28/05/2023
Ni gute womenya ishengero ry’ukuri ?
________________________________________
Hariho ibibazo umuntu wese aba kw’isi kandi afise ubwenge bwiyumvira cane ategerezwa kwibaza rimwe na rimwe bigashobora kumuraza ishinga ndetse akanabura n’amahoro ariko ararondera inyishu yivyo bibazo.Kimwe mur’ivyo bibazo n’ukumenya idini n’ishengero ry’ukuri iryariryo.Hari umurwi w’abantu barajwe ishinga n’ukumenya ishengero ry’ukuri iryariryo uwumurwi ugizwe ahanini n’abantu vyitwa ko badasenga Imana abo twokwita abapani bababifuza kusenga ariko bakaba bagishakisha iryo shengero ry’ukuri.Uwundi murwi n’abibaza ico kibazo maze bagaca bagirako biha inyishu zimwe murizo ni nitwe shengero ry’ukuri canke ishengero ry’ukuri n’umutima w’umuntu canke amashengero yose n’ayukuri ahubwo Imana iraba ivyo ukora ntiyita kuvy’amashengero.
Uwu murwi ugizwe n’abitwa ko bemera Imana.
Ikibazo wokwibaza n’iki mbe ni ngombwa ko turonka inyishu kur’ico kibazo?Mbe amashengero yose n’ayukuri?Mbega Imana irafise ishengero ryayo rimwe kandi ry’ukuri?Tumenye ishengero ry’ukuri n’ikihe kintu twokora?
Ibi bibazo nivyo tuza kugerageza kwishura dukoresheje ivyanditswe vyeranda bibiliya kuko twizera yuko ariho Imana yatangiye inyishu z’ibibazo vyose abantu dufise vyerekeranye nayo.
Reka ubwa mbere na mbere tumanze dutahure ano majambo abiri akunda gukoreshwa kenshi rimwe mu kibanza c’irindi.
Ijambo “Idini” n’ijambo “Ishengero”
______________________________________
Ijambo “Idini” riratandukanye n’ijambo “Ishengero” reka turabe indangurakintu ryayo majambo uko ar’abiri.
Ijambo “Idini” rifise inkomoko mw’ijambo ry’icarabu اﻟدﻴن risomwa ad-din.Iri jambo risobanurwa umurwi w’abantu baba bahujwe n’ukugira ivyizerwa bimwe imigenzo imwe kandi bafise n’igitabo kimwe kirimwo ivyo bizera kandi kuntimatima y’imyizerere yabo baba bafise uwo bakurikira bakemera n’ivyo yavuzeMuzindi ndimi igifaransa canke icongereza bakoresha ijambo “Religion”.
Twobamenyesha yuko hariho amadini menshi kw’isi.
Hariho:
1. Abakristo
2. Abisiramu
3. Abahindu
4. Ababudiste
5. N’ayandi menshi tudashimye kuvuga.
Ijambo “Ishengero” n’ijambo ry’ikirundi rikwije amategeko kera kuri basokuru barikoresha bariko bavuga igugu ry’abantu benshi bakoraniye hamwe.Turamenyeye kumva amajambo nka “ibirori vyitabiriwe n’ishengero ryinshi” “afise ishengero ryinshi rimuri inyuma”.
Tugiye rero muvyiyobokamana iri jambo risigurwa mu buryo bubiri:
1. Inyubakwa abantu bahuriramwo bariko basenga Imana
2. Umurwi wa abantu bafise ivyo bizera bibatandukanya n’abandi.
Itandukaniro ririhagati y’idini n’ishengero nuko idini ari nk’ihuriro ry’amashengero menshi afise ico ahuriyeko.
Akarorero kugira dutahure:Hariho idini rya gikristo rigizwe n’amashengero menshi ariko ahuriye kukuba yizera Yesu kristo nk’Umwami n’Umukiza wabo.
Atagukekeranya rero twovuga yuko idini nyakuri ar’idini ry’ubukristo kubera yuko ariryo ryizera rikongera rigaca mu makanda ya Yesu kristo mugukora ibikorwa vy’ubugiraneza.
“Kandi nta wundi agakiza kabonerwamwo, kukw ata rindi zina musi y'ijuru ryahawe abantu dukwiye gukirizwamwo.”Ivyakozwe n'intumwa 4:12
“Yesu aramubgira, ati Ni jewe nzira n'ukuri n'ubugingo: nta wushika kuri Data ntamujanye.”
Yohana 14:6
“dutumbereye Yesu wenyene, ni we nyanduruko yo kwizera kandi ni we yagusozereye; uwo, kubg' umunezero yashizwe imbere, yihanganiye umusaraba, ntiyagira ikindi isoni zawo, avyagira i buryo bg'intebe y'Imana.”
Abaheburayo 12:2
“Idini itunganye itagira agasembga imbere y'Imana Data wa twese, n'ukuraba impfuvyi n'abapfakazi mu marushwa yabo, no kwirinda ngo ntiwanduzwe n'ivy' isi.”
Yakobo 1:27
Ivyo twovuga vyerekana kw’idini rya gikristo ariryo ry’ukuri ni vyinshi cane ariko kuko atarivyo twagendereye kwiga reka tugarukirize ngaha.
Muri rero rya dini rya gikristo nkuko twabibonye rigizwe n’amashengero menshi twovuga ayamenyekana cane:
1. Abakatorika(Eglise catholique romaine)
2. Abaglicane(Eglise Anglicane)
3. Abametodiste(Église Méthodiste unie ou libre)
4. Abapentecoste(Eglise pentecôte)
5. Ababatiste(Eglise baptiste)
6. IZEBU
7. Abadventiste(Eglise adventiste du 7è Jour)
8. FECABU
9. IVyabona vya YEHOVA
N’ayandi menshi.
Bivurwa yuko muburundi amashengero yemewe n’amategeko arenga 600.
Tugarutse kukibazo cacu mbega ayo mashengero arenga 600 mu burundi gusa dushizeko n’ayandi menshi cane yo kw’isi yose,mbega yose Yesu arayazi ?Yose n’ayukuri ?
Inyishu ni oya oya oya kuber’iki rero.
Dusoma mw’ijambo ry’Imana ko Imana ifise ifise ishengero ryoyo kw’isi.
Mu majambo ya Paul ariko arasezera ubwanyu abakuru b’ishengero bo muri aziya nto yavuze « Mwirinde ubganyu, muzigame n'ubusho bgose Mpwemu Yera yabashizemwo, ngo mube abo kubuzezwa, kugira ngo muragire ishengero ry'Imana, iryo yaguze amaraso yayo. »Ivyakozwe n'intumwa 20:28 bitwereka ko Imana ifise ishengero rimwe yaguze amaraso yiwe ahandi paul yongeye kuvuga yuko iryo shengero rimwe ryitegerezwa n’abamalayika bakaryigirako ubwenge. « kugira ngo noneh' abakuru n'abafise ububasha b'ahantu ho mw ijuru bamenyere kw ishengero ubgenge bg'Imana bg'uburyo bginshi, » Abanyefeso 3:10
Ego nivyo ishengero ry’Imana rigizwe n’abantu benshi bafise n’ingabiri zitandukanye ariko bose bagize umubiri umwe.
« Nk'uk' umubiri ar' umwe, ukagira ingingo nyinshi, kand' ingingo z'umubiri zose nah' ari nyinshi ar' umubiri umwe, ni ko na Kristo ari. Kuko muri Mpwemu umwe, twese ari ho twabatijwe ngo tube umubiri umwe, naho boba Abayuda cank' Abagiriki, naho boba abagurano cank' abidegemvya. Kandi twese twanyweshejwe Mpwemu umwe.
Ikirenge covuga, kiti Ko ntar' ikiganza sind' uwo ku mubiri; ivyo ntivyotuma kitaba ico ku mubiri. »
1 Ab'i Korinto 12:12-13, 15
Aba bantu bagize umubiri umwe birashoboka ko baba mu bibanza no muturere dutandukanye nico gituma rimwe na rimwe ubwo baba bariko baravuga umurwi w’abizera bo mu karere runaka baryita ishengero ry’Imana bagaca bongerako ikibanza caho yahantu.
« turabandikiye mwebge abo mw ishengero ry'Imana ry'i Korinto, bejejwe muri Kristo Yesu, bahamagariwe kuba abera, hamwe na bose bambariza ahantu hose izina ry'Umwami wacu Yesu Kristo, ni we Mwami wabo n'uwacu. »
1 Ab'i Korinto 1:2
« Kand' iki cete ni mwaheza kugisomerwa, muze mwitwaririke ko gisomerwa ishengero ry'i Lawodikiya; kandi namwe muze musome ikizova i Lawodikiya nyene. »
Ab'i Kolosayi 4:16
« Ishengero ry'i Babuloni ry'abatoranijwe nkamwe rirabatasha, bo na Mariko, umwana wanje. »
1 Petero 5:13
Ariko ayo mashengero nubwo abari mu bibanza bitandukanya yitwa Ishengero rimwe ry’Imana.Abakorera hamwe abafise ivyizerwa bimwe ikirushirije nuko abo mukarere kamwe barifadikanya n’abo mu kandi karere muvyiza no mu bibi.
« Nuko ku vyo gukoranya ibitabara abera, nk'uko nageze amashengero y'i Galatiya, abe ari ko namwe mukora. Ku wa mbere wose w'imisi ndwi, umuntu wese muri mwebge abike i we ibimuhaye uburyo, nk'ukw atunze, kugira ngw aho nzozira ntihabe ari ho amashikanwa azokoranirizwa. Kand' aho nzoshikira, abo muzoshima, nzobatuma mbahaye ivyete, kugira ngo bajane ivy' ubuntu bganyu i Yerusalemu.»
1 Ab'i Korinto 16:1-3
Iri shengero ry’Imana rero niryo Yesu ahamagarira yuko abantu bose bamwe mera bategerezwa kubamwo maze bagasiga amashengero yandi amwitirirwa.
Nk’uko rero duhejeje kubona ko hariho Ishengero rimwe gusa ryemerwa n’Imana biragaragara yuko ayandi mashengero atariryo abamashengero y’ivyitiriro.
Uwavugishwa n’Imana Yesaya niwe yigeze kwerekwa ivyayo mashengero y’ivyitiriro ayagereranije n’abigeme indwi. « Uwo musi » ivyugo yerekeza mu misi y’iherezo « abakobga ndwi bazofata umugabo umwe, bamubgire, bati Tuzokwirira ivyo kurya vyacu, tuzokwiyambika impuzu zacu: kimwe gusa, uduhe kukwitirirwa izina ryawe, nawe uduteturure. »Yesaya 4:1
Iyi mvugo y’ibigereranyo yakoreshejwe twoyitahura dukoresheje bibiliya ikayidusobanurira.Muri bibiliya rimwe na rimwe na cane cane muvyubuhanuzi umugore canke umukobwa agereranwa n’ishengero . « Mbafuhira ifuhe ryo kubg'Imana, kuko nabahaye umugabo umwe, ni we Kristo, ngo ndabamushingire mumeze nk'inkumi itunganye. »2 Ab'i Korinto 11:2 hano paul yagereranije ishengero n’inkumi hama Yesu amugereranya nk’umukwe.
Irindi somo « Kuko jewe Umuremyi wawe ari jewe mugabo wawe; Uhoraho Nyen' ingabo ni ryo zina ryanje; Uwera w'Abisirayeli ni jewe Mucunguzi wawe; nzokwitwa Imana y'isi yose. Kuko jewe Uhoraho nguhamagaye nk'umugore w'intabga afise intuntu mu mutima, ngucuye nk'umugore wo mu bucance yari yarirukanywe, ni jewe Imana yawe mbivuze. »
Yesaya 54:5-6
Kubwivyo ababakobwa indwi bavurwa bagereranya amashengero yo mugihe c’iherezo akakajombo indwi gasigura igiharuro gish*tse canke cuzuye bisigurango n’amashengero yose hano ariko aravurwa havuyemwo ishengero rimwe gusa twabonye ryitwa ishengero ry’Imana.Ibifungurwa bazokwigaburira bigereranya n’ijambo kuko muri bibiliya ijambo ry’Imana rigereranwa n’ingaburo . « Amajambo yawe yarabonetse, ndayarya; kand' amajambo yawe yambereye akanyamuneza n'ibihimbaro vy'umutima wanje: kuko nitiriwe izina ryawe, Uhoraho Mana Nyen' ingabo. »Yeremiya 15:16
Imyamboro nayo igereranwa n’ubugororotsi mubusobanuro bwa bibiliya « Nzonezererwa cane Uhoraho, umutima wanje uvugirize impundu Imana yanje; kuko yanyambitse imyambaro y'agakiza, akansesa hejuru umutamana w'ubugororotsi, nk'uk' umukwe ashazisha igitsibo, kandi nk'uk' umugeni ashazisha utugenegene twiwe. »Yesaya 61:10
Kubwivyo tubona yuko mu misi y’iherezo amashengero azobari menshi mu kuba menshi kwayo azogeragezwa kurondera kwitirirwa Yesu we mugabo umwe ariko agasaba Yesu ko atarota yemera inyigisho n’ijambo ryiwe ahubwo ko ivyo bazokwigisha bazomenya iyo babikura kandi azongera bamusabe ko batanakeneye n’ubugororotsi bwiwe ico bakeneye gusa n’ukwitwa abakristo gusa nico gituma idini rya gikristo niryo rifise amashengero canke imirwi myinshi irigize.
Igitandukanya ayo mashengero n’Ishengero ry’Imana nuko ishengero ry’Imana ryoryo bibiliya utubwira ko ryishimikirije ku kuri « ariko ni naba ngitevye n'ukugira ng' uz' umenye uko bikwiye kugenzwa mu ngoro y'Imana, ni yo shengero ry'Imana nzima, vyongeye ni yo nkingi ishigikiye ukuri.»1 Timoteyo 3:15
Ishengero ry’Imana rero niryo risigaye ryonye kenena kandi ryishigikiza ukuri mugihe ayandi mashengero yoyo yataye ukuri.
Ikibazo n’ubu kigisigaye n’iki iryo Shengero nirihe ?
Bibiliya itubwira yuko ishengero rizosigara ryubamye kukuri azoba ar’ishengero rifise ibibintu bikurikira :
1. Ivyagezwe n’Imana(vyose kwari cumi)
2. Kwizera Yesu
3. Ibishingira Yesu intahe(Mpwemu w’ubuvugishwa)
« Ico gisato kigirira wa mugore inzigo, kirigira ngo kirwanye abo mu ruvyaro rwiwe basigaye, bitondera ivyagezwe n'Imana kandi bafise ibishingira Yesu intahe. »Ivyahishuriwe Yohana 12:17
« Aho ni ho ukwihangana kw'abera guserukira, bitondera ivyagezwe n'Imana n'ukwizera Yesu. »Ivyahishuriwe Yohana 14:12
Kubwivyo rero ishengero uzobona bemera ivyagezwe cumi vyose harimwo n’ici sabato ico amashengero menshi yirengagiza maze bakongera bakizera Yesu bagatako bakagira mpwemu w’ubuhanuzi,iryo azoba ar’ishengero ry’ukuri.
Ico Yesu arindiriye ino musi n’abantu biwe batataniye hirya y’ishengero ryiwe kubera ukutamenye ariko arabahamagara bamaze kumenya ukuri kugirango basige amashengero yose yataye ukwera akirengagiza ivyagezwe vyiwe ko yokwifatanya n’ishengero ryiwe.Yesu yavuze ati: «Kandi mfise n'izindi ntama zitar' izo mur' uru rugo, na zo nyene birankwiye kuzija imbere, zizokwumva ijwi ryanje, hazoba umukuku umwe(ishengero) n'umwungere umwe.
» Yohana 10:16
