ኬብሮን ሚዲያ-kebron medi

05/05/2026

05/05/2026

02/03/2026

እምነት፣ አንድነትና ነፃነት፣ የኢትዮጵያዊነት ማኅተም በአድዋ

የካቲት 23 ቀን 1888 ዓ.ም.፤ የኢትዮጵያ ሰማይ በነጻነት ድምጽ የታወጀበት ታላቅ ቀን ነበር። የአድዋ ጦርነት ግጥሚያ በንጉሠ ነገሥት አፄ ምኒልክ እና በጣሊያን ወራሪ ኃይል መካከል ብቻ አልነበረም፤ ይልቁንም የእምነት፣ የጽናት እና የመለኮታዊ ረድኤት መገለጫ እንጂ።

የኢትዮጵያ ኦርቶዶክስ ተዋሕዶ ቤተ ክርስቲያን በአድዋ ዘመቻ ወቅት ከመንፈሳዊ መሪነት ባለፈ የአገር መከታ ሆና ተገኝታለች። አፄ ምኒልክ ወደ ዘመቻው ሲነሱ "የቅዱስ ጊዮርጊስን" ታቦት አስከትለው ነበር።

በጦርነቱ ግንባር ቀዳሚ ሆነው የነበሩት ካህናት ምዕመናኑን በማበረታታት፣ በጸሎት በመደገፍና "የአገር መወረር የሃይማኖት መደፈር ነው" በሚል መንፈሳዊ ወኔ ሕዝቡን ለነጻነት አነሳስተዋል።

ኢትዮጵያውያን ቅዱስ ጊዮርጊስን "ፍጡነ ረድኤት" እና "የአገር ጠባቂ" አድርገን እናምናለን። በአድዋ ጦርነት ወቅት የታሪክ ጸሐፊዎችና በወቅቱ የነበሩ ምስክሮች እንደሚናገሩት፦ በመካከለኛው የጦርነት ሰዓት፣ በጭጋግና በጭስ መሃል በነጭ ፈረስ ላይ ሆኖ ሰራዊቱን የሚመራና ጠላትን የሚያሸብር መንፈሳዊ ኃይል ታይቷል።

ይህ ተአምር የኢትዮጵያን ሰራዊት ወኔ ሲያድስ፣ ወራሪውን የጣሊያን ጦር ግን ግራ አጋብቶ ለሽንፈት ዳርጎታል። ዛሬም ድረስ "ጊዮርጊስ ፈረሰኛው" የአድዋ ድል ዋናው ባለቤት ተደርጎ ይጠቀሳል።

አድዋ የጥቁር ሕዝቦች ሁሉ የነጻነት ቀንዲል የሆነው በቤተ ክርስቲያን፣ በንጉሡና በሕዝቡ አንድነት ነው። ዛሬም ይህ ታሪክ የሚያስተምረን "አንድነት ኃይል ነው፤ እምነት ደግሞ ድል ነው" የሚለውን ታላቅ መርህ ነው።

አድዋ ማለት ለእኛ ሃይማኖት፣ አገር እና ነጻነት በአንድነት የጸኑበት የድል አውድማ ነው። የቅዱስ ጊዮርጊስ አማላጅነትና የቅድስት ቤተ ክርስቲያን ጸሎት የታከለበት ይህ ድል፣ የኢትዮጵያዊነት ማህተም ሆኖ ለዘላለም ይኖራል።

እንኳን ለአድዋ ድል በዓል አደረሳችሁ!