19/11/2025
س/ ينفع أقول في التشهد في الصلاة (( سيدنا )) قبل أسامي الانبياء
يعني أقول : اللهم صل على سيدنا محمد كما صليت على سيدنا إبراهيم ؟
ج/ لا ماينفعش.....
لازم تقول زي ماورد عن النبيﷺ بالظبط من غير أي زيادة :
《اللَّهُمَّ صَلِّ علَى مُحَمَّدٍ وعلَى آلِ مُحَمَّدٍ، كما صَلَّيْتَ علَى إبْرَاهِيمَ وعلَى آلِ إبْرَاهِيمَ؛ إنَّكَ حَمِيدٌ مَجِيدٌ، اللَّهُمَّ بَارِكْ علَى مُحَمَّدٍ وعلَى آلِ مُحَمَّدٍ، كما بَارَكْتَ علَى إبْرَاهِيمَ وعلَى آلِ إبْرَاهِيمَ؛ إنَّكَ حَمِيدٌ مَجِيدٌ》
س/ليه ماينفعش نزود كلمة سيدنا في الصلاة مع ان ينفع اقولها بره الصلاة عادي؟؟
ج/ لأن الأذكار في الصلاة توقيفيه ..يعني بتتقال زي ماالنبيﷺ علمنا بالظبط
زي في الاذان كده ماينفعش برضو تقول اشهد أن سيدنا محمد رسول الله ...لازم تقوله بالظبط زي ماالنبيﷺ علمنا
كذلك في كل مواضع الصلاة مش بس التشهد مثلا في الركوع النبي ﷺ قال لنا قولوا ((سبحان ربي العظيم)) ..فلازم ألتزم بنصها ماينفعش مثلا أحط أسم تاني من اسماء الله الحسنى بدل العظيم
نفس الكلام ده ينطبق على التشهد وعلى كل أذكار الصلاة
مسموح انك تقول كل الاذكار اللي وردت عن النبيﷺ وكل صيغ التشهد اللي وردت زي ما قالها و ما تزودش حتي لو شايف انها احلي .
