04/02/2024
يا جدع بيقولك فوائد 27% !!! والله لن يستقيم الحال .
الاقتصاد في الإسلام عايز الفلوس تفضل شغالة ، ما تقفش ..
ركنت فلوسك وقررت تحوشها وما تستثمرهاش؟ تطلع 2.5٪ زكاة على أصل المبلغ كله يا حلو كل سنة يعني تخسر ربع المبلغ ف عشر سنين يعني تقل جيبك ، لكن هتشغلها ف مشروع؟ هتطلع النسبة دى ع الأرباح والبضاعة بس من غير أصل تمن المشروع أو المصنع أو المحل نفسه والمجتمع استفاد فرص عمل وبيوت مفتوحة ورأس مال داير ، غير إن رأس مالك ما نقصش بالعكس انت كسبت ربح كبير كمان ..
هتبنى بفلوسك بيت تسكنه أو حتى اشتريت بيت تسكنه وماله زى الفل اديك شغلت مهندسين وموردين خامات وفتحت بيوت مئات الصنايعية ومفيش عليك زكاة في كدة ، اشتريت بيت وأجرته يبقي هتطلع زكاة على الايجار واديك ساعدت المجتمع في توفير سكن ، إنما اشتريت بيت تسقعه أو أرض تسقعها لحد ما تغلى (فلوس مركونة) عشان تبيعهم بعد كدة؟ خلى بالك إن ده معناه إن لازم تطلع عليه فلوس زكاة ما دمت مقرر إنك سايبه يغلى عشان تبيعه يعنى هتطلع 2.5٪ في السنة على تمن البيت أو الأرض كلها !
المال في الاسلام يجب أن يدور ليوظف الناس بعضهم بعضاً ، و ركود دورة رأس المال بتخلق فقراء فيجب عليك ساعتها تعوض الفجوة اللى انت عملتها بالزكاة على أصل المبلغ كله وليس على الربح فقط ، تأديباً لك على توقيف المال عندك وتشجيعاً لك على استثماره .. ولذلك أكتر نموذج ذمه الإسلام هو نموذج (المرابي) ، اللى قاعد لا ينتج شئ إلا إنه يخلق أزمات أو يستغل وجودها فيقرض الناس أموال بأرباح ربا لما يرجعوها ، خصوصاً إن الفشل في سداد الدين المالى معناه استعباد قراراتك (بل إن ده كان بيحصل زمان قبل الإسلام ، لو فشل المدين في السداد يتحول لعبد عند الدائن كما يحدث بصورة مقنعة حالياً بين الدول الكبرى الدائنة المستعبدة للدول الصغرى بديونها اللى عندها) ..
خليك حريص لو عندك فلوس تسعى في إنها تدور ، فإن قررت تركنها يبقي طلع حق ربنا فيها وما تنساهوش ..
منقول من د. أحمد حامد
