any:
* «أفي الله شكّ فاطر السماوات والأرض»
«Moa ve misy fisalasalana momba an'i Allah, Ilay Mpamorona ny lanitra sy ny tany?»
(Surah Ibrahim: 10).

** «سنريهم آياتنا في الآفاق وفي أنفسهم حتى يتبيّن لهم أنه الحقّ، أولم يكف بربّك أنه على كلّ شيء شهيد»
«Hasehonay azy ireo ny famantarana momba Anay eny amin'izao rehetra izao, ary ao amin'ny tenan'izy ireo, mandra-pahatongan'ny hahalalan'izy ireo mazava fa Izany no fahamarinana. Moa ve tsy ampy amin'ny Tomponao ny maha Vavolombelon'ny zavatra rehetra Azy?».
(Surah Fussilat: 53)

*** «أم خلقوا من غير شيء أم هم الخالقون»
«Sa nohariana avy amin'ny tsy misy ve izy ireo, sa izy ireo ihany no mpamorona?».
(Surah At-Tur: 35).

Nanoratra: pejy Malagasy mianatra Deen.

** Fanontaniana: Nahoana ny olombelona no mila ny Finoana avy amin'ny Allah? * Valiny: Ny filan'n...
30/07/2026

** Fanontaniana:
Nahoana ny olombelona no mila ny Finoana avy amin'ny Allah?

* Valiny:
Ny filan'ny olombelona ny Finoana (Silamo) dia miorina amin'ny fisian'ny filana ny filozofian'ny fiainana sy ny fisiana.
Azo hazavaina amin'ny alalan'ireto teboka ireto io filazana io:
Teboka voalohany:
Zava-dehibe ny fananan’ny olombelona fahatakarana lalina momba ny fototry ny fiainana, ny fisiana sy ny tanjony, ary ny fiafarany.
Io filana io dia tsy fisainana noforonina avy ety ivelany, fa mipoitra avy amin’ireo fanontaniana lehibe voajanahary (Fitrah) sy fototra mifamatotra amin’ny maha-izy azy ny olombelona (Al-As’ilah al-Wujudiyyah).
Izany fanontaniana izany dia:
1. Avy taiza? (Ny Ontolojia sy ny Mabda'):
Fanontaniana mikasika ny Loharano nisian'ity fiainana ity sy izao rehetra izao.
2. Ao amin'ny inona (na Aiza)?:
Fanontaniana mikasika ny tanjon'ity fiainana ity sy ny lalana tonga lafatra tokony hizoran'ny olombelona mba hanatratrarana izany tanjona izany.
3. Ho aiza?:
Fanontaniana mikasika ny hoavin'ity fiainana ity, ao anatiny amin'izany ny hoavin'ny olombelona sy ny fiafarany.

Raha tsy manana ny valin-teny mazava amin'ireo fanontaniana ireo—izay fototra iankinan'ny filozofian'ny fiainana—ny olombelona, dia very ao anatin'ny fiainana foana sy tsy misy dikany.

Teboka faharoa:
Ny famaritana ny rafitra sy fitsipika iray entina mandamina ny fitondran-tena ary ny fiarahamonin'ny olombelona amin'ny ankapobeny—na amin'ny fotoana ankehitriny izany na amin'ny hoavy—dia mandidy ny fahatakarana mialoha ny filozofian'ny fiainana, mba ho mifanaraka tsara amin'ny tanjon'ity fiainana ity izany rafitra izany.

Teboka fahatelo:
Ny Finoana (Silamo) dia tsy tonga afa-tsy ny hamaly ireo fanontaniana lehibe sy fototry ny fisiana ireo, izay tsy hisy sehatra na taranja hafa afaka hamaly feno sy mazava ankoatra azy - ny siansa na lalàna ara-iolombelona tsy hahatratra izany feno noho izy voafetran'ny fizika sy ny zava- hita maso fotsiny kanefa fa ny fanontaniana ara-pisiana dia mihoatra ny fizika - satria ny Finoana (Silamo) dia fitambaran'ny:
• Fanazavana mikasika izao fiainana izao sy ny fisiana: ny niandohany, ny hiafarany, ny tanjona aminy, ary ny anjara toeran'ny olombelona amin'izany, izay antsoina hoe fototra iorenan'ny Finoana (Usul ad-Din).
• Rafi-pitondran-tena mazava sy ireo fitsipika ara-piarahamonina mitondra ny olombelona mankany amin'ny tanjon'ny fisiany, izay antsoina hoe rantsa-pinoana (Furu ad-Din) miorina amin'ny fototra.

Fehiny:
Manana filana voajanahary hafantatra ny filosofia ny fiainana sy ny tanjony aminy ny olombelona, mialoha ny hametrahana ny ara-pitondran-tena sy ny fitsipika ara-piarahamonina, ary ny Finoana (Silamo) dia tonga mba hamaly izany filana izany amin'ny alalan'ny fanomezana fanazavana feno sy mazava ary mifanaraka amin'ny logika ny sain'olombelona mikasika an'izany sy rafi-pitsipika mifanaraka aminy izay mitondra azy mankany amin'izany tanjona izany.

* Ho arahinao eto @ pejy ny fanazavana mivelatra, miaraka amin'ny porofo, izay voalaza amin'io teboka fahatelo farany io.
Nanoratra: pejy Malagasy mianatra Deen.

** Fanontaniana:Inona izany Finoana Silamo izany?Valiny: Efa hatramin'ny ela teo amin'ny tantaran'ny olombelona n...
26/07/2026

** Fanontaniana:
Inona izany Finoana Silamo izany?

Valiny:
Efa hatramin'ny ela teo amin'ny tantaran'ny olombelona no nahitana ezaka maro hamaritana sy hanazavana ireo lafiny maro momba an'izao fiainana/fisiana izao, na teo amin'ny lafiny ara-pikarohana izany na eo amin'ny lafiny fifampitondrana eo amin'ny samy mpiara-belona, toy ny hita miharihary amin'ny fandinihana ireo fitsipika sy lalàna nifampifehezana teo amin'ireo fiarahamonin'olombelona maro samihafa.
Tsy maningana amin'izany ny Finoana Islamika (Silamo) satria, raha ny marina, dia tsy inona izany fa fomba famakiana izao tontolo izao avy amin'Allah — Ilay Tsitoha — izay manazava ireo lafin-javatry ny fisiana amin'ny alalan'ny fanamafisana ireto singa lehibe telo ireto:

• Voalohany: Ny fisian'ny Allah - Ilay avo Indrindra - Mpiahy ny olombelona, izay manana toetra manokana mampiavaka Azy.

• Faharoa: Ny hafatra avy Aminy ho an'ny olombelona, izay mirakitra ireo fampianarana momba an'izao fisiana izao sy ireo torolalana momba ny fitondran-tena mahitsy, amin'ny alalan'ny fametrahana lalàna mandamina ny fiainan'ny olon-tokana sy ny fiarahamonina; satria ny fiainana maha-olombelona, araka ny fomba fijery ara-pinoana, dia fiainana misy tanjona manokana.

• Fahatelo: Ny faharetan'ny olombelona aorian'izao fiainana izao, amin'ny fahasambarana na amin'ny fahoriana, araka ny haavon'ny fahalalany an'Allah — Ilay Avo Indrindra — sy ny fitondran-tena tsara mifanaraka amin'izany eto amin'ity fiainana ity; satria amin'ny fijery ara-pinoana, ny olombelona dia tsy zavatra ara-nofo fotsiny ihany izay levona amin'ny fahafatesana, ary ny fahafatesana dia tsy inona fa dingana iray amin'ireo dingan'ny fisiany.

Ary amin'ny fomba fohy kokoa: Ny Finoana Islamika (Silamo) dia fitambaran'ireto lafiny roa lehibe ireto:
• Voalohany: Ny lafiny ara-pahalalana sy teôria.
• Faharoa: Ny lafiny fampiharana, izay ahitana fototra roa: ny lalàna ara-pinoana sy ny fitondran-tena (môraly sy etika).

* Ireto misy andininy vitsivitsy hita ao amin'ny Boky masina Kor'any ahitana ireo voalaza ireo:

1-Ny Andininy Voalohany (Surat Al-Baqarah: 177)
«Tsy ny hitodihan'ny tarehinareo mankany amin'ny Atsinanana sy ny Adrefana no fahatsarana (al-Birr), fa ny tena fahatsarana marina dia ny finoana an'Andriamanitra, ny Andro Farany, ireo Anjely, ny rakitsoratra ary ireo Mpaminany; sy izay nahafoy ny fanomezana ny harena — na dia eo aza ny fitiavana izany — ho an'ireo havana akaiky, ny kamboty, ny mahantra, ny mpivahiny, ireo mpangataka, ary ho fanavotana ireo mpanompo sy babo; ary ny fanatanterahana ny Swalat sy ny fanomezana ny Zakat; sy ireo manaja ny fifanekena nataony rehefa nifanaiky, ary ireo miaritra am-paharetana ao anatin'ny sarotra sy ny voina, ary rehefa tra-pahoriana. Ireo no olon'ny fahamarinana, ary ireo no tena mpiahy tena sy manana ampinga ara-panahy (al-Muttaqun).»

2-Ny Andininy Faharoa (Surat Al-Baqarah: 277):
«Hamafsina fa tsy maintsy hahazo ny valisoany any amin'ny Tompony ireo izay mino sy manao asa tsara, ary manatanteraka ny Swalat (fivavahana) sy manome ny harena fiantrana(Zakat) ary tsy hisy tahotra hahazo azy ireo, no tsy halahelo koa izy ireo.»

3-Ny Andininy Fahatelo (Surat An-Najm: 39-41):
«Ary raha ny marina dia araka izay fiezahan'ny olombelona ihany no azony * ary hamafisina fa ny fiezahany ihany no haseho azy [amin'ny andro fitsaganana] * avy eo dia homena valisoa feno tanteraka izy.»

Nanoratra: pejy Malagasy mianatra Deen.

* Fanontaniana: Fa maninoa isika no tokony hahafantatra an'i Allah? * Valiny:Anisany porofo ara-tsaina mamporisika an...
22/07/2026

* Fanontaniana:
Fa maninoa isika no tokony hahafantatra an'i Allah?

* Valiny:
Anisany porofo ara-tsaina mamporisika antsika hahafantatra an'i Allah dia «ny tsy maintsy hanalana sy hanakanana ny loza mety hisy hateraky ny famelana ny fahafantarana Azy», izay antsoina eo amin’ny tontolo Islamika hoe: «وجوب دفع الضرر المحتمل».
Fanazavana izany amin'ny alalan'ireto teboka ireto:
• Voalohany: Ny Porofo Ara-tantara
Fantatra teo amin'ny tantara fa nisy vondron'olona niavaka tamin'ny fahatsorana, ny fahamarinana ary ny ny fahitsiana izay nilaza fa misy Ilay Nahary niandohany izao zavatra rehetra izao, izay antsoina hoe «Allah», ary izy ireo no iraka sy solontenany amin'ny fampitana ny hafatra.
Niaritra fijaliana amin'ny endrika maro izy ireo mba hampitana izany hafatra izany, ary
nampitandrina ny amin'ny fijaliana ateraky ny famelana ny fahafantarana Azy.

• Faharoa: Ny saina sy ahiahy
Io fanambarana io anefa dia ampy hiteraka ahiahy momba ny loza mety hitranga ateraky ny famelana ny fahafantarana Azy.
Afaka atao tsara anefa ny misoroka izany loza mety hitranga izany.

• Fahatelo: Ny Fitsipiky ny Saina manoloana ny ahiahy
Mandidy ny lojika madio sy ny fisainana lalina fa rehefa misy ny loza mety hitranga dia andraikitra tsy azo ihivirana ny fisorohana izany, ary io fitsipiky ny lojika ara-tsaina io dia mihatra na dia kely aza ny ahiahy amin'ny fahafahana hitrangan'izany, satria ny loza mety hisy eto dia tena lehibe tokoa; noho izany dia ampy mba hanamarihana ny fitsipiky ny lojika ara-tsaina amin'ny tsy maintsy fanalana izany loza izany, na dia kely aza ny fahafahana hitrangany.
Ny hany fomba tokana hanalana sy hisorohana izany loza izany anefa dia ny fidirana amin'ny fikarohana sy ny fandalinana ara-tsaina momba ny mety ho fahamarinan'io Hafatra sy Ilay Nahary io.

Fehiny:
Noho izany, ny fikatsahana fahalalana momba an'i Allah dia andraikitra ara-tsaina fototra (Wajib Aqli). Ny sain'ny olombelona madio dia tsy afaka manamarina ny fanaovana tsinontsinona io fikarohana io, satria ny haben'ny loza mananontanona amin'ny tsy fahalalana Azy dia mandresy ny fisalasalana rehetra.

Nanoratra: pejy Malagasy mianatra Deen.

Misy ny mihevitra fa ampy fotsiny ny fananana toetra tsara sy fo madio, ka mandray ny Finoana (Silamo) sy ny fampiharana...
17/07/2026

Misy ny mihevitra fa ampy fotsiny ny fananana toetra tsara sy fo madio, ka mandray ny Finoana (Silamo) sy ny fampiharana ny didy ao aminy ho tsinontsinona na ho ambintsika fotsiny ihany.

Io fomba fijery io anefa dia mirakitra fahadisoana roa lehibe:
Voalohany: Ny Fahadisoana ara-Pahafantarana (Erreur Épistémologique) amin'ny famaritana ny Finoana(Silamo).

Satria io fiheverana io dia mametraka ny Finoana (Silamo) ho amin'ny endrika asa fanompoana fotsiny ihany, toy ny fanom-pivavahana (swalat), ny fanatanterahana ny fivahinianana masina (hajj), ary ny fifehezana (sawm)... sns, nefa fandavana ny maha-izy azy manontolo ny Finoana(Silamo) izany, satria na dia singa iray ao anatin'ny Finoana(Silamo) aza ny asa fanompoana, dia misy singa hafa manan-danja ankoatran'izany.
Raha ny fandalinana ara-pototra tokoa mantsy no jerena, ny Finoana(Silamo) dia fitambaran'ny rafitra telo lehibe tsy azo tsinjaraina (Totalité Organique):
1- Ny Fotom-pinoana (Akida): Izay fototra iorenan'ny Finoana.
2- Ny Lalàna ara-pinoana (Ahkam): Izay mandrindra ny fifandraisan'ny olombelona amin'ny Mpahary sy ny tontolo manodidina.
3- Ny Fitondrantena (Akhlaq).

Faharoa: Ny Marefo ara-Metafizika eo amin'ny Etika(fitondrantena) tsy miankina.

Na dia efa voasoratra ao anatin'ny maha-olona aza ny fitsipika fototry ny fitondrantena tsara — amin'ny alalan'ny fahatsiarovan-tena voajanahary (Fitrah) izay mitady ny marina sy ny tsara — dia marefo izany raha tsy misy mpanorina ara-metafizika (Fondement Métaphysique).
Satria ny fitondrantena tsara entin'ny maha-olona fotsiny, nefa tsy mifamatotra amin'ny Finoana:
1. Tsy manana hery mpanentana maharitra:
Mila valisoa sy zava-kendrena lehibe kokoa noho ny fiainana eto an-tany izy mba hiarovana azy amin'ny fahasimbana.
2. Tsy mahatanty ny fitsapana mafy: Rehefa iharan'ny herisetra, ny tsy fahamarinana, na ny fakam-panahy lalina ny olona iray, dia mety ho levona indray mipy maso ny «toetra tsara» ananany.

Koa raha tsy misy ny fiaretana ara-panahy (Sabr) - amin'ny fotoana izay tokony ilana izany - sy ny hery avy amin'ny Finoana ny Mpahary, ny etika tsy miankina dia lasa fitondrantena entin'ny fihetseham-po miovaova, fa tsy soatoavina miorina mafy tsy ho voasozon'ny fotoana.

Fehiny:
Ny fanasarahana eo ny fanana toetra tsara sy ny Finoana(Silamo) dia fahadisoana ara-pahalalana. Ny fitondrantena tsy misy Finoana dia toy ny rano mipoitra nefa tsy misy loharano izay mety hamelombelona vetivety, fa ho ritra ihany rehefa mivaivay ny hain-tany.

Nanoratra: pejy Malagasy mianatra Deen.

Matetika ny andian-teny hoe: «Allah Akbar» (الله أكبر) dia adika tsotra hoe: «Andriamanitra Ilay lehibe indrindra».Raha ...
16/07/2026

Matetika ny andian-teny hoe: «Allah Akbar» (الله أكبر) dia adika tsotra hoe: «Andriamanitra Ilay lehibe indrindra».
Raha amin'ny fomba fijery teolojika silamo anefa, dia tsy midika fotsiny hoe: «lehibe noho ny zavatra hafa» izy io, fa manana dikany lalina mihoatra lavitra noho ny fampitahana tsotra eo amin'ny ambaratongan'ny fisiana izany.
Izany dia azo tsorina amin'ny alalan'ireto hevitra lehibe ireto:

Voalohany: Ny toetra intrinseka manoloana ny fampitahana relatifa
Ny fahalehibiazan’i Allah - Ilay Avo Indrindra - dia toetra raikitra amin’ny maha-Izy Azy (toetra intrinseka) satria raha toa ka toetra azo tamin'ny alalan'ny fampitahana Azy amin'ny hafa fotsiny (toetra relatifa) dia midika izany fa misy zavatra hafa miara-mizara izany fahalehibiazana sy fahamboniana izany Aminy, na dia manana tombony mihoatra aza Izy.
Io fomba fijery io anefa dia mametra ny fahalehibiazany ho ao anatin'ny faritry ny fahalehibiazana iombonan’ny hafa Aminy, miampy ampahany mihoatra fotsiny; kanefa io famerana io dia mitaky ny fetezana hahatakatra sy handiditra tanteraka ny fahalehibiazany, izay mifanipaka tanteraka amin'ny maha-Tsy Manam-pahataperana Azy.

Faharoa: Ny laharam-pahamehana ara-piany (Antériorité Ontologique)
Io famerana io dia midika fa tsy ho afaka hanana ny fahalehibiazana sy fahamboniana Izy raha tsy aorian’ny fampitahana Azy amin’ny zavatra hafa; kanefa tsy misy na inona na inona misy ankoatra Azy afa-tsy izay nohariny avokoa.

Fahatelo: Ny fetran'ny saina
Noho izany, ny dikan’ny hoe: «Allah Akbar» dia Izy no Ilay manana fahalehibiazana raikitra aminy, izay lehibe lavitra sy tsy hay lazaina amin’ny alalan’ny toetra na inona na inona, hatrizay hatrizay. Izany dia manasongadina ny tsy fahafahan’ny saina hahatakatra ny tena votoatiny (essence) amin’ny fahalehibiazany, ary koa ny hamisavisa na hamaritra izany amin’ny alalan’ny toetra na inona na inona.

Nanoratra: pejy Malagasy mianatra Deen.

** Fanontaniana: Raha toa ka i Allah Ilay Tsitoha no nahary izao rehetra izao, iza àry no nahary Azy? Satria ny z...
11/06/2026

** Fanontaniana:
Raha toa ka i Allah Ilay Tsitoha no nahary izao rehetra izao, iza àry no nahary Azy? Satria ny zava-misy rehetra dia tsy maintsy manana antony nampisy azy avokoa.

** Valiny:
ity fanontaniana ity diso tanteraka raha ny rafitra lojika no jerena noho ireto antony manaraka ireto:

>Voalohany: Ny Lalàn'ny Antony (Principe de causalité) dia mametraka mazava fa ny fisiana rehetra izay niforona avy amin'ny tsy fisiana (na nandalo fahabangana) tany am-boalohany ihany no mitaky antony nampisy azy, fa tsy ny fisiana rehetra tsy an-kanavaka. Izany dia satria ny fisiana, eo amin'ny sehatry ny saina, dia mizara roa lehibe:
• a) Ny fisiana miankina (Existence contingente):
Izany hoe ny fisiana izay tsy nanana izany fisiana izany tany am-boalohany no nomena izany taty aoriana.
Ity karaza-pisiana ity dia mila antony ivelany nanome azy ny fisiana.

• b) Ny Fisiana Tsy Maintsy Misy (Existence nécessaire / واجب الوجود):
Izany hoe ilay fisiana izay avy amin'ny maha Izy Azy sy ny tenany ihany, ka tsy mbola nandalo fahabangana na tsy fisiana mihitsy, na dia indray mipi-maso monja aza.
Ity fisiana ity dia tsy miankina amin'ny antony ivelany nampisy Azy.

>Faharoa: Ity fanontaniana ity dia ahitana fahadisoana mibaribary eo amin'ny fandrindran-kevitra (Sophisme / Contradiction interne). Izany dia satria mifanohitra tanteraka amin'ny maha «Mpahary» Azy ny dikan'io fanontaniana io. Raha toa mbola misy namorona indray mantsy ny Mpahary, dia mivadika ho «zava-boahary» (miankina) Izy fa tsy Mpahary (tsy miankina) intsony.

>Fahatelo: Raha toa ka mila mpahary nampisy azy avokoa ny mpahary rehetra, dia ho foana ary tsy ho nisy mihitsy izao rehetra izao, noho ny firodanan'ny fisesisesiana tsy hita fiafarana (Régression tendant vers l'infini / التسلسل). Satria ilay mpahary voalohany dia tsy ho afaka namorona raha tsy teo ilay mpahary faharoa, ary ity mpahary faharoa ity koa dia tsy ho afaka namorona raha tsy nisy ilay mpahary fahatelo... Vokatr'izany, tsy hisy zava-mitranga na iray aza hiforona eto amin'izao tontolo izao. Kanefa, hita maso sy tsapan'ny saina, ary iainana fa misy sy mijoro izao rehetra izao; izany indrindra no porofo tsy azo lavina fa ny Mpahary izao tontolo izao dia tsy mila antony na mpahary hafa nampisy Azy.

Nanoratra: pejy Malagasy mianatra Deen.

Adresse

Aix-en-Provence

Site Web

Notifications

Soyez le premier à savoir et laissez-nous vous envoyer un courriel lorsque Malagasy mianatra Deen publie des nouvelles et des promotions. Votre adresse e-mail ne sera pas utilisée à d'autres fins, et vous pouvez vous désabonner à tout moment.

Raccourcis

Partager

Type