18/05/2026
ግንቦት-11 ቅዱስ ያሬድ አመታዊ ክብር በዓል
እንኳን አደረሳችሁ!
ያሬድ ካህኑ ዘመረ ያሬድ ካህኑ ዘመረ
ዘመረ ያሬድ ዘመረ አምላኩን አመሰገነ×2
ቅዱስ ያሬድ ውልደትና እድገቱ ኢትዮጵያ ወስጥ፣ አክሱም ከተማ ከአባቱ ከአብዩድና ከእናቱ ታውክሊያ ነው፤ ዕድሜው ለትምህርት ሲደርስ እናቱ መምህር ወደ ሆነው አጎቱ አባ ጌዲዮን ትወስደዋለች
እርሱ ግን በመጀመሪያ ትምህርት ሊገባው አልቻለም ከዕለታት በአንድ ቀን መምህር ጌዲዮን ያሬድን ሲገርፈው በምሬት አለቀሰ ማይኪራህ ወደምትባል ቦታም ተጓዝ በመንገድ ላይ ሳለ ውኃ ስለተጠማ በዚያች ስፍራ ካለ ምንጭ ውኃ ጠጥቶ በዛፉ ሥር ለማረፍ ቁጭ አለ ወደ ላይም በሚመለከትበት ጊዜ ከዛፉ ላይ አንዲት ትል ፍሬ ለመብላት ከታች ወደ ላይ ስትወጣ ስትወርድ ተመለከተ
እርሱም ትኩር ብሎ አያት ትሏም ስድስት ጊዜ ያለመሰልቸት ከወጣች ከወረደች በኋላ በሰባተኛው ፍሬው ካለበት መድረስ ቻለች ፍሬውንም መብላት ጀመረች
በዚያን ወቅት ቅዱስ ያሬድ አሰበ፤ እንዲህም አለ "ይህች ትል ፍሬውን ለመብላት እንዲህ ከታገሠች እኔም እኮ ትምህርት ለመማር ብታገሥ እግዚአብሔር አምላክ ይገልጽልኛል"
ወደ ጉባኤው ተመልሶ መምህሩን ይቅርታ ከጠየቀ በኋላ መማር ጀመረ እግዚአብሔር አምላክም የ፹፤፩ መጽሐፍትንና የሊቃውንት መጽሐፍትን እንዲሁም ሌሎች ቤተ ክርስቲያን የተቀበለቻቸውን የቅዱሳት መጻሕፍትን ምሥጢር ገለጸለት መምህር ጌዲዮን ሲሞት የእርሱን ቦታ ተረክቦ ማሰተማር ቀጠለ
በ፭፻፴፬ ዓ.ም. ኅዳር ፮ ቀን ወደ ሰማይ ተነጠቀ በሰማይ ቅዱሳን መላእክት እግዚአብሔርን ልዩ በሆነ ጣዕመ ዝማሬ ሲያመሰግኑ ሰማ
ወደ ምድርም በተመለሰ ጊዜ አክሱም ጽዮን ውስጥ ወደ ምሥራቅ በኩል በመዞር ከሰማይ የሰማውን ዝማሬ ዘመረ አርያም ብሎም ሰየመው
በዚሁም በ፭፻፴፰ ዓ.ም. ቅዱስ ያሬድ ማኅሌትን ጀመረ
ታኅሣሥ ፩፣ በዕለተ ሰኞ ምህላ ያዘ እሰከ ታኅሣሥ ፮ ቀዳሚት ሰንበት ድረስም ዘለቀ በዚያች ዕለት ጌታችን መድኃኒታችን ኢየሱስ ክርስቶስ በመልዕልተ መስቀል አንደተሰቀለ ሆነ ከቅዱሳን መላእክት ጋር ተገለጸለት
ቅዱስ ያሬድም ጌታ የተገለጸለትን የመጀመሪያውን ሳምንት ‹ስብከት› ብሎ ሰየመው በሳምንቱም እንደገና በብርሃን አምሳል ስለተገለጸለት ያን ዕለት ‹ብርሃን› ብሎ ሰየመው በሦስተኛው ሳምንት እንዲሁ በአምሳለ ኖላዊ ስለተገለጸለት ‹ኖላዊ› ብሎ ሰየመው በመጨረሻም ሳምንት በአምሳለ መርዓዊ ሲገለጽለት ዕለቱን ‹መረዓዊ› ብሎ ሰይሞታል
ከዚህም በኋላ ቅዱስ ያሬድ ፭ የዜማ መጻሕፍትን ደረሰ እነዚህም ድጓ ጾመ ድጓ ምዕራፍ ዝማሬና መዋሥዕት ናቸው ከደረሳቸው የዜማ መጽሐፍቶችም ውስጥ ትልቁ ድጓ ነው በሦስትም ይከፈላል የዮሐንስ አስተምህሮና ፋሲካም ይባላሉ በንባባት ብቻ ይቀደስባቸው የነበሩትን ፲፬ቱ ቅዳሴያት በዜማ የደረሳቸው ቅዱስ ያሬድ ነው ዝማሬም በ፭ ይከፈላል ኅብስት ጽዋዕ መንፈስ አኮቴትና ምሥጢር ይባላል
ይህ ቅዱስ ደራሲ በተወለደ በ፸፭ ዓመቱ በሰሜን ተራራ ውስጥ ደብረ ሐዊ ከሚባል ገዳም ግንቦት ፲፩ ቀን ተሠውሯል
የዝማሬና መዋሥዕት መምህራን የቅዱስ ያሬድን ጉባኤ ተክተው አሁን በማስተማር ላይ እስካሉት መጋቤ ብርሃናት ፈንታ ድረስ ፵፮ ናቸው
የኢትዮጵያ ኦርቶዶክስ ተዋሕዶ ቤተ ክርስቲያን ባለውለታ ቅዱስ ያሬድ መምህር ወሐዋርያ መጻሕፍትን በጣዕመ ዜማ የደረሰ፣ መዝሙረ ዳዊትን ጨምሮ ሌሎችንም ቅዱሳት መጻሕፍትን በተለያየ ዜማ ያመሳጠረ ታላቅ ኢትዮጵያዊ ሊቅ ነው
የቅዱስ ያሬድን ጸጋና በረከት ያድለን!
አሜን አሜን አሜን🙏🙏🙏
