23/12/2025
Unser schöner Baum!
Nu steiht he. Allens hett klappt. Fein süht he ut. Hüüt vörmiddag hebbt uns Lüüd tosamen mit de Mitarbeiders vun de Buuhof de Dannboom in uns Kark opstellt. Jahr för Jahr findt s*k Minschen in uns Gemeende, de seggt: „Jem bruuken doch een Boom för Wiehnachten! Mien Dann mutt weg ut de Goarn. Kiek doch mal, wat de nich inne Kark passen deit.“ Un dat Wunnerbaare is: De passt jümmers! Wieldat wi güstern Aabend an de 4. Advent noch een Konzert harrn, mussen wi bit vundaag tööven.
Aver nu hett allens klappt. Stolt kiekt wi all op de Boom. „De süht wedder fein ut!“, sünd wi uns eenig. Denn gifft dat Fröhstück för all de flietigen Hölpers in`t Gemeendehuus, ja, un denn passeert inne Kark een groote Wunner: De Dann warrd schmückt, mit Steerns un mit de Kerzen. Siggi un Nis, uns Mitarbeiders, geevt s*k jümmers veel Möögde. Denn dat schall doch schöön utsehn. Af un to warrd dat heel fikeliensch un bringen de Lichterkeed ründ um de Boom an. Aver ok dat warrd good.
As se ferdi sünd, maakt Siggi de Lichter an. „Schöön!“ Un nu is dat miteens keen Dann mehr, nä, dat is een Christboom. Dat Gröön vun de Nadeln vertellt uns vun dat Höpen, wat mit Jesus inne Welt kaamen is. De Lichter erinnert an dat Strahlen vun de Engel in de hillige Nacht op de Felder vun Bethlehem. Dat Rood un Witt steiht för Gott sien Leevde un för Jesus, dat Licht för de Welt. Düsse Dann, de nu een Christboom is, de vertellt mi nu de heele Geschicht vun Wiehnachten un Jesus sien Gebuurt.
Dorüm frei ik mi al op Wiehnachtenabend. Denn is de Kark vull, de Lüüd sünd so glückli, wi singt „O du fröhliche“ un wi staunt tosamen över de schmucke Boom. De strahlt un vertellt uns vun dat Wunner, dat Gott sülm in düsse Welt kummt un ehr verwanneln deit. De kann Truuer un Bangnis in Freud un Glück verwanneln, un de kann ut een eenfache Dann een schmucke strahlende Christboom maaken.
/ Pastor Peter Schuchardt in "Gesegneten Abend" auf NDR Schleswig-Holstein
