Kamenge United Methodist Church

22/08/2026

Urugendo rw’Abana mu bubwirirza bwa Gitega

Mu rugendo barimwo mu ntara ya Gitega abana bo kw’Iriba-Kamenge kuri uno wa gatandatu igenekerezo rya 22 myandagaro 2026 bagendeye ikirimba co mu Gishora aho umwami Mwezi Gisabo yahungiye mu gihe yariko arahirwa na Kilima na Maconco.

Muri ico kibanza abana biboneye ingoma Ruciteme na Murimirwa zavyaye izindi zikaba zavuzwa rimwe mu mwaka mu kwezi kwa 12 ku musi w’umuganuro.
Binjiye mu nzu umwami yabamwo barabona ibikoresho bitandukanye harimwo urubaya, icansi, imikuza, uburiri yararako, ingangura bicisha uwamenje n’ibindi bikoresho.

Abana bash*tse mu kigo i bwami. Aho naho hakaba hari igikoni abakevyi barondereramwo ibifungurwa vy’umwami, ubwiherero n’ubwogero yakoresha.
Muri ico kibanza nyene abana bash*tse ahashingiwe umwamikazi Inarukundo umugore wa Mwezi hamwe n’intatemwa ya Antime Baransakaje inararibonye mu murisho w’ingoma.

Bavuye aho abana baciye berekeza mu gisagara ca Gitega ahari ikigo c’iratiro ry’akaranga ku Burundi musée national aho babonye ingene abo hambere bari babayeho. Aho naho babonye ibicurarangisho vya kera, urwembe bakoresha mukumwa abantu, impuzu z’ibiti, ibihete, imiringa, urusato bahekamwo umwana, amasuka, imihoro, amaceri batwaramwo umwami, amabuye bakoresha nk’imbugita mu myaka yi 3000 Yesu ataravuka hamwe n’ishusho y’igisagara ca Bujumbura ku muzo w’abadagi.

Inyuma y’urwo rugendo baciye berekeza kuri Paruwasi Nyabugogo aho bakiranywe igishika na bagenzi babo.

Tubamenyeshe Kandi ko abo bana baherekejwe n’abigisha babo hamwe n’umwunganizi wa pasitori ,Pasteur Simon!

18/08/2026

Igice ca kabiri c’amasanamu yaranze ibirori vyo gusozera inyigisho za muri paroisse kw’Iriba Kamenge!

17/08/2026

Kaze dusangire umugisha muri ino ndwi!

17/08/2026

Isozerwa rya -Kw’Iriba-Kamenge

Kuri uyu w’Imana igenekerezo rya 16 myandagaro 2026, muri Paruwasi kw’Iriba-Kamenge haba ibirori vyo gusozera ku mugaragaro inyigisho za bibiliya ku bana bari mu buruhuko VBS-2026.

Abana berekanye impano zitandukanye harimwo kurongora urutonde rw’ibikorwa, kurongora indirimbo zo himbaza no gutazira, udukino, gusengera imitwaro n’amashimwe, usengera amaturo, amatangazo, ivyanditswe no kuvuga ubutumwa.

Mu butumwa yasangije abaraho Kezakimana Bethine Michaella umwe muri abo bana yishimikije amajambo ari mu gitabu c’Itanguriro 6:1-12 avuga uko ingeso z’abantu zononekaye kw’isi. Yavuze ko ingeso Imana yagaye arizo zatumye Imana ihanisha abantu umwuzure. Yasavye abaraho kuraba ko ingeso zabo Imana izishimira mu gihe itazishima bakosore kugira ijuru ribemere.

Rev. Violette Mucowintore arongoye Paruwasi yashimye ku bwira n’ubukerebutsi abigisha b’abana bakoranye inyigisho za VBS hamwe n’ibikorwa bariko barakora muri ico gisata.

Ibirori vyasozerewe no guha abana impapuro zerekana ko bize bongera barasozera inyigisho za VBS igikorwa cari gihagariwe n’abarongozi ba Paruwasi mu nyuma abana baca barasangira akavunamusase.

10/08/2026

Ikirangamisi c’yindwi!

Kaze dusangire umugisha!

10/08/2026

Isozera rya VBS-2026

Abana bo muri Paruwasi Kw’Iriba-Kamenge kuri uyu w’Imana igenekerezo rya 9 myandagaro 2026 bitabiriye ibirori vyo gusozera ku mu garagaro inyigisho za Bibiya mu buruhuko VBS ku rwego rwa Konferansi.

Ivyo birori vyitabiriwe n’abana bava mu maparuwasi 4 y’ububwiriza bwa Bujumbura vyabereye muri Paruwasi ya Rubirizi mu bwiriza bwa Bujumbura bitewe iteka na Emmanuel Sinzohagera umwepisikopi w’akarere ku Burundi n’urwanda arikumwe n’abash*tsi bavuye muri Philippine, Amerika,uganda ,abakozi b’Imana n’abandi.
Musenyeri Sinzohagera yashimiye abakoze kugira inyigisho zigende neza yongera ashimira n’abana bazitavye ku rugero rushimishije. Yasavye abavyeyi bafise umuhamagaro wo kwigisha abana baze kurerera ishengero.

Kubwa Désiré Nirera arongoye igisata c’abana ku rugero rwa Konferansi yashimiye vy’imvamutima Paruwasi Kw’Iriba-Kamenge biciye mu gisata c’abana kuba umwana Dory Ethan Iryivuze yabaye uwambere mw’ijambo ry’Imana mu gihugu yavuye muri iyo Paruwasi.
Yashimye kandi kuba De Lord Iriho, Eve Paola Nishimwe, Bethine Michaella Kezakimana hamwe na Jennifer Vyukusenge barashoboye gukurikirana ivyirwa vy’ivugabutumwa vyatanzwe n’ishirahamwe CYIA ubu bakaba basigaye bigisha abandi bana.

Muri ivyo birori nyene abana bo kw’Iriba baserutse mu bikorwa bitandukanye aho Jennifer Vyukusenge ariwe yararongoye urutonde rw’ibikorwa programme, Dory Ethan Iryivuze avuga urufatiro rw’ivyirwa bize mu ndwi ya VBS mu gihe abandi batari bake bafadikanije nabo mu Rubirizi mu ndirimbo zo gihimbaza no gutazira.

Ijambo ry’Imana ryashikirijwe na Akezwe Milka umwana wo mu rubirizi aho yagarutse ku civugo ca VBS kivuga “Gukurira mu buntu bw’Imana” aho yishimikije ibitabu vya 1 Yohana 3:1 na Abaroma 5:8.
Yabwiye abantu ko gukurira mu buntu bw’Imana ari gukurira mu buzima bwo gusenga mukuri ivyo ukora uri mu ngoro y’Imana akaba ari navyo ukora uri muhira.

Murayo masengesho kabaye akaryo ka Musenyeri ko gushikiraza ku mugaragaro Rév.Claude Ntakarutimana nk’umubwiriza wa Bujumbura.

Tubamenyeshe ko abana bo kw’Iriba bari baherekejwe n’abarongozi Rév. Simon Nsengiyumva, Rév. Diacre Marie Concessa Barubike, icegera c’umukuru w’abakenyezi ku rugero rwa Konferansi hamwe n’abavyeyi bari baherekeje abana.



. United Methodist News

📸: Église Méthodiste Unie-Conférence Annuelle du Burundi

08/08/2026

VBS-Umusi igira 5

Ndashobora gutanga imbabazi

Kuri uyu wa gatanu igenekerezo rya 7 myandagaro 2026 abana bize ku nkuru ijanye no gutanga imbabazi.

Iryo jambo iri muri Matayo 18:21-35 rivuga ku mwami yashatse gukora icirwa kugira amenye ko abamukorera bose bamwishura neza ideni. Umwami yarahebeye uwaramufitiye ideni rinini ariko uwo mukozi atashe ahura n’uwumufitiye ideni rito amufata mugahogo aramufungisha, umwami avyumvise arababara amutumako aca ayegeka ko nawe bamuta mu munyororo kuko vyase ko nawe aharira nkuko nawe yahariwe.

06/08/2026

VBS-Umusi igira 4

Ndashobora kuvuga ukuri

Mu cirwa co kuruno wa kane igenekerezo rya 6 myandagaro 2026, umusi ugira 4 abana bo muri Paruwasi Kw’Iriba-Kamenge bari mu nyigisho ry’ishure ya Bibiliya mu buruhuko bize uko umuntu ashobora kuba umunyakuri.

Bisunze ku butumwa buri muri Luka 19:1-10 buvuga ukuntu Zakayo yarameze atarahura na Yesu, amaze guhura nawe aca asubiza ibintu vyose abo yarenganije maze agakiza gataha mu nzu iwe, ahinduka umuntu w’umunyakuri kandi w’umunyabuntu, akoresha ubutunzi bwiwe mu gufasha abari mu bukene.
Abana bakuyemwo icirwa ko mu gihe cose umuntu yakiriye umwami Yesu akwiye guhindura ingeso ziwe mbi akaba umunyakuri.

Tubamenyeshe ko abana bagendewe n’abarongozi b’igisata c’abana mu bubwiriza bwa Bujumbura.

06/08/2026

05/08/2026

*VBS-Umusi ugira 3

Ku musi ugira gatatu w’ishure rya Bibiliya ku bana bari mu buruhuko abana muri Paruwasi Kw’Iriba bize kubijanye n’urukundo kuri bose.

Iryo jambo ryari rishingiye ku butumwa bwiza bwa Yohana 4 buvuga ku nkuru y’umusamariyakazi yaje kuvoma amazi kw’iriba ahasanga Yesu baraganira ndetse uwo mwami Yesu amusaba amazi maze uyo mugore aratangazwa no kubona umuyuda amusaba amazi mu gihe ubwo bwoko bwanenana.
Abana bize ko munyuma yuko Yesu abwiye uwo mugore ivyiwe vyose yahavuye yihana arizera.

Tubamenyeshe ko Rév. Diacre Rose Nibizi asanzwe ari mu barongozi b’igisata c’abana kuri Paruwasi yari yaje kuraba uko abana bariko barakurikirana inyigisho.