14/07/2026
سُورة المُطَفِّفِين:
السورة دي نادرة جدًا، لأنها من أواخر السور اللي نزلت في مكّة، وبردو من أوائلالسور اللي نزلت في المدينة! لأن النبي ﷺ لما هاجر للمدينة، لقى أهلها من أسوأ الناس في الكيل والميزان وبيغشوا في البيع والشراء، فنزلت السورة دي عملت ثورة اقتصادية وأخلاقية ونضّفت السوق كله!
- المشهد الأول (وَيْلٌ):
السورة بتبدأ بوعيد وتهديد مُرعب وهو الويل: يعني وادٍ في جهنم لفئة معينة، وربنا قال: (وَيْلٌ لِّلْمُطَفِّفِينَ * الَّذِينَ إِذَا اكْتَالُوا عَلَى النَّاسِ يَسْتَوْفُونَ * وَإِذَا كَالُوهُمْ أَو وَّزَنُوهُمْ يُخْسِرُونَ) الآية دي بتعالج مرض ازدواجية المعايير أو الكيل بمكيالين!
المُطفف مِش بس البياع اللي بيلعب في ميزان الفاكهة! لاء، المُطفف هو كل إنسان بيطالب بحقه كَامِل مُكَمِّل، ولما ييجي يدي الناس حقوقهم بيُنْقُصْهَا ويَبْخَسْهَا! والمُطفف هو المُوظف اللي بيطالب بمرتبه وحوافزه، وفي المقابل بيزوَّغ من الشغل وبيضيّع وقت مصالح الناس! والمُطفف هو الزوج اللي بيطالب مراته بكل حقوقه وتكون مثالية، وهو مُهمِل في حقوقها ومقصر معاها! وكذلك بالظبط، الزوجة اللي بتطلب كل حاجة، بس مابتديش لزوجعا حقوقه! والمُطفف بردو هو اللي يزعل لو حد جاب سيرته بكلمة، وهو قاعد ليل نهار يقطع في فروة خلق الله!
القرآن بيحذرك: إياك تكون مُطفف في مشاعرك، أو شغلك، أو علاقاتك، لأن الويل والهلاك هيكون مصيرك لو ماتوبتش وماعدلتش ميزانك!
- المشهد التاني (عُقُوبَة الحِرْمَان):
السورة بتكمل وبتشرح ليه المطفف والمجرم بيوصل للدرجة دي من التبلُّد! السر في الآية دي: (كَلَّا ۖ بَلْ ۜ رَانَ عَلَىٰ قُلُوبِهِم مَّا كَانُوا يَكْسِبُونَ).
(الرَّان) هو الصدأ! الذنب بيجيب ذنب، والكذبة بتجيب كذبة، لحد ما القلب يتغطى بطبقة من الصدأ المظلم! ساعتها بيسمع القرآن وميتأثرش، وبيشوف الموت ومايتعظش!
والعقوبة الأكبر للمجرمين دول يوم القيامة مِش بس النار، العقوبة النفسية الأبشع هي الحرمان من رؤية مَلِك المُلوك: (كَلَّا إِنَّهُمْ عَن رَّبِّهِمْ يَوْمَئِذٍ لَّمَحْجُوبُونَ)! يا حسرة القلب اللي يتحرم من رؤية نور ربنا يوم القيامة بسبب ذنوب أصر عليها في الدنيا!
