10/04/2023
انسى كل اللي فات ويلا بينا نبدأ صفحة جديدة مع رمضان من النهاردة! ♥️
- بس في ٣ خطوات هنعملهم قبل ما نبدأ. 🤍
- (الخطوة الأولى)
تجديد النية والتوبة والدعاء ندعي ربنا يعينا عالإجتهاد في الليالي دي وإننا ندرك ليلة القدر.
- (الخطوة التانية)
قفل السوشيل ميديا وفتحها للضرورة بس ووقت محدد وتتقفل تاني، معانا السنة كلها بنضيع فيها وقت العشر ايام دول مينفعش فيهم تقصير أبدًا.
- (الخطوة التالتة)
جدول الدعوات 🦋
- زي ما احنا عارفين العشر ايام دول فيهم أعظم ليلة في السنة (ليلة القدر) وكلنا نفسنا دعوات معينة تتحقق.
فإليكم طريقة جدول الدعوات:
- هتجيب ورقة مقطوعة من نص الكشكول هتقسمها كالأتي:
- (الصفحة الأولى) هنكتب فيها دعواتي الدنيوية.
زي أنجح، اتزوج، اتوفق في أمر معين، وهكذا.
- (الصفحة التانية) دعواتي الأخروية.
زي أن ربنا يرزقك بالفردوس الاعلى، يثبت قلبك على الدين، يدخلك الجنة بدون حساب وهكذا.
- (الصفحة التالتة) هنكتب عليها أهل بيتي
وتقسمها حسب أفرادهم
مثلا:
ماما وتكتب دعوات ليها نفسك تتحقق.
بابا وهكذا على حسب أفراد البيت.
- الصفحة الرابعة اكتب عليها (صُحبتي)
اكتب فيها اسماء اصحابك والناس اللي عاوز تدعيلهم وكمان متنساش تدعي للمسلمين أجمعين.
وطبعًا متنسونيش.
- كدا كتبنا الدعوات ودي خطوة مهمة لإن في حاجات بتتمناها جدا وممكن تنساها.
- خلصنا ال ٣ خطوات؟ دلوقتي جه دور نعرف ممكن نعمل إيه بقى في الـ ١٠ ايام دول! 🏋️
✅أول حاجة (هنختم القرآن مرة)
- كل يوم 3 أجزاء وعلى فكرة ممكن تاخد جزء منهم تصلي بيه التهجد.
✅تاني حاجة (هنقيم الليل)
- قيام الليل هو التراويح هو التهجد بس بيختلف الاسم حسب وقته وبإذن الله هنزلكم الفرق في بوست تاني.♥️
✅تالت حاجة (الاذكار)
- هنذكر ربنا طول الوقت ولو نعمل ورد بعدد اذكار معين ياريت زي مثلا استغفار ٥٠٠٠ مرة في اليوم وناخدها تحدي مع نفسنا.
✅رابع حاجة (دعاء اللهم إنك عفو تحب العفو فاعف عني)
- ده خليه معاك طول الوقت ردده وانت قلبك حاضر وفاهم معناه.
✅خامس حاجة (صدقة يوميًا)
- كل يوم خرج ولو جنية وياريت يكون بعد صلاة التراويح.
✅سادس حاجة (جلسة الضحى)
- وهي انك تصلي الفجر في جماعة وتقرأ قرآن لحد الشروق وتصلي ركعتين صلاة الضحى تكتب لك عمرة وحجة تامة إن شاء الله.♥️
- خلصنا أهداف الـ ١٠ ايام
يبقى تاخد حبة نصايح 🤏🏻🎯
١- ثبت نظام للنوم وافضل نظام في العشر الأواخر هو إنك تنام من بعد الضحى للضهر.
٢- أوعى تضيع ال ١٠ ايام من إيديك اعتبرهم اخر ١٠ ايام في حياتك وتخيل لو موت في اليوم العاشر تحب إيه تكون أخر أعمالك؟
٣- قيم كل الليالي وادعي في كل الليالي مش في الليالي الوترية بس وخد بالك!
وبس كدا اتمنى يكون البوست ده فرق معاكم ولا تنسوني من صالح دعائكم فضلًا.♥️
- حبيبة محمد
