07/15/2026
Սիրելի Գերաշնորհ Տ. Բաբգէն Արք. Չարեան,
Ձեր քահանայական, եպիսկոպոսական եւ հովուապետական ծառայութեան նշանակալից յոբելեանին առիթով, խոր երախտագիտութեամբ եւ հոգեւոր ցնծութեամբ մեր գոհաբանական աղօթքները կը բարձրացնենք առ Ամենակալ Աստուած՝ գոհութիւն մատուցանելով Իր անսահման բարութեան համար, որ ձեզ շնորհեց եւ կոչեց որպէս նուիրեալ, անձնուէր ու հաւատարիմ մշակ՝ Իր Սուրբ Եկեղեցւոյ այգեստանին մէջ։
Ձեր անսասան հաւատարմութիւնը մեր Տէր Յիսուս Քրիստոսին, ձեր անշեղ նուիրումն ու որդիական սէրը հանդէպ Հայաստանեայց Առաքելական Սուրբ Եկեղեցւոյ, ինչպէս նաեւ ձեր հայրական գուրգուրանքն ու անխոնջ հոգատարութիւնը իւրաքանչիւր հաւատացեալի նկատմամբ, մեզի համար կը հանդիսանան Աւետարանի կենսատու ճշմարտութիւններուն կենդանի վկայութիւնը եւ ներշնչող օրինակը։
Տասնամեակներ շարունակ դուք իմաստութեամբ, խոնարհութեամբ, հոգեւոր արիութեամբ եւ աննկուն յոյսով առաջնորդած էք Աստուծոյ ձեզի վստահուած հօտը՝ անոր հետ բաժնելով թէ՛ ուրախութիւններն ու օրհնութիւնները, եւ թէ՛ նեղութիւններն ու փորձութիւնները, ամէն քայլափոխի արտացոլելով ճշմարիտ, անձնուէր եւ սիրառատ հովուի մը սիրտը։ Ձեր ծառայութիւնը եղած է ոչ միայն առաջնորդութիւն, այլ նաեւ մխիթարութիւն, զօրակցութիւն եւ կենդանի վկայութիւն Քրիստոսի հովուական սիրոյն։
Մեր ջերմագին աղօթքն է, որ Ամենակալ Տէրը ձեզի շնորհէ տակաւին երկարամեայ, խաղաղ, օրհնաբեր եւ արդիւնաւէտ ծառայութիւն, առատապէս հեղու Իր երկնային շնորհները ձեր վրայ, պահպանէ ձեզ ամուր առողջութեամբ, անսպառ զօրութեամբ եւ մշտանորոգ հոգեւոր եռանդով, որպէսզի շարունակէք անսայթաք առաջնորդել ձեզի վստահուած հօտը դէպի հաւատքի, միութեան, սրբութեան եւ փրկութեան ճանապարհը եւ ծառայութեան ոգիով ներշնչելով դէպի Քրիստոսի կենդանի ներկայութիւնը։
Խորին երախտագիտութեամբ, որդիական սիրով եւ խորագոյն յարգանքով կը խնդրենք ընդունիլ մեր սրտագին շնորհաւորութիւններն ու եղբայրական բարեմաղթանքները։ Կը վստահեցնենք ձեզ, թէ միշտ ներկայ էք մեր աղօթքներուն մէջ, եւ կը շարունակենք աղերսել առ Բարձրեալն Աստուած, որպէսզի Իր առատ օրհնութեամբ պահպանէ, զօրացնէ եւ առաջնորդէ ձեզ ձեր սրբազան ու պատասխանատու առաքելութեան ընթացքին՝ շնորհելով ձեզ երկարամեայ, խաղաղ, օրհնաբեր ու պտղաբեր ծառայութիւն՝ ի փառս Իր Սուրբ Անուան եւ ի շինութիւն Իր Սուրբ Եկեղեցւոյ։
Աղօթակից սիրով՝
Վեր. Ժորժ Տապպօ
Հովիւ՝ Մոնթրէալի Հայ Աւետարանական Առաջին Եկեղեցւոյ
https://www.facebook.com/share/p/1LBDbwW3Ya/?mibextid=wwXIfr
