01/05/2026
MAQAA ABBAA ILMAA AFUURA QULQULLIU WAAQA TOKKOTTI AMEEN!
Jaalatamtootaafi kabajamtoota Maatii Waaqayyoo!
Nagaa Waaqayyootiin akkam jirtu?
Ani kadhannaa keessaniifi arjummaa Waaqayyootiin kunoo yoona ga'eera.
Yoona ga'uun suuqii irraa hin bitamu,
Yoona ga'uun waajjirra mootummaa keessaa kennaa dhaan namaaf hin laatamu,
Yoona ga'uun maatii ufii irraa dhaalaan hin argamu,
Yoona ga'uun keennaa Waaqaa irraa namaaf laatumu dha.
Kanaafuu baroota du'aan marfaman keessa qaxxaa murree lubbuu dhaan yoona ga'uun keenyi mallattoo arjummaa Waaqayyooti.
Jaalala abbummaa isaatiin nu jaalatee,
Eegumsa isaatiin nu eegee,
Arjummaa isaatiin kan yoonaan nu ga'e galatni maqaa Waaqayyootiif haa ta'u!
Ameen!!!
Mee amma yoo fedhaaf jaalala Waaqayyoo nuuf ta'e erga arjummaa isaatiin yoona geenyee daqiiqaa muraasaaf galaa jireenya keenya boriif ta'u dubbii sagalee Waaqayyoo waliin haabarannu!
Mata dureen barnoota keenyaa
"Xuraa'ummaatti utuu hin ta'in, qulqullaa'ummaatti akka jiraannuuf Waaqayyo nu waame."
kan jedhu ta'a
1Tas.4፥7
Egaa akkuma beekamu Soomiin Gooftaa galee toorbeen inni lammaffaa
ቅድስት (QIDDIST) jedhameetu beekama.
Moggaasni maqaa kanaa hayyuu mana kiristiyaanaa keenyaa kan ta'e Qulqullicha Yaareed irraa kan argame dha.
Guyyaa kanatti manni kiristiyaanaa,
Sirna waaqeffannaa ishee irratti,
Sirna qiddaasee ishee irratti,
Faarfannaa ishee irratti,
Lallaba ishee irratti waa'ee qulqullummaa dha barsiisti.
Sirna qiddaasee irratti kutaaleen kitaaba qulqulluu keessaa dubbifaman;
1ffaa=Diyaaqoonii isa tokkoffaatiin 1Tas.4፥1-13
2ffaa=Diyaaqoonii isa lammaffaatiin 1Phex.1፥13-dhumaatti.
3ffaa=Luba isa lammaffaatiin Ho.Du.10፥7-30
ምስባክ (Misbaakiin guyyichaa ammoo)
"እግዚአብሔርሰ ሰማያተ ገብረ
አሚን ወሰናይት ቅድሜሁ
ቅድሳት ወዕበየ ስብሐት ውስተ መቅደሱ።"
kan jedhu dha.
Far.95(96)፥5
Oromiffaan;
"Waaqayyo garuu bantii samiiwwanii ni hojjete.
Galatni, simboonis fuula isaa dura, aangoon, miidhagummaanis mana qulqullummaa isaa keessa jiru."
jedha.
Far.95(96)፥5-6
Icitii dhaan gaafa hiikamu;
እግዚአብሔርሰ ሰማያተ ገብረ
Waaqayyo maal hojjete yoo naan jette Waaqayyohoo inni Waaqa dha waan ta'eef samiiwwan toorba ni uume,
አሚን ወሰናይት ቅድሜሁ
Nama amantiifi hojii gaarii qabu ni jaalata,
ቅድሳት ወዕበየ ስብሐት ውስተ መቅደሱ
Qulqulluu qulqulluu jedhamee galateeffatamuunis qabeenya Waaqaummaa isaati.
Hiika jedhu uf keessaa qaba.
Wangeelli guyyaa kanatti dubbifamu;
Mat.6፥16-25 yeroo ta'u
Qiddaaseen guyyaa kanatti qaddasamus;
Qiddaasee Eephifaaniyoos jedhama.
Amma gara mata duree keenya jalqabaatti gaafa deebinu;
1Tas.4፥7 irratti;
"Xuraa'ummaatti utuu hin ta'in, qulqullaa'ummaatti akka jiraannuuf Waaqayyo nu waame."
Nuun jedha.
As irratti waa'ee qulqullummaa gaafa kaasnu QULQULLUMMAAN Waaqayyoo dhaaf qabeenya Waaqummaa isaati.
Qulqulluunis kan akka Waaqayyoo eessayyuu hin jiru.
Mul.15፥5
“Waaqayyolii keessaa kan akka kee eenyu?
Yaa Waaqayyo, kan akka kee surraa qulqullummaa qabu eenyu?
Kan akka kee hojii guddaa fi sodaachisaa hojjetu, wanta dinqisiisaas godhu eenyu?”
jedhamee akka barreeffametti.
Bau.15:11
Qulqullootaaf qulqullummaan Kennaadhaan Waaqa irraa isaaniifii laatama.
Waaqayyo garuu Waaqaummaa issaatiin bara baraan qulqulluu dha.
Kanaafuu Ergamootni samii irraa "Qulqulluu! Qulqulluu! Qulqulluu dha Waaqayyo gooftaan maccaa; guutummaan lafaas ulfina isaatiin guutuu dha"
Jedhanii bara baraan isa galateeffatu.
Isa.6:3
“Kanaafis, "Eenyutti na fakkeessitu? Eenyu wajjinis wal na qixxeessitu?" jedha Waaqayyo qulqulluun.”
Isa.40:25
Koottaa nutis qulqulleettii Haannaa waliin;
“Yaa Waaqayyoo, qulqulluun akka keetii tokko illee hin jiru; si malees kan biraa hin jiru; akka Waaqayyo keenyaas kattaa kan namaaf ta'u hin jiru.” haajennu.
1Sam. 2:2
Kana malees waa'ee qulqullummaa Waaqayyoo kitaaba qulqulluu keessaa baay'inaan hubachuu ni dandeenya.
Isa.57፥15
Hizq.36፥20-21
Luq.1፥50
Isa.6፥3
Mul.4፥8
Egaa Waaqni amala Waaqummaa isaatiin qulqulluu ta'e kun,
"Ani Waaqayyo gooftaa keessan; ani qulqulluu waanan ta'eef, isinis of qulleessaa, qulqullootas ta'aa! Uumama lafa irra munyuuqan kanaan namummaa keessan hin xureessinaa!
Ani Waaqayyo isa gooftaa isiniif ta'uudhaaf biyya Gibxii isin baasee dha; kanaaf ani qulqulluu akkuman ta'e, isinis immoo qulqulloota ta'aa!"
nuun jedha.
Lew.11፥44-45
Inni abbaa keenya dha.
Nutis ijjoolloota isaati.
Kanaafuu ijoolleen ammoo abbaatti ba'uudhaa qabdi waan ta'eef akkuma Waaqayyo abbaan keenyi Waaqummaa isaatiin qulqulluu ta'e kana nutis jireenya keenyaan qulqulloota ta'uun nurra jiraata.
Waamamuun keenyis qulqullummaa dhaafi dha woo!
1Tas.4፥7
Namni qulqullimmaa dhaan hin jiraanne garuu kaayyoo itti waamame sanaa irraa kaateera.
Qulqullummaa dhaan jiraachuu jechuun garuu akkami dha???
Akka Zakkaariyaasiif akka Eelsaabeex abboommii Gooftaatii fi seera isaa raawwachaa fuula Waaqayyoo duratti jireenya qajeelaa ta'e jiraachuu.
Luq.1፥6
Dhaloota abaaramaa ta'e keessattillee akka Nooh fuuldura Waaqayyootti qajeelummaa ufii eeganii argamuu.
Uma.7፥1
Wanti afaan namaa keessaa gadi ba'u nama xureessa waan ta'eef afaan ufii tiin hamaa dubbachuu dhiisuu.
Mat.15፥18
Efe.4፥29
1Sam.2፥3
Sammuu ufiittis hamaa yaaduu dhiisuu.
Garaa ufiittis haaloo qabachuu dhiisuu.
Walumaa galatti qulqullummaa dhaan jiraachuu jechuun fedha ufii dhiisanii akka fedha Waaqayyootti jiraachuu jechuu dha.
Xuraa'ummaan garuu hojii foonii dha.
iniis;
halalummaa,
jireenya gad-dhiisii,
waaqayyolii tolfaman waaqessuu, qoricha namatti gochuu,
diinummaa,
qoccolloo,
inaaffaa,
dheekkamsa,
ofittummaa,
yaadaan gargar ba'uu,
barsiisaan gargar cabuu,
weennoo,
machii,
albaadhummaafi kan kana fakkaatani dha.
Warri wanta akkas nama xureessan kana hojjetan mootummaa Waaqayyootti tasumaa galuu hin danda'an.
Gal.5፥19-21
Koottaa!
Waaqayyo qulqulluun qulqullummaa dhaaf nu waameera waan ta'eef cubbuu hundumaa dhiisnee qulqullummaa dhaan haa jiraannu!
Qulqullummaa dhaaf waamamtanii hin xuraa'iinaa!
Faarfannaa dhaaf waamamtanii hin sirbiinaa!
Jaalalaaf waamamtanii jibba hin dhaqiinaa!
Araaraaf waamamtanii haaloo garaatti hin baatiinaa!
Jireenyaaf waamamtanii du'a hin hin tajaajiliinaa!
Ifatti waamamtanii dukkana keessa hin jiraatiinaa!
Ulfinaaf waamamtanii uf hin salphisiinaa!
"Egaa namni gorsa kana tuffatu, Waaqayyoon isa afuura isaa qulqulluu isiniif kennu tuffata malee, nama tuffata miti."
1Tas.4፥8
Kanaafuu;
“Inni isin waame qulqulluu akkuma ta'e, isinis adeemsa keessan hundumaan qulqulloota ta'aa!”
1Phe.1:15
....╭✥✥✥✥✥✥✥✥✥╮......✥┈┈••●◉✞◉●••┈••✥.......... Abbaa Niqoodimoos ......Tulluu jireenyaa irraa......✥┈┈••●◉✞◉●••┈••✥..............╰✥✥✥✥✥✥✥✥✥╯
