07/12/2025
NJOFTIM ZYRTAR.
Stuttgart, 07.12.2025
Paqja, mëshira, begatitë, dhuntitë dhe mirësitë e Zotit qofshin mbi Ju!
Të nderuar kryetarë dhe përfaqësues të xhamive shqiptare,
Ju njoftojmë se më datë 06.12.2025 u mbajt mbledhja zyrtare e Unionit të Qendrave Islame Shqiptare të Gjermanisë, në Stuttgart. Në këtë mbledhje u diskutuan çështje të rëndësishme lidhur me aktivitetet e ardhshme të xhamive shqiptare në rajon, bashkëpunimin mes tyre, si dhe organizimin e eventeve komunitare dhe fetare.
Në Asamble, UIAZD-në e përfaqësuan:
• Kryetar: Hoxhë Mensur ef. Halili
• Zëvendëskryetar: Hoxhë Rexhep Sulejmani
• Sekretar: Hoxhë Salahudin Ibra
• Anëtar: Hoxhë Sevgani Asani
• Anëtar: Hoxhë Besnik Kadriolli
Ishte një kënaqësi e veçantë për ne në Baden-Württemberg që, pas shumë vitesh – që nga themelimi i UIAZD-së në vitin 2007 – të kemi mundësinë të mirëpresim sërish Asamblenë e UIAZD-së në Stuttgart.
Dega UIAZD-BW u themelua në vitin 2019 në Qendrën Islame Shqiptare në Schwäbisch Gmünd. Që nga themelimi i saj, elhamdulilah, kemi realizuar një sërë aktivitetesh të suksesshme dhe të përbashkëta UIAZD – UIAZD-BW në mbarë Gjermaninë, duke forcuar bashkëpunimin, vlerat dhe identitetin tonë të përbashkët.
Rendi i ditës
• Lexim Kurani dhe fjala përshëndetëse
• Fjala përshëndetëse e Mensur ef. Halili
• Degët e UIAZD-së
• Keynote: Dr. Besnik Sinani
• Paraqitja e raporteve
• Të ndryshme
Gjatë mbledhjes u zhvillua një diskutim i frytshëm mes xhamive shqiptare në Baden-Württemberg dhe Kryesisë së Unionit, ku u prezantuan tema me rëndësi të madhe, veçanërisht ato që lidhen me bashkëpunimin dhe bashkëveprimin.
Fjalën përshëndetëse e mori Kryetari i UIAZD-së, Hoxhë Mensur ef. Halili, i cili u fokusua në rëndësinë e koordinimit dhe planifikimit të aktiviteteve të përbashkëta ndërmjet degëve dhe qendrave islame. Ai theksoi nevojën për organizim, komunikim të rregullt, shkëmbim eksperiencash dhe projekte me afate të qarta, duke uruar që ky takim të prodhojë vendime të dobishme, të zbatueshme dhe efikase për mirëfunksionimin e Unionit dhe shërbimin ndaj komunitetit.
Sekretari i UIAZD-së, Hoxhë Salahudin Ibra, prezantoi aktivitetet e Unionit në rang republike, duke dhënë një pasqyrë të detajuar të projekteve dhe iniciativave më të rëndësishme. Ai theksoi rëndësinë e këtyre aktiviteteve për forcimin e bashkëpunimit ndërmjet degëve dhe xhamive shqiptare, si dhe për rritjen e përfaqësimit dhe ndikimit të komunitetit shqiptar mysliman në Gjermani.
Mes projekteve të paraqitura nga UIAZD, u përmendën:
• Memorandumi, si dokument strategjik që synon të harmonizojë veprimtaritë dhe qëllimet e Unionit;
• Projekti pilot me Goethe-Institut, që synon zhvillimin e bashkëpunimit kulturor dhe edukativ me institucionet gjermane;
• Revista e Unionit “PERSPEKTIVA”, platformë për informim dhe promovim të aktiviteteve, edukimit dhe kulturës islame;
• Impulsi i xhumasë / Dita ime, iniciativa që synon të rrisë pjesëmarrjen dhe përfshirjen aktive të komunitetit në jetën e xhamive dhe aktivitetet sociale;
• DIK-KRM-IKW-WDWIB-RTD, projekte të koordinuara që mbulojnë fushat e edukimit, komunikimit dhe bashkëpunimit me strukturat islame në Gjermani.
Këto iniciativa synojnë të krijojnë mundësi konkrete për bashkëpunim, të promovojnë edukimin dhe kulturën islame, si dhe të ofrojnë platforma për aktivitete fetare, kulturore dhe edukative në të gjithë vendin. Njëkohësisht, ato kontribuojnë në rritjen e unitetit dhe kohezionit të komunitetit shqiptar mysliman në Gjermani, duke përforcuar rolin e tij në shoqëri dhe duke mbështetur zhvillimin e projekteve të qëndrueshme në të ardhmen.
Ndërkohë, degët raportuan për veprimtaritë e tyre të deritanishme, duke bërë një pasqyrë të rezultateve, sfidave dhe arritjeve kryesore në nivel lokal. Ata gjithashtu prezantuan planet dhe projektet e parashikuara për të ardhmen, duke theksuar rëndësinë e koordinimit të mëtejshëm, bashkëpunimit të ngushtë ndërmjet degëve dhe zhvillimin e aktiviteteve që synojnë forcimin e komunitetit, edukimin e të rinjve dhe ofrimin e shërbimeve kulturore dhe fetare për besimtarët. Ky raport i detajuar synon të krijojë një bazë të qartë për planifikim strategjik dhe vendimmarrje efektive në të ardhmen.
Fillimisht, mori fjalën Hoxhë Sevgani ef. Asani në emër të UIAZD-BY, dega e sapoformuar e Bajernit, i cili përshëndeti të pranishmit dhe uroi mbarësi në punimet e Asamblesë.
Nga ana e degës së Unionit UIAZD-BW, Kryetari Hoxhë Muhamet ef. Havolli përshëndeti të pranishmit dhe shprehu mirënjohjen për pjesëmarrjen e delegacioneve nga degët e tjera. Ai informoi për vizitat e kryera në xhamitë e Baden-Württembergut, duke theksuar rëndësinë e këtyre vizitave për forcimin e lidhjeve ndërmjet komuniteteve dhe koordinimin e aktiviteteve.
Gjithashtu, Kryetari paraqiti progresin e bërë në themelimin e xhamive të reja në këtë rajon, duke nënvizuar angazhimin e Unionit për zhvillimin dhe zgjerimin e strukturave islame, si dhe për krijimin e hapësirave që ofrojnë shërbime dhe aktivitete për komunitetin lokal.
Ndërsa Zëvendëskryetari i UIAZD-BW, Abdylrrahim Leci, prezantoi aktivitetet e realizuara deri më tani nga UIAZD-BW, ai gjithashtu paraqiti planet dhe projektet e parashikuara për të ardhmen. Ai theksoi rëndësinë e koordinimit dhe bashkëpunimit ndërmjet degëve dhe xhamive shqiptare, si dhe nevojën për një planifikim strategjik që garanton zbatimin efektiv të aktiviteteve dhe projekteve të ardhshme.
Vlen të theksohet themelimi i “Fondit për hapjen e Xhamive të reja”, ku u prezantua koncepti i financimit, hapat e implementimit dhe mënyrat e mbështetjes për iniciativat që do të zhvillohen në të ardhmen. Ky fond synon të krijojë mundësi konkrete për zgjerimin e strukturave islame dhe ofrimin e shërbimeve të nevojshme për komunitetin lokal.
Po ashtu, në të njëjtën mbrëmje, UIAZD-BW nisi zyrtarisht projektin e radhës në Qendrën Islame Shqiptare Böblingen-Sindelfingen, duke shënuar një hap të rëndësishëm në realizimin e iniciativave zhvilluese dhe duke kontribuar drejtpërdrejt në fuqizimin e aktivitetit fetar, edukativ dhe kulturor për të gjithë besimtarët në rajon. Ky projekt shërben gjithashtu si model për iniciativa të ngjashme në të gjithë Baden-Württembergun.
Menjëherë pas nisjes së projektit, filloi grumbullimi i fondeve për Qendrën Islame Shqiptare Böblingen-Sindelfingen, dhe xhamitë e Baden-Württembergut kanë përgjigjur pozitivisht ndaj thirrjes dhe kërkesës së UIAZD-BW për mbështetje.
Mysafir special dhe Keynote Speaker ishte Dr. Besnik Sinani, pedagog i teologjisë islame në Universitetin e Tübingënit, i cili prezantoi temën: “Ligjërimi në epokë transformimi”.
Dr. Sinani trajtoi çështjen e rritjes së ligjërimit anti-musliman në mediat dhe rrjetet sociale evropiane, si dhe nevojën për krijimin e strategjive të vetë-përfaqësimit mediatik të muslimanëve shqiptarë në Gjermani.
Mbledhja e Asamblesë së UIAZD-së në Stuttgart përfundoi me sukses, duke forcuar lidhjet ndërmjet degëve dhe xhamive shqiptare në Baden-Württemberg dhe duke vendosur baza të qëndrueshme për projekte të ardhshme. Ky takim shërbeu si një platformë e rëndësishme për shkëmbimin e përvojave, diskutimin e planeve dhe koordinimin e aktiviteteve, duke kontribuar në unitetin, bashkëpunimin dhe zhvillimin e komunitetit shqiptar mysliman në Gjermani.
Në fund, për të pranishmit u shtrua një darkë nga Qendra Islame Shqiptare Stuttgart, si shenjë mirësjelljeje dhe falënderimi për angazhimin dhe pjesëmarrjen e tyre.
Me nderime dhe respekt,
Kryesia e Unionit të Qendrave Islame Shqiptare – Dega Baden-Württemberg (UIAZD-BW)
