23/04/2026
ՄԱՅՐ ԱԹՈՌ ՍՈՒՐԲ ԷՋՄԻԱԾԻՆԸ ԽՍՏՕՐԷՆ ԿԸ ԴԱՏԱՊԱՐՏԷ
ԱՏՐՊԷՅՃԱՆԻ ԻՇԽԱՆՈՒԹԻՒՆՆԵՐՈՒՆ ԿՈՂՄԷ ԻՐԱԿԱՆԱՑՈՒՈՂ
ԱՐՑԱԽԻ ՀՈԳԵՒՈՐ ԵՒ ՄՇԱԿՈՒԹԱՅԻՆ ԺԱՌԱՆԳՈՒԹԵԱՆ
ՀԵՏԵՒՈՂԱԿԱՆ ՈՉՆՉԱՑՈՒՄԸ
ՅԱՅՏԱՐԱՐՈՒԹԻՒՆ
Վրդովմունքով տեղեկացանք, որ Ատրպէյճանի իշխանութիւնները հողին հաւասարեցուցած են Ստեփանակերտ քաղաքի Սուրբ Յակոբ եկեղեցին եւ յարակից տարածքին մէջ գտնուող խաչքարերն ու կոթողները, որոնք ըստ ատրպէյճանական աղբիւրներու՝ իբր թէ անօրինական եւ ապամոնտաժման ենթակայ կառոյցներ էին: Խիստ մտահոգիչ են նաեւ Ստեփանակերտի Առաջնորդանիստ Սուրբ Աստուածածին Մայր Տաճարի ոչնչացման վերաբերեալ ստացուող տեղեկութիւնները։
Մայր Աթոռ Սուրբ Էջմիածինը խստօրէն կը դատապարտէ Ատրպէյճանի իշխանութիւններուն կողմէ իրականացուող Արցախի հոգեւոր եւ մշակութային ժառանգութեան հետեւողական ոչնչացումը։ Ակնյայտ է, որ Ատրպէյճանի իշխանութիւնը կը շարունակէ թիրախաւորել հայկական քրիստոնէական սրբավայրերը՝ նպատակ ունենալով ջնջել հայկական հետքը Արցախէն։
Պետական մակարդակով իրագործուող այս վանդալիզմը հերթական անգամ կը փաստէ, որ Ատրպէյճանի հայատեաց քաղաքականութիւնը որեւէ փոփոխութիւն չէ կրած, որով եւ կասկածելի կը դառնան Հայաստանի հետ կայուն ու երկարատեւ խաղաղութիւն հաստատելու մասին յայտարարութիւնները։
Մայր Աթոռ Սուրբ Էջմիածինը կոչ կ՚ընէ ՀՀ կառավարութեան ղեկավարին եւ իշխանութեան ներկայացուցիչներուն՝ հրատապ ու գործուն քայլեր ձեռնարկել կանխելու համար Արցախի հոգեւոր եւ մշակութային ժառանգութեան համակարգուած իւրացումն ու ոչնչացումը։
Կոչ կ՚ընենք նաեւ մշակութային ժառանգութեան պահպանութեամբ, տարածաշրջանին մէջ ժողովուրդներու խաղաղ համակեցութեամբ եւ փոխգործակցութեամբ շահագրգռուած բոլոր պետութիւններուն ու միջազգային կազմակերպութիւններուն՝ ազդու միջոցներ ձեռնարկել կասեցնելու համար մշակութային ոճրագործութիւնները Արցախի մէջ։