22/05/2026
በስመ አብ ወወልድ ወመንፈስ ቅዱስ አሐዱ አምላክ አሜን።
ቅዱሳን ንዓለም ከም ዚፈርድዋዶ ኣይትፈልጡን ኢኹም፧ 1ይ ቆሮንቶስ 6:1
ሰላም ለዘሚካኤል ዘተሰምየ አረጋዌ፣
እስመ ሑረቱ በጥበብ ወፍናዊሁ ልባዌ፣
ምስሌሁ ኅቡረ ዘበአሐዱ ህላዌ፣
ሰላም ለቅዱሳን ዘተሰነዓው ስንዓዌ፣
ከመ በጸሎት ይሥዓሩ ሥርዓቶ ለአርዌ።
👉ሰላም! ብክርስቶስ ክርስቲያን ዝተሰመኹም ክቡራት ኣሕዋትን ኣሓትን እንኳዕ ንወርሓዊ በዓል ፃድቕ አቦና አቡነ አረጋዊ ብሰላም አብፀሐና።
👉ኣባ ዘሚካኤል (ኣረጋዊ ፀሓይ) ኣቡኡ ካብ ናይ ሮም ነገሥታት ወገን ዝኾነ ስሙ ይስሓቕ ዝብሃል ክኸውን ከሎ ናይ ኣዲኡ ሽም እድና ይብሃል። ክልቲኦም ሓቀኛታትን እሙናትን ንእግዚአብሔር ዝፈርሑን ዘኽብሩን ነበሩ።
👉ጻድቕ አቡነ አረጋዊ ምስቶም ሾሞንተ ቕዱሳን ኮይኑ ነቲ ኣብ ጉባኤ ኬልቄዶን ዝተኸስተ ሓድሽ ‘ክልኤ ባህርይ’ ዝብል ትምህርቲ ብምቅዋሙ መከራ ስለዝጸንዖ ናብ ሀገርና ተሰዲዱ መጽአ።
👉 ተስዓቱ ቅዱሳን ብሓንሳእ ድሕሪ ምጽናሕ፡ ስብከተ ወንጌል ንምስፋሕን ሥርዓተ ምንኵስና ንምዝርጋሕን መንፈስ ቅዱስ ነናብ ዝመርሖም ተፈላለዩ።
👉በዚ ኸኣ ንአቡነ አረጋዊ ቦታኡ ንሸነኽ ምሥራቅ እትርከብ ደብረ ዳሞ ኾነት።
👉ደብረ ዳሞ ብዙርይኡ ብፀድፊ ዝተሓፀረ ንምድያቡ ዘፀግም ነዊኅ ጎቦ እዩ። አቦና አረጋዊ ፀሓይ ንኸደይቦ ናብ እግዚአብሔር ጸለየ። ብተራዳእነት ቅዱስ ሚካኤል ከዓ ሠላሳ ሜትሮ ዝቑመቱ ገበል ከደይቦ ተኣዚዝሉ መጽአ።
👉አቡነ አረጋዊ ነቲ ገበል ‘ጭራኻ ኣውርዶ’ሞ ኣደይበኒ’ በሎ። እቲ ገበል ግና ነቲ ጭራኡ ኣብ ፍርቂ ጸድፊ ጥራይ በጺሑ፡ ብልሳን ሰብ ‘ኣንታ ፈላሲ፡ ኣብዚ እምባ እዚ ብዘይካ ዝነፍሩ ኣዕዋፍ፡ ትበልዖ እንጌራ ይኹን ትሰትዩ ማይ፡ ወይ ድማ ተጽልለሉ ዕንፀይትን ገረብን የልቦን። ብመዓልቲ ፀሓይ፡ ብለይቲ ቍርን ኣሳሓይታን እዩ፡ ናይዚ እምባ’ዚ ጥሪትን ሃብትን እዚኣቶም ጥራይ እዮም’ ክብል ተዛረቦ።
👉አቡነ ኣረጋዊ ድማ ‘ዝተኣዘዝካዮ ጥራይ ፈጽም፡ እግዚአብሔር እቲ ዝደለናዮ ኣየስእነናን’ዩ’ በሎ’ሞ ብኡ ንብኡ ጭራኡ ኣውሪዱ ኣብ መዓንጣ ኣቡነ ኣረጋዊ ብምጥምጣም፡ ብሓንሳእ ኣብ’ቲ ርእሲ እቲ ቅዱስ ደብሪ ኣደየቦ።
👉እዚ ዅሉ እናተፈጸመ፡ ሊቐ መላእክት ቅዱስ ሚካኤል እቲ ተመን ኣብ ልዕሊ አቡነ አረጋዊ ክፉእ ነገር ከይፍጽምን ከየፍርሖን ብየማናይ ኢዱ ሴፍ መዚዙ ይሕልዎ ነበረ።አርድኢት ኣባ ማትያስን ካልኦት ስዓብቱን’ውን እናረኣዩ ይድነቑን ነበሩ።
👉ዕለት 12 ጥቅምት አቡነ አረጋዊ ኣብ ዝባን’ዚ ደብሪ ምስ በጽሐ፡ ሰለስተ ጊዜ “ሃሌ ሉያ ለአብ፡ ሃሌ ሉያ ለወልድ፡ ሃሌ ሉያ ወለመንፈስ ቅዱስ” እናበለ ኣመስገነ። በዚ ኸኣ እዚ ደብሪ’ዚ፡ “ደብረ ሃሌ ሉያ” ተባሂሉ ይጽዋዕ እዩ።
በረኸት፣ ፀሎትን አማላድነትን ኣቦና ኣቡነ አረጋዊ ፀሓይ አይፈለየና ።
ወስብሐት ለእግዚአብሔር
ወለወላዲቱ ድንግል
ወለመስቀሉ ክቡር ኣሜን!
