Umusozi siyoni

Call

Umusozi siyoni Evengelisation

03/10/2026

kuwa gatandatu ige 03/10/2026 (UBUNTU N, Ukuri) yohana 1: 17 Kukw’ ivyagezwe vyazanywe na Mose, UBUNTU N, UKURI vyazanywe na YESU KRISTO✝.* _Ijambo ry'umwaka : KWUBAKA UBUCUTI N'IMANA_.

*Shalom Shalom Mwene Data, Kaze dusangire ijambo ry'Imana 👇🏾👇🏾👇🏾*

_Thème : kwama icamwa c' umunezero.

_🔥 Yohana 17:13🔥_

Ariko none ndaje kuri wewe, kand' ibi mbivuga ndi mw isi, kugira ngo bagire umunezero wanje wuzure muri bo.

🔵Yesu nashimwe mukundwa. *Reka ntangure nkwipfuriza weekend nziza. Uyu musi ukubere umusi wo gushishikara kwegera Imana, wo kurondera Imana.* Turi mugice ca gatatu aho tuganira kw'ijambo riduhamagarira kurongorwa na Mpwemu Yera. Ubu tugeze aho turabira hamw ivyamwa vya Mpwemu Yera. *Ejo twabonye ingene twogwiza urukundo mubuzima bwacu.* Twobonye kurukundo rufuka ivyaha vyinshi. Unomusi turabira hamwe icamwa c'umunezero. Iyo twama ivyamwa vya Mpwemu Yera, niho bigaragarira ko turi abana b'Imana. *Ijambo ry'Imana rivuga ko bazotumenyera kuvyamwa twama.* Ni gute uriko urama? Tugure ubgenge tubugwiza kugira tubashe kwama kandi cane. Ivyamwa twama nivyo bizotuma twambara ibitsobo bikomeye mwijuru, bizonatuma Imana Ihaguruka kutugwanira mubihe bigoye. Ijambo ry'Imana rivuga ngo : *Kand'i Yopa har' umwigishwa yitwa Tabita, risobanurwa ngo Doruka: uwo mugore yari n'ibikorwa vyiza vyinshi, n'ubuntu bginshi yagira.* Ivyakozwe n'intumwa 9:36. Ijambo ryambere nuko uyo mugore yari umwigishwa. Umwigishwa n'umuntu yemeye kuja kubirenge vya Yesu kugira yigishwe. Ubwakabiri ngo yari n'ibikorwa vyiza vyinshi, n'ubuntu bginshi yagira. *Yama Ivyamwa vyinshi. Ivyo vyatumye Imana Imugwanira mubihe bigoye.*

03/10/2026

_🔵 mwene Data, turasangira ijambo rivuga ngo : *kwama icamwa c' umunezero.* mw'isi nta munezero uhari kiretse mu bantu bameny'Imana. Ivya bantu bo mw'isi baronderamwo umunezero, ahubwo nivyo bibambura umunezero. *Hariho abumva ko bafise amahera biba bikwiye ariko ikibabaje ya mahera niyo abambura umunezero munyuma.* Amahera ni meza ariko iyo ariyo adukoresha ni mabi cane. Hakuduha umunezero ahubwo atwambura wa munezero. Abakunzi bicubahiro nabo birangira batakaje umunezero. *Abantu barondera umunezero munzoga ha kuyaronka ahubwo bitera bimera nabi cane kandi kenshi umunezero wo mw'isi utera umubabaro mwinshi.* Simvuga ko tutonezerwa oyaa, ariko twige kuzerwa nka bana b'Imana. Mu Mana twizeye n'imitima yacu yose hari umunezero udasanzwe, uwo ntuva kubifadika ahubwo uva k*kugira uwa remye vyose muri twebwe. Ijambo ry'Imana rivuga : *Mweho mur' abava ku Mana, bana bato, kandi ba bandi mwarabanesheje: k*k' Uri muri mwebge aruta uri mu b'isi.* 1 Yohana 4:4. Uwuri muri twebge niwe soko y'umunezero wacu. Tugira umunezero rero iyo turi muri Kristo Yesu honyene. *Yesu Ni yaba munini muri twebwe, tuzogira umunezero myinshi.* Murakoze.

Wewe wakiye iri jambo kandi ukaryizera, *Ndagusengera ngw' Imana Iguhe kwamana umunezero uva kuri Yo.* ni mwizina rya YESU Kristo ndabisenze, Amen.

_Reka ndangize ndakwingingira kuza Kuri Yesu wewe utarakizwa. Yesu Aragukunda, kandi Yagiye kumusalaba kubera ivyaha vyawe, Ingo kuri We Agutabare. Mugire weekend nziza._

*Augustin (+25779383507) whatsapp ✍🏾✍🏾✍🏾📞📞📞*

02/10/2026

kuwa gatanu ige 02/10/2026 (UBUNTU N, Ukuri) yohana 1: 17 Kukw’ ivyagezwe vyazanywe na Mose, UBUNTU N, UKURI vyazanywe na YESU KRISTO✝.* _Ijambo ry'umwaka : KWUBAKA UBUCUTI N'IMANA_.

*Shalom Shalom Mwene Data, Kaze dusangire ijambo ry'Imana 👇🏾👇🏾👇🏾*

_Thème : kwama icamwa c' urukundo.

_🔥 1 Yohana 4:16🔥_

Natwe twamenye kandi twizeye urukundo Imana idufitiye. Imana n'urukundo; kand' uguma mu rukundo aguma mu Mana, Imana ikaguma muri we.

🔵Yesu nashimwe mukundwa. *Reka turarabira hamwe urukundo rw'Imana nurwabantu. Turiko turabira hamwe ingene dukwiye kwama icamwa c'urukundo.* Iki camwa kirakomeye cane kandi nico cambere. Nk'uko twabibonye urukundo rufuka ivyaha vyinshi. Ahari urukundo haraza Amahoro, kandi urukundo runesha vyinshi. Ijambo ry'Imana rivuga ngo : *Ariko mwebge mwumva ndababgire: Mukunde abansi banyu, mugirire neza ababanka, muhezagire ababavuma, musabire ababagirira nabi.* Luka 6:27-28. Uku ni kwikorera umusaraba. Kera twari abansi b'Imana k*ko twari tujakariye ivyaha. Abanse kwihana nabo bitwa abansi bumusalaba. *Imana Yaradukunze, Yarakunze abansi bayo. Natwe duhamagariwe gukunda abansi bacu.* Abatwanka tubiteho tubagirire neza, abatuvuma ntitubasubize inabi ariko tubahezagire, abatugirira nabi tubasabire ivyiza. *Urwo nirwo rukundo Imana idusaba kubamwo.* Ijambo ry'Imana riravuga kandi ngo : Abo nkunda, dukundane: k*k' urukundo ruva ku Mana. *Umuntu wese akundana yavyawe n'Imana, kand' azi Imana. Udakundana, ntazi Imana, k*kw Imana ar' urukundo.* 1 Yohana 4:7-8. Kimwe mu bintu bituranga ko tuzi Imana n'urukundo dukunda abandi. *Dukeneye kubabazwa nabari mubihe bigoye.*

02/10/2026

_🔵 mwene Data, turasangira ijambo rivuga ngo : *kwama icamwa c'urukundo.* urukundo rukwiye kuturutira vyose. Ijambo ry'Imana rivuga ngo : *Maze k*k' ubugarariji buzogwira urukundo rw'abenshi ruzotimba.* Matayo 24:12. Turi mugihe canyuma aho atarukundo rukihari, urukundo rwa benshi ruriko ruratimba ku benshi rwaramaze gutimba. *Abakijijwe suko dukwiye kubaho, uko bukeye uko bwije dukwiye kugwiza urukundo kubandi.* Ijambo ry'Imana rivuga ngo : Iki ni co kirimw' urukundo, s'uko twebge twakunze Imana, ariko n'ukw ari yo yadukunze, igatuma Umwana wayo kuba impongano y'ivyaha vyacu. *Abo nkunda, kw Imana yadukunze irtyo, natwe dukwiye gukundana. Nta wigeze kubona Imana. Dukundanye, Imana iguma muri twebge, no kuyikunda kuba guhinguwe muri twebge.* 1 Yohana 4:10-12. Kimwe mu bintu bituma tuneshwa na vyinshi ni kutagendana n'Imana, k*ko inkomezi zacu atahandi ziva atari ku Mana. *Ngo dukundanye Imana Iguma muri twebge, tugwize rero gukundana atari mu majambo gusa, ariko ari mu bikorwa.* uwuguma mu rukundo aguma mu Mana, Imana ikaguma muri we. *Guma mu Rukundo bizotuma ubona Imana.* Murakoze.

Wewe wakiye iri jambo kandi ukaryizera, *Ndagusengera ngw' Imana Igushoboze kwamana urukundo.* ni mwizina rya YESU Kristo ndabisenze, Amen.

_Reka ndangize ndakwingingira kuza Kuri Yesu wewe utarakizwa. Yesu Aragukunda, kandi Yagiye kumusalaba kubera ivyaha vyawe, Ingo kuri We Agutabare. Mugire umusi wa gatanu mwiza ._

*Augustin (+25779383507) whatsapp ✍🏾✍🏾✍🏾📞📞📞*

01/10/2026

kuwa kane ige 01/10/2026 (UBUNTU N, Ukuri) yohana 1: 17 Kukw’ ivyagezwe vyazanywe na Mose, UBUNTU N, UKURI vyazanywe na YESU KRISTO✝.* _Ijambo ry'umwaka : KWUBAKA UBUCUTI N'IMANA_.

*Shalom Shalom Mwene Data, Kaze dusangire ijambo ry'Imana 👇🏾👇🏾👇🏾*

_Thème : kwama icamwa c' urukundo.

_🔥 1 Ab'i Korinto 13:4-7🔥_

Urukundo rurihangana, rugira neza, urukundo ntirugira ishari, urukundo ntirwihayagiza, ntirwihimbaza, ntirukora ibiteye isoni, ntirurondera ivyarwo, ntirwiciraho, ntirwiyumvira ikibi ku bantu, ntirunezererwa ukugabitanya kw'abandi, ariko runezeranwa n'ukuri: rurenzako muri vyose, rwizera vyose, rwizigira vyose, rwihanganira vyose.

🔵Yesu nashimwe mukundwa. *Reka ntangure nkwipfuriza ukwezi kwicumi kwiza. Ukomeze kwegera lmana nayo Izokwegera.* Ijambo ry'Iman rivuga ngo : *Hahirwa abafise inzara n'inyota vyo kugororoka, k*kw ari bo bazohazwa.* Matayo 5:6. Hari ibintu kanaka ushaka kubona mubuzima bwawe, harivyo ushaka kw'Imana Iguhazako mu kubona I kwishura, *ntakindi ukeneye atari kugira inzara n'inyota vyo kugororoka.* uguhazwa kwiza kwivyiza kuva ku Mana. Turabandanya no kwama icamwa curukundo. Ijambo ry'Imana rivuga ngo : *Ntihagire uwo mugirira umwenda, atar' ugukundana: k*k' ukunda uwundi aba ashikije ivyagezwe. Kukw ibi, ngo Ntugasambane, ntukice, ntukibe, ntukifuze, n'ikindi cagezwe cose, bipoperanirijwe mur' iri jambo, ng' Ukunde mugenzawe nk'uko wikunda. Ufise urukundo ntagirira mugenzi we nabi: ni co gituma urukundo ari rwo rush*tsa ivyagezwe.* Abaroma 13:8-10. Aya majambo agufashe cane wewe ushaka kwama icamwa curukundo. Ngo uwukunda uwundi aba ashikije ivyagezwe, aba arwanije ivyaha. Ufise urukundo ntagirira mugeziwe nabi. *Dukwiye kwambara kino camwa curukundo nkikirwanishwa gikomeye

01/10/2026

_🔵 mwene Data, turasangira ijambo rivuga ngo : *kwama icamwa c'urukundo.* Unomusi turabira hamwe ingabire iruta izindi ngabire zose, iyo siyindi n'urukundo. *Ijambo ry'Imana riratwereka neza ko naho twagira ingabire zikomeye nko kuvuga indimi z'abantu n'iz' abamarayika, kuvugishwa n'Imana mu kwizera kwose gushobora gukurah' imisozi, mu gutanga tugaburira aboro, nizindi ngabire twogira ariko tutagira urukundo ngo ntaco vyotumarira.* Kuzigira sibibi ariko zitangurirwe n'urukundo. Urukundo rero Imana Ivuga ruratangaje cane kandi rurakomeye, *k*ko rurihangana, rugira neza, ntirugira ishari, ntirwihayagiza, ntirwihimbaza, ntirukora ibiteye isoni, ntirurondera ivyarwo, ntirwiciraho, ntirwiyumvira ikibi ku bantu, ntirunezererwa ukugabitanya kw'abandi, ariko runezeranwa n'ukuri: rurenzako muri vyose, rwizera vyose, rwizigira vyose, rwihanganira vyose.* Iy'umuntu afise urukundo akora ku mutima w'Imana. Paulo arangiza avuga ngo : *hagumyeh' ukwizera, n'ivyizigiro, n'urukundo, ivyo ukw ari bitatu: arikw ikibiruta n'urukundo.* Bakundwa, ntitube indyadya ariko tugwize urukundo atarurwo kumunwa gusa, ariko rwibikorwa. *Murakoze.*

Wewe wakiye iri jambo kandi ukaryizera, *Ndagusengera ngw' Imana Igushoboze kwama urukundo.* ni mwizina rya YESU Kristo ndabisenze, Amen.

_Reka ndangize ndakwingingira kuza Kuri Yesu wewe utarakizwa. Yesu Aragukunda, kandi Yagiye kumusalaba kubera ivyaha vyawe, Ingo kuri We Agutabare. Mugire umusi wa kane mwiza ._

*Augustin (+25779383507) whatsapp ✍🏾✍🏾✍🏾📞📞📞*

30/09/2026

*kuwa gatatu ige 30/9/2026 (UBUNTU N, Ukuri) yohana 1: 17 Kukw’ ivyagezwe vyazanywe na Mose, UBUNTU N, UKURI vyazanywe na YESU KRISTO✝.* _Ijambo ry'umwaka : KUBAKA UBUCUTI N'IMANA_.

*Shalom Shalom Mwene Data, Kaze dusangire ijambo ry'Imana 👇🏾👇🏾👇🏾*

_Thème : Yesu niwawundi, Yesu ni Muzima, Yesu nubu Aracatabara_

_🔥Kuvayo 15:25🔥_

Na we atakambira Uhoraho: Uhoraho amwereka igiti, agiterera mur' ayo mazi, aca ahinduka meza. Aho ni ho Uhoraho yabashingiye icagezwe n'ibgirizwa, kand' aho ni ho yabageragereje.

🔵Yesu nashimwe mukundwa. Sinzi ibihe uriko uracamwo ariko nashaka aya majambo agufashe, aravuga ngo : *Ibisigaye, muremesherezwe mu Mwami wacu, no mu bushobozi bgiwe bginshi. Mwambare ibirwanishwa vyose vy'Imana, kugira ngo mushobore guhagarara mudatsinzwe n'ubugunge bga wa Murwanizi. Kukw abo tunigana atar' ab' inyama n'amaraso, ariko tunigana n'abakuru n'abafise ububasha n'abaganza iyi si y'umwiza, n'impwemu mbi z'ahantu ho mw ijuru.* Abanyefeso 6:10-12. Ikintu cambere ni kuremesherezwa mu mwami. *Aho ni hehe? Aho ni mwijambo ryiwe.* Ijambo ry'Imana rikeneye kutubera ivyizigiro muvyo ducamwo vyose k*ko aribwo bushobozi bw'Imana buhambaye. Ikindi dukeneye kwambara ibirwanishwa vyose vy'Imana kugira ntidutsindwe n'ubugunge bga wa Murwanizi, navyo n'ibi : *ukuri, ukugororoka, ubutumwa bwiza, ukwizera, agakiza, ijambo ry'Imana.* Ikindi dukwiye kumenya nuko tutanigana nivyo tubona ahubwo tunigana nivyo tutabona arizo mpwemu z'ahantu ho mw ijuru. *Dukeneye guhaguruka tugasenga cane.*

30/09/2026

_🔵 mwene Data, buri musi wa gatatu twama dusangira ijambo ry'Imana rivuga ngo : *Yesu niwawundi, Yesu ni Muzima, Yesu nubu Aracatabara.* Umuririmvyi yaririmvye ngo : *Ugusenga, ugusenga Kuramfash' ibihe vyose, Kunshikana kuri Data, Akankiza mu bingoye. Kandi Satan' iy' anteye Akansuk' uburyo bgose, Ibihetangabo kenshi Ugusenga kuramfasha.* Senga hama wizere amasengesho yawe. Ntidukwiye kugira ubwoba bwibihe bibi ariko dukwiye kugira ubwoba bwo kuba kure y'Imana. *Dukeneye kwegera Imana uko bukeye uko bwije.* Mwijambo ry'Imana ryunomusi tubona Abisirayeli bari mu kibazo co kubura amazi imisi Itatu, Bash*tse i Mara, ntibashobora kunywa amazi yaho, k*ko yar' umururazi; ni co catumye hitwa Mara .Kuvayo 15:23. Babuze amazi batangura kwidodombera Imana hogusenga. *Wewe uri mu kibazo kanaka wirinde cane kwidodombera Imana ahubwo uyishimire Muri vyose hama uyimenyeshe ibikugoye.* Mose atakambiye Imana, Imwereka Icakora. Mugutakambira Imana niho hava inyishu zibibazo vyacu. Ayo mazi mabi urimwo, ico kibazo kiri imbere yawe kibwire Yesu, nawe aragihindura ciza. *Dukeneye kwizera gusa.* Murakoze

We wakiye iri jambo kandi ukaryizera, *Ndagusengera ngo rigukorere ibihwanye nukwizera kwawe.* ni mwizina rya YESU ndabisenze, Amen.

Reka ndangize ndakubwira ngo : *Yesu Niwe Murokozi Wacu, Muri we huzuye, ugukiza, n' ugutabara.* Ncuti wewe rero utaraha ubuzima bwawe Yesu Kristo ngwakubere umwami n'umukiza w'ubugingo bwawe, kaze nubu Aracakurindiye Agutabare. twandikire tugufashe . Mugire umusi wa gatatu mwiza, mwarahezagiwe cane. 🙌🏾🙌🏾🙌🏾

*Augustin (+25779383507) whatsapp ✍🏾✍🏾✍🏾📞📞📞*

29/09/2026

*kuwambere ige, 28/09/2025 (UBUNTU N, UKURI) yohana 1: 17 Kukw’ ivyagezwe vyazanywe na Mose, UBUNTU N, UKURI vyazanywe na YESU KRISTO✝.* _Ijambo ry'UMWAKA: KWUBAKA UBUCUTI N'IMANA._

*Shalom Shalom Mwene Data, Kaze dusangire ijambo ry'Imana, 👇🏾👇🏾👇🏾*

_Thème : Kwama twitwararika ubwami bw'Imana gusumba ibindi vyose_

🔥Zaburi 139:23-24🔥

Mana, nsuzuma, umenye umutima wanje,
N'uncace, umenye ivyiyumviro vyanje,
Urabe yuko harih' inzira y'ibibi yoba iri muri jewe,
Undongorere mu nzira y'ibihe bidashira.

🔵Yesu nashimwe cane mwene Data. *Ntangure ndabasaba imbabazi, telephone yangoye unomusi. ndabipfurije indwi nshasha nziza. Kaze kujubere akaryo kadasanzwe ko gukomeza kwegera Imana no gukora Ivyishaka.* Abakizwa ntidukwiye kwijajara ngo birakwiye kubera yuko dukijijwe, k*ko satani ntaruha kutugwanya. Gukizwa dukeneye kubibera magabo mu kwirinda no guca bugufi cane. Yesu arabaza ngo : *None mur' abo bompi n'uwuhe yakoze ivyo se agomba? Baramwishura, bati N'uwa mbere. Yesu arababgira, ati Ndababgira ukuri yukw abatozakori n'abasambanyikazi babatanga kwinjira mu bgami bg'Imana. Kuko Yohana yaje muri mwebge agendera mu nzira yo kugororoka, kandi ntimwamwemera. Arikw abatozakori n'abasambanyikazi baramwemeye. Namwe mubibonye, no hanyuma ntimwirimbura ngo mumwemere.* Matayo 21:32. Aya majambo atwigisha gukora ivy'Imana Ishaka. Yesu Yariko avuga abahungu babiri se yatumye. *Umwe aremera ariko ntiyako ivyo se Yamubwiye. Uwundi aranka ariko amaze kwirimbura bigenda neza, akora Ivyo se yavuze.* Ibi bitwigisha iki? Abitwa ko bagororotse bashobora kubura ubwami bw'Imana ariko ababoneka kwari abanyavyaha akaba ariko badutanga kuja mwijuru. *Kubwivyo tube maso.*

29/09/2026

_🔵 mwene Data, buri musi wambere twama dusangira ijambo rivuga ngo : *Kwama twitwararika ubwami bw'Imana gusumba ibindi vyose*. Ikintu cose Kurinosi gifise itango nihezo. Nuko n'umuntu biri, nawe afise intango ni herezo. umusiguzi aravuga ngo : *Iherezo ry'ikintu riruta itanguriro ryaco; kand' uw' umutima wihangana aruta uw' umutima w'ubgibone.*
Umusiguzi 7:8. Iherezo ryawe rikeneye kuba ryiza cane gusumvya intango yawe. Ikindi ukeneye kugira n'umutima wihangana mu kutanduzwa nivya buno buzima, *wihanganira ibihe bibi ugenda uhura navyo muri buno buzima niho tuzobona ubwami bw'Imana.* Amajambo yunomusi atwigisha kwama twama twisuzuma. *Dusuzuma imitima yacu, dusaba Imana Iduhindure ivyiyumviro vyacu bibi maze iduhe Ivyiyumviro vyiza bizima biyihimbara.* Ivyo Bizogufasha kurwanya ibibi biri imbere yacu bitubuza kuja isiyoni yo mwijuru. Umwanditsi wa zaburi yarangije avuga ngo : *Undongorere mu nzira y'ibihe bidashira.* Natwe iyo niyo nzira izodushikana mwijuru. Inzira uriko uracamwo unomusi ubona izogushikana mwijuru kweli? *ndavuga ivyukora, ubuna bizotuma ubona ubwami bw'Imana? Ba maso rero.* Murakoze.

We wakiye iri jambo kandi ukaryizera, *Ndagusengera ngo Imana Igushoboze kwama witwararika ivyubwami bw'Imana gusumba ibindi.* ni mwizina rya YESU Kristo ndabisenze, Amen.

_Reka ndangize ndakwingingira kuza Kuri Yesu wewe utarakizwa. Yesu Aragukunda, kandi Yagiye kumusalaba kubera ivyaha vyawe, Ingo kuri We Agutabare. Mugire umusi wambere mwiza._

*Augustin (+25779383507) whatsapp ✍🏾✍🏾✍🏾📞📞📞*

Address

8ème Avenue Rumonge
Rumonge

Telephone

+25779383507

Website

Alerts

Be the first to know and let us send you an email when Umusozi siyoni posts news and promotions. Your email address will not be used for any other purpose, and you can unsubscribe at any time.

Shortcuts

Share

Category